18 ноября.

Канон святым отцем Поместнаго Собора Церкве Русския

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́м отце́м, глас 6:

Днесь благода́ть Свята́го Ду́ха нас собра́,/ просла́вити отцы́ Собо́ра Це́ркве Ру́сския/ с Первосвяти́телем Моско́вским Ти́хоном,/ и́же ве́рныя лю́ди земли́ на́шея/ на по́двиг испове́дания пра́выя ве́ры благослови́ша// и страда́нии свои́ми Це́рковь на́шу просла́виша.

Тропа́рь свято́му Патриа́рху Ти́хону, глас 1:

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́// и мир Бо́жий лю́дем испроси́.

Ин тропа́рь свято́му Патриа́рху Ти́хону, глас 3:

В годи́ну тя́жкую Бо́гом избра́нный/ в соверше́нней свя́тости и любви́ Бо́га просла́вил еси́,/ во смире́нии вели́чие, в простоте́ и кро́тости си́лу Бо́жию явля́я,/ положи́л еси́ ду́шу за Це́рковь, за лю́ди своя́,/ испове́дниче свя́те Патриа́рше Ти́хоне,/ моли́ Христа́ Бо́га,/ Ему́же сораспя́лся еси́,// и ны́не спасти́ зе́млю Ру́сскую и па́ству твою́.

Велича́ние:

Велича́ем вас,/ святи́телю о́тче Ти́хоне/ и святи́и отцы́ Собо́ра Це́ркве Ру́сския,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Стихи́ра, глас 6:

Многострада́льнии Руси́ Святы́я моли́твенницы,/ мно́гия ду́ши заблу́ждшия ко Христу́ обрати́вшии,/ новому́ченицы, испове́дницы и пра́ведницы,/ Патриа́рха Ти́хона самови́дцы и послу́шницы,/ заве́том того́ ве́рно после́довавшии,/ лише́ния и ско́рби претерпе́вшии,/ моли́теся ны́не о чту́щих ве́рою и любо́вию// собо́рную па́мять ва́шу.

Кано́н, глас 6.

Песнь 1

Ирмос: Жезло́м проро́ка разсече́ся/ дре́вле мо́ре Чермно́е,/ прехожде́ние волн разделя́я та́инственно/ в поги́бель во́инству мучи́телеву, ве́рным же во спасе́ние,/ песнь богокра́сную воспева́ющим:// сла́вно просла́вися Христо́с Бог наш.

Припе́в: Святи́и отцы́ на́ши, моли́те Бо́га о нас.

Мгло́ю безбо́жия помрачи́ся Русь Правосла́вная, отступи́ша бо мно́зи от ве́ры оте́ческия и отпадо́ша Небе́снаго Ца́рствия. Оба́че Госпо́дь украси́ Це́рковь на́шу, и́менем Патриа́рха Ти́хона нарица́емую, со́нмом му́чеников и испове́дников Свои́х.

Припе́в: Святи́и отцы́ на́ши, моли́те Бо́га о нас.

Смотре́ние Бо́жие утаи́ся от люде́й, умо́м помраче́нных, ю́зником ца́рственным руга́ющихся; егда́ же слух убие́ния царе́ва ве́рных дости́же, Патриа́рх со отцы́ Свяще́ннаго Собо́ра моли́тву сотвори́ша, со дерзнове́нием злоде́йство облича́юще.

Припе́в: Святи́и отцы́ на́ши, моли́те Бо́га о нас.

О святи́телю Влади́мире, пра́ведный и тве́рдый душе́ю, ве́рный сы́не Це́ркве Ру́сския! Убие́ние твое́ у стен оби́тели Киево-Пече́рския положи́ нача́ло поминове́ния собо́рнаго но́вых му́ченик. Ны́не же, Престо́лу Бо́жию предстоя́, моли́ся Го́сподеви спасти́ и просвети́ти ду́ши на́ша.

Припе́в: Святи́и отцы́ на́ши, моли́те Бо́га о нас.

Святи́тель Пе́рмский Андрони́к да почти́тся, ве́ры Христо́вы свети́льник горя́й, самоде́ржцу отве́рженну сострада́лец ве́рный, па́ствы своея́ учи́тель усе́рдный, му́ченик, еще́ жив сый, в земли́ погребе́нный, и, я́ко зе́рно пшени́чное, плод стори́цею принесы́й.

Припе́в: Святи́и отцы́ на́ши, моли́те Бо́га о нас.

Заключе́ние темни́чное Андрони́ково слы́шавше, мучениколю́бцы святи́тель Васи́лий Черни́говский, и Матфе́й, пе́рмских па́стырей воспита́тель, и Алекси́й, ве́ры Христо́вы побо́рник, повеле́ние собо́рное потща́шася испо́лнити об изъявле́нии убие́ния священному́ченика Пе́рмскаго. Последи́ же за ве́рность и любо́вь к собра́ту своему́ му́ченических венце́в сподо́бишася.

