1 ноября

Канон иной преподобному Иоанну Рыльскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Покая́ния основа́ние, прописа́ние умиле́ния, о́браз утеше́ния, духо́внаго соверше́ния равноа́нгельное житие́ твое́ бы́сть, преподо́бне. В моли́твах у́бо и в поще́ниих и в слеза́х пребыва́вый, о́тче Иоа́нне, моли́ Христа́ Бо́га о душа́х на́ших.

Канон глас 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Запе́в: Преподо́бне о́тче Иоа́нне, моли́ Бо́га о на́с.

Присносу́щным све́том ны́не озаря́яся и со Ангелы ве́сь све́тел предстоя́ Вседе́телю, се́рдца моего́ омраче́ние прожени́, о́тче, я́ко да све́тло пропове́даю жития́ твоего́ до́блести.

Запе́в: Преподо́бне о́тче Иоа́нне, моли́ Бо́га о на́с.

Вкорени́вшееся в души́ твое́й жела́ние неизрече́нныя красоты́ Христо́вы стяжа́в, чу́вственныя две́ри все́м тле́нным и мимотеку́щим затвори́л еси́ и мно́гими по́двиги получи́л еси́ жела́емое.

Сла́ва: Вели́кое смотре́ние Бо́жие от утро́бы ма́терни тя́ освяти́ и сосу́д показа́ благоприя́тен Свята́го Ду́ха, те́мже от младе́нства при́сно бы́л еси́ стра́хом Бо́жиим огражда́емь.

И ны́не, богоро́дичен: Та́инства стра́шнаго яви́лася еси́ Де́лательница, разстоя́щая соедини́вши существа́: Бо́га бо безпло́тнаго, заче́нши, пло́тию сопряже́нна произвела́ еси́ во еди́ном лице́, во двою́ же естеству́, Чи́стая.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Запе́в: Преподо́бне о́тче Иоа́нне, моли́ Бо́га о на́с.

Бо́дренно очи́ма души́ твоея́ ви́дев, я́ко вся́ су́етна су́ть, отве́ргл еси́ мирску́ю красоту́, и ни́щим име́ния твоя́ разда́л еси́, и сокро́вище некра́домое на небеси́ стяжа́л еси́.

Запе́в: Преподо́бне о́тче Иоа́нне, моли́ Бо́га о на́с.

Боже́ственных послу́шав за́поведей, в смире́нии пребыва́л еси́ все́ житие́ твое́ и, я́ко непотре́бен, во оте́чествии твое́м вмене́н бы́л еси́ поноше́нием, и́стинныя сла́вы жела́нием пита́яся.

Сла́ва: Отврати́л еси́ плещи́ твоя́ от ми́ра и возве́л еси́ в го́ры о́чи твои́, ча́я по́мощи отту́ду Боже́ственныя; те́мже от горы́ святы́я Своея́ услы́ша тя́ Бо́г и вознесе́ тя́ чудесы́.

И ны́не, богоро́дичен: Вопие́т Дави́д богооте́ц к Деви́це: у́хо Твое́ приклони́, Дщи́ Царе́ва, и ви́ждь люде́й Твои́х озлобле́ние, гла́сы услы́ши блажа́щих Тя́ и Твою́ велича́ющих ми́лость.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Запе́в: Преподо́бне о́тче Иоа́нне, моли́ Бо́га о на́с.

Воззва́ тя Госпо́дь от Сио́на, живы́й во Иерусали́ме, я́коже дре́вле пра́отца Авраа́ма, изы́ти от земли́ оте́чества твоего́ повелева́я, ты́ же после́довал еси́ словеси́ Его́ со усе́рдием.

Запе́в: Преподо́бне о́тче Иоа́нне, моли́ Бо́га о на́с.

Свети́льник положи́л еси́ нога́ма твои́ма зако́нная повеле́ния и све́т стезя́м твои́м, те́м во све́те изы́де пра́вда твоя́ и, я́коже полу́дне, всему́ ми́ру возсия́л еси́.

Сла́ва: Оде́жда пло́ти твоея́ ри́за ко́жаная бы́сть, в ню́же обо́лкся, умертви́л еси́ страстна́я взыгра́ния, о́тче, и дебельство́ ко́жное ри́зы Ада́мския до конца́ истни́л еси́.

