1 ноября.

Канон святому пророку Иоилю.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2:

Проро́ка Твоего́ Ио́иля па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Стихи́ры проро́ка, гла́с 8.

Боже́ственный Ду́х излия́ся, / я́ко честны́й Ио́иль, проро́чествуя, сказа́, / от Него́ дви́жимь, / на ны́, ве́рующия, / и та́йнам Боже́ственным явле́ние открыва́ет, / и проро́чествуют, / и́же де́йство Его́ прие́мшии, / и Боже́ственною заре́ю просвеща́еми, / и Боже́ственною благода́тию.

Боговеща́ния испо́лнен / ди́вный Ио́иль, / я́ко исто́чник, исхо́дит, ду́ши напая́ющий, / от до́му Твоего́, Влады́ко, / и сла́дость на́м иска́па, / помышле́ния ослажда́ющую, / ве́сь высо́к бы́в ду́хом, / доброде́телию возноси́мь / к Боже́ственней высоте́.

Проро́ческим дерзнове́нием твои́м / и разу́мным к Бо́гу, / Ио́иле, приближе́нием, / и́мже небе́сная зри́ши виде́ния, / о на́с Того́ уми́лостиви, / соверша́ющих ве́рою па́мять твою́, / разреше́ния прося́ прегреше́ний, сла́вне, / и прича́стия Боже́ственных наслажде́ний, / и ве́лия ми́лости.

Кано́н проро́ка. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Пророче Божий Иоиле, моли́ Бо́га о нас.

Ли́к на́м проро́ческий свесели́тся, похваля́ему тебе́ небому́дренну, Ио́иле богогла́се, с ни́миже спасти́ся на́м моли́, блаже́нне.

Припев: Пророче Божий Иоиле, моли́ Бо́га о нас.

Глаго́лы Бо́жия предвозвеща́я, богодухнове́нне, лю́тый проре́кл еси́ гне́в и пра́ведный, и́же от нече́стия прибы́вший лю́дем твои́м суему́дренным.

Сла́ва Отцу́ и Сы́ну и Свято́му Ду́ху:

Чу́дное, и светоно́сное Ду́ха, и животворя́щее вдохнове́ние тебе́ присени́ и бу́дущих зна́ние вдохне́, проро́че блаже́ннейше.

И ны́не и при́сно и во ве́ки веко́в. Ами́нь.

Богородичен: Тя́ ски́ния свиде́тельства прописа́, многови́дно образу́ема, явля́ющи от Тебе́ вопло́щшагося неизме́нно, Богома́ти, пречи́стая Влады́чице.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Пророче Божий Иоиле, моли́ Бо́га о нас.

Учи́ми твои́ми му́дрыми догма́ты, по́ст, проро́че, и служе́ние благоче́стно пропове́дуем, в до́м Госпо́день ходя́ще.

Припев: Пророче Божий Иоиле, моли́ Бо́га о нас.

Твои́м уче́нием после́дующе от всего́ се́рдца и помышле́ния, пла́чем же и моли́твами Бо́га взыску́ем, достохва́льне.

Сла́ва Отцу́ и Сы́ну и Свято́му Ду́ху:

Изъяви́в на́м Всеще́драго Влады́ки, проро́че, долготерпе́ние, и Боже́ственную же благосты́ню изъясни́л еси́ Того́, и благода́ть.

И ны́не и при́сно и во ве́ки веко́в. Ами́нь.

Богородичен: Зачала́ еси́, Пречи́стая, Бо́га и родила́ еси́ Сло́во, неизрече́нно вопло́щшееся, во проро́цех глаго́лавшее и испо́лнившее те́х пропове́дания.

Седа́лен проро́ка, гла́с 2.

Богоглаго́ливе проро́че, вдохнове́нием испо́лнився Уте́шителевым, изъясни́л еси́ в после́дняя времена́ бы́вшее язы́ком осия́ние. Сего́ ра́ди ны́не благоче́стно тя́ похваля́ем, и твою́ па́мять соверша́юще, вопие́м ти́: Христа́ Бо́га моли́ о душа́х на́ших.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Пророче Божий Иоиле, моли́ Бо́га о нас.

Ми́лостив бу́ди, Го́споди, чи́сто к Тебе́ ка́ющимся, я́ко еди́н Ще́др и Многоми́лостив.

Припев: Пророче Божий Иоиле, моли́ Бо́га о нас.

Якоже провозвести́л еси́, сла́вне, от Бо́га излия́ся Ду́х на вся́ку пло́ть ве́ровавших.

Сла́ва Отцу́ и Сы́ну и Свято́му Ду́ху:

Сни́тие Ду́ха, ученики́ Госпо́дни умудри́вшее, Твоя́ Богоглаго́ливая словеса́ испо́лни.

И ны́не и при́сно и во ве́ки веко́в. Ами́нь.

Богородичен: Изба́вльшеся, Пречи́стая, из мра́чных а́довых боко́в, Боже́ственным Твои́м Рождество́м, Тя́ ублажа́ем.

Пе́снь 5

Ирмос: Но́щи преше́дшей, прибли́жися де́нь, и Све́т ми́ру возсия́, сего́ ра́ди хва́лят Тя́ Ангельстии чи́ни и славосло́вят Тя́ вся́ческая.

Припев: Пророче Божий Иоиле, моли́ Бо́га о нас.

Христо́во прише́ствие Ио́иль боже́ственный я́вственно все́м прорече́, я́ко прии́дет и спасе́т ро́д челове́ческий от и́дольскаго льще́ния.

