22 ноября

Канон преподобной Матроне Константинопольской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 8

Мужескому́дрено утаи́вшися вра́жиих лука́вых путе́й, Матро́но,/ к жи́зни вои́стину ше́ствовавши несумне́нною во́лею/ и неукло́нное тече́ние Богому́дро сконча́вши,/ от Христа́ прия́ла еси́ благода́ть духо́вную,/ тем и во́ду цельба́м источа́еши/ любо́вию притека́ющим в па́мять твою́ сла́вную,/ мни́хом похвала́,/ моли́ Христа́ Бо́га спасти́ся душа́м на́шим.

Канон, глас 8.

Песнь 1.

Ирмос: Пои́м Го́сподеви, вси лю́дие,/ в мо́ре Чермне́м фарао́на погрузи́вшему,/ побе́дную песнь пою́ще, я́ко просла́вися.

Припев: Преподобная мати Матроно, моли́ Бо́га о нас.

С чи́ны Небе́сными всегда́ су́щи/ и прича́стием Боже́ственным обожа́ема,/ чту́щия тя спаса́й моли́твами твои́ми.

Припев: Преподобная мати Матроно, моли́ Бо́га о нас.

Вся, Боже́ственным жела́нием распала́емая,/ разжже́ния сласте́й душетле́нных воздержа́ния ту́чами угаси́ла еси́.

Сла́ва Отцу́ и Сы́ну и Свято́му Ду́ху:

Че́стен Влады́ки сосу́д яви́лася еси́,/ очи́стивши се́рдце, Матро́но, страсте́й плотски́х поще́нием.

И ны́не и при́сно и во ве́ки веко́в. Ами́нь.

Богородичен: Обра́дованная,/ из Тебе́ роди́тися Благоволи́вшаго па́че естества́ моли́/ умири́ти и спасти́ вся́ческая.

Песнь 3

Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т тя дух мой.

Припев: Преподобная мати Матроно, моли́ Бо́га о нас.

Жезло́м Боже́ственныя ве́ры страсте́й пресе́кла еси́ мо́ре,/ Боже́ственне душа́м предпутетворя́щи пра́вое прехожде́ние.

Припев: Преподобная мати Матроно, моли́ Бо́га о нас.

Яви́лася еси́ удобре́ние еди́нствующих я́ве, всечестная́,/ и мона́хов житие́ стяжа́вши чи́стое и непоро́чное.

Сла́ва Отцу́ и Сы́ну и Свято́му Ду́ху:

Ме́ртвости совлекла́ся еси́ тлетво́рных страсте́й, сла́вная,/ и врага́ житие́м благоче́стным обнажи́ла еси́.

И ны́не и при́сно и во ве́ки веко́в. Ами́нь.

Богородичен: Соедини́ся во утро́бе Твое́й Созда́тель пло́ти, Пречи́стая,/ пребы́в е́же бе,/ я́ко да е́же бла́го бы́ти челове́ком да́рует.

Седа́лен, глас 8.

Предъизбра́нная от Бо́га ма́ти,/ к приста́нищу жи́зни наставля́ема,/ без волне́ния жития́ бу́рю претекла́ еси́,/ со А́нгелы песносло́вящи Изба́вителя/ и моля́щися непреста́нно о нас,/ я́ко да благода́ть и ми́лость Христо́с да́рует нам,/ сохраня́ющи па́ству, ю́же боле́знию соста́вила еси́.

Песнь 4.

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Преподобная мати Матроно, моли́ Бо́га о нас.

Ка́плями слез твои́х напои́вши се́рдце твое́,/ и возде́лала еси́ доброде́телей стори́чествующий, о Матро́но, клас/ Боже́ственною благода́тию.

Припев: Преподобная мати Матроно, моли́ Бо́га о нас.

Ко Христу́ возве́ргши помышле́ния степе́ни,/ пребы́сть напа́стьми непревра́тна лука́вых де́монов, достосла́вная.

Сла́ва Отцу́ и Сы́ну и Свято́му Ду́ху:

До́блественною му́дростию сопру́га оста́вивши и жития́ мяте́ж,/ и́го Христо́во возлюби́ла еси́/ и Того́ в след после́довала еси́.

И ны́не и при́сно и во ве́ки веко́в. Ами́нь.