И ны́не, богоро́дичен: Уподо́би Тя́ Дави́д голуби́це, посре́бренне криле́ иму́щей и злата́я междура́мия, Препе́тая; те́мже покры́й мя́ от стре́л, летя́щих во дни́, и изба́ви мя́.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Запе́в: Преподо́бне о́тче Иоа́нне, моли́ Бо́га о на́с.

Собла́зн при стези́ угото́вав, препя́ти души́ твоея́ тече́ние диа́вол тща́шеся и разбо́йники посла́ отгна́ти тя́ от пеще́ры пе́рвыя; ты́ же, я́ко за Христа́ гони́мь, бе́гая, ра́довался еси́.

Запе́в: Преподо́бне о́тче Иоа́нне, моли́ Бо́га о на́с.

Слеза́ми оче́с твои́х зе́млю напои́в пребога́тно, прозябе́ слану́ток тебе́ неора́нно, преблаже́нне, и́мже немощно́му те́лу твоему́ ма́лое утеше́ние подава́л еси́, Пищеда́телю благода́рственная воспева́я.

Сла́ва: Зако́ном Христо́вым науче́нный, о пи́щи и оде́жди не попе́клся еси́, но, небе́сных пти́ц де́ло исполня́я, в дре́во ду́пленное всели́лся еси́ и без покро́ва на мно́ги дни́ пребы́л еси́.

И ны́не, богоро́дичен: Ке́дры лива́нския превозше́дшая, Горо́ ту́чная и конце́м блиста́ющая доброде́телию, си́лою без руки́ от Тебе́ отсе́кшагося Ка́мене сокруши́ и́долы страсте́й мои́х и ду́шу утверди́, Блага́я.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Запе́в: Преподо́бне о́тче Иоа́нне, моли́ Бо́га о на́с.

Обновле́нное ра́лом по́стническим се́рдце твое́ восприи́м, Бо́г в пусты́ни неора́нней пло́д тебе́ произрасти́.

Запе́в: Преподо́бне о́тче Иоа́нне, моли́ Бо́га о на́с.

От мно́гих ле́т диа́вол му́чаше челове́ка, его́же ты́, к тебе́ приведе́нна, вско́ре исцели́л еси́ моли́твою.

Сла́ва: Илия́ проро́к го́рстию муки́ вдови́цу пита́ше со ча́ды, ты́ же, чудотворя́, ма́лою пи́щею напита́л еси́ пасу́щих.

И ны́не, богоро́дичен: От язы́ка льсти́ваго изба́ви мя́, Ма́ти Бо́жия Благосе́рдая, неду́гов же и скорбе́й, ра́дость да́рующи се́рдцу моему́.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Запе́в: Преподо́бне о́тче Иоа́нне, моли́ Бо́га о на́с.

Поще́нием мно́гим и бо́дренною моли́твою, нестяжа́нием и сле́зными исто́чники украси́л еси́ тво́й душе́вный до́м, о́тче, Сердцеве́дец же, обре́т, всели́ся в не́м, испо́лнив его́ Свои́х дарова́ний.

Запе́в: Преподо́бне о́тче Иоа́нне, моли́ Бо́га о на́с.

Победи́л еси́ тмочи́сленная кова́рства врага́, стезе́ю те́сною ше́ствовав, и Подвигополо́жнику Го́споду угоди́л еси́, от Него́же вене́ц прии́м, чуде́с исто́чник стяжа́л еси́ све́тлое воздая́ние.

Сла́ва: Боже́ственная ра́ка моще́й твои́х, я́коже ра́й, благоуха́ет, па́че ины́х арома́т, чу́вства все́х притека́ющих и сердца́ наслажда́ющи, преподо́бне, и явле́ние иму́щи нема́лое у́мных дарова́ний.

И ны́не, богоро́дичен: Не обре́те Бо́г святе́йшия па́че Тебе́, смы́слом и те́лом де́вствующия, его́же ра́ди вожделе́ добро́ты Твоя́ и в Тя́ всели́ся, от пречи́стых крове́й пло́ть прии́м, да со земны́ми поживе́т.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Запе́в: Преподо́бне о́тче Иоа́нне, моли́ Бо́га о на́с.

