Шрифт

20 ноября.

Канон преподобному Лазарю Галисийскому

Преподобному Лазарю, в Галисийстей горе постившагося
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Бде́нными моли́твами, тече́ньми сле́зными сто́лп омочи́л еси́, и из глубины́ воздыха́ньми во сто́ трудо́в уплодоноси́л еси́, и бы́л еси́ па́стырь, все́м подая́ проще́ние, преподо́бне о́тче на́ш Ла́заре, моли́ся Христу́ Бо́гу спасти́ся душа́м на́шим.

Кано́н преподо́бнаго. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Лазаре, моли́ Бо́га о нас.

Гряди́те, ве́рнии, Ду́хом Боже́ственным веселя́щеся ве́рно, восхва́лим боже́ственнаго Ла́заря, к нему́ вопию́ще: блаже́нне, твои́ми моли́твами бе́д изба́ви ны́.

Припев: Преподобне отче Лазаре, моли́ Бо́га о нас.

К твоему́ па́ки оте́честву приити́ тя Бо́г сотвори́ и не хотя́ща: те́м приходя́ща мя́ при́сно к страсте́м спаси́ моли́твами твои́ми.

Сла́ва Отцу́ и Сы́ну и Свято́му Ду́ху:

Светоза́рная богода́нная любо́вь, в тебе́ возсия́вши бога́тно, свою́ ду́шу за бли́жняго тя́ усе́рдно, богоно́се, положи́ти сотвори́.

И ны́не и при́сно и во ве́ки веко́в. Ами́нь.

Богородичен: Спаси́ ны, Богороди́тельнице Всенепоро́чная, вся́каго гне́ва и скорбе́й, покланя́ющияся Твоему́ свято́му о́бразу и ве́рою Богоро́дицу испове́дающия Тя́.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Преподобне отче Лазаре, моли́ Бо́га о нас.

Кре́постию Боже́ственною, му́дре, укрепля́емь, изба́вился еси́ звере́й свире́пых. Те́м моли́ся Христу́ от звере́й мы́сленных изба́вити пою́щия тя́.

Припев: Преподобне отче Лазаре, моли́ Бо́га о нас.

Укрепля́емь Христо́вою си́лою, преподо́бне, жа́жду, и тя́жесть пусты́нную, и ску́дость поне́сл еси́ до́блественно наде́ждею неизрече́нныя сла́дости.

Сла́ва Отцу́ и Сы́ну и Свято́му Ду́ху:

Избе́гл еси́ вражде́бных напа́стей, всеблаже́нне, Ага́риных вну́ков, Боже́ственною благода́тию покрыва́емь и мно́гим на по́льзу спаса́емь.

И ны́не и при́сно и во ве́ки веко́в. Ами́нь.

Богородичен: Влады́ку вся́ческих, Чи́стая, родила́ еси́, Де́во, па́че сло́ва неизрече́нно, Его́же моли́, Всепе́тая, пою́щия Тя́ влады́чествия измени́ти страсте́й.

Седа́лен, гла́с 3.

Боже́ственный у́м твое́ се́рдце имы́й, преподо́бне, земна́я измени́ Боже́ственными и стоя́щими, и сликовству́еши Ангелом, Све́та невеще́ственнаго наслажда́яся, непреста́нно веселя́ся. Те́м, преподо́бне Христа́ Бо́га моли́ дарова́ти на́м ве́лию ми́лость.

Слава И ны́не, Богородичен:

Боже́ственная ски́ния была́ еси́ Сло́ва, еди́на Пречи́стая, Ма́ти Де́во, чистото́ю Ангелы превозше́дшая, па́че все́х ме́не пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Преподобне отче Лазаре, моли́ Бо́га о нас.

Яко все́х вре́менных, преподо́бне, пристра́стия же и любве́ отбежа́в, всю́ к Бо́гу твою́ наде́жду стяжа́в всегда́. И е́же стяжа́л еси́, ни́щих ру́ки прия́ша.

Припев: Преподобне отче Лазаре, моли́ Бо́га о нас.

Де́монское злоде́йство, преподо́бне, отрази́в, прираже́нии звери́ными некоснове́н от сего́ отню́д пребы́л еси́, блаже́нне, Боже́ственною благода́тию покрыва́емь, тя́ при́сно во все́х Заступа́ющаго.

