22 ноября

Канон святителю Нектарию, митрополиту Пентапольскому, Эгинскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Таже тропарь, глас 4:

Преподо́бнически пожи́в, я́ко му́дрый иера́рх,/ просла́вил еси́ Го́спода/ доброде́тельным житие́м, Некта́рие преподо́бне./ Те́мже, Уте́шителя просла́влен си́лою,/ Боже́ственными мощми́ твои́ми,/ де́моны отго́ниши и боля́щия исцеля́еши,/ ве́рою приходя́щия ти.

Канон, глас 8.

Песнь 1.

Ирмос: Во́ду проше́д Человеколю́бче я́ко су́шу, и еги́петскаго зла избежа́в, Изра́ильтянин вопия́ше: Изба́вителю и Бо́гу на́шему пои́м

Припев: Святителю отче Нектарие, моли́ Бо́га о нас.

Любовию движимь, молю Содетеля Господа слово ми подати по достоянию воспети великаго в чудотворцех Нектария богомудраго.

Припев: Святителю отче Нектарие, моли́ Бо́га о нас.

Юдоль земнаго жития безпорочно прошел еси, отче досточудне, и с лики небесными водворился еси, отонюдуже посещаеши нас дивными чудесы.

Сла́ва Отцу́ и Сы́ну и Свято́му Ду́ху:

Бурею носимь житейских треволнений, во Эгинстем острове пристанище обрел еси и дом Живоначальней Троице преукрашенный воздвигл еси.

И ны́не и при́сно и во ве́ки веко́в. Ами́нь.

Богородичен: Всечистая Богоотроковице, Мати Спасителя нашего Господа, умилосердися над воспеватели Твоими и ослабу страстей нам подаждь.

Песнь 3

Ирмос: Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в лю́бви Твое́й, жела́ний кра́ю, ве́рных утвержде́ние, Еди́не Челове́колюбче

Припев: Святителю отче Нектарие, моли́ Бо́га о нас.

Изнемогающих нас от стрел вражиих свободи заступлением твоим всемощным, скорый наш предстателю, Нектарие.

Припев: Святителю отче Нектарие, моли́ Бо́га о нас.

Просветився светом дел благих, богодухновенне, столп веры пламенеющий явился еси, Нектарие, уверяя малодушных сердца.

Сла́ва Отцу́ и Сы́ну и Свято́му Ду́ху:

Разум Небесный стяжал еси, отче Нектарие, на земли пребывая, с Горними умом сожительствовал еси, воспевая сладце Триипостасному Владыце твоему.

И ны́не и при́сно и во ве́ки веко́в. Ами́нь.

Богородичен: Имя Твое призывающих, помилуй, Богоневесто Владычице, и подаждь исцеление и от злых избавление.

Моли Бога о нас, / святителю отче Нектарие, / яко мы усердно к тебе прибегаем, / скорому помощнику и молитвеннику о душах наших.

Седален, глас 2:

Моление теплое и стенание сердечное / приносим ти, отче досточудне Нектарие, / и любовь твою поминающе, прилежно вопием: / предвари и от бед избави нас, / скорый наш предстателю и славный чудотворче.

Слава, И ныне, Богородичен, глас тойже:

Моление теплое, и стена необоримая, / милости источниче, мирови прибежище, / прилежно вопием Ти: / Богородице Владычице, предвари, / и от бед избави нас, / Едина вскоре предстательствующая.

Песнь 4.

Ирмос: Услы́шах, Го́споди, смотре́ния Твоего́ та́инство: разуме́х дела́ Твоя́ и просла́вих Твое́ Божество́.

Припев: Святителю отче Нектарие, моли́ Бо́га о нас.

Исцелений источник неоскудевающий явился еси, Нектарие блаженне, присно напаяяй нас милостию Божией и погашаяяй пламень душегубных страстей.

Припев: Святителю отче Нектарие, моли́ Бо́га о нас.

Молитвенник теплейший и отец чадолюбивый явился еси, отче преподобне, покрывающий всех любовию твоею и до ныне нас милующий.

Сла́ва Отцу́ и Сы́ну и Свято́му Ду́ху:

Избави притекающих к тебе и твоему образу благочестно покланяющихся от всякаго прилога диавольскаго и наследие в Царстве Живоначальныя Троицы получити сподоби.

И ны́не и при́сно и во ве́ки веко́в. Ами́нь.

