1 ноября

Канон преподобному Иоанну Рыльскому, иной

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

И тропа́рь преподо́бнаго, гла́с 1:

Покая́ния основа́ние, прописа́ние умиле́ния, о́браз утеше́ния, духо́внаго соверше́ния равноа́нгельное житие́ твое́ бы́сть, преподо́бне. В моли́твах у́бо и в поще́ниих и в слеза́х пребыва́вый, о́тче Иоа́нне, моли́ Христа́ Бо́га о душа́х на́ших.

Кано́н, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Запе́в: Преподо́бне о́тче Иоа́нне, моли́ Бо́га о на́с.

Да́ждь ми́, блаже́нне, кре́пкую с высоты́ по́мощь и просвеще́ние ра́зума, я́ко да равноа́нгельное твое́ на земли́ житие́ восхвалю́, и́мже исто́чник чуде́с яви́лся еси́.

Запе́в: Преподо́бне о́тче Иоа́нне, моли́ Бо́га о на́с.

Иже в Лива́не ке́дру уподо́бился еси́, доброде́тели боже́ственныя преумно́жив, и, я́ко дре́во насади́вся при исхо́дищих воды́ живы́я, осеня́еши ны́не неду́жных благода́тию.

Сла́ва: Вы́спрь житие́ на́ше я́ко слы́шав и на небесе́х пребыва́ние, оста́вил еси́ зе́млю оте́чества твоего́, и ми́ра кра́сная презре́л еси́, и к вы́шней жи́зни впери́лся еси́.

И ны́не, богоро́дичен: Егда́ восхожда́ху небе́снии уми́ ле́ствицу Иа́ковлю и низхожда́ху, Твое́ стра́шное рождество́ тогда́ та́йно яви́ша, Богоро́дице, и́мже у́бо Бо́г на зе́млю сни́де, да челове́ки на не́бо вознесе́т.

Пе́снь 3.

Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Запе́в: Преподо́бне о́тче Иоа́нне, моли́ Бо́га о на́с.

Не роди́вся от по́хоти плотски́я, я́ко безпло́тен пожи́л еси́ на земли́, и ча́до бы́л еси́ Вы́шняго благода́тию, и я́ко жре́бий оте́ческий прия́л еси́ угото́ванное Ца́рство Того́ возлю́бльшим.

Запе́в: Преподо́бне о́тче Иоа́нне, моли́ Бо́га о на́с.

Благода́тию Ду́ха исполня́я за́поведь изра́ильтяном Моисе́йскую, очи́стил еси́ те́ло и ду́шу де́ньми мно́жайшими, на го́ру возше́д, и я́ко безпло́тен пребыва́л еси́ та́мо, и боговиде́ния сподо́бился еси́.

Сла́ва: От ю́ности украси́вся ра́зумом, Соломо́нову му́дрость стяжа́л еси́ и, всю́ ми́ра сего́ сла́стную пи́щу премину́в, а́лчбою и боле́знию потща́лся еси́ нетле́нную получи́ти, всеблаже́нне.

И ны́не, богоро́дичен: Госпо́дь пе́рстом написа́ в Тебе́ Сло́во Безнача́льное, я́коже в глави́зне кни́жней, Всепе́тая; те́мже припа́даю Ти́, моля́ся, в кни́зе живо́тней мя́ написа́ти, грехо́в рукописа́ние растерза́ющи.

По си́х а́бие пое́м:

Спаси́ от бе́д рабы́ твоя́, преподо́бне о́тче Иоа́нне, я́ко вси́ по Бо́зе к тебе́ прибега́ем, я́ко неруши́мому столпу́ и предста́телю.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Запе́в: Преподо́бне о́тче Иоа́нне, моли́ Бо́га о на́с.

Виде́ние Дании́лово разсмотри́в, я́ко от горы́ отто́ржеся ка́мень несече́нный и в пра́х и́дольское сокруши́ мучи́тельство, обре́л еси́ на горе́ краеуго́льный Ка́мень, Христа́, зло́бу всю́ сокруша́юща.

Запе́в: Преподо́бне о́тче Иоа́нне, моли́ Бо́га о на́с.

Огне́м да не опали́тся содо́мским, Ангел Ло́тови повелева́ше на горе́ спасти́ся, ты́ же, ра́вное тому́ рве́ние восприи́м и на го́ру возше́д, та́мо жи́ти изво́лил еси́ и пла́мене стра́стнаго избежа́л еси́.

Сла́ва: Смире́нно после́довал еси́ жезло́м позва́вшему тя́ Па́стырю и, я́ко овча́ незло́биво, зе́лием го́рним пита́лся еси́; ны́не же на па́жити ра́йстей поко́ище обре́т, на вода́х пи́щных насыща́ешися.

И ны́не, богоро́дичен: Вкуси́ Ада́м печа́ль плода́ дре́вняго, жену́ послу́шав, Ты́ же, Чи́стая, гла́с арха́нгела восприи́мши, — се́ Раба́ Госпо́дня! — возопи́вши и Бо́га поро́ждши, ра́дость в ми́р ввела́ еси́.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Запе́в: Преподо́бне о́тче Иоа́нне, моли́ Бо́га о на́с.

