23 ноября.

Канон Святым апостолам Ерасту, Олимпу, Родиону, Сосипатру, Куарту и Тертию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н святы́х. Глас 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святии апостоли, моли́те Бо́га о нас.

Боже́ственнии су́ще ученицы́ вопло́щшагося за милосе́рдие Бо́га на́шего, Того́ моли́те грехо́в дарова́ти проще́ние соверша́ющим ва́шу па́мять, блаже́ннии.

Припев: Святии апостоли, моли́те Бо́га о нас.

Зерца́ла Бо́жия светови́дная вмести́тельна Того́ подая́ний яви́стеся, блаже́ннии, все́м ве́рным благода́тельно даю́ще спаси́тельныя зари́, богови́дцы апо́столи.

Сла́ва Отцу́ и Сы́ну и Свято́му Ду́ху:

Возсия́ша все́м просвеще́ние, озаре́ний исто́чник поче́рпше, Ера́ст, и Те́ртий, и Оли́мп, и Родио́н, и Сосипа́тр ку́пно с Куа́ртом, я́же благоче́стно ублажи́м.

И ны́не и при́сно и во ве́ки веко́в. Ами́нь.

Богородичен: Ро́д челове́ческий Твои́м Рождество́м, Де́во, обнови́ла еси́, Сло́во бо родила́ еси́ Отчее, в пло́ть ме́ртвенную оде́явшееся и безсме́ртия пути́ на́м показа́вшее.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святии апостоли, моли́те Бо́га о нас.

Сло́во, я́ко свети́льник мы́сленный, принося́ще, апо́столи, богопоко́рно всю́ тва́рь проидо́сте, тоя́ мра́к разгоня́юще и сы́ны явля́юще све́та благода́тию, но́щи неве́дения рабо́тающия.

Припев: Святии апостоли, моли́те Бо́га о нас.

Глаго́л ва́ших проро́чески во всю́ изы́де вселе́нную веща́ние спаси́тельное и де́л све́тлое показа́ние всю́ зе́млю обтече́, ду́ши просвеща́ющее, богоглаго́ливии Госпо́дни апо́столи.

Сла́ва Отцу́ и Сы́ну и Свято́му Ду́ху:

Все́лься в душа́х ва́ших, му́дрии, Ду́х Всесвяты́й богови́дны весьма́ соде́ла; всю́ду ми́р обходя́ще, хра́мы разори́сте и́дольския благода́тию и Бо́гу це́ркви воздвиго́сте.

И ны́не и при́сно и во ве́ки веко́в. Ами́нь.

Богородичен: Сы́на Отча единоро́днаго, безма́терня пе́рвее и из Тебе́ рожде́нна, уве́девше безо́тча, Бо́жию Ма́терь испове́даем Тя́, безстра́стно ро́ждшую и Де́ву пребы́вшу па́че сло́ва, Мари́е Богоневе́сто.

Конда́к, гла́с 4.

Яви́ся дне́сь апо́стол честно́е торжество́, подаю́щее я́ве все́м прегреше́ний оставле́ние, соверша́ющим и́х па́мять.

Та́же седа́лен, гла́с 1.

Ера́ста и Оли́мпа, Сосипа́тра и Те́ртия, Родио́на ку́пно и Куа́рта па́мять согла́сно почти́м, к ни́м воспева́юще: боже́ственнии пропове́дателие и слуги́ Сло́ва, ду́ши на́ша ве́чнующия му́ки моли́твами ва́шими изба́вите.

Сла́ва, и ны́не, Богородичен:

Безневе́стная, Чи́стая Богоро́дице Де́во, еди́на ве́рных Предста́тельнице и Покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми.

КрестоБогородичен:

Нескве́рная Агница Агнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святии апостоли, моли́те Бо́га о нас.

Утвержде́ния дре́вле неутвержде́ным бы́вше, раскопа́сте ва́шими богода́нными уче́нии вра́жия тверды́ни всера́зныя и запусте́нию преда́сте, богови́днии Спа́совы апо́столи.

Припев: Святии апостоли, моли́те Бо́га о нас.

Вельми́ Христо́ва вели́чия пропове́дающе, ума́лении всеконе́чно, великопропове́дницы, земны́я вельми́ просвети́сте све́тло, вели́чием благода́ти соверши́вше, боже́ственнии апо́столи.

Сла́ва Отцу́ и Сы́ну и Свято́му Ду́ху:

Да похва́лится боже́ственный Оли́мп песнопе́ньми, и Родио́н с ни́м да возвели́чится благоче́стно, тече́ние соверши́вше муче́ния с Петро́м богопропове́дником в Ри́ме, глава́ми отсека́еми.