Богородичен: Пречистая, Святая Дево, Богородице, всяк вред душ и телес и всякую злую напасть изгони от нас молитвами Твоими.

Пе́снь 5

Ирмос: Просвети́ нас повеле́нии Твои́ми, Го́споди, и мы́шцею Твое́ю высо́кою Твой мир пода́ждь нам, Человеколю́бче

Припев: Святителю отче Нектарие, моли́ Бо́га о нас.

Радость велию и сокровище многочудное Господь нам дарова, святыя мощи твоя, отче Нектарие блаженне, ихже любовию лобызающе, тя приснаго за нас ходатая прославляем.

Припев: Святителю отче Нектарие, моли́ Бо́га о нас.

Иноков и мирских наставник богопросвещенный явился еси, Нектарие чудне, и нас, тепле призывающих тя, настави на стезю заповедей и повелений Господних.

Сла́ва Отцу́ и Сы́ну и Свято́му Ду́ху:

Назираеши с Превыспренних за обителию и стадом, еже собрал еси, блаженне отче, и николиже любовь твоя преста от нас. Сие добре ведуще, радуемся и прославляем дивнаго во святых Своих Господа.

И ны́не и при́сно и во ве́ки веко́в. Ами́нь.

Богородичен: Отчаго Сына Единароднаго Мати Всечистая, немощствующих нас и разслабленных воздвигни от тли греховныя к пению Сына и Бога Твоего.

Песнь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зол душа́ моя́ испо́лнися, и живо́т мой а́ду прибли́жися, и молю́ся я́ко Ио́на: от тли, Бо́же, возведи́ мя

Припев: Святителю отче Нектарие, моли́ Бо́га о нас.

Широкий путь погибельный возненавидев, отвратил еси плещи своя от мира, славу и честь земную презрев, Небесныя сладости наследник явился еси.

Припев: Святителю отче Нектарие, моли́ Бо́га о нас.

Еже паче ко спасению потребная возлюбил еси, отче прехвальне, осени благодатию твоею души наша, святе, очеса разума и сердца к свету Христовых дел приведи твоими молитвами.

Сла́ва Отцу́ и Сы́ну и Свято́му Ду́ху:

Нетленное сокровище тя ведахом и море чудес, всеблаженне, яко из тебе изливается благодать, недуги исцеляющая и страсти угашающая.

И ны́не и при́сно и во ве́ки веко́в. Ами́нь.

Богородичен: Исцели наша недуги душевная и телесная, Богородительнице Чистая, да поживем по заповедем Сына Твоего, славословие Ему всегда приносяще и хвалу делы своими.

Кондак, глас 2:

Теплый заступник и Предстатель сильный буди, Нектарие, / всем верою притекающим к тебе / и божественныя твоя мощи любочестно лобызающим, / яже Христос Бог прослави / чудес источающимися дарованьми, / и миром души наша обогати. / Егоже прилежно моли / подати нам свыше прегрешений оставление  и велию милость.

Стихира, глас 6:

Звезда новая показался еси Христовой Церкви / в последняя лета, преподобне, / жития чистотою просияв, / умными сияньми яже в тебе дарований велиих / озаряя души наша / и исцелений преславными чудесы / избавляя присно демонскаго всегубительства / и страстей смертнаго помрачения: / не остави убо нас, Нектарие чудодетельне, / благоплодными твоими молитвами.

Песнь 7.

Ирмос: От Иуде́и доше́дше о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святителю отче Нектарие, моли́ Бо́га о нас.

Елеем благих дел украшенный светильник пресветлый сущим во тьме явился еси, отче всеблаженне, и целитель недугов миро вречевания источающий.

Припев: Святителю отче Нектарие, моли́ Бо́га о нас.

От славы твоея Небесныя призри на нас, любовию тя похваляющих, отче всесвященне, и потщися избавити нас от напастей и скорбей.

Сла́ва Отцу́ и Сы́ну и Свято́му Ду́ху:

Тело твое многотрудное источник исцелений соделал Господь, труды и подвиги твоя прослави и имя твое превознесе, сего ради любовию тя ублажаем.

И ны́не и при́сно и во ве́ки веко́в. Ами́нь.

Богородичен: Чистая Дево, от всякия скверны нас огради, ум, долу поникший, к зрению Горния доброты возведи, да, радуяся, поем Тя и славословим Сына Твоего, Спаса нашего.

Песнь 8.

Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки

Припев: Святителю отче Нектарие, моли́ Бо́га о нас.

