22 ноября

Канон святым мученикам Онисифору и Порфирию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Канон, глас 4.

Песнь 1.

Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Припев: Святии мученицы, моли́те Бо́га о нас.

Нося́щи ве́рою благохва́лящим по́льзу Боже́ственную,/ честна́я наста́ па́мять твоя́,/ в не́йже тя мо́лим, блаже́нне:/ всех нас помяни́.

Припев: Святии мученицы, моли́те Бо́га о нас.

Име́я дерзнове́ния испо́лнено твое́ до́блественное помышле́ние,/ безслове́снаго повеле́ния небре́гл еси́, Богодухнове́нне,/ и, ра́дуяся, блаже́нне, страда́л еси́.

Сла́ва Отцу́ и Сы́ну и Свято́му Ду́ху:

Си́лою возмога́емь Небе́сною, Ониси́форе,/ к лю́тым устреми́лся еси́ му́кам/ и всю победи́л еси́ кре́пость ра́тующаго.

И ны́не и при́сно и во ве́ки веко́в. Ами́нь.

Богородичен: Уста́вила еси́ сме́рти мучи́тельство,/ безсмертную Жизнь, Созда́теля, ро́ждши, Христа́, Изба́вителя на́шего,/ Де́во Неискусобра́чная.

Песнь 3

Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Припев: Святии мученицы, моли́те Бо́га о нас.

Ра́вно Отцу́ и Ду́ху, Сло́во на три́знищи испове́дающе, му́ченицы,/ треволне́ния мук му́жески отрази́ша.

Припев: Святии мученицы, моли́те Бо́га о нас.

Поста́вив тве́рдо но́ги твоя́, му́чениче, на ка́мени испове́дания и ве́ры,/ ве́тры, Ониси́форе, ран не поколеба́лся еси́.

Сла́ва Отцу́ и Сы́ну и Свято́му Ду́ху:

Всем умо́м, блаже́нне му́чениче, изступи́в ко Христу́ жела́емому,/ не чу́вствовал еси́ и́же от ран боле́зней, всеблаже́нне.

И ны́не и при́сно и во ве́ки веко́в. Ами́нь.

Богородичен: При́зри, Пречи́стая, спасти́ мя,/ и́бо Боже́ственным ма́нием все стро́ящаго воплоти́ла еси́ Бо́га Сло́ва/ па́че сло́ва и помышле́ния.

Седа́лен му́чеников, глас 1.

Огне́м Боже́ственнаго распала́еми жела́ния,/ огня́ чу́вственнаго прикоснове́нием отню́д не опали́стеся, блаже́ннии,/ пре́лесть же пожго́сте/ и, влеко́ми неми́лостивно, страстоте́рпцы,/ приснопа́мятный прия́сте коне́ц и сла́ву получи́сте.

Песнь 4.

Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Припев: Святии мученицы, моли́те Бо́га о нас.

Облиста́ющее светозаре́ние боле́зней твои́х, Ониси́форе му́чениче,/ привлече́ любо́вию, блаже́нне, спострада́ти тебе́ блаже́ннаго Порфи́рия.

Припев: Святии мученицы, моли́те Бо́га о нас.

Возложи́вше на сковраду́ разжже́нную,/ протяза́ют мучи́тели ку́пно Христо́вы во́ины,/ ра́дующияся и горя́щия ду́хом.

Припев: Святии мученицы, моли́те Бо́га о нас.

Заколе́ние я́ко соверше́нно, страстоте́рпцы,/ и чи́стыя же́ртвы Влады́це всех, ра́дующеся, приведо́стеся,/ тем блажи́ми есте́.

Сла́ва Отцу́ и Сы́ну и Свято́му Ду́ху:

Разу́мно тя, возложе́ннаго Влады́це,/ льсти́выя бесе́ды прельсти́ти отню́д не возмого́ша, Порфи́рие Богому́дре,/ всему́дре и всебога́те.

И ны́не и при́сно и во ве́ки веко́в. Ами́нь.

Богородичен: Воплоща́ема родила́ еси́ Бо́га Сло́ва,/ уподо́битися, Отрокови́це, за милосе́рдие ми́лости всем благоволи́вша,/ Всенепоро́чная Влады́чице.

