1 ноября.

Канон пренесению мощей преподобнаго и богоноснаго отца Иоанна, пустынножителя Рыльскаго, чудотворца.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Покая́ния основа́ние, / прописа́ние умиле́ния, / о́браз утеше́ния, / духо́внаго соверше́ния / равноа́нгельное житие́ твое́ бы́сть, преподо́бне. / В моли́твах у́бо и в поще́ниих / и в слеза́х пребыва́вый, / о́тче Иоа́нне, / моли́ Христа́ Бо́га / о душа́х на́ших.

Велича́ние:

Ублажа́ем тя́, преподо́бне о́тче Иоа́нне, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Возсия́ дне́сь пресве́тлое торжество́ честны́я па́мяти твоея́, богому́дре о́тче Иоа́нне, и́же от младе́нства Бо́гу прилепи́вся и Того́ стопа́м после́довав, мирски́й мяте́ж, а́ки ну́ждное волне́ние, преплы́л еси́ и в Ца́рство небе́сное дости́гл еси́. Те́мже покланя́ющеся моще́м твои́м, ве́рно Христа́ славосло́вим, да́вшаго тя́ на́м те́пла о на́с моли́твенника, чту́щих любо́вию честну́ю па́мять твою́.

Кано́н преподо́бному, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Запе́в: Преподо́бне о́тче Иоа́нне, моли́ Бо́га о на́с.

Разу́мный све́т му́дрости возсия́й ми́ ны́не, молю́ся ти́, преподо́бне о́тче, пе́ти начина́ющу ми́ твое́ честно́е житие́, и Боже́ственныя благода́ти испо́лни уста́ моя́.

Запе́в: Преподо́бне о́тче Иоа́нне, моли́ Бо́га о на́с.

Ангелу подо́бяся вои́стину, удали́лся еси́ все́х я́же в ми́ре и, бежа́в те́лом и душе́ю, водвори́лся еси́ в пусты́ни, я́коже Моисе́й боговиде́ния, бога́тно наслажда́яся.

Сла́ва Отцу́ и Сы́ну и Свято́му Ду́ху:

Дово́льно исто́чника пи́в Ева́нгельскаго во́д оби́льных, из чре́ва ны́не ре́ки чуде́с источа́еши, преподо́бне Иоа́нне, и напая́еши ве́рою к тебе́ притека́ющия.

И ны́не и при́сно и во ве́ки веко́в. Ами́нь.

Богородичен: Утро́бу Твою́ обита́ Бо́г Сло́во, Де́во Чи́стая, я́коже ка́пля соше́д, ка́плющая на зе́млю и естество́ челове́ческое, пла́менем зло́бы горе́вшее, обнови́ ороше́нием.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Запе́в: Преподо́бне о́тче Иоа́нне, моли́ Бо́га о на́с.

Испо́лнь Ду́ха и у́м на не́бо просте́р, о тле́нней пи́щи не попе́клся еси́, но хле́бом Ангельским пита́лся еси́.

Запе́в: Преподо́бне о́тче Иоа́нне, моли́ Бо́га о на́с.

Струя́ми сле́з твои́х зе́млю пусты́нную напои́л еси́ и пло́д приноси́ти тебе́ слану́тка неора́нно утучни́л еси́.

Сла́ва Отцу́ и Сы́ну и Свято́му Ду́ху:

Яко птене́ц, к Бо́гу возлете́ти жела́я, преподо́бне о́тче, гнездо́ себе́ в дре́ве сотвори́л еси́, от земны́х облегчи́вся.

И ны́не и при́сно и во ве́ки веко́в. Ами́нь.

Богородичен: Иису́са, Сы́на Твоего́, ми́лостива мне́ сотвори́, зло́е творя́щему, Пречи́стая, во е́же не ви́дети ми́ Того́ лице́ отвраща́юща.

Седа́лен, гла́с 6.

По́стническия по́двиги поне́сл еси́ / и страда́льческим венце́м увяза́лся еси́, / с безпло́тными бо враги́ в телеси́ боря́ся / и во́инства и́х низлага́я, / удиви́л еси́ терпе́нием твои́м Ангелы, / и́хже житию́ во пло́ти поревнова́л еси́. / Но моли́ся Христу́ Бо́гу, / о́тче Иоа́нне, спасти́ся на́м.