Богородичен: Не оста́вив небе́сных, Пречи́стая, Бог/ истощава́ется во утро́бе Твое́й и ме́рится Безме́рный,/ безме́рная ми́ра разреши́в прегреше́ния.

Пе́снь 5

Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе, ино́го не ве́мы.

Припев: Преподобная мати Матроно, моли́ Бо́га о нас.

Оде́явшися во о́браз святы́й, о Матро́но!/ Врага́ злотво́рнаго в студ оде́яла еси́.

Припев: Преподобная мати Матроно, моли́ Бо́га о нас.

Теку́щими измени́ла еси́ бу́дущая/ и сопру́жником Жениха́ безсме́ртнаго,/ Невестоводи́теля душ на́ших.

Сла́ва Отцу́ и Сы́ну и Свято́му Ду́ху:

Всено́щную принося́щи хвалу́ Влады́це, Матро́но,/ успи́ла еси́ сла́сти теле́сныя.

И ны́не и при́сно и во ве́ки веко́в. Ами́нь.

Богородичен: Ме́ртвых и живы́х Влады́ку родила́ еси́,/ стра́сти, Всенепоро́чная, се́рдца моего́ умертви́.

Песнь 6.

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на,/ от тли́, Бо́же, возведи́ мя.

Припев: Преподобная мати Матроно, моли́ Бо́га о нас.

Я́ко пти́ца добропе́снива, в лу́зе по́стничества сла́дко возглаша́ющи,/ я́ко у́мныя привлекла́ еси вра́бии свяще́ннейших жен собор,/ мреж вра́жиих избе́гши, Матро́но, ду́хом.

Припев: Преподобная мати Матроно, моли́ Бо́га о нас.

Плоть у́бо любому́дрием держа́щи и обуздова́ющи стра́сти, преподо́бная,/ души́ же красне́йшую добро́ту све́тло Христу́ благоукраша́ющи,/ красна́ же и благоле́пна, Матро́но, ду́хом позна́лася еси́.

Сла́ва Отцу́ и Сы́ну и Свято́му Ду́ху:

А́нгельское жи́тельство на земли́ возлюби́ла еси́,/ пою́щи непреста́нно нас ра́ди от Святы́я Де́вы за мно́жество бла́гости Воплоти́вшася/ и естество́ же́нское на врага́ лука́ваго Укрепи́вша.

И ны́не и при́сно и во ве́ки веко́в. Ами́нь.

Богородичен: Порабо́тися грехо́м естество́ челове́ческое,/ но сие́ изба́вила еси́, Богоро́дице, лука́выя рабо́ты,/ вся́ческих Влады́ку ро́ждши, показа́вшаго нам жи́зии вхо́ды, Всенепоро́чная.

Конда́к, глас 2.

За любо́вь Госпо́дню, преподо́бная Матро́но,/ поко́я жела́ние возненави́дела еси́,/ поще́нием дух твой просвети́вши,/ но твои́ми моли́твами и проти́вных шата́ния разори́,/ кре́пко бо зве́ри победи́ла еси́.

И́кос:

Струю́ мне сло́ва даждь, Бо́же мой,/ и исто́чник благочи́ния сотвори́ мой ум,/ и благослови́ язы́к мой, да воспою́ Твою́ а́гницу,/ ю́же венча́л еси́ Ты бла́гостию Твое́ю./ А́ще бо Сам не да́си мне сло́во досто́йное,/ ка́ко принесу́ дар ни́щий бога́тней в словесе́х и дея́ниих?/ Тем пода́ждь мне си́лу испове́дати ея́ натрижне́ния,/ кре́пко бо зве́ри победи́ла есть.

Песнь 7.

Ирмос: О́троцы евре́и́стии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Припев: Преподобная мати Матроно, моли́ Бо́га о нас.

Я́ко го́рлица красне́йша, соблюла́ еси́ Бо́гу целому́дрия благоча́дие,/ страсте́й непло́дством, блаже́нная,/ я́ко и́стинно обогати́вши тобо́ю спаса́емыя.

Сла́ва Отцу́ и Сы́ну и Свято́му Ду́ху:

Мир, честна́я, и я́же в ми́ре оста́вивши в Бо́жией наде́жди,/ преми́рное ны́не насле́довала еси́ насле́дие,/ еди́нствующих су́щая и́стинно, Матро́но, красота́.