Припе́в: Святи́и отцы́ на́ши, моли́те Бо́га о нас.

Святи́телю Христо́в Гермоге́не, гра́да Сара́това в ве́ре утвержде́ние, тобо́льския па́ствы му́дрый наста́вниче, безбо́жных преда́телей же и крамо́льников обличи́телю. Ты, ца́рственныя ю́зники кресто́м на страда́ния проро́чески благослови́в, сам смерть му́ченическую чрез утопле́ние прия́л еси́.

Сла́ва Отцу́ и Сы́ну и Свято́му Ду́ху:

Варлаа́ме пречу́дне, и́ноков похвало́ и благочи́ния церко́внаго ревни́телю! Ты я́ко Афо́н други́й Бе́лую го́ру показа́л еси́, и преде́лы Ура́льския по́двиги твои́ми благода́тно освяти́л еси́. Му́ченический же вене́ц прие́м, ны́не моли́твами твои́ми оби́тель твою́ укрепля́еши.

И ны́не и при́сно и во ве́ки веко́в. Ами́нь.

Богородичен: Я́ко апо́столов иногда́, успе́ние Твое́ чад Це́ркве Ру́сския собра́, Введе́ние же Твое́ богоизбра́ннаго Патриа́рха во храм Госпо́день введе́, от всех воспева́емая, Преблага́я Ма́ти Бо́га на́шего.

Песнь 3

Ирмос: На тве́рдем ве́ры Твоея́ ка́мени/ помышле́ние утверди́в души́ моея́, утверди́, Го́споди:/ Тя бо и́мам, Бла́же,// прибе́жище и утвержде́ние.

Припе́в: Святи́и отцы́ на́ши, моли́те Бо́га о нас.

Благоче́стие на Руси́ погуби́ти возжеле́вше, сло́ву гро́зному Патриа́рха гони́телие не внима́ху и но́вых му́ченик кровь пролива́ху, оба́че сия́ яви́ся Це́ркве Ру́сския утвержде́ние.

Припе́в: Святи́и отцы́ на́ши, моли́те Бо́га о нас.

Да почти́м, ве́рнии, святи́теля Ти́хона, печа́льника гони́мых и па́ствы ру́сския утвержде́ние, и́же, власти́тели злы́я облича́я и поги́бель тем предрека́я, за стра́ждущих и во у́зах су́щих небоя́зненно предста́тельствует.

Припе́в: Святи́и отцы́ на́ши, моли́те Бо́га о нас.

Тща́ние и благонра́вие твое́ в де́лех церко́вных уве́дев, священному́чениче сла́вне Лавре́нтие, архиере́я тя святи́тель Ти́хон поставля́ет, оба́че же без ми́лости гони́ма тебе́ ви́дя, судия́м непра́ведным возопи́: за ку́ю вину́ чи́стаго на смерть осуди́сте?

Припе́в: Святи́и отцы́ на́ши, моли́те Бо́га о нас.

Христо́ви свиде́телие и пропове́дницы святи́телие Ефре́м со Никола́ем, му́ки прие́мше, ра́дуются ны́не на Небеси́, с ни́миже и ты́сящи ве́рных сликовству́ют, я́ко не убоя́шася заступи́ти отцы́ своя́ пред гони́тели.

Припе́в: Святи́и отцы́ на́ши, моли́те Бо́га о нас.

Му́жество и кре́пость почти́м, бра́тие, святи́телей Митрофа́на Астраха́нскаго и Плато́на Ре́вельскаго, и́же лю́тых страда́ний не уклони́шася, но муче́ние и убие́ние му́жественно претерпе́ша.

Припе́в: Святи́и отцы́ на́ши, моли́те Бо́га о нас.

Прича́стницы Страсте́й Христо́вых яви́стеся, святи́и Ти́хоне Воро́нежский и Сильве́стре О́мский, я́ко даде́ся вам благода́ть, не то́чию во Христа́ ве́ровати, но и по Нем страда́ти.

Сла́ва Отцу́ и Сы́ну и Свято́му Ду́ху:

О священному́чениче Си́моне, благоле́пия дре́вняго ревни́телю, единове́рия дру́же и еди́нства Це́ркве Ру́сския побо́рниче! Дерзнове́нною твое́ю моли́твою, я́ко друг Христо́в, ра́ны церко́вныя уврачу́й.

И ны́не и при́сно и во ве́ки веко́в. Ами́нь.