Сла́ва Отцу́ и Сы́ну и Свято́му Ду́ху:

Разсла́бити твою́ кре́пость, преподо́бне, вселука́вый тща́шеся, е́же к Бо́гу зря́ твою́ любо́вь и благодаре́ние, те́м на тя́ псы́ поусти́, но во тщету́ его́ ухищре́ние обличи́ся.

И ны́не и при́сно и во ве́ки веко́в. Ами́нь.

Богородичен: Пою́ Тя, Богоро́дице Влады́чице, и вопию́ Ти: Твое́ю моли́твою освяти́, соблюда́ющи, и наста́ви ко спасе́нию мно́гими грехи́ па́дающаго и прило́ги де́монскими коле́блема.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Лазаре, моли́ Бо́га о нас.

Души́ твоея́ тве́рдое и ра́зума богостоя́нное, преподо́бне, лука́вый, низложи́ти наде́явся, во пса́ себе́ преложи́в, та́ко прии́де искуси́ти тя́.

Припев: Преподобне отче Лазаре, моли́ Бо́га о нас.

В ску́дости мно́зей недоуме́ния вра́г бы́в, отступи́, ничто́же отню́д стужи́вша тя́, блаже́нне, зря́, па́че же благода́рственно ску́дость нося́ща.

Сла́ва Отцу́ и Сы́ну и Свято́му Ду́ху:

Же́зл си́лы, я́коже ору́жие, кре́ст, преподо́бне, в рука́х всегда́ нося́, все́ вра́жие ко́зней де́йство, я́ко пра́х, истни́л еси́.

И ны́не и при́сно и во ве́ки веко́в. Ами́нь.

Богородичен: Отча́явшихся наде́жда и предста́тельнице ве́рных, спаси́ мя, Ма́ти Бо́жия, от вся́каго наси́лия враго́в неви́димых и ви́димых, Всепе́тая.

Пе́снь 6.

Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.

Припев: Преподобне отче Лазаре, моли́ Бо́га о нас.

Хра́м Бо́гу твое́ се́рдце хотя́ яви́ти, преподо́бне, Це́ркви обхожда́л еси́ святы́х, от ни́хже прия́л еси́ благода́ть оби́льно Свята́го Ду́ха мно́гим челове́ком на утвержде́ние.

Припев: Преподобне отче Лазаре, моли́ Бо́га о нас.

Твое́ оте́чество, я́ко бога́тство, тя́, богому́дре, многоце́нное, па́ки прия́т Боже́ственным судо́м. Те́м стра́нна мя́ оте́чества Еде́мскаго, преподо́бне, су́ща насле́дника сему́ соде́лай.

Сла́ва Отцу́ и Сы́ну и Свято́му Ду́ху:

Це́рковь тя́ Мари́ны де́вы му́ченицы пе́рво прия́т все́льника, в не́йже, я́ко незаходи́ма, возсия́л еси́, звезда́, озаря́я, преподо́бне, во тме́ неве́дения спя́щия.

И ны́не и при́сно и во ве́ки веко́в. Ами́нь.

Богородичен: Умоли́ Сы́на Твоего́ и Го́спода, Де́во, о рабе́х Твои́х, ве́рою честно́му о́бразу зра́ка Твоего́, Всенепоро́чная, покланя́ющихся при́сно, и́бо мо́жеши.

Конда́к преподо́бнаго, гла́с 4.

Яко свети́льника превели́каго Це́рковь Христо́ва сла́вит тя́ с весе́лием псало́мски. Те́мже не преста́й моля́ся Христу́ да́ти все́м прегреше́ний проще́ние.

Пе́снь 7.

Ирмос: Вети́и яви́шася о́троцы любомудре́йшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́.

Припев: Преподобне отче Лазаре, моли́ Бо́га о нас.

Трапе́зу оби́льну угото́ва, испо́лнену благи́х доброде́телей ти́ Боже́ственных, и́миже вся́ пита́я, и пе́ти науча́ше: оте́ц на́ших Бо́же, благослове́н еси́.

Припев: Преподобне отче Лазаре, моли́ Бо́га о нас.

Глаго́лом уче́ний твои́х прему́дрых после́дующе, лю́дие, маловре́менных все́х любо́вь вои́стинну усе́рдно отложи́вше, и жи́тельство с тобо́ю я́ко бла́го, всеблаже́нне, произво́лиша.

