Шрифт

1 ноября.

Канон святому мученику Уару.

Святому мученику Уару
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Уа́р во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н му́ченика. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святый мучениче Уаре, моли́ Бо́га о нас.

Яви́лся еси́ на высоте́ Христо́вы Це́ркве, Уа́ре, я́коже со́лнце све́тлое, блиста́ньми просвеща́я твои́х боре́ний, блаже́нне, земна́я исполне́ния.

Припев: Святый мучениче Уаре, моли́ Бо́га о нас.

Боже́ственныя любве́, всеблаже́нне, объя́т сла́дким раче́нием, отве́рглся еси́ себе́ и ко вся́кой му́це пло́тстей устреми́лся еси́, кре́пко подвиза́вся.

Сла́ва Отцу́ и Сы́ну и Свято́му Ду́ху:

Смы́сленно боже́ственных подви́жник ю́зами связа́в себе́, страстоте́рпче, и ле́стныя разори́л еси́ у́зы кре́пким терпе́нием мно́гих му́к.

И ны́не и при́сно и во ве́ки веко́в. Ами́нь.

Богородичен: Пресу́щественное Сло́во во Твое́м чре́ве па́че сло́ва всели́ся, и роди́вся боголе́пно, му́ченическия ли́ки, Чи́стая, приведе́, с ни́миже песносло́вим Тя́.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святый мучениче Уаре, моли́ Бо́га о нас.

Вше́л еси́ ра́зумом кре́пким в му́жественныя по́двиги, утверди́вся наде́ждами бу́дущих благи́х и му́чеников Христо́вых всему́дрыми, блаже́нне, поуче́нии.

Припев: Святый мучениче Уаре, моли́ Бо́га о нас.

Во́инство святы́х страстоте́рпец, стра́ждущих зако́нне зря́, о́нех показа́л еси́ му́жескую кре́пость, примеша́яся многообра́зным, Уа́ре, му́кам.

Сла́ва Отцу́ и Сы́ну и Свято́му Ду́ху:

В полце́ свяще́ннем, Уа́ре, я́ко до́блий во́ин, обре́лся еси́, и ссе́к мно́жество му́жества мече́м, му́дре, ра́тным, побе́дами сла́вимь.

И ны́не и при́сно и во ве́ки веко́в. Ами́нь.

Богородичен: Де́во Ма́ти Бо́жия, моего́ уны́ния глубоча́йшую тму́ и о́блаки страсте́й просвеще́нием, е́же в Тебе́, молю́ Тя, благода́ти, отжени́.

Седа́лен, му́ченика, гла́с 1.

Стра́сти честны́х ви́дев му́чеников и те́х лобза́в у́зы любо́вию, на высоту́ восте́кл еси́ свиде́тельства, всечу́дне, на дре́ве бо пове́шен, ра́ны претерпе́л еси́, до́ндеже в ру́ки Госпо́дни ду́ха пре́дал еси́.

Сла́ва И ны́не, Богородичен:

Упова́ние христиа́н, Пресвята́я Де́во, Его́же родила́ еси́ Бо́га, па́че ума́ и сло́ва, непреста́нно моли́ о воспева́ющих Тя́, пода́ти оставле́ние грехо́в на́ших все́х и исправле́ние жития́, ве́рою и любо́вию при́сно сла́вящим Тя́.

КрестоБогородичен:

Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святый мучениче Уаре, моли́ Бо́га о нас.

Святы́ми я́звами удобря́емь, красне́йший яви́лся еси́, и Бо́гу, Уа́ре, возлю́блен, Венча́вшему тво́й ве́рх, досточу́дне.

Припев: Святый мучениче Уаре, моли́ Бо́га о нас.

На кресте́, сла́вне, растяза́емь и на земли́ простира́емь, лю́тыя боле́зни претерпе́л еси́. Те́м неболе́зненную жи́знь насле́довал еси́, веселя́ся.

Припев: Святый мучениче Уаре, моли́ Бо́га о нас.

Зако́нно ви́дяще боже́ственнии му́ченицы стра́ждуща тя́, блаже́нне, терпе́ния словесы́ укрепля́ху, с ни́миже стра́сти до́лгия соверши́в, ублажи́лся еси́.