Богородичен: Братоуби́йство крова́вое слы́шавше, не́цыи, я́ко безу́мнии, реко́ша: несть Бог. Оба́че попече́нием Христа́ Жизнода́вца и моли́твами Ма́тере Его́ Пресвяты́я врата́ а́дова Це́рковь Ру́сскую не одоле́ша.

Седа́лен, глас 2:

Но́вии страстоте́рпцы Це́ркве Ру́сския,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем.

Сла́ва, и ны́не, Богоро́дичен, глас 4:

Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще:/ Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.

Песнь 4

Ирмос: Удиви́ся Твой ра́зум от мене́,/ услы́шавшу пресла́вная вели́чия смотре́ния Твоего́,/ укрепи́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́.

Припе́в: Святи́и отцы́ на́ши, моли́те Бо́га о нас.

О свя́те Патриа́рше наш Ти́хоне! Ка́ко досто́йно ублажи́м ве́рность тебе́ сохра́ньших, егда́ лжепа́стырие, гони́тельми науща́емии, я́ко власти́телие зако́ннии в Це́ркви, твоего́ отрече́ния иска́ху?

Припе́в: Святи́и отцы́ на́ши, моли́те Бо́га о нас.

Гла́ду бы́вшу во Оте́честве на́шем, от братоуби́йства погиба́ющем, па́стыри увещава́л еси́, святи́телю Ти́хоне, Го́спода умоля́ти, да омы́ется земля́ Ру́сская слеза́ми покая́ния и Святы́ми Та́йнами да обнови́тся.

Припе́в: Святи́и отцы́ на́ши, моли́те Бо́га о нас.

У́зы и суди́ще, заплева́ние и клеветы́, преда́тельство и суде́й лука́вых сме́ртное изрече́ние претерпе́в, о Це́ркви и па́стве боле́зновал еси́, святи́телю Петрогра́дский Вениами́не, му́ченики возлюби́вый изде́тска. С ни́миже ны́не Бо́га прославля́еши.

Припе́в: Святи́и отцы́ на́ши, моли́те Бо́га о нас.

Мона́шество и свяще́нство в час испыта́ния Це́ркве Ру́сския прия́ти не убоя́вся, о́тче богому́дре Се́ргие, священному́ченика Вениами́на сподви́жник ве́рный яви́лся еси́. С ни́мже и осужде́ние непра́ведное и смерть му́ченическую претерпе́л еси́.

Припе́в: Святи́и отцы́ на́ши, моли́те Бо́га о нас.

Похвало́ Солове́цкая, священному́чениче Иларио́не, Це́ркве Ру́сския свети́льниче, Патриа́рха Ти́хона ве́рный спобо́рниче, крамолы́ лжеобнови́телей ре́вностный обличи́телю, исцели́ и ны́не ра́ны церко́вныя.

Припе́в: Святи́и отцы́ на́ши, моли́те Бо́га о нас.

Преподо́бне о́тче Алекси́е, наста́вников духо́вных насле́дниче, уче́ний святооте́ческих сокро́вищнице и мно́гих му́ченик воспита́телю! Не преста́й Зоси́мову пу́стынь храни́ти и мона́шество правосла́вное в по́двизех духо́вных утвержда́ти.

Сла́ва Отцу́ и Сы́ну и Свято́му Ду́ху:

Не солга́ся проро́чество преподо́бнаго Амвро́сия, ста́рца оби́тели О́птинския: прее́мник бо его́ Исаа́кий разоре́ния тоя́ самови́дец быва́ет и, крест свой му́жественне прие́м, в годи́ну лю́тую сме́рти за Христа́ сподобля́ется.

И ны́не и при́сно и во ве́ки веко́в. Ами́нь.

Богородичен: Кня́зю ми́ра, порабо́тити Це́рковь тща́щуся, да́же до уз и сме́рти противоста́ша отцы́ святи́и и все упова́ние свое́ по Бо́зе на Де́ву Пречи́стую возложи́ша.

Пе́снь 5

Ирмос: Свет и мир Твой, Христе́,/ рабо́м Твои́м пода́ждь, Бла́же:/ Ты бо еси́ всех мир,/ и сою́з любве́, Человеколю́бче,/ Тя позна́вшим у́тро све́тлое,// и Влады́ку вои́стину, и Го́спода.

Припе́в: Святи́и отцы́ на́ши, моли́те Бо́га о нас.

Собо́рное веле́ние исполня́я, святы́й Патриа́рх прее́мники себе́ указу́ет, в та́йне завеща́ние храня́ да́же до вре́мене преставле́ния своего́, и сим показу́ет лжесобо́ров бе́гати, созыва́емых веле́нием вла́сти безбо́жныя.

Припе́в: Святи́и отцы́ на́ши, моли́те Бо́га о нас.