Припев: Пророче Божий Иоиле, моли́ Бо́га о нас.

Ве́сь ты́ возни́кнув, проро́че сла́вне, на преу́мный же и вы́ше по́мысла Све́т, проро́чествия благода́ть извле́кл еси́ отту́ду и пра́вду пропове́дал еси́.

Сла́ва Отцу́ и Сы́ну и Свято́му Ду́ху:

О пою́щих тя́ моли́ся спасти́ от вся́каго озлобле́ния, пребога́те Ио́иле, и Боже́ственныя благода́ти и зари́ сподо́битися, умоли́.

И ны́не и при́сно и во ве́ки веко́в. Ами́нь.

Богородичен: Пресвята́я Де́во, Влады́чице ми́ра, Тя́, Богоро́дицу, испове́дающим от безчи́сленных грехо́в моли́ спасти́ся, и жите́йских обстоя́ний.

Пе́снь 6.

Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́.

Припев: Пророче Божий Иоиле, моли́ Бо́га о нас.

Ка́плют твои́х глаго́л исто́чницы, боговеща́ния и душепи́щную сла́дость точа́ще, сла́вне, напая́ющую ве́рно приходя́щия.

Сла́ва Отцу́ и Сы́ну и Свято́му Ду́ху:

Го́ру тя́ проро́чества, сла́дость источа́ющую, и богоче́стия, Ио́иле, пропове́дника всему́дра зна́ем, богоглаго́ливе проро́че.

И ны́не и при́сно и во ве́ки веко́в. Ами́нь.

Богородичен: Просвети́, Све́т Ро́ждшая незаходя́щий, сердца́ славосло́вящих Тя́ ве́рно, Пречи́стая Влады́чице, и из Тебе́ Ро́ждшагося неизрече́нно.

Кондак пророка Иоиля, глас 4

Просветившееся Духом чистое твое сердце/ пророчества бысть светлейшаго приятилище:/ зриши бо, яко настоящая, далече сущая,/ сего ради тя почитаем, пророче, блаженне Иоиле, славне.

Пе́снь 7.

Ирмос: Пе́щь дре́вле всегремя́щую угаси́вый и о́троки ту́чею духо́вною ороси́вый, благослове́н еси́, Бо́же оте́ц на́ших.

Припев: Пророче Божий Иоиле, моли́ Бо́га о нас.

Исходя́щий от до́му Госпо́дня и напая́ющий исто́чник, я́коже проре́кл еси́, произы́де, проро́че всече́стне.

Сла́ва Отцу́ и Сы́ну и Свято́му Ду́ху:

Пото́к сито́вный шпеницоно́сен соде́лал еси́ пи́щный исто́чник, я́коже Ио́иль прорече́: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Иже вся́ Сотвори́вый ро́ждся от Де́вы, спасе́ ми́р, благоче́стно пою́щий: благослове́н еси́, Бо́же оте́ц на́ших.

Пе́снь 8.

Ирмос: Дре́вле ороси́вшаго евре́йския о́троки в пла́мени, и опали́вшаго, Го́спода, халде́и пресла́вно в не́й, воспое́м, глаго́люще: благослови́те и превозноси́те Его́ во ве́ки.

Припев: Пророче Божий Иоиле, моли́ Бо́га о нас.

Показа́л еси́, сла́вне, покая́ния о́бразы я́ве благоутро́бнаго Го́спода, прие́млюща ве́рою к Нему́ приходя́щия и пою́щия: благослови́те дела́ Госпо́дня Го́спода.

Припев: Пророче Божий Иоиле, моли́ Бо́га о нас.

Служи́тель бы́в ты́ Госпо́день, проро́че Ио́иле, Того́ та́йны вручи́лся еси́ прорица́ти лю́дем, хва́лящим и пою́щим: благослови́те дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Оставле́ние источа́ют Иу́дови чуде́с ре́ки, я́же су́ть апо́столи пресла́внии Госпо́дни, я́коже проро́чествова Ио́иль, вопию́щих напая́юще: благослови́те вся́ дела́ Госпо́дня Го́спода.

И ны́не и при́сно и во ве́ки веко́в. Ами́нь.

Богородичен: Ипоста́сь, сло́жну во двою́ существу́, Христа́, Всенепоро́чная, родила́ еси́, пребы́вши Де́ва Чи́стая, Ему́же пою́ще, зове́м: благослови́те дела́ Госпо́дня Го́спода.

Песнь 9

Ирмос: На небесе́х благослове́нная и на земли́ славосло́вимая, ра́дуйся, Неве́сто Неневе́стная.

Припев: Пророче Божий Иоиле, моли́ Бо́га о нас.

Со проро́ки, я́ко проро́к, ра́достно ны́не в небе́сных весели́шися оби́телех.

Припев: Пророче Божий Иоиле, моли́ Бо́га о нас.

Свы́ше ны́ назира́еши ны́не, благогове́йно тя́ славосло́вящия, богоглаго́ливе всебога́те.

Сла́ва Отцу́ и Сы́ну и Свято́му Ду́ху:

Сокраще́н пу́ть спасе́ния Ио́иль покая́нием богому́дренно показа́.

И ны́не и при́сно и во ве́ки веко́в. Ами́нь.

Богородичен: Возвела́ еси́ ны́, па́дшия, Ма́ти Бо́жия, благоутро́бнаго Влады́ку и Спа́са ро́ждши.

Молитва

О прехва́льный и пречу́дный проро́че Бо́жий Ио́иле! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.