Пе́снь 5

Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Припев: Святии мученицы, моли́те Бо́га о нас.

Столпи́ Христо́вы Це́ркве непоколеби́мии/ колеба́ньми мук непревра́тни кре́постию ду́ха яви́стеся.

Припев: Святии мученицы, моли́те Бо́га о нас.

Куми́ры бого́в скве́рных истни́сте/ и яви́стеся благоче́стия и му́жества о́бразы, честни́и великому́ченицы.

Сла́ва Отцу́ и Сы́ну и Свято́му Ду́ху:

Во́инством и́стинным от Бо́га препоя́састеся,/ привре́менное могу́тство оста́вивше ве́рою,/ ра́дующеся, пострада́сте.

И ны́не и при́сно и во ве́ки веко́в. Ами́нь.

Богородичен: Всели́ся в Тя, вмести́вся, Невме́стный/ и показа́ Тя, Небе́с ши́ршую, Де́во:/ тем Тя ублажа́ем.

Песнь 6.

Ирмос: Приидо́х во глубины́ морски́я,/ и потопи́ла мя е́сть бу́ря мно́гих грехо́в,/ но я́ко Бог из глубины́ возведи́ живо́т мой,/ Многоми́лостиве.

Припев: Святии мученицы, моли́те Бо́га о нас.

Боле́зни ран претерпе́л еси́, Ониси́форе му́чениче,/ тече́ние соверши́в свиде́тельства и победи́тель быв,/ прия́л еси́ по́чести небе́сныя.

Припев: Святии мученицы, моли́те Бо́га о нас.

Друг дру́гу содержа́щеся,/ ве́рою привяза́еми ку́пно и влеко́ми,/ разреше́ние телесе́, я́ко кре́пцыи страда́льцы, прия́сте,/ Го́споду совокупля́еми.

Сла́ва Отцу́ и Сы́ну и Свято́му Ду́ху:

К ко́нем привя́зани и ну́ждно влеко́ми/ нра́вом судя́щаго люте́йшим, благосла́внии му́ченицы Госпо́дни,/ Боже́ственнаго конца́ сподо́бистеся.

И ны́не и при́сно и во ве́ки веко́в. Ами́нь.

Богородичен: Зако́нов кроме́ есте́ственных, Де́во, Законода́вца ражда́еши,/ обновля́ющаго сокруше́ное естество́ на́ше,/ Его́же моли́ спасти́ мя, грехи́ сокруше́наго.

Конда́к, глас 2.

Му́ченик дво́ица, пострада́вше кре́пко,/ вра́жию горды́ню на зе́млю низложи́сте,/ озари́вшеся благода́тию несозда́нныя Тро́ицы,/ сла́внии Ониси́форе и Порфи́рие,/ моли́теся непреста́нно о всех нас.

И́кос:

Возмого́ша, Боже́ственною кре́постию утве́рждшеся, Христо́вы во́ини/ низложи́ти вра́жия сове́ты и ухищре́ния,/ к свире́пым ко́нем ку́пно привя́зани/ и стра́ждуще зако́нно,/ нам про́сят от Бога долго́в проще́ния,/ и разреше́ния гряду́щих искуше́ний,/ и лю́тых избавле́ния./ Тем ты́я хва́лим при́сно,/ я́ко при́сныя к Богу уго́дники,/ моля́щияся непреста́нно о всех нас.

Песнь 7.

Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Припев: Святии мученицы, моли́те Бо́га о нас.

Благоро́днейшия твоея́ души́ благоро́дныя твоя́ нра́вы явля́я,/ испове́дал еси́ пред мучи́тели, Ониси́форе му́чениче, Бо́га воплоще́нна.

Припев: Святии мученицы, моли́те Бо́га о нас.

Ве́чную Боже́ственную свобо́ду любя́,/ твоему́ Вла́дыце, я́ко благопослушли́в раб, спострада́л еси́/ и с Ним лику́еши, Порфи́рие всеблаже́нне.

Припев: Святии мученицы, моли́те Бо́га о нас.