Сла́ва и ны́не, Богородичен:

Милосе́рдия две́ри отве́рзи на́м, Благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д, Ты́ бо еси́ спасе́ние ро́да христиа́нскаго.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Запе́в: Преподо́бне о́тче Иоа́нне, моли́ Бо́га о на́с.

Обре́л еси́ Бо́га утвержде́нна на версе́ боже́ственныя ле́ствицы доброде́телей, е́юже возше́д, почи́л еси́ от трудо́в и боле́зней.

Запе́в: Преподо́бне о́тче Иоа́нне, моли́ Бо́га о на́с.

Агня́ тя́ до́браго Па́стыря, в горе́ кры́ющееся, преподо́бне о́тче, яви́ша овча́та, от своея́ огра́ды убежа́вшая.

Сла́ва Отцу́ и Сы́ну и Свято́му Ду́ху:

На тя́ наше́дшии па́стырие все́м пропове́даша стра́нное терпе́ние твое́ и Бо́гу в вы́шних сла́ву возсыла́ху.

И ны́не и при́сно и во ве́ки веко́в. Ами́нь.

Богородичен: Неневе́стная Ма́ти, Тобо́ю уве́дана бы́ша ше́ствия Бо́га на́шего, от Твои́х пречи́стых крове́й прии́мшаго челове́чество.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Запе́в: Преподо́бне о́тче Иоа́нне, моли́ Бо́га о на́с.

Ели́цы боголюби́вии, преподо́бне о́тче, глаго́лов послу́шающе па́стырских, на виде́ние твое́ в пусты́ню прихожда́ху.

Запе́в: Преподо́бне о́тче Иоа́нне, моли́ Бо́га о на́с.

Сла́ва твоя́ дале́че су́щия к тебе́ созыва́ше, я́коже гла́с в пусты́ни вопию́щаго всю́ду пронося́щися.

Сла́ва Отцу́ и Сы́ну и Свято́му Ду́ху:

В дре́ве уедини́вся, я́коже пти́ца, преблаже́нне о́тче, оправда́ния Бо́жия де́лая, не почива́л еси́, ниже́ Го́сподеви моля́ся.

И ны́не и при́сно и во ве́ки веко́в. Ами́нь.

Богородичен: Еди́наго в Тебе́, я́коже в глави́зне кни́жней напи́саннаго, Бо́га поноси́вши, Чи́стая, в пра́ведных мя́ кни́зе напиши́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Запе́в: Преподо́бне о́тче Иоа́нне, моли́ Бо́га о на́с.

Твори́ши дела́ Фесви́тянина Илии́, преподо́бне о́тче: ма́лым бо хле́бом мно́гих пита́еши и в сы́тость чу́дом корми́ши.

Запе́в: Преподо́бне о́тче Иоа́нне, моли́ Бо́га о на́с.

Изво́лиша мно́зи с тобо́ю жи́ти, блаже́нне, ми́ра сего́ преоби́девше сла́дость и твоему́ началообра́зному поревнова́вше житию́.

Запе́в: Преподо́бне о́тче Иоа́нне, моли́ Бо́га о на́с.

Лече́бную си́лу от Бо́га прии́м, слепы́м све́т дае́ши, глухи́м слы́шание, хромы́м хожде́ние и все́м ве́рою приходя́щим здра́вие.

Сла́ва Отцу́ и Сы́ну и Свято́му Ду́ху:

На главу́ твою́ мѵ́ро сни́де и на браду́ твою́ ма́сло ра́дости, е́же свещу́ се́рдца твоего́ неугаси́му соблюде́, преподо́бне.

И ны́не и при́сно и во ве́ки веко́в. Ами́нь.

Богородичен: Избра́нная Агнице Чи́стая, Льва́ стра́шнаго ро́ждшая, и Агнец бы́вшаго, и на заколе́ние безгла́сна приведе́ннаго, и беззако́ния моя́ на Ся́ восприи́мшаго.

Конда́к, гла́с 8.

Ангельскому житию́ поревнова́в, преподо́бне, / вся́ земна́я оста́вив, ко Христу́ прите́кл еси́ / и, Того́ за́поведьми огражда́яся, / яви́лся еси́ сто́лп непоколеби́мь от вра́жиих нападе́ний. / Те́м зове́м ти́: / ра́дуйся, о́тче Иоа́нне, свети́ло пресве́тлое.

