20 ноября.

Канон святым мученикам Авкту, Тавриону и Фессалоникии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Таврио́н сла́вный и Авкт ди́вный,/ о́гневи проти́вистася и всем и́нем ка́знем,/ моли́твами возмога́юща;/ та у́бо моле́нием сердца́ похваля́юще,/ ве́рою пресвяту́ю и честну́ю па́мять е́ю соверши́м,/ ду́шам просвеще́ние почерпа́юща.

Кано́н преподо́бнаго. Гла́с 8.

Пе́снь 1.

Ирмос: Пе́снь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ пе́снь побе́дную пою́ще/ и вопию́ще:/ пои́м Тебе́ Еди́ному, Влады́це.

Припев: Святии мученицы, моли́те Бо́га о нас.

Ве́рою страда́ния ва́ю сла́вное чту́щая, вели́кая му́ченика,/ помоли́тася спасти́ся от бе́д и скорбе́й,/ иму́ща дерзнове́ние ко всех Бо́гу и Влады́це.

Припев: Святии мученицы, моли́те Бо́га о нас.

Звезда́, ве́рным све́том тварь озаря́юща, му́ченика яви́стася/ и тьму пре́лестную прогони́ста благода́тию./ Тем светоно́сную ва́шу па́мять ве́рою твори́м.

Припев: Святии мученицы, моли́те Бо́га о нас.

Зако́ну нечести́вых безсту́дно предло́жену,/ чести́81 безду́шны истука́ны, му́ченика, ника́коже попеко́стася,/ иму́ща ве́ру необори́му к Еди́ному Бо́гу и Влады́це.

Сла́ва Отцу́ и Сы́ну и Свято́му Ду́ху:

Ста пред су́дищем му́жески Таврио́н многостра́стный, Авкт сла́вный,/ верста́ светоно́сная, Тро́ицу пропове́дающи,/ и многобо́жную глубо́кую отогна́ тьму.

И ны́не и при́сно и во ве́ки веко́в. Ами́нь.

Богородичен: Высоту́ та́йны стра́шныя и глубину́ непостижи́му/ кто возмо́жет, Де́во, сказа́ти?/ Бо́га бо родила́ еси́, Челове́ка бы́вша/ па́че всея́ вины́ и сло́ва.

Пе́снь 3.

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й, / жела́ний кра́ю, ве́рных утвержде́ние,/ Еди́не Человеколю́бче.

Припев: Святии мученицы, моли́те Бо́га о нас.

На еди́наго ро́дом злочести́ваго, свята́я, всю я́рость пра́во вверго́ста,/ истощи́вша ва́ю телеса́ Бо́жиим посо́бием,/ того́ суровство́ победи́ста.

Припев: Святии мученицы, моли́те Бо́га о нас.

Просвети́вшася ран до́бротворя́щими я́звами/ и укра́шшася мук приложе́нии,/ па́че облиста́сте, я́ко светоза́рней звезде́,/ страстоте́рпца му́ченика светоза́рная.

Сла́ва Отцу́ и Сы́ну и Свято́му Ду́ху:

Пребыва́ющи ви́дя и Христо́во И́мя призыва́юща,/ льстец ра́нами ссече́,/ Боже́ственными противле́нии и терпе́нием мук того́ победи́ла есть, Богоблаже́нная.

И ны́не и при́сно и во ве́ки веко́в. Ами́нь.

Богородичен: К Тебе́ прибега́ем вы́ну, Деви́це, мно́жеством всегда́ обступа́еми,/ уще́дри и спаси́ мя,/ ро́ждши Спа́са всего́ ми́ра и Го́спода, Еди́на Препе́тая.

Седа́лен, гла́с 4.

Таврио́н сла́вный и Авкт ди́вный,/ о́гневи проти́вистася и всем и́нем ка́знем,/ моли́твами возмога́юща;/ та у́бо моле́нием сердца́ похваля́юще,/ ве́рою пресвяту́ю и честну́ю па́мять е́ю соверши́м,/ ду́шам просвеще́ние почерпа́юща.

Пе́снь 4.

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Святии мученицы, моли́те Бо́га о нас.

Сокруша́ема телесе́ ра́нами и боле́зньми не поми́ловаста,/ Боже́ственным ране́нием раждиза́ема Бо́га и Зижди́теля, до́бляя.