Якоже Ангел на земли́ пребы́в, воздержа́нием Крести́телю уподо́бился еси́, пусты́нному воспита́нию, преподо́бне; ны́не же хле́бом Ангельским пита́яся по пи́санному, насы́ти ду́ши на́ша благода́тию.

Запе́в: Преподо́бне о́тче Иоа́нне, моли́ Бо́га о на́с.

Твое́ дерзнове́ние, е́же к Бо́гу, неора́нно прозябы́й слану́ток пропове́дует, о́тче, и́мже самаго́ себе́ ди́вно пита́л еси́, я́коже естество́м пло́ти обложе́ннаго, и и́же к тебе́ приходя́щия.

Сла́ва: Истинная наде́жда не посрами́ тебе́, блаже́нне, уве́девша бу́дущую сла́ву, к не́йже недосто́йна вмени́л еси́, я́же на земли́ боре́ния и дерзнове́нно к по́стническим страсте́м устреми́лся еси́.

И ны́не, богоро́дичен: Хи́тростию зми́я Ада́м боже́ственныя ри́зы совлече́ся и в ри́зу ко́жаную оде́яся; от Тебе́ же пло́ть прии́м, Зижди́тель мо́й дебельства́ пло́ти совлече́ мя и в пе́рвую мя́ па́ки оде́жду оде́я.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Запе́в: Преподо́бне о́тче Иоа́нне, моли́ Бо́га о на́с.

Све́том пе́рвым облиста́вся, бы́л еси́ свети́льник, блаже́нне, и Ангелом подо́бник, безпреста́нно поя́ в моли́твах всено́щных Еди́наго Бо́га, Его́же и сы́н благода́тию яви́лся еси́.

Запе́в: Преподо́бне о́тче Иоа́нне, моли́ Бо́га о на́с.

Волну́ющееся бу́рею мо́ре жития́ оста́вил еси́, погружа́ющее нехотя́щих на не́бо вознести́ся, и вся́ преше́л еси́ мирски́я прило́ги, на́г бе́гая искуше́ний лука́ваго.

Сла́ва: Обре́л еси́ Бо́га, все́льшася в тя́, не да́в поко́я скраниа́ма твои́ма, ни ве́ждома твои́ма дрема́ния, и, я́ко безпло́тен во пло́ти пожи́в, в небе́сныя хра́мы всели́лся еси́.

И ны́не, богоро́дичен: Иска́пай ка́пли щедро́т, о́блаче небе́сный, Чи́стая Де́во, я́коже руно́ прии́мшая до́ждь и я́коже ка́плю — Бо́га во чре́ве, и страсте́й мои́х пото́ки изсуши́.

Конда́к, гла́с 2.

Моля́щим тя́ тепле́йший засту́пниче и прося́щим скоре́йший послу́шателю, преподо́бне о́тче Иоа́нне, приими́ моле́ние на́ше и Христа́ умоли́ поми́ловати на́с, Еди́наго Преблага́го и Многоми́лостиваго.

И стихи́ра, гла́с 6:

Моле́бное пе́ние творя́ще богоно́сному отцу́, прииди́те, припаде́м к честне́й ра́це моще́й его́, из глубины́ серде́чныя взыва́юще: уго́дниче Христо́в, преподо́бне Иоа́нне, не пре́зри ма́лаго на́шего пе́ния, недосто́йными устна́ми тебе́ приноси́маго, но приими́ моле́ние на́ше и низпосли́ на́м свы́ше бога́тую по́мощь, от напа́стей ны́ избавля́я твои́ми к Бо́гу моли́твами, всеблаже́нне и досточу́дне о́тче.

Пе́снь 7.

Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Запе́в: Преподо́бне о́тче Иоа́нне, моли́ Бо́га о на́с.

Хра́брый ревни́тель бы́в Илии́ проро́ку, на стра́сти устреми́лся еси́ ору́жием поста́ и, на горе́ водворя́яся, а́лчбою па́че челове́к по́стнически умертви́л еси́ сра́мныя по́мыслы.

Запе́в: Преподо́бне о́тче Иоа́нне, моли́ Бо́га о на́с.

Бо́жия пути́ пра́ваго восхоте́в, и мирска́го жела́ния отве́ргся, и на ка́мени разу́мнем стопы́ души́ твоея́ утверди́в, ка́мене собла́зна при стези́ все́х избавля́еши и прило́гов искуше́ний.

Сла́ва: Окрест ра́ки моще́й твои́х то́чатся чудеса́ исцеле́ний приходя́щим, Бо́гу бо коне́чне угоди́л еси́, ве́рующим обеща́вшему ре́ки из чре́ва источи́ти Боже́ственныя благода́ти.