Единонравна пустыннолюбителем древним безмолвия рачителя тя Христос показа и единомудреннаго отцем Церкви столпа веры и благочестия блюстителя яви.

Припев: Святителю отче Нектарие, моли́ Бо́га о нас.

Исходатайствуй молитвами твоими, отче священне Нектарие, исправление навыков наших греховных, покаяние всецелое и радость о Христе Господе нашем.

Сла́ва Отцу́ и Сы́ну и Свято́му Ду́ху:

Ликовствующе в памяти твоей, отче Нектарие богоблаженне, прославляем Спасителя нашего Господа, обновившаго и освятившаго естество наше, и Ему славословие приносим.

И ны́не и при́сно и во ве́ки веко́в. Ами́нь.

Богородичен: Иже вседержавною силою носяй всяческая, в неможение плотское от Тебе облечеся, Дево Всенепорочная, во благодеяние человеков, яко Человеколюбец.

Песнь 9.

Ирмос: Воистину Богородицу Тя исповедуем, / спасеннии Тобою, Дево Чистая, / с безплотными лики Тя величающе.

Припев: Святителю отче Нектарие, моли́ Бо́га о нас.

Изгнания, поношения, лишения многоразличныя и козни бесовския мужественне претерпел еси, отче добропобедне, выну хвалу возсылая Промыслителю Богу.

Припев: Святителю отче Нектарие, моли́ Бо́га о нас.

Наветов всяческих, болезней и душегибельнаго отчаяния нас свободи, Нектарие преподобне, и благодать Христову с Небесе низпосли, да непрестанно тя, заступника нашего, хвалим.

Сла́ва Отцу́ и Сы́ну и Свято́му Ду́ху:

Отвергся мира и самаго себе, крест взял еси и за Христом последовал еси, и славу от Него получил еси, еяже и нас причастники быти сподоби, любовию почитающих тя, отче Нектарие чудне.

И ны́не и при́сно и во ве́ки веко́в. Ами́нь.

Богородичен: О, Преблагословенная Дево Богородице! Спасение подаждь нам душевное и телесное, Пренепорочная, и болящим даждь цельбу и лютых избавление.

Таже стихиры, глас 8.

Во святителех чуднаго / в песнех почтим Нектария блаженнаго, / предстоящаго во светлостех Небесных / Престолу Пресвятыя Троицы/ и за ны выну молящагося.

От многих грехов моих немощствует тело, / немощствует и страстьми обуреваемая душа моя. / К тебе прибегаю, святителю богоблаженне, / возстави мя погибающаго и помилуй мя.

Молитвенника изряднаго и чудотворца славнаго / вемы тя, отче Нектарие богомудре, / образ твой лобызаем и мощем твоим кланяемся, / не лиши нас предстательства твоего и помощи.

Вселенная вся проповедует подвиги твоя, / Церковь Христова красуется славным именем твоим, / люди Божии, просвещаеми светом чудес твоих, Нектарие блаженне, / славословят Державу Святыя Троицы.

Вся Ангелов воинства, Предтече Господень, / апостолов двоенадесятице, / святии вси с Нектарием богомудрым и Богородицею / сотворите молитву, / во еже спастися нам.

МОЛИТВА

О, богомудрый и всесвятый отче Нектарие, чудотворче великий и преславный. К тебе ныне прибегаем, верою и любовию чтущии тя, похвалы сия приносяще от всего сердца и помышления. Ты, угодниче Божий, явился еси ныне, яко звезда утренняя, озаряющая мира сего помраченныя концы светом благодати Христовой, юже стяжал еси неложно смиренным житием твоим и кроткими нравы, нетленных и премирных обетований сподобльшеся. Сего ради мы, недостойнии раби твои, молим тя прилежно: отче святый Нектарие, не забуди нас, к тебе усердно притекающих. Свет сый ныне, просвети наша души, помраченныя страстьми, озари наш ум и обнови помышления, во еже поучатися нам божественным и священным образам и нектому о суетных пещися. Утверди нас, преподобне отче, в вере, надежде и любви ко Господу Богу нашему. Исцели болезни душевныя и телесныя, буди нам покров и прибежище в скорбех и напастех, вразумление и исправление во гресех, благодать независтную подающе всегда, яко да прославим Единаго Истиннаго Бога, дивнаго во святых Своих, Отца и Сына и Святаго Духа, ныне и присно и во веки веков. Аминь.