Умира́ние тя́жкое за Це́рковь Ру́сскую на всяк день претерпева́л еси́, Патриа́рше Ти́хоне, мно́гажды от безбо́жных искуша́емь, но чист от греха́ яви́лся еси́, па́ству от волко́в соблюды́й непоро́чно.

Припе́в: Святи́и отцы́ на́ши, моли́те Бо́га о нас.

Пра́ведно и благоче́стно жити́е твое́ бысть, святи́телю Кири́лле. А́ще и во изгна́нии мно́гая ле́та пребы́л еси́, оба́че собра́тий твои́х утверди́л еси́ на ка́мени ве́ры Христо́вы, смерть же твоя́ в земли́ пусты́нней му́ченичество за ве́ру правосла́вную яви́ся.

Припе́в: Святи́и отцы́ на́ши, моли́те Бо́га о нас.

Ле́стию и нече́стием тща́щимся премени́ти ве́ру святу́ю оте́ческую противуста́л еси́ небоя́зненно, свя́те Агафа́нгеле, сего́ ра́ди изгна́н был еси́, да уве́дят ве́рнии, я́ко вре́мя приспе́ за пра́вду Христо́ву страда́ти.

Припе́в: Святи́и отцы́ на́ши, моли́те Бо́га о нас.

О кре́посте несокруши́мая, святи́телю о́тче Пе́тре! Страда́нием бо лю́тым Це́рковь Ру́сскую от раско́ла храни́л еси́, я́ко ве́рный до сме́рти Патриа́рха Ти́хона послу́шник, не вне́мля глаго́лом мучи́телевым зову́щим, е́же сни́ти со креста́.

Припе́в: Святи́и отцы́ на́ши, моли́те Бо́га о нас.

О вели́кая оби́теле Солове́цкая, коли́ко новому́ченик в стена́х твои́х по́двиг понесо́ша и страда́ния прия́ша! От ни́хже святы́х отце́в Собо́ра ны́не восхва́лим: после́дняго настоя́теля Вениами́на, в пустынножи́тельстве от злоде́ев убие́ннаго, архиере́и Евге́ния и Васи́лия, еще́ же Михаи́ла пресви́тера и ины́я, и в богосло́вцех изря́дна, сим спострада́вша, му́ченика Иоа́нна.

Сла́ва Отцу́ и Сы́ну и Свято́му Ду́ху:

Колькра́ты беззако́ннии иска́ху уби́ти тя, святи́телю Иоа́нне, чистоты́ Правосла́вия ревни́теля, раско́ла ху́льнаго пе́нзенскаго обличи́теля, земли́ Латви́йския те́плаго моли́твенника, в не́йже му́ченичества венце́м украси́лся еси́.

И ны́не и при́сно и во ве́ки веко́в. Ами́нь.

Богородичен: Слу́жбу Бо́жию в ме́стех потае́нных и́же за ве́ру страда́льцы соверша́юще, о́браз Твой, на дщи́цах и ка́менех ма́лых пи́санный и на холсте́х истка́нный, о Богома́ти, я́ко зе́ницу о́ка храня́ху и благогове́йне Тя почита́ху. 

Песнь 6

Ирмос: Зве́рю бе́здны предае́тся/ проро́к Ио́на, глубине́ морско́й,/ прообразу́я Твое́, Сло́ве, тридне́вное воста́ние,/ тем и взыва́ше:/ из глубины́ преиспо́дния// возведи́ живот мой, Благоутро́бне.

Припе́в: Святи́и отцы́ на́ши, моли́те Бо́га о нас.

В ле́то три́десять седьмо́е ве́ка го́рькаго ве́лие губи́тельство на Руси́ бысть, и о́ви лю́дие наси́льством умро́ша, о́ви же в го́рьких рабо́тах погибо́ша. Те́мже, ве́рнии, моли́твенно просла́вим та́ко уму́ченныя сподви́жники святи́теля Ти́хона Патриа́рха.

Припе́в: Святи́и отцы́ на́ши, моли́те Бо́га о нас.

Дре́вле в ко́емждо гра́де Руси́ едва́ еди́н мучи́тель обрета́шеся. Ка́ко же в ле́та гоне́ния безбо́жнаго толи́ка тьма душегу́бцев во́льных воста́? Ка́ко сы́нове а́довы сме́рти преда́ти святы́я во́ины Христо́вы не устраши́шася?

Припе́в: Святи́и отцы́ на́ши, моли́те Бо́га о нас.

В земли́ Зыря́нстей, во гра́де скорбе́й зе́льных, го́рьких рабо́т, гла́да и уничиже́ния, мно́гия му́ки претерпе́л еси́, священному́чениче Анато́лие, архиере́ю Оде́сский, о ни́хже по́слежде самови́дцы с пла́чем пове́даша, ве́рность твою́ Ева́нгелию свиде́тельствующе.

