22 ноября

Канон преподобной Феоктисте Паросской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, ма́ти, изве́стно спасе́ся е́же по о́бразу:/ прии́мши бо крест, после́довала еси́ Христу́,/ и де́ющи учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бная Феоктисто, дух твой.

Канон, глас 6.

Песнь 1.

Ирмос: Я́ко по су́ху, пешеше́ствовав, Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь/ пои́м, вопия́ше.

Припев: Святая мученице Феоктисто, моли́ Бо́га о нас.

Я́ко чу́дна твоя́ жизнь и житие́,/ А́нгелом каса́ющися невеще́ственным но́вым и необы́чным нра́вом,/ тесното́ю па́че естества́, Феокти́сто, жи́тельства твоего́.

Припев: Святая мученице Феоктисто, моли́ Бо́га о нас.

От младе́нства мирску́ю пи́щу отню́д возненави́дела еси́ и плотску́ю сласть,/ пост возлюби́вши,/ и́мже обузда́ла еси́ стремле́ния вся теле́сная.

Сла́ва Отцу́ и Сы́ну и Свято́му Ду́ху:

Благу́ю зе́млю души́ твоея́ во мла́дости незло́бия обре́те Се́ятель благи́х/ и вложи́ се́мя жизни,/ собра́ плод стори́чествующий.

И ны́не и при́сно и во ве́ки веко́в. Ами́нь.

Богородичен: Тя, Пречи́стую Отрокови́цу и ве́рным кре́пкое Заступле́ние,/ Феокти́ста, от души́ изде́тска возлюби́вши,/ всем доброде́телем па́че естества́ прия́телище бысть.

Песнь 3

Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Припев: Святая мученице Феоктисто, моли́ Бо́га о нас.

Не утаи́ся лука́ваго, Богоуго́дне живу́щи,/ сего́ ра́ди содева́ет на плещи́ твои́ зла́я/ и мно́жество Ара́влян наво́дит Ле́зве, оте́честву́ твоему́.

Припев: Святая мученице Феоктисто, моли́ Бо́га о нас.

Плене́ну тя враги́ пра́ведных враг преда́ти тщи́тся,/ но близ Изба́витель,/ И́же а́бие от ме́рзких исхи́тив, чи́сту Себе́ соблюде́.

Сла́ва Отцу́ и Сы́ну и Свято́му Ду́ху:

В Па́ре о́строве, враго́в избе́гши руки́,/ изво́лила еси́ мона́шествовати, я́ко пти́ца, в нем,/ и в та́мо су́щем хра́ме Присноде́вы Богома́тере/ я́ко служе́бница пребыва́ющи всегда́.

И ны́не и при́сно и во ве́ки веко́в. Ами́нь.

Богородичен: Всю наде́жду на Тя Феокти́ста возложи́вши, Ма́ти Де́во Отрокови́це,/ и Тя, покро́в, и пи́щу, и питие́,/ и кре́пкое заступле́ние, в лю́тых стяжа́.

Песнь 4.

Ирмос: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи / от смы́сла чи́ста, о Го́споде пра́зднующи.

Припев: Святая мученице Феоктисто, моли́ Бо́га о нас.

Тай отше́дши во вну́тренняя и веще́ственная о́строва,/ ви́димых враго́в избе́гла еси́,/ неви́димых же зе́льна приложи́ся тебе́ рать.

Припев: Святая мученице Феоктисто, моли́ Бо́га о нас.

Кто возмо́жет твоя́, преподо́бная, отню́д изрещи́ по́двиги,/ я́же име́ла еси́, к нача́льником тьмы стра́ждущи?/ и́хже и стре́лы пла́менны, и словеса́ неудобопости́жна.

Сла́ва Отцу́ и Сы́ну и Свято́му Ду́ху:

О, и́же храня́щия тя Боже́ственныя благода́ти!/ Ка́ко и еди́на, и млада́, разу́мных ефио́плян ополче́ние/ в же́нстем естестве́ победи́вши, посрами́ла еси́.

И ны́не и при́сно и во ве́ки веко́в. Ами́нь.

Богородичен: Соверше́нным ра́зумом в ю́ности телесе́, Феокти́ста, пожи́вши,/ к Твое́й Ма́тери, Бо́же, утверди́ все упова́ние свое́/ и приспе́ в ста́рость до́брую.