Припев: Святии мученицы, моли́те Бо́га о нас.

Себе́ Сотво́ршему нетле́нну и нескве́рненну/ привела́ еси́ житие́м соверше́нным, Фессалоники́е доброду́шная.

Сла́ва Отцу́ и Сы́ну и Свято́му Ду́ху:

Име́ния обнажи́ся и роди́телю себе́ удалила́ еси́,/ Го́сподеви же восле́дова,/ Того́ ра́ди стра́ждущи терпе́нью.

И ны́не и при́сно и во ве́ки веко́в. Ами́нь.

Богородичен: Одержи́ма мя бу́рею грехо́в и погиба́юща, Богоро́дице,/ мя напра́ви к приста́нищу ти́ху умиле́ния.

Пе́снь 5

Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго,/ но обрати́ мя и к све́ту за́поведей Твои́х/ пу́ти моя́ напра́ви, молю́ся.

Припев: Святии мученицы, моли́те Бо́га о нас.

Безду́шным же́ртву, душе́вная су́ще Госпо́дня заколе́ния, страда́льцы,/ ника́коже не принесо́сте ра́зумом тве́рдым./ Тем, вся́ку боле́знь ран претерпе́вша,/ на неболе́зненную кончи́ну преидо́ста.

Припев: Святии мученицы, моли́те Бо́га о нас.

Неукроще́нный ра́зум осужда́ющаго гне́ва испо́лнися/ и каме́нием побива́ти святы́я го́рце повелева́ше,/ но тех, я́ко дете́й оте́ц чадолюби́в, спаса́ет Спас,/ Его́же ра́ди страда́ти изво́лиша.

Сла́ва Отцу́ и Сы́ну и Свято́му Ду́ху:

Подо́бницы, первострада́льца, Авкт с Таврио́ном, му́ченика яви́стася,/ мно́жеством бо каме́ния неща́дно, я́ко он, каме́нием побива́ема,–/ Христа́ – ка́мене неразседо́маго, до сме́рти ника́коже отверго́стася, сла́вная.

И ны́не и при́сно и во ве́ки веко́в. Ами́нь.

Богородичен: Грехо́вная тя́жкая всегда́ ношу́ бремена́, Пречи́стая,/ и вопию́ Ти:/ сих хода́тайством Боже́ственным обложи́/ и и́го ми носи́ти ле́гкое безпа́костно сподо́би, Еди́на Непоро́чная.

Пе́снь 6.

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Припев: Святии мученицы, моли́те Бо́га о нас.

Растяже́ну тя роди́тель, де́во, бия́ше,/ ви́дя уневе́щену Зижди́телеви и Спа́су всех,/ чрез естество́м зло́бою естества́ уста́вы бо попира́ют,/ и честну́ тя сотворя́ет му́ченицу.

Припев: Святии мученицы, моли́те Бо́га о нас.

Кре́постию ти вся́ческая Творя́щаго, честна́я Фессалоники́е, укре́пльшшся,/ не́мощь же́нску Сло́во ю́ношески и му́жески отложи́,/ и пострада́ терпе́ньно, и обоже́ния Боже́ственнаго получи́.

Сла́ва Отцу́ и Сы́ну и Свято́му Ду́ху:

Не повину́вшеся беззако́нному веле́нию,/ вве́ржени бы́сте в во́ду ку́пно,/ руко́ю же вся Направля́ющаго непотопле́ни, му́ченицы, яви́стася/ и приведо́стася к ти́хому приста́нищу спасе́нному, ра́дующеся.

И ны́не и при́сно и во ве́ки веко́в. Ами́нь.

Богородичен: Кра́сен, я́ко из черто́га, из чре́ва Твоего́ Же́них про́йде, Сло́во,/ Деви́ческое украси́в естество́,/ Бо́жиим ра́зумом просвети́ и разори́ безле́потное84 зло́бие, Де́во Богоневе́стная.

Пе́снь 7.

Ирмос: От Иуде́и до́шедше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н ес

Припев: Святии мученицы, моли́те Бо́га о нас.

Неи́стовный гони́тель в пыла́ющий пла́мень вас вве́ргл есть,/ не поже́ршем и́долом, ни прекло́ньшем коле́ну,/ но до́бро уста́вно зову́щем:/ оте́ц на́ших Бо́же, благослове́н еси́.