Припе́в: Святи́и отцы́ на́ши, моли́те Бо́га о нас.

Сама́рския преде́лы, в ни́хже до́бльственно потруди́лся еси́, ны́не с на́ми сла́вят мно́гая страда́ния твоя́, архипа́стырю Алекса́ндре, засту́пниче и прибе́жище гони́мых, я́ко Христа́ ра́ди и смерть прия́л еси́ за дру́ги своя́.

Припе́в: Святи́и отцы́ на́ши, моли́те Бо́га о нас.

Житие́м и словесы́ Христа́ пропове́дал еси́, Серафи́ме священному́чениче преди́вный, в преде́лех Хо́лмских, Орло́вских и Смоле́нских му́дростию и любо́вию па́ству уча́ и от собла́зн огражда́я. Те́мже вене́ц тебе́ терно́вен исплете́ся.

Припе́в: Святи́и отцы́ на́ши, моли́те Бо́га о нас.

Градо́в Росси́и Вели́кия и Ма́лыя пропове́дницы, Патриа́рха же Ти́хона сы́нове ве́рнии, святи́телие Никоди́м и Проко́пий досто́йно да почту́тся, и́же по́двиг служе́ния архиере́йскаго, сугу́бейший по́двига, всем ве́рным о́бщаго, му́ченичеством увенча́ша, я́ко богому́дрии.

Сла́ва Отцу́ и Сы́ну и Свято́му Ду́ху:

Священноиспове́дника пресви́тера Василия почти́м, во изгна́нии в преде́лех Арха́нгельских живо́т сконча́вша, свяще́нники же Госпо́дни просла́вим, Илию́, сострада́льца Фадде́ю, Тверско́му архипа́стырю, Константи́на же, Во́логды моли́твенника, убие́нныя в годи́ну, крове́й испо́лнену.

И ны́не и при́сно и во ве́ки веко́в. Ами́нь.

Богородичен: Законопресту́пен и сме́рти пови́нен, реко́ша на Сы́на Твоего́ челове́цы нечести́вии, Ему́же сострада́ла еси́, Богороди́тельнице Пречи́стая, та́кожде и оклевета́нныя служи́тели Его́, я́ко Ма́ти Благоутро́бная, утеша́ла еси́.

Конда́к, глас 3:

Гоне́ния и страда́ния да́же до сме́рти претерпева́юще/ и правосла́внаго ца́рства Ру́сскаго разоре́ние облича́юще,/ отцы́ Собо́ра Це́ркве на́шея/ к покая́нию ча́да ве́рная призыва́ют// и стоя́ти тве́рдо за ве́ру Христо́ву благословля́ют.

Ин конда́к, свято́му Патриа́рху Ти́хону, глас 5:

Служе́ние твое́ испо́лнено сто́на и го́ря,/ священному́чениче Ти́хоне, Патриа́рше наш,/ но был еси́ пра́вило ве́ры и о́браз кро́тости,/ побежда́я ра́спри и разделе́ния;/ си́лою смире́ния и любве́ Христо́вы противоста́л еси́ зло́бе сатани́нстей,/ возгла́вил еси́ до́брое во́инство но́вых му́чеников,// Це́рковь Ру́сскую утверди́вших во ве́ки.

И́кос:

Хотя́й Госпо́дь ве́рныя подви́гнути к прославле́нию по́двига святы́х новому́чеников и испове́дников Це́ркве Ру́сския, дом Бо́жий, святи́телем Влади́миром созда́нный и от безбо́жных в годи́ну лю́тых гоне́ний пору́ганный, благоле́пно па́ки возставля́ет, подвиза́я в нем ико́ну святы́х отце́в Свяще́ннаго Собо́ра изобрази́ти, я́ко да ли́ки их ви́дяще, поуча́ются в по́вестех дея́ний сла́вных и страда́ний безме́рных всех, свято́му Патриа́рху Ти́хону после́дующих и и́менем того́ в годи́ну гоне́ний нарица́емых. И́хже по́двигом мир в Це́ркви на́шей утверди́ся.

Песнь 7

Ирмос: О́троцы в Вавило́не дре́вле/ во огни́ не опали́шася,/ на му́ки бо дерзну́вше за ве́ру оте́ческую,/ в о́ней непоколе́блеми пребы́ша,/ и зре́ти Го́спода и пе́ти Тому́ сподо́бишася:// Изба́вителю Бо́же, благослове́н еси́.

Припе́в: Святи́и отцы́ на́ши, моли́те Бо́га о нас.

На ме́сте, иде́же ны́не храм новому́чеников Бу́товских устро́ися, три́десять ты́сящ ю́зник в ле́та зла́я убие́ни бы́ша, и́же, на смерть за Христа́ ведо́ми, ве́рою взыва́ху: Бо́же, благослове́н еси́.

