17 ноября.

Канон святителю Павлу, митрополиту Тобольскому, Печерскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

Правосла́вия наста́вниче, Це́ркве Христо́вы побо́рниче, пра́вды нелицеприя́тный провозве́стниче, архиере́ов богодухнове́нное удобре́ние, Па́вле чудотво́рче, высото́ю испове́дания твоего́ вся́ ны́ удивля́еши, чудесы́ же твои́ми благода́тно просвеща́еши; подви́жниче духо́вный, моли́ Христа́ Бо́га спасти́ся душа́м на́шим.

Стихира, гла́с 6:

Боже́ственная благода́ть осеня́ет гро́б тво́й, святи́телю о́тче на́ш Па́вле, и де́йствует во спасе́ние приходя́щих к тебе́ с ве́рою: я́ко боля́щия исцеля́еши, разсла́бленныя укрепля́еши, слепы́я просвеща́еши и бе́сы от челове́к прогоня́еши, чудеса́ излива́еши прикаса́ющимся моще́м твои́м святы́м; те́мже тя́, целе́бниче безме́здный, почита́ем и ублажа́ем.

Кано́н святи́теля, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святителю отче Павле, моли́ Бо́га о нас.

Приими́, свя́тче Бо́жий, пе́ние хвале́бное, от и́стиннаго усе́рдия тебе́ приноси́мое, и простри́ моли́твенныя дла́ни твоя́ ко Го́споду, прося́ на́м осия́ния благода́тнаго свы́ше, да твое́ богоуго́дное житие́ ве́рно просла́вим, Бо́гу, в тебе́ просла́вльшемуся, побе́дную пе́снь воспева́я.

Припев: Святителю отче Павле, моли́ Бо́га о нас.

От юности твоея́, о́тче Па́вле, по́стническое житие́ возлюби́л еси́, уче́нии богодухнове́нными просвети́в тво́й смы́сл, соде́лался еси́ сосу́д избра́н Бо́жия благода́ти, я́же тя́ возвы́си на степе́нь святи́тельскую, я́ко досто́йнаго Бо́гу побе́дную пе́снь воспева́ти.

Сла́ва Отцу́ и Сы́ну и Свято́му Ду́ху:

Юношеския стра́сти обузда́в воздержа́нием, в Ла́вре Пече́рстей благи́й яре́м Христо́в на ра́мо твое́ возложи́л еси́, Па́вле преподо́бне, и́нок бы́в нелицеме́рен, во смире́нии ду́ха Бо́гу побе́дную пе́снь воспева́вый.

И ны́не и при́сно и во ве́ки веко́в. Ами́нь.

Богородичен: Царя́ Небе́снаго, на херуви́мех седя́щаго, и серафи́мы повелева́ющаго, престо́л яви́лася еси́, Богоро́дице, к Нему́же дерзнове́ние Ма́тернее име́ющи, проси́ на́м у Его́ бла́гости грехо́в проще́ния и жития́ исправле́ния, да тебе́ благода́рное пе́ние воспева́ем.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святителю отче Павле, моли́ Бо́га о нас.

Естества́ челове́ческаго не́мощь познава́я, моли́твами непреста́нными к Бо́гу, си́лу свы́ше прия́л еси́, по́двиги духо́вныя непреткнове́нно проходи́ти, на ка́мени ве́ры утверди́в, о́тче Па́вле, твое́ боголюби́вое се́рдце.

Припев: Святителю отче Павле, моли́ Бо́га о нас.

Ра́зум тво́й богосло́вием Правосла́вныя ве́ры украси́л еси́, Па́вле богоно́се, соиме́нному ти́ апо́столу Христо́ву внима́я с любо́вию, и того́ уче́ния полага́я я́ко пра́вило жи́зни, дости́гл еси́ исполне́ния духо́внаго, в Бо́зе утверди́в твоя́ помышле́ния.