Боже́ственными кровьми́ ва́шими/ разжже́нный пла́мень безбо́жия угаси́вше, вопие́те, всехва́льнии:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Да блаже́нныя и безсме́ртныя сла́вы сподо́битеся,/ блаже́нную пострада́сте смерть,/ Богосве́тлыя зве́зды мы́сленнаго Со́лнца.

И ны́не и при́сно и во ве́ки веко́в. Ами́нь.

Богородичен: Воплоще́нно Сло́во от Твои́х крове́й ражда́еши,/ земны́я обожи́ти благоволи́вшаго, Де́во, воспева́ющия:/ оте́ц на́ших Бо́же, благослове́н еси́.

Песнь 8.

Ирмос: На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.

Припев: Святии мученицы, моли́те Бо́га о нас.

Удеса́ терза́нием преда́вше,/ растерза́сте врага́ несмы́сленное се́рдце,/ пребы́вше непоколе́блени умо́м, великоимени́тии венцено́сцы.

Припев: Святии мученицы, моли́те Бо́га о нас.

Кровьми́ ва́шими огнь угасе́ неве́дения, страда́льцы,/ ве́рных же напои́сте всех и сердца́, и ду́ши возраще́нием Богозна́ния.

Припев: Святии мученицы, моли́те Бо́га о нас.

Во́лны лю́тых муче́ний окормле́нием Христо́вым преидо́сте/ и к приста́нищу Боже́ственнаго Ца́рствия Небе́снаго приста́сте в нетле́ние.

Сла́ва Отцу́ и Сы́ну и Свято́му Ду́ху:

У́глие, огне́м Паракли́та распаля́еми, я́ве, му́ченицы, я́вльшеся,/ пожго́ша лесть вра́жию и просвети́ша вселе́нную.

И ны́не и при́сно и во ве́ки веко́в. Ами́нь.

Богородичен: Цвет избра́нный во удо́лиих, Отрокови́це, жития́ обре́т,/ возжеле́ Твоея́ добро́ты Сло́во Бо́жие/ и, воплоти́вся, облагово́нстви вселе́нную.

Песнь 9.

Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Припев: Святии мученицы, моли́те Бо́га о нас.

Возмого́ша, си́лою Христо́вою вжиля́еми,/ безпло́тныя с те́лом побори́ти, до́блии адама́нти, столпи́ ве́ры,/ и ны́не на Небесе́х весели́тся от ве́ка с пострада́вшими.

Припев: Святии мученицы, моли́те Бо́га о нас.

Я́ко колесни́ца Словесе́ свяще́нная бы́вше,/ к безслове́сным привя́зани бы́сте, Боже́ственнии му́ченицы,/ и к приста́нищу Небе́сному достиго́сте, ра́дующеся, и побе́ды по́чести прия́сте./ Тем досто́йно блажи́ми есте́.

Припев: Святии мученицы, моли́те Бо́га о нас.

Телеса́ ва́ша Пангеа́нов сла́вный ны́не и́мать град, му́ченицы Боже́ственнии,/ обога́щся засту́пники ва́ми и врачи́, цели́щими теле́с и душ неду́ги/ приходи́щих ве́рою всегда́.

Сла́ва Отцу́ и Сы́ну и Свято́му Ду́ху:

Боже́ственная дво́ица и светоза́рная,/ Порфи́рие, страстоте́рпче присносла́вный, и Ониси́форе доблему́дрый,/ Тро́ице Пресвяте́й моли́теся мир и лю́тых избавле́ние пода́ти душа́м на́шим.

И ны́не и при́сно и во ве́ки веко́в. Ами́нь.

Богородичен: Оде́явся во всего́ мя во́лею, Влады́ка/ от Твои́х происхо́дит, Всенепоро́чная, Боже́ственных чресл, я́ко жени́х,/ и млеко́м пита́ется, И́же всю тварь пита́яй ма́нием, Благослове́нная Присноде́во.

Свети́лен.

Му́ченики почти́м, страда́нии возсия́вших/ и озари́вших мир му́ченическими светлостьми́,/ Ониси́фора сла́внаго и с ним Порфи́рия,/ и́бо си́и мо́лятся о нас,/ любо́вию соверша́ющих па́мять их.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.