Пе́снь 5

Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Припев: Святая мученице Феоктисто, моли́ Бо́га о нас.

Ум возвы́сивши к Бо́гу,/ вся прешла́ еси́ жела́емая паде́ний и ну́жная телесе́./ Тем ни глад тя, ни жа́жда, сла́вная,/ ни мраз, ни нагота́, ни зной победи́.

Припев: Святая мученице Феоктисто, моли́ Бо́га о нас.

Стра́нное твое́ житие́ враг ви́дя, яря́ся за́вистию,/ смуща́я тя и искуша́я ко́зньми вся́кими,/ но не возмо́же запя́ти, непоро́чная, стопы́ твоя́.

Сла́ва Отцу́ и Сы́ну и Свято́му Ду́ху:

Стре́лы младе́нец лука́ваго вся́ко приложе́ний вмени́вши,/ невозвра́тно соверши́ла еси́ но́вое поще́ния твоего́ обхожде́ние/ и посрами́ла еси́ сего́ тще́е шата́ние.

И ны́не и при́сно и во ве́ки веко́в. Ами́нь.

Богородичен: Я́ко блаже́нная в жена́х, Тя, преблаже́нная Богоро́дице,/ разу́мное заступле́ние себе́ положи́,/ о Тебе́ сотво́рши си́лу, оскорбля́ющия же изничто́жи.

Песнь 6.

Ирмос: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Припев: Святая мученице Феоктисто, моли́ Бо́га о нас.

Уста́вы есте́ственныя превзы́де, кроме́ потре́бных жи́вши./ Тем я́ко прикаса́ющися, во пло́ти безвеще́ственна пребыва́ше,/ и́мже хотя́ше су́щих неви́димых.

Припев: Святая мученице Феоктисто, моли́ Бо́га о нас.

Проуве́дела еси́ Ду́хом Святы́м твою́ кончи́ну прибли́жившуся./ Тем и ви́дена была́ еси́ ловце́м, Бо́гу благоволи́вшу,/ я́ко да не утаи́тся твое́ житие́ страннообра́зное.

Сла́ва Отцу́ и Сы́ну и Свято́му Ду́ху:

Я́ко ви́де тя, преподо́бная, в це́ркви лове́ц,/ зрак зе́млен иму́щу, кроме́ пло́ти и кро́ве,/ уди́влься, мечта́ние зре́ти мня́ше,/ в толи́ко иста́явшу, о, чудесе́!

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице,/ не отри́ни мене́, лю́тыя нечистоты́ по́лна су́ща,/ но ми́лостива бу́ди мне и уве́тлива,/ приими́ принося́щаго Твоея́ Феокти́сты в моли́твы моле́ние.

Седа́лен, глас 1.

Измла́да Бо́гу, Феокти́сто, вдана́ бы́вши,/ я́ко зда́ние благо́е и созда́вшему подо́бно,/ усе́рдно и́го Его́ благо́е от ю́ности взе́мши,/ не вкуси́ла еси́ мяте́жа жите́йскаго, храня́щи вся чу́вства./ Тем, я́ко безпло́тна, стра́нно на земли́ жи́тельствоваше.

Сла́ва и ны́не, Богоро́дичен:

Безневе́стная Чи́стая Богоро́дице Де́во,/ еди́на ве́рных Предста́тельнице и Покро́ве,/ бед, и скорбе́й, и лю́тых обстоя́ний вся изба́ви/ на Тя наде́жду, Отрокови́це, иму́щия/ и ду́ши на́ша спаси́ Боже́ственными моли́твами Твои́ми.

Песнь 7.

Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Припев: Святая мученице Феоктисто, моли́ Бо́га о нас.

Ско́ро разреши́ла еси́ устраши́вшемуся виде́ния твоего́ боя́знь,/ объяви́вши приклю́чшаяся тебе́ по Боже́ственному Про́мыслу, чи́стая,/ о ни́хже и пред ним дала́ еси́ сла́ву Бо́гу благода́рственно.

Припев: Святая мученице Феоктисто, моли́ Бо́га о нас.