Сла́ва Отцу́ и Сы́ну и Свято́му Ду́ху:

Хвала́ми венча́ем боже́ственныя му́ченики, я́же венча́ благода́ть Боже́ственная Боже́ственными увязе́нии, низло́жших вра́жия высо́кая мудрова́ния.

И ны́не и при́сно и во ве́ки веко́в. Ами́нь.

Богородичен: От ти́ны страсте́й, Влады́чице, возведи́, и стра́стных помышле́ний, отчужда́ющих мя́ Бо́га Еди́наго Чи́стаго, да ве́рою ублажа́ю Тя́.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святый мучениче Уаре, моли́ Бо́га о нас.

Укрепля́ешися манове́ньми Боже́ственными и неосла́бная терза́ния терпи́ши до́блим смы́слом, Уа́ре, растерза́я го́рдаго се́рдце, зло́бу соде́лавшаго.

Припев: Святый мучениче Уаре, моли́ Бо́га о нас.

Сла́вный му́ченик, ви́дя отпа́дающия на зе́млю своя́ пло́ти, ра́довашеся, ве́чнующая ума́ све́тлостию и Боже́ственная возда́ния предпрозира́я.

Сла́ва Отцу́ и Сы́ну и Свято́му Ду́ху:

Пою́ Тя́, Го́споди Бо́же, и славосло́влю, и покланя́юся, благи́х сподобля́яся, угото́ванных Тебе́ возлю́бльшим, — му́ченик в страда́нии те́пле зовя́ше.

И ны́не и при́сно и во ве́ки веко́в. Ами́нь.

Богородичен: Явльшися херуви́м и серафи́м я́ко вои́стинну святе́йши, Всенепоро́чная, вся́, ве́рно Тя́ ны́не освяща́ющия, освяти́ и спаси́ хода́тайством Твои́м.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святый мучениче Уаре, моли́ Бо́га о нас.

Глаго́лов небре́гл еси́ пребеззако́ннаго врага́ и пла́мень претерпе́л еси́ нестерпи́мых боле́зней терпели́вно, многострада́льне Уа́ре, моле́бниче о хва́лящих тя́ ве́рою.

Припев: Святый мучениче Уаре, моли́ Бо́га о нас.

Не преста́ше мучи́тель пребезу́мный, ра́нами неми́лостивно сдробля́я тя́, до́ндеже в ру́ки Бо́жия свяще́нную твою́ ду́шу преда́л еси́, добро́тами просве́щшуся по́двиг твои́х.

Сла́ва Отцу́ и Сы́ну и Свято́му Ду́ху:

Возвы́сился еси́, подо́бяся на дре́ве Христу́, и на то́м ви́ся, твою́ ду́шу пре́дал еси́ Бо́гу, тя́ венчава́ющу, страстоте́рпче, зако́нно до́блествовавша.

И ны́не и при́сно и во ве́ки веко́в. Ами́нь.

Богородичен: Упра́ви, Влады́чице, в пучи́не лю́тых, обурева́емую всегда́ смире́нную ду́шу мою́, и к ти́хому приста́нищу напра́ви, несомне́нным ра́зумом Тя́ блажа́щую.

Конда́к му́ченику, гла́с 4:

Христу́ после́дуя, му́чениче Уа́ре, Того́ испи́в ча́шу, и муче́ния венце́м увязе́ся, и со Ангелы ликовству́еши: моли́ непреста́нно за ду́ши на́ша.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святый мучениче Уаре, моли́ Бо́га о нас.

Просвеще́на тя́ подвиго́в приложе́ньми, предо́брая Клеопа́тра, Уа́ре, ску́тала е́сть, обре́тши сла́ву тобо́ю, ве́ры досто́йну я́ве, ю́же показа́ те́пле в твое́ сконча́ние.

Припев: Святый мучениче Уаре, моли́ Бо́га о нас.

Излива́ющи на тя́ сле́зы, и мѵ́ры тя́ честны́ми помазу́ющи, сокрыва́ет тя́ под земле́ю всечестна́я жена́, погре́бшаго пре́лесть лука́вую и из гро́ба блиста́ньми просвеща́юща на́с.