Икос:

В словесе́х и де́лех на земли́ возсия́вшаго и Спа́сово уче́ние соверши́вша, земна́го Ангела и небе́снаго челове́ка, Иоа́нна сла́внаго, соше́дшеся, похва́лим, вси́ ве́рнии, си́це пою́ще и к нему́ глаго́люще: ра́дуйся, Среде́чское прозябе́ние; ра́дуйся, пусты́нное воспита́ние; ра́дуйся, от ю́ности Бо́га возлюби́вый; ра́дуйся, вся́ всего́ ми́ра ни во что́же вмени́вый; ра́дуйся, и́же высо́кое житие́ по́стническими труды́ показа́вый; ра́дуйся, злоко́зненнаго зми́я копие́м терпе́ния твоего́ низложи́вый; ра́дуйся, на гора́х, я́ко со́лнце, возсия́вый; ра́дуйся, го́ры и хо́лмы благоуха́ния испо́лнивый; ра́дуйся, гра́ды и ве́си просвети́вый чудесы́; ра́дуйся, вся́ стра́ны озари́вый доброде́тельми; ра́дуйся, ста́ду твоему́ тве́рдое огражде́ние; ра́дуйся, благочести́вым побе́дное венча́ние. Ра́дуйся, о́тче Иоа́нне, свети́ло пресве́тлое.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Запе́в: Преподо́бне о́тче Иоа́нне, моли́ Бо́га о на́с.

Честну́ю це́рковь воздви́гл еси́, я́коже огра́ду овца́м, себе́ це́рковь жи́ву сотвори́в, Го́сподеви поя́: отце́в Бо́же, благослове́н еси́.

Запе́в: Преподо́бне о́тче Иоа́нне, моли́ Бо́га о на́с.

Еже ми́ру распя́тие претерпе́в и я́же на земли́ у́ды умертви́в, нектому́ ты́ жи́л еси́, но Христо́с в тебе́, Ему́же взыва́л еси́: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Пра́вило души́ твоея́ разруши́ти не возмого́ша ни по́тове, ниже́ боле́зни, ни теле́сное изможде́ние, ни ста́рость претружде́нная, но Влады́ки твоего́ жела́я, неуста́нно взыва́л еси́: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Руно́ ороше́нное, Де́во, пла́мень грехо́в мои́х угаси́, купино́ неопали́мая, страсте́й мои́х те́рние попали́, подаю́щи ми́ на воде́ жи́ти упокое́ния и гее́нскаго мя́ огня́ свобожда́ющи.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Запе́в: Преподо́бне о́тче Иоа́нне, моли́ Бо́га о на́с.

Егда́, со́лнце пресве́тлое, на за́паде жи́зни земны́я себе́ уразуме́л еси́, ученики́ наказа́в и во стра́се Бо́жии утверди́в, возвести́л еси́ боле́зней твои́х возме́здие и, ра́дуяся, ду́х тво́й Го́сподеви пре́дал еси́.

Запе́в: Преподо́бне о́тче Иоа́нне, моли́ Бо́га о на́с.

Сме́рть не лиши́ телесе́ твоего́ живу́щия в тебе́ благода́ти Боже́ственныя, но, преше́дшим дне́м четы́редесятым, са́м явля́ешися, и в зе́млю погребсти́ тя́ повелева́еши, и чуде́с струи́ источа́еши.

Сла́ва Отцу́ и Сы́ну и Свято́му Ду́ху:

Ви́дяще пучи́ну чуде́с твои́х, хра́м тво́й сокро́вище проразумева́ем многоце́нное: вси́ бо, неду́гом одержи́мии, в то́й притека́юще, ско́ро от гро́ба твоего́ здра́вие прие́млют, тя́, просла́вльшаго Бо́га, сла́вяще.

И ны́не и при́сно и во ве́ки веко́в. Ами́нь.

Богородичен: Еще́ светле́е све́та со́лнечнаго проразумева́ем де́вства Твоего́ све́тлое сия́ние, Пречи́стая: Све́та бо безле́тнаго и со́лнцу Творца́ во чре́ве Твое́м име́ла еси́, из Тебе́ возсия́вшаго и тму́ пре́лести разгна́вшаго, и ве́сь ми́р све́том богоразу́мия просвети́вшаго.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Запе́в: Преподо́бне о́тче Иоа́нне, моли́ Бо́га о на́с.