3а ше́сть лет и три́десять пости́вшися,/ спаси́тельнаго Те́ла и Кро́ве причасти́тися не иму́щи,/ про́сиши приклю́чшемуся ти/ от него́ Часть еди́ну благогове́йно принести́ к тебе́.

Сла́ва Отцу́ и Сы́ну и Свято́му Ду́ху:

Прии́де, нося́ Жела́емое, и вложи́ всегове́йно в ру́ку твою́,/ е́же и прие́мши, и, веселя́щися, глаго́лала еси́ к Бо́гу:/ ны́не отпуща́еши мя Твою́, Влады́ко, рабу́ ми́лостивно по глаго́лу Твоему́.

И ны́не и при́сно и во ве́ки веко́в. Ами́нь.

Богородичен: Благоуго́дно Тебе́ пожи́вшую, Всепе́тая, прия́ла еси́ служе́бницу Твою́/ и сподо́била еси́ неизрече́нных Боже́ственных благ;/ тоя́ моли́твами и нас прича́стники сотвори́, Чи́стая, нетле́нныя пищи.

Песнь 8.

Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Припев: Святая мученице Феоктисто, моли́ Бо́га о нас.

Стра́шных Та́ин причасти́вшися ве́рно,/ я́коже жела́ла еси́, ма́ти преподо́бная,/ оста́вила еси́ персть у́бо пе́рсти,/ честны́й же дух твой А́нгели че́стно принесо́ша Го́споду.

Припев: Святая мученице Феоктисто, моли́ Бо́га о нас.

Приступи́в к тебе́ и па́ки лове́ц ве́рный,/ благослове́ния я́ко получи́ти от Тебе́ шед,/ обре́те ме́ртву лежа́щу тя зако́ном есте́ственным и дивля́шеся,/ что подо́бно ему́ соде́яти.

Сла́ва Отцу́ и Сы́ну и Свято́му Ду́ху:

Помышле́нием я́ко мня́ше, и́же не навы́к до́браго,/ Богоуго́дно взем твою́ де́рзостно ру́ку честну́ю,/ обеща́ся прия́ти на честь святы́я твоея́ па́мяти, блаже́нная,/ и жития́ соблюде́ние име́ти.

И ны́не и при́сно и во ве́ки веко́в. Ами́нь.

Богородичен: Доброде́тели святы́х почита́ю, Влады́чице,/ доброде́тели же де́лания отню́д не стяжа́х,/ но, я́ко ми́лостива, уще́дри моя́ чу́вствия/ и изба́ви мя всезло́бнаго обы́чая.

Песнь 9.

Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Припев: Святая мученице Феоктисто, моли́ Бо́га о нас.

Ру́ку укра́дену взе́мшаго/ с корабле́м, и бре́менем, и плову́щими удержа́ла еси́/ пребыва́ти во о́строве Па́ре, до́ндеже уразуме́в, он,/ нося́ сию́, положи́ с мольбо́ю к про́чему честно́му твоему́ телеси́.

Припев: Святая мученице Феоктисто, моли́ Бо́га о нас.

Отпуще́ннии и удержа́ннии, су́щия в тебе́ си́лы во иску́се бы́вши,/ ку́пно вси притеко́ша к моще́м твои́м/ до́бре поклони́тися и объя́ти, ничто́же обрето́ша:/ неви́дима бо бы́вше о́бразом, и́мже весть Бог.

Сла́ва Отцу́ и Сы́ну и Свято́му Ду́ху:

Вели́ких боле́зней измене́ние бо́льшим от Христа́, преподо́бная, прие́мши/ и иму́щи дерзнове́ние вели́ко моли́тися Ему́,/ помяни́ почита́ющия Боже́ственную па́мять твою́/ и испроси́ нам грехо́в очище́ние и жития́ исправле́ние.

И ны́не и при́сно и во ве́ки веко́в. Ами́нь.

Богородичен: Вся хотя́ спасти́, Госпо́дь,/ Тя Себе́ Ма́терь избра́в, положи́ ве́рным вину́ вся́каго бла́га./ Сего́ беззако́нием огорчи́вши,/ Тобо́ю упова́ем обрести́ ми́лость, Ми́лостивая Влады́чице.

Молитва

О свята́я, Феоктисто. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.