Сла́ва Отцу́ и Сы́ну и Свято́му Ду́ху:

Не престая́ше, преподо́бне, угожда́ющи тебе́ Христо́ву уго́днику, приснопа́мятная, до́ндеже яви́лся еси́ хода́тай е́й, му́дре, Ца́рствия небе́снаго, его́же сподо́бися тобо́ю с любе́знейшим сы́ном.

И ны́не и при́сно и во ве́ки веко́в. Ами́нь.

Богородичен: Сокруше́на мя́ безчи́сленными согреше́нии, Де́во, хода́тайством Твои́м обнови́, уврачу́ющи мою́ ду́шу и сло́во подаю́щи, вопи́ти: благослове́на, Яже Бо́га пло́тию ро́ждшая.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святый мучениче Уаре, моли́ Бо́га о нас.

Ма́терних послу́шав, му́чениче, моле́б, небе́сному во́инству све́тло во́инствуя, о́трока честна́го и твоего́ неотсту́пна показа́л еси́ благосла́вия неизрече́нным милосе́рдием.

Припев: Святый мучениче Уаре, моли́ Бо́га о нас.

От Еги́пта тя́ бога́тство я́коже многоце́нное принесе́, му́чениче, разбогатя́щи многоце́нными дарми́, Клеопа́тра, целе́нии всю́ Палести́ну, любо́вию тя́ почита́ющую.

Сла́ва Отцу́ и Сы́ну и Свято́му Ду́ху:

Веселя́ся, по́двиги твоя́ соверши́л еси́, во́ине до́блий Вседержи́теля, и я́ко победи́тель от Него́ венча́лся еси́, Уа́ре всеблаже́нне, му́чеников вели́кая сла́во.

И ны́не и при́сно и во ве́ки веко́в. Ами́нь.

Богородичен: Грехи́ прилага́ю ко грехо́м и бу́дущаго не бою́ся Стра́шнаго Суда́: победи́, Чи́стая, души́ моея́ ослепле́ние, и мольбо́ю Твое́ю обрати́вши, мя́ спаси́.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святый мучениче Уаре, моли́ Бо́га о нас.

Кре́пость низложи́л еси́ ратобо́рца, Боже́ственною я́ве си́лою препоя́сався, страда́льче до́блий Уа́ре. Те́м тя́ хва́лим, врачева́ние оби́льное от твои́х моще́й, ве́рнии, почерпа́юще.

Припев: Святый мучениче Уаре, моли́ Бо́га о нас.

Яко све́т, я́ко у́тро, я́ко вели́кое со́лнце в земны́я простре́ся па́мять твоя́ концы́, светоно́сными просвеща́ющи сия́ньми твои́х честны́х по́двиг вся́, прехва́льне, и мра́к серде́ц отгоня́щи.

Припев: Святый мучениче Уаре, моли́ Бо́га о нас.

С тобо́ю сия́юща ви́девши сла́вою мно́гою своего́ сы́на чадолюби́вая, все́х Бо́га велича́ше; тебе́ же и́скреннейше, му́чениче, сла́вяше, велича́йшаго предста́теля, я́вственно обогати́вшися.

Сла́ва Отцу́ и Сы́ну и Свято́му Ду́ху:

Земля́, на не́йже терпели́вейшее те́ло твое́, му́дре, лежи́т, боже́ственне освяти́ся, но да́ждь моли́твами твои́ми на́м разреше́ние грехо́в, жития́ исправле́ние, Уа́ре, и все́х неудо́бных избавле́ние.

И ны́не и при́сно и во ве́ки веко́в. Ами́нь.

Богородичен: Явлься, Де́во, из Тебе́ Госпо́дь, све́тлаго о́блака, еги́петския куми́ры вся́ческой па́губе предаде́; мно́жество же страстоте́рпцев Сего́ носи́ти сподо́би, Сего́ подража́тели честны́м Его́ страда́нием.

Молитва

О святы́й уго́дниче Бо́жий, му́чениче Уа́ре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому мученику Уару