Припев: Святии мученицы, моли́те Бо́га о нас.

Несумне́нным се́рдцем в огнь вле́зше, преблаже́ннии,/ я́коже пре́жде ю́ноша, не опали́стася ника́коже,/ но спасе́ни бы́сте, пою́ще:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Стремле́нием нанесе́ных с Небе́сными вод пла́мень у́бо потуше́,/ мно́жество же беззако́нных напра́сно сокруши́ся,/ святи́и же поя́ху:/ оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Ду́шу мою́ уязве́ну неприя́зненнаго греха́ стре́лами исцели́,/ ум мой, преступле́нием зле омраче́нный, просвети́, Влады́чице,/ Светода́вца Христа́ ро́ждши, Богома́ти.

Пе́снь 8.

Ирмос: Седмери́цею пещь/ халде́йский мучи́тель / Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Припев: Святии мученицы, моли́те Бо́га о нас.

Па́че живота́ вре́меннаго та́мо су́щии возлюби́вше,/ мно́гообра́зными ра́нами преидо́сте сквозе́ огнь же и во́ду,/ уте́ху обре́тше, я́ко Небе́сное вои́стину Ца́рство,/ в не́мже пое́те:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Припев: Святии мученицы, моли́те Бо́га о нас.

Глаго́л мучи́телев безбо́жных я́ве обличи́ла еста́,/ и́стинное испове́дание, свята́я, до́бре соблюла́ еста́,/ и к Бо́гу приидо́ста ны́не Подви́жнику,/ мече́м усека́ема, и любо́вию воспева́ета:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Сла́ва Отцу́ и Сы́ну и Свято́му Ду́ху:

Я́коже пау́чныя ни́ти,/ вра́жия вседе́йства, му́ченика до́бляя, Богомо́щно раздра́ста/ младе́нец стреля́ния, я́же от них мня́ща,/ тем и́стинна победоно́сца я́вльшася, вопие́та благода́рно:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

И ны́не и при́сно и во ве́ки веко́в. Ами́нь.

Богородичен: Умерщвле́на страстьми́ и мно́гими злы́ми, Чи́стая,/ ду́шу мою́ оживи́, Живо́т ро́ждшия,/ смерть разру́шши все́ю кре́постию и сме́ртию/ и даждь пе́ти ми благода́рственным се́рдцем:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Припев: Святии мученицы, моли́те Бо́га о нас.

Возмо́гша телесы́ тле́нными безпло́тнаго врага́,/ непобеди́ми и ве́лии му́ченицы, победи́ти, подвиза́вшася,/ и ны́не нетле́нный живо́т насле́доваша,/ Авкт сла́вный и Таврио́н с ним прехва́льный.

Припев: Святии мученицы, моли́те Бо́га о нас.

Я́ко цве́тца, посреде́ пла́мене, прехва́льная, неувядо́ма, яви́стася,/ благоуха́вша Богоразу́мием вся концы́,/ и злый смрад вра́жий си́лою прогна́ста,/ и светле́йша яви́стася зла́та Бо́жиею благода́тию.

Припев: Святии мученицы, моли́те Бо́га о нас.

Телеса́ челове́ческая пресла́вный Амфипо́лий сокры́в ва́ю, прехва́льная,/ я́ко Боже́ственное бога́тство,/ сия́ обогати́вши исцеле́ние всем оби́ло источа́юще благода́тию/ и отмыва́юще теле́сныя и душе́вныя недуги.

Сла́ва Отцу́ и Сы́ну и Свято́му Ду́ху:

Я́ко со́лнце светоза́рно,/ всепра́здная па́мять ва́ю возсия́, вели́кая му́ченика,/ всю тварь озаря́юща,/ в ню́же мо́лимся, ва́ю Боже́ственными утеше́нии вся просвеща́ета,/ ва́ю ра́достно бла́жащая.

И ны́не и при́сно и во ве́ки веко́в. Ами́нь.

Богородичен: Просвети́, две́рь Све́та, ду́шу мою́,/ ю́же враг помрачи́ па́дании и жите́йскими все́ми смуще́нии,/ и тьмы изба́ви без све́та огня́ и муче́ния,/ да просла́влю Тя, Богоро́дице, ве́рным удобре́ние.

Молитва

Святи́и му́ченицы Таврио́не и Авкте! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.