И ны́не и при́сно и во ве́ки веко́в. Ами́нь.

Богородичен: азреша́я Е́вину кля́тву, в Пренепоро́чную всели́ся Деви́цу,/ благослове́ния исто́чник источа́я вопию́щим:/ благослове́н, Пречи́стая, Плод Твоего́ чре́ва.

Песнь 8.

Ирмос: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те вся дела́ Госпо́дня Го́спода.

Припев: Преподобная мати Матроно, моли́ Бо́га о нас.

Благоче́стия нра́вы ду́шу украси́вши, Матро́но,/ Ду́хом Боже́ственным Бо́гу привела́ еси́, чи́стая, лик дев, пою́щий:/ благослови́те вся дела́ Го́спода и превозноси́те Его́ во ве́ки.

Припев: Преподобная мати Матроно, моли́ Бо́га о нас.

Твои́х по́тов ту́чи Боже́ственною благода́тию/ страсте́й ту́чи, Матро́но, му́тныя изсуша́ют,/ сердца́ же ве́рно приходя́щих всегда́ напая́ют./ Тем тя почита́ем во вся ве́ки.

Сла́ва Отцу́ и Сы́ну и Свято́му Ду́ху:

Тебе́ саму́ю ору́жии ве́ры вооружи́вши воздержа́ния,/ не уязви́лася еси́ стрело́ю сла́сти, пребыва́ющи посреде́ муже́й./ И дре́вле Е́ву уязви́вшаго уязви́ла еси́ копие́м целому́дрия, Матро́но блаже́нная.

И ны́не и при́сно и во ве́ки веко́в. Ами́нь.

Богородичен: Се Де́ва, я́ко глаго́лет Ду́хом Иса́ия,/ име́ во чре́ве Изба́вльшаго ны от а́дова чре́ва, благоче́стно вопию́щия:/ благослови́те вся дела́ Го́спода и превозноси́те Его́ во ве́ки.

Песнь 9.

Ирмос: Устраши́ся всяк слух/ неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти,/ от Деви́ческаго чре́ва быв челове́к/ Те́мже Пречи́стую Богоро́дицу, ве́рнии, велича́ем.

Припев: Преподобная мати Матроно, моли́ Бо́га о нас.

Я́ко Боже́ственная ты голуби́ца,/ доброде́телей позлаще́нными кри́лы, Матро́но сла́вная,/ выспрь возлете́ла еси́/ и ны́не воспочива́еши, иде́же преподо́бных ли́цы, и пра́ведных чи́ни,/ и ве́чное весе́лие, и ра́дость неизглаго́ланная.

Припев: Преподобная мати Матроно, моли́ Бо́га о нас.

Лю́бящи от Жены́ за утро́бы щедро́т Возсия́вшаго, незаходи́маго Со́лнца,/ разжже́нную и неудо́бь прохо́дную удо́бно про́йде, чи́стая, стезю́ по́стную,/ де́моны попаля́ющи и стра́сти плотски́я изсуша́ющи.

Сла́ва Отцу́ и Сы́ну и Свято́му Ду́ху:

Боже́ственная па́мять твоя́ нам светле́йши со́лнца возсия́,/ просвеща́ющи на́ша сердца́ и помышле́ния,/ в ню́же помина́й нас, ве́рою творя́щих ю, Матро́но сла́вная,/ дерзнове́ние к Бо́гу и́стинно иму́щи.

И ны́не и при́сно и во ве́ки веко́в. Ами́нь.

Богородичен: Нося́щи, Отрокови́це, рука́ми вся́ческая ма́нием Нося́щаго,/ руки́ мя изба́ви чужда́го хода́тайством Твои́м,/ и све́том Твои́м мое́ помышле́ние просвети́,/ и отчужди́ страсте́й, неосла́бно борю́щих мя.

Свети́лен.

Посреде́ муже́й всели́лася еси́, Матро́но, присносла́вная,/ прие́мши о́браз, о, стра́нно чу́до! преподо́бная,/ ка́ко утаи́лася еси́ мучи́теля, тве́рдо при́сно огорча́ющася,/ поще́нием, и моли́твами, и бде́нии непреста́нными сего́ главу́ сокруши́ла еси́.

Молитва

О свята́я, мати Матро́но. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.