И ны́не и при́сно и во ве́ки веко́в. Ами́нь.

Богородичен: Чуде́с бо́льше все́х, Всенепоро́чная, в Тебе́ новосоде́явшееся чу́до показа́ся я́вственно: Бо́га бо родила́ еси́ теле́сне, земны́м за милосе́рдие соедини́вшася в несли́тнем соедине́нии, Богоневе́сто.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святии апостоли, моли́те Бо́га о нас.

Му́дрость Отча, все́ осуществова́вшая, учи́тели в ми́р ва́с посла́, в му́дрости Ду́ха и и́стины явле́нием вся́ умудря́ющия, сла́внии.

Припев: Святии апостоли, моли́те Бо́га о нас.

Сло́ва вмета́юще, всему́дрии, у́дицу, возвлеко́сте из глубины́ неве́дения благода́тию ры́б, су́щия безгла́сншия, и Го́споду ве́ровавшия приведо́сте.

Сла́ва Отцу́ и Сы́ну и Свято́му Ду́ху:

Восхва́лим Оли́мпа, и вели́каго Родио́на, и Те́ртия, и Сосипа́тра, ку́пно и Ера́ста, и боже́ственнаго Куа́рта, христопропове́дники и все́х благочести́вых защи́тники.

И ны́не и при́сно и во ве́ки веко́в. Ами́нь.

Богородичен: Зачала́ еси́ сло́вом Сло́во, Всенепоро́чная, и родила́ еси́ па́че ума́ и сло́ва, Богоневе́стная, бы́вша, Богоро́дице, Челове́ка. Те́м Тя́ словесы́ богодухнове́нными всегда́ ублажа́ем.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святии апостоли, моли́те Бо́га о нас.

Пречестни́и, я́ко ка́мение, валя́ющеся на земли́, привали́сте к благоче́стию, и́же нра́вом лука́вым ка́мению нечу́вственному служа́щия, богови́днии Сло́ва таи́нницы блаже́ннейший.

Припев: Святии апостоли, моли́те Бо́га о нас.

Еди́ницу в Тре́х Ли́цех неразлу́чну, несли́тну пропове́дающе, многобо́жную от земли́ разори́сте ле́сть, неле́стнии Христо́вы апо́столи, и лю́те прельще́нныя к све́ту богозна́ния наста́висте.

Сла́ва Отцу́ и Сы́ну и Свято́му Ду́ху:

Ра́зумы кра́сными несмы́сльство нему́дрых, прему́дрии апо́столи, разори́сте, и утверди́сте Бо́гу, Всецарю́ еди́ному, ве́ровати, тва́рь всю́ Боже́ственными светоли́тии украша́ющему.

И ны́не и при́сно и во ве́ки веко́в. Ами́нь.

Богородичен: Яко ино́е не́бо, пе́рваго, Влады́чице, я́вльшися вы́шшее, Тя́ сла́вим, Со́лнце на́м Пра́вды возсия́вшее и глубо́кую неве́дения тму́ отгна́вшее.

Конда́к, гла́с 2.

Боже́ственным све́том у́м озари́вше, вити́йская плете́ния му́дре разори́сте, и язы́ки вся́ улови́вше, апо́столи сла́внии, Влады́це приведо́сте, Тро́ицу Боже́ственную сла́вити науча́юще.

Икос:

Яко ученицы́ все́х Влады́ки, мре́жею, богови́дцы, ва́ших моли́тв из глубины́ прегреше́ний извлецы́те смире́нную ду́шу мою́, сетьми́ уловле́нную де́монских ко́зней, да до́бре преше́д про́чее вре́мя живота́ моего́, пою́ ва́с любо́вию и просла́влю житие́ ва́ше непоро́чное, е́же на земли́ соверши́сте, лю́те омраче́нныя просвети́вше, Тро́ицу Боже́ственную сла́вити науча́юще.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии апостоли, моли́те Бо́га о нас.

Тя́, свяще́нна иконо́ма, Ера́сте, Це́ркве Христо́вы су́щия во Иерусали́ме, пиша́ пропове́даше Па́вел апо́стол, с ни́мже тя́ почита́ем, пою́ще Христу́: хва́льный отце́в на́ших Бо́же, благослове́н еси́.

Припев: Святии апостоли, моли́те Бо́га о нас.

Терпе́нием искуше́ний, и скорбе́й, и гоне́ний искуси́вся и я́звами Христо́выми удобря́емь, Ера́сте пребога́те, велегла́сно взыва́л еси́: хва́льный отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Зако́на но́ваго яви́лся еси́, Куа́рте, возвести́тель, ве́тхаго беззако́ния отводя́ чуждему́дренныя и к возновле́нию жи́зни преводя́ зову́щия: хва́льный отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Отчее Сло́во Соприсносу́щное, я́вльшееся земны́м, воплоти́ла еси́ и те́лом, Отрокови́це, породила́ еси́ Челове́ка бы́вша, да спасе́т челове́ка, хва́льный отце́в Бо́г и препросла́влен.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии апостоли, моли́те Бо́га о нас.