Те́ло твое́ честно́е во гро́бе положе́нное — разре́шшуся соу́зу есте́ственному и тебе́ Бо́гу ду́х преда́вшу — облагоуха́ет вся́ приходя́щия и Бо́га прославля́ет чудесы́, Иоа́нне преблаже́нне.

Запе́в: Преподо́бне о́тче Иоа́нне, моли́ Бо́га о на́с.

Ли́ку мона́шествующих и мно́жеству ве́рных те́плый обрета́ешися засту́пник, и́же зло́бу разруша́яй и проше́ния исполня́яй. Бо́г бо возвели́чи тя́, при́снаго раба́ Своего́, челове́ки и скоты́ тобо́ю исцеля́я.

Сла́ва Отцу́ и Сы́ну и Свято́му Ду́ху:

Испо́лни се́рдца моего́ жела́ние, чуде́с исто́чниче: да́руй ми́ благода́ть твою́, от вся́каго искуше́ния мя́ избавля́я, на суде́ же гряду́щем во Еде́мстей мя́ всели́ па́жити моли́твами твои́ми, от горя́ща се́рдца тебе́ пе́снь прине́сшаго.

И ны́не и при́сно и во ве́ки веко́в. Ами́нь.

Богородичен: Изря́дно предочи́стившися во свята́я святы́х вселе́нием и Ангельскою руко́ю пита́нием, челове́ком Бо́га породила́ еси́, от Твои́х Пречи́стых крове́й пло́ть прии́мшаго и я́коже пре́жде рождества́ Де́ву Тя́ соблю́дшаго.

Свети́лен, гла́с 2.

Ра́дуйся, пусты́не Ры́льская, весели́ся, и́ноков сосло́вие. Прииди́те, вси́ ве́рнии, ра́ку обступи́вше преподо́бнаго, то́ки пролива́ющую исцеле́ний, пе́сненными похвала́ми воззове́м к нему́, глаго́люще: ра́дуйся, Среде́чское прозябе́ние и пусты́ни до́брое воспита́ние.

Сла́ва и ны́не, Богородичен:

Непроходи́мую две́рь еди́ную, плодови́тую ма́слину, кади́льницу всезлату́ю, Боже́ственный о́гнь нося́щую, ста́мну небе́сныя ма́нны и светоно́сный о́блак, Богоро́дицу святу́ю вси́ просла́вим.

Молитва преподобному Иоанну Рыльскому

Земна́я звездо́ чуде́сная, я́же от преде́л Сре́дца гра́да возсия́вшая, и све́щниче живы́й, и́же всю зе́млю Бо́лгарскую све́том пра́вды Бо́жия осиява́яй, преди́вный в по́стницех уго́дниче Бо́жий, о́тче Иоа́нне, преподо́бных у́бо ра́дование, Це́ркве Бо́лгарския украше́ние, ве́ры Правосла́вныя кре́пкое утвержде́ние, ско́рый помо́щниче к тебе́ с ве́рою и любо́вию притека́ющим и вели́кий пред Го́сподем о всех нас предста́телю! Приими́, преблаже́нне, моле́ния на́ша и умоли́ Христа́ Бо́га на́шего, я́ко да вси, тобо́ю неви́димо охраня́еми и сою́зом бра́тския любве́ связу́еми, лю́дие слове́нстии в ми́ре пребыва́ют и благоче́стии, и да изба́вит их Госпо́дь от враг ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и вся́каго зла. Предстоя́щим же зде и моля́щимся пред честно́ю ра́кою моще́й твои́х испроси́, преподо́бне, у Го́спода на́шего Иису́са Христа́ вся, я́же ко спасе́нию проше́ния, да вси с тобо́ю непреста́нно прославля́ем всесвято́е и́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

Молитва вторая преподобному Иоанну Рыльскому

О, преподо́бне о́тче Иоа́нне, уго́дниче Госпо́день преизря́дный, те́плый наш засту́пниче и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́ и умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́ во всем житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ моея́ помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, и ны́не, и при́сно, и во ве́ки веко́в. Ами́нь.