И ны́не, богоро́дичен: Глубину́ слы́шим прему́дрости, Пречи́стая, я́ко Созда́вшаго руко́ю Ада́ма и от ребра́ Еву Сотво́ршаго Сло́ва воплоти́ла еси́, Иже, в ре́бра на Кресте́ пробожде́н, ро́д челове́ческий обнови́.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Запе́в: Преподо́бне о́тче Иоа́нне, моли́ Бо́га о на́с.

Иску́с врага́ доблему́дренно отрази́в во бра́ни кре́пцей и непобеди́мь яви́вся бесо́вскими кова́рствы, побе́дными венцы́ увяза́лся еси́ и, Го́сподеви ны́не предстоя́, мо́лишися о воспева́ющих тя́.

Запе́в: Преподо́бне о́тче Иоа́нне, моли́ Бо́га о на́с.

Сме́ртней кончи́не приспе́вшей вре́менней, оста́вил еси́ труды́ по́стническия, и, ве́чный поко́й восприи́мь, Бо́гу предстои́ши, и, посреди́ луче́й неизрече́ннаго Божества́ сия́я, о на́с мо́лишися.

Сла́ва: Ра́вне дре́внему патриа́рху Иа́кову ва́р дневны́й поне́с и сту́день нощну́ю претерпе́в, возше́л еси́ ле́ствицею доброде́телей на высоту́ боговиде́ния, о́тче Иоа́нне, чуде́с исто́чниче.

И ны́не, богоро́дичен: Агнице Пречи́стая, к Тебе́ прибега́ю: ду́шу мою́, страстьми́ оскверне́нную, вода́ми омы́й сле́зными, вода́ми благода́ти Ду́ха Бо́жия глубо́кий ка́л гре́х челове́ческих омы́вшая.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Запе́в: Преподо́бне о́тче Иоа́нне, моли́ Бо́га о на́с.

Изя́щныя по́чести по́двига твоего́ восприя́л еси́ терпе́нием твои́м, его́же ра́ди со Ангелы водворя́ешися и за наготу́ теле́сную в небе́сную ри́зу обле́клся еси́, в по́стницех всеизря́дне.

Запе́в: Преподо́бне о́тче Иоа́нне, моли́ Бо́га о на́с.

Любому́дрых собо́рище, ви́ждь, каковы́ми благода́тьми воздае́т Бо́г и́стинно Того́ добро́ты вожделе́вшим: ни естество́ бо, ни вре́мя телесе́ Иоа́нна пустыннолю́бнаго победи́, точа́щаго чудеса́ да́же доны́не.

Сла́ва: Ели́ко си́ла скрижа́ли се́рдца моего́ распросте́р, вся́ написа́х мно́гия твоя́ благода́ти, но досто́йна ничесо́же принесо́х тебе́; те́мже молю́ тя́: ве́ру приими́ и любо́вь, преблаже́нне.

И ны́не, богоро́дичен: Вонми́ Дави́дских гу́слей провеща́нию, Дщи́ Царе́ва, и приклони́ у́хо Твое́. Люде́й Твои́х не забу́ди, но уще́дри, Деви́це, и́же непреста́нно Тя́ сла́вящих.

Тропари́ преподо́бнаго, [гла́с 2]:

Ангела земна́го в пе́снех почти́м, Иоа́нна, и граждани́на небе́снаго, при́сно предстоя́щаго в све́тлостех со Ангельскими ли́ки престо́лу Святы́я Тро́ицы.

От мно́гих мои́х и лю́тых грехо́в немощству́ет те́ло, немощству́ет и душа́ моя́: к тебе́ прибега́ю, моля́ся, преподо́бне, спаси́ мя, окая́ннаго, в си́х погиба́юща.

Ско́ро приими́ мольбы́ на́ша, пла́чь же и сле́зы недосто́йных ра́б твои́х, и при́сно о на́с моли́ся преблаго́му Бо́гу, Иоа́нне блаже́нне, Бо́жий уго́дниче.

Пое́м вси́ приле́жно пе́снь тебе́ ны́не, всеблаже́нне Иоа́нне, и вопие́м: от бе́д на́с изба́ви и бу́ди на́м помо́щник, честну́ю твою́ па́мять ве́рно почита́ющим.

Вся́ Ангелов во́инства, Предте́че Госпо́день, апо́столов ли́че ве́сь и все́х святы́х чи́ни, приле́жно с Богоро́дицею благо́му Бо́гу о на́с при́сно моли́теся.

Моли́тва:

О, преподо́бне о́тче Иоа́нне, уго́дниче Госпо́день преизря́дный, те́плый на́ш засту́пниче и везде́ в ско́рбех ско́рый помо́щниче! Помози́ мне́, гре́шному и уны́лому, в настоя́щем се́м житии́ и умоли́ Го́спода Бо́га дарова́ти ми́ оставле́ние все́х мои́х грехо́в, ели́ко согреши́х от ю́ности моея́ во все́м житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ моея́ помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя́ возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха, и твое́ ми́лостивное предста́тельство, ны́не, и при́сно, и во ве́ки веко́в.