Нерасте́рзни столпи́ Христо́вы я́вльшеся Це́ркве, разори́сте злоче́стия сте́ны вся́, ве́рныя же, я́ко ка́мение, назда́вше на ка́мени ве́ры, вопию́щия: вся́ дела́ Го́спода по́йте и превозноси́те Его́ во ве́ки.

Припев: Святии апостоли, моли́те Бо́га о нас.

Законополо́жницы яви́стеся вы́, Ду́ха зако́н напису́юще в сердца́х ве́рных, всеблаже́ннии, и́мже просвеща́еми, вопия́ху: вся́ дела́ Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Украси́вся, блаже́нный Оли́мпе, в о́ньже де́нь Пе́тр вели́кий коне́ц прия́т, я́ве сконча́вся ку́пно с Родио́ном мече́м, повеле́нием Не́рона, беззако́ннаго царя́, и совокупи́стеся небе́сным лико́м.

И ны́не и при́сно и во ве́ки веко́в. Ами́нь.

Богородичен: Ста́мна дре́вле, иму́щая ма́нну, Чи́стая, образова́ше Тя́, Христа́ бо, сла́дость на́шу, носи́ла еси́ во чре́ве и пло́тию родила́ еси́, избавля́ющаго вся́кия го́рести безме́стных прегреше́ний превознося́щия Того́ во ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святии апостоли, моли́те Бо́га о нас.

Ра́вно тече́ние соверши́вше, ра́вно от Влады́ки Сло́ва обога́щшеся, ра́вных Ду́ха даро́в сподо́бистеся и по́честей ра́вных получи́сте, апо́столи Госпо́дни, просвети́телие серде́ц на́ших.

Припев: Святии апостоли, моли́те Бо́га о нас.

Якоже небе́сныя зве́зды, Богозна́меньми всю́ зе́млю просвети́сте, тму́ глубо́кую неве́дения отгна́вше и сы́ны дне́ показа́вше, дре́вле порабоще́нныя козньми́ вражде́бника.

Припев: Святии апостоли, моли́те Бо́га о нас.

По́лк злоу́мных погуби́сте, во глубину́ дре́вле ври́нувших язы́ки люде́й, мно́жество же Бо́гу приведо́сте спаса́емых, чино́м совокупля́еми невеще́ственных си́л, всеизбра́ннии Христо́вы апо́столи.

Сла́ва Отцу́ и Сы́ну и Свято́му Ду́ху:

Вше́дше к преми́рным, Оли́мп вели́кий и Сосипа́тр, Те́ртий ку́пно и Родио́н, и Куа́рт, и Ера́ст свяще́ннейший и ны́не о ми́ре Изба́вителя мо́лят.

И ны́не и при́сно и во ве́ки веко́в. Ами́нь.

Богородичен: Пощади́ лю́ди Твоя́, Го́споди, нахожде́ния ва́рварскаго на́с избавля́я, и грехо́в, и напа́стей, и му́ки ве́чныя моли́твами Ро́ждшия Тя́ Де́вы Пречи́стыя и сла́вных апо́стол Твои́х.

Свети́лен.

Све́тлая прия́телища Ду́ха Свята́го, пресве́тлыя зари́ невече́рняго дне́, светода́тельная мо́лния, апо́столы, в пе́снех ве́рно просла́вим вси́.

Богородичен: Тя́ Засту́пницу вси́ и́мамы, гре́шнии, о Пресвята́я Де́во! Ты́ благоуве́тлива на́м соде́лай Сы́на Твоего́ ма́терними Твои́ми мольба́ми.

Молитва

Святы́е сла́вные и всехва́льные апо́столи Христо́вы Ерасте, Олимпе, Родионе, Сосипатре, Куарте и Тертие, мо́лим вас с ве́рою и любо́вию: умоли́те Христа́ Го́спода претвори́ти ду́ши на́ша из грехолюби́вых в боголюби́выя; сохрани́те и соблюди́те нас моли́твами авшими от искуше́ний диа́вольских и паде́ний грехо́вных, и испроси́те нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же вы ны́не водворя́етеся и весели́теся. Ей, апо́столи Спа́совы! Не посрами́те нас, кре́пце на вы упова́ющих, но бу́дите нам помо́щники и покрови́тели во всем житии́ на́шем и помози́те нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.