18 ноября.

Канон святым мученикам Галактиону и Епистимии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́на святы́х. Гла́с 8.

Пе́снь 1.

Ирмос: Истря́сшему в мо́ри мучи́тельство фарао́не и Изра́иля су́шею наста́вльшему, пои́м Христу́, я́ко просла́вися во ве́ки.

Припев: Святии мученицы, моли́те Бо́га о нас.

Животворя́щей Тро́ице, всеблаже́нне, предстоя́ ра́достно и, све́тлыми мо́лниями просвеща́емь, испроси́ просвеще́ние соверша́ющим твою́ святу́ю па́мять.

Припев: Святии мученицы, моли́те Бо́га о нас.

Ду́хом Святы́м распали́в твою́ ду́шу, пожже́ стра́сти плотски́я посто́м и погаси́л еси́ о́гнь безбо́жия кро́вными струя́ми.

Сла́ва Отцу́ и Сы́ну и Свято́му Ду́ху:

Ро́д, и бога́тство, и держа́ву Христа́ ра́ди оста́вив и взе́м, преподо́бне, кре́ст, мона́шествовал еси́ боголе́пно со Еписти́миею блаже́нною, твое́ю сопру́гою.

И ны́не и при́сно и во ве́ки веко́в. Ами́нь.

Богородичен: Засту́пнице скорбя́щих, спасе́ние и наде́жде ненаде́ющихся, Богоро́дице Всепе́тая, моли́ приле́жно изба́вится на́м от бе́д.

Пе́снь 3.

Ирмос: Утверже́й сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Припев: Святии мученицы, моли́те Бо́га о нас.

Дневну́ю звезду́ от непло́дных чре́сл, му́ченице, тя́ произведе́ ро́ждшая тя́, но́щь безбо́жия разоря́ющу.

Припев: Святии мученицы, моли́те Бо́га о нас.

Чистото́ю любве́ одержи́мь, де́вствовати научи́л еси́ с тобо́ю сопру́жницу; с не́юже пострада́в зако́нно, му́чениче Галактио́не, просла́вися.

Сла́ва Отцу́ и Сы́ну и Свято́му Ду́ху:

Оле жены́, преди́ искуше́ния му́ченическая научи́вшияся вся́ приклю́чшаяся открове́нием Боже́ственным, и низложи́вши мучи́теля.

И ны́не и при́сно и во ве́ки веко́в. Ами́нь.

Богородичен: Умерщвле́на страстьми́ вре́дными, жи́ва сотвори́ мя, Живо́т ро́ждшая, разори́вшаго, Отрокови́це, всю́ сме́ртную си́лу.

Седа́лен, гла́с 4.

Посто́м украси́в твоея́ зри́тельное души́, луча́ми же страда́ния просвеща́еши ве́рныя, Галактио́не блаже́нне. Те́м тво́й святы́й и светоно́сный де́нь ве́рою соверша́юще, благоче́стно тебе́ вопие́м: я́ко име́я дерзнове́ние к Бо́гу, моли́ спасти́ся на́м.

Сла́ва, и ны́не, Богородичен:

Обнови́ла еси́, Чи́стая, боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к жи́зни нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

КрестоБогородичен:

Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ние прегреше́ний на́м дарова́ти.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Святии мученицы, моли́те Бо́га о нас.

Агнцы слове́снии яви́стеся, па́стырю Всецарю́ я́вственно после́дующе, и в небе́сней огра́де, венцено́сцы, с му́ченики всели́стеся.

Припев: Святии мученицы, моли́те Бо́га о нас.

Сопряже́ние избра́нно яви́стеся, разделя́юще бразду́ честна́го и до́браго свиде́тельства, и соде́ласте кла́с, в жи́тницах небе́сных соблюда́емь.

Сла́ва Отцу́ и Сы́ну и Свято́му Ду́ху:

По Христе́ усека́еми, до́блии, но́зе, и главы́, и но́гти, и ру́ки, искорени́сте ле́сть нече́стия и победоно́сцы яви́стеся.

И ны́не и при́сно и во ве́ки веко́в. Ами́нь.

Богородичен: Язы́к земны́х досто́йне не мо́жет воспе́ти Тя́, Бо́жию Роди́тельницу я́вльшуюся, Всенепоро́чная Пречи́стая, христиа́н прибе́жище.

Пе́снь 5

Ирмос: Утренююще вопие́м Ти́: Го́споди, спаси́ ны́. Ты́ бо еси́ Бо́г на́ш, ра́зве Тебе́, ино́го не ве́мы.

Припев: Святии мученицы, моли́те Бо́га о нас.

Яко млеко́м, воспита́вся по́стнически, Галактио́не, во исполне́ние соверше́нное Христо́вых страсте́й дости́гл еси́.

Припев: Святии мученицы, моли́те Бо́га о нас.

Умо́м очище́нным ви́дела еси́, Еписти́мие, взята́ превысо́ко святы́х на поко́ище.

Сла́ва Отцу́ и Сы́ну и Свято́му Ду́ху:

Му́чеников соводворе́ние получи́сте в вы́шних, безсме́ртную сла́ву, преподобному́ченицы, обрето́сте.

И ны́не и при́сно и во ве́ки веко́в. Ами́нь.