Припе́в: Святи́и отцы́ на́ши, моли́те Бо́га о нас.

Списа́теля жития́ Саро́вскаго чудотво́рца священному́ченика Серафи́ма днесь восхва́лим, и́же, в боле́зни сый и ста́рости масти́тей, вскрай ро́ва Бу́товскаго мучи́тели приво́дится и убие́ние неви́нно прие́млет, воспева́я: Изба́вителю Бо́же, благослове́н еси́.

Припе́в: Святи́и отцы́ на́ши, моли́те Бо́га о нас.

Ве́рность храня́ святи́телю Петру́, в скита́нии нево́льнем су́щему, страда́ния мно́гая претерпе́л еси́, архипа́стырю гра́да Влади́мира, свя́те Нико́лае, те́мже и виде́ние ли́ка твоего́ ве́рным бысть утвержде́ние. Ты же, смерть за Христа́ до́блественне прия́ти угото́вився, взыва́л еси́: Бо́же, благослове́н еси́.

Припе́в: Святи́и отцы́ на́ши, моли́те Бо́га о нас.

Днесь почти́тся и пресви́тер Се́ргий, слу́жбы Бо́жия усе́рдный рачи́тель, на путь свяще́нства Патриа́рхом Ти́хоном благословле́нный, и́же, красото́ю слове́с церко́вных окриля́емь, посреде́ гоне́ния лю́таго до́бре ше́ствова и, му́ченичества дости́гнув, благода́рственно Христу́ воззва́: Изба́вителю Бо́же, благослове́н еси́.

Припе́в: Святи́и отцы́ на́ши, моли́те Бо́га о нас.

В прему́дрости кни́жней ум изостри́в, некни́жному ученику́ Петру́, верхо́вному апо́столу, подража́ти потща́лся еси́, Иоа́нне, служи́телю престо́ла Бо́жия, глас же ева́нгельский, е́же отве́ргнутися себе́ и взя́ти крест свой, услы́шав, со дерзнове́нием на по́двиг му́ченический устреми́лся еси́, зовы́й: Христе́, Спа́се ми́ра, благослове́н еси́.

Припе́в: Святи́и отцы́ на́ши, моли́те Бо́га о нас.

Се́ргия преподо́бнаго от ю́ности послу́шник изря́ден был еси́, а́вво Крони́де богому́дре! Ты бо, попече́ние усе́рдное о оби́тели Тро́ицтей, я́ко игу́мен, явля́я, о и́ноцех ея́ во благоде́нствии и злоде́нствии ру́це моли́твенно воздвиза́л еси́, с ни́миже ны́не во Ца́рствии Бо́жии взыва́еши: О́тче, Сы́не и Святы́й Ду́ше, благослове́н еси́.

Сла́ва Отцу́ и Сы́ну и Свято́му Ду́ху:

Во Аме́рице да́льней и в первопресто́льнем гра́де Москве́ святи́телю Ти́хону помо́щника ве́рнаго, Алекса́ндра пресви́тера почти́м, близ гро́ба патриа́ршаго к му́ченичестей кончи́не при́званнаго, свинце́м устреле́ннаго и огне́м сожже́ннаго, ны́не же пою́щаго: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: О Ма́ти Бо́жия, Преми́лостивая! Кто бы возмо́гл есть из люде́й ве́рных у́зы, бие́ния, уничиже́ния и лю́тую смерть претерпе́ти, а́ще бы не Ты предстоя́ла еси́ стра́ждущим, ско́рби и страда́ния му́ченическая утоля́ющи и науча́ющи пе́ти: Спаси́телю, Христе́ Бо́же, благослове́н еси́.

Песнь 8

Ирмос: Преподо́бнии Твои́ о́троцы/ в пещи́ Херуви́мы подража́ху,/ Трисвяту́ю песнь воспева́юще:/ благослови́те, по́йте// и превозноси́те во вся ве́ки.

Припе́в: Святи́и отцы́ на́ши, моли́те Бо́га о нас.

Ве́лия страда́ния претерпе́ли есте́, Оте́чества на́шего церко́внии избра́нницы, вы бо вои́стину яви́лися есте́ я́ко соль земли́ Ру́сския и утвержде́ние ве́ры правосла́вныя в ней во ве́ки.

Припе́в: Святи́и отцы́ на́ши, моли́те Бо́га о нас.

Се́рдце твое́, о Русь Свята́я, про́йде ору́жие во́ев герма́нских, твоя́ преде́лы плени́ти восхоте́вших, оба́че сы́нове твои́, жизнь за тебе́ положи́вшии, вку́пе со страда́льцы, во у́зах уму́ченными, Христу́ песнь но́ву воспева́ют во ве́ки.