Сла́ва Отцу́ и Сы́ну и Свято́му Ду́ху:

Образ стяжа́в жития́ ты́ Симео́на ди́внаго, я́ко ка́мень адама́нт, на столпе́ без покро́ва стоя́л еси́, зовы́й, веселя́ся: пребоже́ственный отце́в и на́ш Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Спаси́ мя́ от сете́й вра́жиих хода́тайством Твои́м, Чи́стая, и любви́ коне́чней блага́го Сы́на Твоего́ привяжи́, удаля́ема всегда́ от Него́ сластьми́ безме́стными.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Преподобне отче Лазаре, моли́ Бо́га о нас.

Навы́к неле́стно от пре́жде тебе́ пости́вшихся отце́в, о́тче, по́двиги и боре́ния, и потща́лся еси́ не яви́тися вторы́й, и я́ко не то́кмо яви́ся, но уже́ и превзы́де.

Припев: Преподобне отче Лазаре, моли́ Бо́га о нас.

Испо́лнил еси́ моли́тву, е́юже моля́ся Бо́гу дре́вле, треблаже́нне, — Тво́й хле́б все́м предлага́ю, — глаго́ля, и — Тебе́ Твоя́ от Твои́х прино́сим, Го́споди сла́вы, во вся́ ве́ки.

Сла́ва Отцу́ и Сы́ну и Свято́му Ду́ху:

И сло́вом, о́тче, и де́лом ты́, направля́я су́щия с тобо́ю к Боже́ственней стези́, са́м мно́жае па́че си́х к се́й направля́емь, и́мже чудеса́ соверши́л еси́: Бо́г бо моли́твами твои́ми гумно́ умно́жи.

И ны́не и при́сно и во ве́ки веко́в. Ами́нь.

Богородичен: Да ра́дуется не́бо, да весели́тся и земля́ с челове́ки, Де́ва бо Мари́я Творца́ все́х неизрече́нно роди́, Ему́же пои́м: Тя́ превозно́сим, Христе́, во ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподобне отче Лазаре, моли́ Бо́га о нас.

Ле́ностию, увы́ мне́, житие́ соверши́х все́ и бою́ся суда́ стра́шнаго. Но, о Человеколю́бче Го́споди, моле́нием Ла́заря сле́зныя ми́ посли́ струи́, да те́ми омы́ю скве́рну прегреше́ний мои́х.

Припев: Преподобне отче Лазаре, моли́ Бо́га о нас.

Ти́ху име́я ду́шу, кро́ток же зра́к, вле́поту име́л еси́, о́тче, и уве́тлив ко все́м ве́сь явля́яся, струя́ми же твои́х глаго́л напая́я ду́ши, му́дре. Юже тишину́ и на́м Христа́ умоли́ пода́ти.

Сла́ва Отцу́ и Сы́ну и Свято́му Ду́ху:

Явственнейшу все́м доброде́тель твою́ боже́ственную подо́бно яви́ти хотя́ Бо́г, горе́ приступи́ти тя́, преподо́бне, соде́я к жесто́кой, от нея́же па́че, о́тче, лучи́ удо́бь испуща́я жития́, озари́л еси́ вселе́нную.

И ны́не и при́сно и во ве́ки веко́в. Ами́нь.

Богородичен: Ми́лостива тогда́ яви́ мне́ Судию́, Сы́на Твоего́, Его́же родила́ еси́ без се́мене, во вре́мя, егда́ ся́дет, я́коже пи́шется, на престо́ле святе́м, суди́ти, Отрокови́це, вся́ земны́я, о и́хже в житии́ безме́стных соде́яша.

Свети́лен.

Богоно́сца вси́ и Влады́чня подража́теля восхва́лим пе́сньми, Ла́заря приснопа́мятнаго, де́монское свире́пство разори́вшаго Боже́ственною си́лою.

Богородичен:

Тя́ Дании́л прописа́ несеко́мую го́ру, от нея́же честны́й Ка́мень отсече́ся, сокруша́я и́дольския хра́мы, Богороди́тельнице Мари́е.

Молитва

О свяще́нная главо́, преподо́бне о́тче, преблаже́нне а́вво Лазаре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Лазарю, в Галисийстей горе постившагося