Богородичен: Родила́ еси́ в ле́то Безле́тнаго, Пречи́стая, бы́вша Челове́ка, да спасе́т челове́ка.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́, Бо́же на́ш.

Припев: Святии мученицы, моли́те Бо́га о нас.

Ба́нею боже́ственнаго просвеще́ния к безсопру́жным приступи́сте, кро́вию последи́ кре́щшеся, страда́льцы, соверше́ннейше.

Припев: Святии мученицы, моли́те Бо́га о нас.

Мно́гим жесто́чеством ду́шу просвети́в, посто́м, красну́ яви́л еси́, Галактио́не, све́том страда́ния.

Сла́ва Отцу́ и Сы́ну и Свято́му Ду́ху:

На колесни́це кро́ви ва́шея все́дше, му́ченицы, и пу́ть постиго́сте небе́сный, в не́мже почива́ете.

И ны́не и при́сно и во ве́ки веко́в. Ами́нь.

Богородичен: Равноче́стна родила́ еси́ Отцу́ Сы́на, Неискусобра́чная, и млеко́м пита́ла еси́ Пита́теля все́х па́че ума́.

Конда́к, гла́с 2.

Му́ченик Христо́вых полко́м причто́стеся до́бре хра́брствовавшим, све́тло подвиза́вшеся, Галактио́не сла́вне, с честно́ю сопру́жницею и сострада́вшею тебе́ Еписти́миею. Еди́ному Бо́гу непреста́нно моли́теся о все́х на́с.

Пе́снь 7.

Ирмос: Ангелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Припев: Святии мученицы, моли́те Бо́га о нас.

Уневе́стившися Сло́ву, Еписти́мие, Боже́ственному, тя́ обнажи́ти тща́щияся ослепи́ла еси́ неве́рныя, и пока́явшияся Све́та ча́да яви́ла еси́.

Припев: Святии мученицы, моли́те Бо́га о нас.

Пожре́ти бого́м безду́шным отре́кшеся отню́д, и́стинному Бо́гу на́шему и ду́ш Влады́це же́ртва, му́ченицы, честна́я принесо́стеся.

Сла́ва Отцу́ и Сы́ну и Свято́му Ду́ху:

На о́гнь муче́ния приведе́н, Галактио́не, кро́вными пото́ки безбо́жия пла́мень, му́чениче, погаси́л еси́, му́дре, вопия́: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: С вы́шними все́ми небе́сными чи́нми велегла́сно Тя́ вси́, Богороди́тельнице Отрокови́це, Тобо́ю спасе́ннии, блажи́м.

Пе́снь 8.

Ирмос: Безнача́льнаго Царя́ сла́вы, Его́же трепе́щут небе́сныя си́лы, по́йте, свяще́нницы, лю́дие, превозноси́те во вся́ ве́ки.

Припев: Святии мученицы, моли́те Бо́га о нас.

Равноче́стны чистото́ю и ра́вни поще́нием и страда́нием су́ще, ра́вныя от Бо́га получи́сте да́ры, до́блии страда́льцы.

Припев: Святии мученицы, моли́те Бо́га о нас.

Сочета́ние нетле́нием сохрани́сте, возжеле́вше Ангельское житие́, с ни́миже ра́достно, Госпо́дни страстоно́сцы, лику́ете досто́йно.

Сла́ва Отцу́ и Сы́ну и Свято́му Ду́ху:

Стоя́ пред суди́щем му́жески, пропове́дал еси́, му́чениче, Еди́наго Го́спода Бо́га и́стиннаго и многобо́жия разруши́л еси́ шата́ние.

И ны́не и при́сно и во ве́ки веко́в. Ами́нь.

Богородичен: Яко че́стен и превы́шший престо́л, су́щую Бо́га Вы́шняго воспое́м, лю́дие, еди́ну по Рождестве́ Ма́терь и Де́ву.

Песнь 9

Ирмос: Проявле́нное на горе́ законополо́жнику во огни́ и купине́ Рождество́ Присноде́вы в на́ше ве́рных спасе́ние, пе́сньми немо́лчными велича́ем.

Припев: Святии мученицы, моли́те Бо́га о нас.

Сто́лп яви́лся еси́, богому́дре, небе́сный, Це́ркве основа́ние и сто́лп благоче́стия, и му́чеников и по́стников, Галактио́не, утвержде́ние и боже́ственное удобре́ние.

Припев: Святии мученицы, моли́те Бо́га о нас.

Процвела́ еси́ в де́вственных цве́тех, я́коже шипо́к, и во удо́лиих му́ченических благово́нствующи, я́ко кри́н, Еписти́мие де́во, му́ченице Госпо́дня, те́м тя́ согла́сно ублажа́ем.

Сла́ва Отцу́ и Сы́ну и Свято́му Ду́ху:

Све́том Трисо́лнечныя све́тлости озаре́ни, к Тому́ преидо́сте ны́не, сы́нове Све́та я́вльшеся, моли́теся просвеще́ние дарова́ти, му́ченицы, ве́рою хва́лящим вы́.

И ны́не и при́сно и во ве́ки веко́в. Ами́нь.

Богородичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющим, Тя́ ны́не на моли́тву подвиза́ем, да изба́вимся от вра́г на́ших.

Молитва

Святи́и му́ченицы Галактио́не и Еписти́мие! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.