Припе́в: Святи́и отцы́ на́ши, моли́те Бо́га о нас.

Исчи́слил еси́ дни страда́ний и сострада́льцев имена́, суды́ Бо́жия благослови́в, святи́телю Афана́сие, зане́, во у́зах сый, святы́х ру́сских иску́сный песносло́вец яви́лся еси́, о новому́ченицех же почи́вших моли́твенник усе́рдный, с ни́ми Бо́га сла́виши во вся ве́ки.

Припе́в: Святи́и отцы́ на́ши, моли́те Бо́га о нас.

Юне́йший от отце́в Собо́ра Це́ркве Ру́сския в пещи́ гоне́ний искуша́емь быва́ет и я́ко исто́чник богому́дрых уче́ний в земли́ Влади́мирстей явля́ется, священноиспове́дник Великодво́рский Петр, любве́ Христо́вы испо́лненный, я́же не изся́кнет во ве́ки.

Припе́в: Святи́и отцы́ на́ши, моли́те Бо́га о нас.

Вся по и́мени помяну́вше отцы́ святы́я, в ли́це новому́ченик просла́вленныя, и о про́чих моли́твы вознесе́м ко Го́споду, и́хже жития́ и по́двизи безве́стни суть, да ми́лость улуча́т от Бо́га, созда́вшаго ве́ки.

Сла́ва Отцу́ и Сы́ну и Свято́му Ду́ху:

Мо́щи твоя́ огне́м откры́шася, святи́телю о́тче Ти́хоне, Патриа́рше святы́й, оба́че обря́щем ли мо́щи мно́гих сподви́жник твои́х, в ме́стех безве́стных и непрохо́дных погребе́нных, и́хже па́мять нетле́нна во ве́ки?

И ны́не и при́сно и во ве́ки веко́в. Ами́нь.

Богородичен: И́мже пе́ние надгро́бное никто́же принесе́, Сама́ предста́ла еси́, Чи́стая, с ли́ки а́нгельскими; и́мже беззако́нное мучи́тельство безве́стну кончи́ну угото́ва, Сама́ отве́рзла еси́, Препе́тая, ра́йския вхо́ды, да ца́рствуют со Христо́м во ве́ки.

Песнь 9

Ирмос: Сло́вом Сло́во Еди́на Ро́ждшая,/ ерети́ческая уста́ загради́ злоре́чивая./ И́но но́во не́бо, некра́домый рай, Пречи́стая,// Тя велича́ем.

Припе́в: Святи́и отцы́ на́ши, моли́те Бо́га о нас.

В па́мять святи́теля Ти́хона Патриа́рха соше́дшеся, ве́рнии, и вся сподви́жники его́, и́же от Собо́ра святы́х отце́в, помяну́вше, на ме́сте, иде́же ти́и бя́ху со́брани, Христа́ велича́ем.

Припе́в: Святи́и отцы́ на́ши, моли́те Бо́га о нас.

Ерети́ческая злоре́чивая уста́ загради́вшии, святи́и отцы́ новому́ченицы, Собо́ров вселе́нских догма́ты в сердца́х ва́ших сохрани́ли есте́, те́мже вас велича́ем.

Припе́в: Святи́и отцы́ на́ши, моли́те Бо́га о нас.

Святы́я Руси́ собо́ри преста́ша иногда́, с патриа́ршеством упраздни́вшеся вку́пе, но глас собо́рный, я́ко крин, посреде́ ка́мене прозя́бший, в годи́ну бе́дствия возвести́ся.

Припе́в: Святи́и отцы́ на́ши, моли́те Бо́га о нас.

Уста́ми проро́к, Го́споди, Изра́иля наставля́я, лю́дем, проро́ки изби́вшим, царя́ поставля́еши; лю́дем же, правосла́внаго царя́ отве́ргшим, гоне́ния посыла́еши, да во́ли Твоея́ позна́ние покая́нием обря́щут.

Припе́в: Святи́и отцы́ на́ши, моли́те Бо́га о нас.

Це́ркве уста́вы собо́рне определи́вше, по́слежде же сию́ гони́му ви́девше, судьба́м Бо́жиим непостижи́мым удиви́стеся, о святи́и отцы́ новому́ченицы, по́двиги свои́ми Христа́ возвели́чившии.

Припе́в: Святи́и отцы́ на́ши, моли́те Бо́га о нас.

Нарекли́ есте́ прозорли́во, святи́и отцы́, страда́льцы за ве́ру Христо́ву новому́ченики и испове́дники Це́ркве Ру́сския и па́мять ежеле́тную сим уста́вили есте́. Ны́не же с ни́ми вку́пе велича́етеся.