В телеси́ ме́ртвеннем твоему́ па́че естества́ терпе́нию дивя́щеся, Ангельстии ли́цы оби́тель тебе́ на небеси́ све́тло предугото́ваша, в ню́же тя́ и прия́ша, от земли́ преста́вльшагося.

Запе́в: Преподо́бне о́тче Иоа́нне, моли́ Бо́га о на́с.

Боже́ственное дарова́ние чудесы́ открыва́ет сокрове́нное в земли́ те́ло твое́ де́вственное, Иоа́нне преблаже́нне, и исто́чник излива́ет благода́ти все́м ве́рным, твоея́ по́мощи прося́щим.

Сла́ва: Словесы́ да воспое́тся Бо́г Триипоста́сный, Еди́н Сы́й по существу́: Сло́во, Еже к Бо́гу, Оте́ц, Иже в не́дрех Того́ нося́й, и Ду́х Боже́ственный, от Отца́ исходя́й.

И ны́не, богоро́дичен: Се́, я́коже изреко́ша злата́я Твоя́ и пречи́стая уста́, Богоро́дице, блажа́т Тя́ вси́ ро́ди ве́рно, поне́же Бо́г Тя́ возвели́чи и херуви́м честне́йшую яви́ Тя.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Запе́в: Преподо́бне о́тче Иоа́нне, моли́ Бо́га о на́с.

Боже́ственную твою́ Це́рковь исто́чник чуде́с яви́ Бо́г па́че, не́жели дре́вле иуде́ом о́вчую купе́ль: не еди́н бо, но безчи́сленное мно́жество, приходя́ще, прие́млют исцеле́ния, преблаже́нне Иоа́нне.

Запе́в: Преподо́бне о́тче Иоа́нне, моли́ Бо́га о на́с.

Жи́зни нетле́нныя на земли́ кро́тких сподо́бился еси́ и со Ангелы водворе́ния, сно́м же на мно́зе вре́мени усну́в, во гро́бе я́ко жи́в явля́ешися и неруши́мь, богоблаже́нне Иоа́нне.

Сла́ва: Благода́ть твою́ и благи́х хоте́ние свы́ше на́м да́руй, по си́ле тебе́ словеса́ истка́вшим хвале́ния от жела́ния серде́чнаго, Иоа́нне прехва́льне, чуде́с неоску́дный исто́чниче.

И ны́не, богоро́дичен: Ле́ствице небе́сная, све́щниче златы́й и трапе́зо пречи́стая, от земли́ на не́бо возведи́ мя, сия́нием Сы́на Твоего́ освети́ мя и хле́бом Боже́ственным насы́ти, се́рдце мое́ утвержда́ющи пе́ти Тя́ во ве́ки.

Молитва преподобному Иоанну Рыльскому

Земна́я звездо́ чуде́сная, я́же от преде́л Сре́дца гра́да возсия́вшая, и све́щниче живы́й, и́же всю зе́млю Бо́лгарскую све́том пра́вды Бо́жия осиява́яй, преди́вный в по́стницех уго́дниче Бо́жий, о́тче Иоа́нне, преподо́бных у́бо ра́дование, Це́ркве Бо́лгарския украше́ние, ве́ры Правосла́вныя кре́пкое утвержде́ние, ско́рый помо́щниче к тебе́ с ве́рою и любо́вию притека́ющим и вели́кий пред Го́сподем о всех нас предста́телю! Приими́, преблаже́нне, моле́ния на́ша и умоли́ Христа́ Бо́га на́шего, я́ко да вси, тобо́ю неви́димо охраня́еми и сою́зом бра́тския любве́ связу́еми, лю́дие слове́нстии в ми́ре пребыва́ют и благоче́стии, и да изба́вит их Госпо́дь от враг ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и вся́каго зла. Предстоя́щим же зде и моля́щимся пред честно́ю ра́кою моще́й твои́х испроси́, преподо́бне, у Го́спода на́шего Иису́са Христа́ вся, я́же ко спасе́нию проше́ния, да вси с тобо́ю непреста́нно прославля́ем всесвято́е и́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.