Сла́ва Отцу́ и Сы́ну и Свято́му Ду́ху:

О́тче, Сы́не и Ду́ше Всесвяты́й, при́зри с Небесе́ на Це́рковь Ру́сскую, в пра́вой ве́ре сию́ соблюди́, да и мы, ча́да ея́, вои́стину Тя велича́ем.

И ны́не и при́сно и во ве́ки веко́в. Ами́нь.

Богородичен: Догма́ты храни́ти и за́поведи Христо́вы с любо́вию твори́ти наста́ви нас, Богоневе́сто Влады́чице, да и мы, ве́ру непоро́чно соблю́дше, в Ца́рствие Бо́жие вход улучи́ти возмо́жем.

Свети́лен:

Свет Отца́, и Сы́на, и Ду́ха Свята́го/ всели́ся в ду́шы ва́ша, о святи́и отцы́ Свяще́ннаго собо́ра, новому́ченицы и испове́дницы,/ сего́ ра́ди па́мять ва́шу со святи́телем Патриа́рхом Ти́хоном вку́пе прославля́ем. 

Сла́ва, и ны́не, Богородичен:

Свет Христо́в яви́ся всем Тобо́ю, Ма́ти Де́во,/ всели́ся бо во утро́бу Твою́ Сло́во па́че сло́ва,/ сего́ ра́ди род наш пе́сньми немо́лчными Тя велича́ет.

Моли́тва святи́телю Ти́хону, Патриа́рху Всеросси́йскому, испове́днику

О па́стырю до́брый, святи́телю о́тче наш Ти́хоне, Патриа́рше Це́ркве Ру́сския! Ты мно́гия труды́ в жи́зни вре́менней подъя́л еси́. Простота́ и любы́ твоя́, дух ми́рен и кро́ток, та́же и сло́во, благода́ти испо́лненное, по се́рдцу бы́ша лю́дем земли́ на́шея, и́же и предложи́ша тя Бо́гу на по́двиг вели́кий и многотру́дный. Егда́ же богобо́рцы и хули́телие воздвиго́ша на Це́рковь Христо́ву гоне́ние, ему́же не бе ра́внаго от ве́ка, Сам Госпо́дь Вседержи́тель избра́ и соде́ла тя Патриа́рха. Ты же, святи́телю, сраспина́яся Христу́ и Це́ркви Его́, со ско́рбию лю́ди к покая́нию призыва́л еси́. И кто изочте́т страда́ния твоя́? Заточе́ние бо темни́чное, клеветы́ и суды́ гони́телей со смире́нием претерпева́я, враго́м Христо́вым моли́твою сле́зною и кро́ткою противуста́л еси́ и архиере́и, пресви́теры, мона́хи и мирски́я на по́двиг му́ченический благослови́л еси́.

Те́мже мо́лим тя, святи́телю Христо́в, бу́ди нам дерзнове́нный засту́пник и не оста́ви ны, немощна́я ча́да твоя́. Испроси́ у Го́спода нам грехо́в проще́ние, ве́ры утвержде́ние, скорбе́й осла́бу, по́мыслов чистоту́, да, в покая́нии и моли́тве пребыва́юще, украси́м себе́ целому́дрием, любо́вию и смире́нием, и та́ко Ца́рствия Небе́снаго дости́гнем, иде́же с тобо́ю сподо́бимся прославля́ти Святу́ю Тро́ицу, Отца́, и Сы́на, и Свята́го Ду́ха. Ами́нь.

И́на моли́тва, святы́м отце́м, на Собо́ре Це́ркве Ру́сския потруди́вшимся

О святи́и уго́дницы Бо́жии, со́нма но́вых му́чеников и испове́дников Це́ркве Ру́сския прича́стницы, на Собо́ре Це́ркве Ру́сския в годи́ну ско́рби до́бре потруди́вшиися и му́жески за ве́ру Христо́ву в ле́та гоне́ния лю́таго пострада́вшии! Помина́юще труды́ на ни́ве Бо́жией, ва́ми подъя́тыя, и по́двиги во страда́нии за ве́ру сверше́нныя, славосло́вим доброде́тели ва́ша, воспева́ем братолю́бие, прославля́ем любо́вь ко Спаси́телю Христу́ и Це́ркви Его́ Святе́й, и, я́ко ча́да ва́ша по ду́ху, мо́лим: научи́те нас ра́зум ева́нгельский приле́жне стяжа́ти, на вся́кое де́ло благо́е потре́бен, помози́те во испыта́ниих кре́пость ве́ры име́ти, сподо́бите нас насле́дники по́двига ва́шего бы́ти, да неосужде́нно Ца́рствия Бо́жия дости́гнем, иде́же ку́пно с ва́ми просла́вим Тро́ицу Единосу́щную во ве́ки веко́в. Ами́нь.