Сла́ва Отцу́ и Сы́ну и Свято́му Ду́ху:

К исто́чнику сла́достному ева́нгельскаго уче́ния, я́ко еле́нь на исто́чники водны́я, поте́кл еси́, Па́вле богому́дре, и я́ко дре́во, при вода́х возра́сшее, пло́д мно́г о Христе́ прине́сл еси́ Святе́й Це́ркви, я́же е́сть сто́лп и утвержде́ние и́стины.

И ны́не и при́сно и во ве́ки веко́в. Ами́нь.

Богородичен: Во мно́гия и лю́тыя беззако́ния впа́дшия ны́, Влады́чице Преблага́я, изба́ви от пле́на страсте́й, и в страну́ безстра́стия приведи́, руко́ю Твое́ю держа́вною, утверди́в на́ша сердца́ на ка́мени за́поведей Сы́на Твоего́ и Бо́га.

Седа́лен, гла́с 6:

Помышля́я тя́, святи́телю, в черто́зе небе́снем Царя́, Христа́ и Бо́га, сла́вою и че́стию увенча́ннаго, уязвля́юся се́рдцем, тоя́ же добро́ты жела́ющи, но увы́ мне́ окая́нному, чу́ждому де́л твоего́ жития́ блага́го, недосто́йному спасе́ния ве́чнаго, ты́ са́м, преблаги́й о́тче, воззри́ на мя́ погиба́ющаго, и ру́ку по́мощи твоея́ мне́ простри́, бога́тствы твои́ми воспо́лни мою́ душе́вную ску́дость, и покажи́ мя́ насле́дника Ца́рства Христо́ва.

Сла́ва, и ны́не, Богородичен:

Свя́зан мно́гими ны́не плени́цами грехо́в, и содержи́мь лю́тыми страстьми́ и беда́ми, к Тебе́ прибега́ю, моему́ спасе́нию, и вопию́: помози́ ми, Де́во, Ма́ти Бо́жия.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святителю отче Павле, моли́ Бо́га о нас.

Истинный ра́б Христа́ Спаси́теля бы́л еси́, святи́телю богоблаже́нне, на Того́ бо вы́ну взира́я у́мныма очесы́ се́рдца, жи́знь твою́ в за́поведех Его́ соверши́л еси́, смы́слом чи́стым испыту́я та́йны, в Зако́не Бо́жием сокрове́нныя, и досто́йным открыва́емыя от Го́спода.

Припев: Святителю отче Павле, моли́ Бо́га о нас.

Преподо́бием и чистото́ю украси́вся измла́да, святи́телю Па́вле, на престо́ле архиере́йстем поста́вился еси́ от Пастыренача́льника Иису́са, я́ко свети́льник горя́й и светя́й; моли́твами твои́ми, свя́те, освети́ и на́ша мра́чныя ду́ши, да по́мощию твое́ю у́зрим све́т спасе́ния о Го́споде.

Сла́ва Отцу́ и Сы́ну и Свято́му Ду́ху:

От ю́га Росси́и возра́сл еси́, о́тче, я́ко ве́твь благопло́дная, и в се́верную Сиби́рскую страну́ по́слан бы́л еси́ пасти́ ста́до Христо́во: Тобо́льская всеосвяще́нная Це́рковь тя́ па́стыря до́браго стяжа́, побо́рника и защи́тника ея́ достоя́ния.

И ны́не и при́сно и во ве́ки веко́в. Ами́нь.

Богородичен: В Тебе́, Чи́стая, испове́дуем во дву́ естеству́ бы́ти, во еди́но прекра́сно соедини́вшияся спасе́ния ра́ди на́шего. Того́ моли́, Благода́тная, разделе́нныя ны́ грехопаде́ньми от Его́ благода́ти, па́ки соедини́ти с Собо́ю та́инствами святы́я Це́ркве.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святителю отче Павле, моли́ Бо́га о нас.

От и́стинныя любве́ к Бо́гу и Его́ святе́й Це́ркви, святи́телю Па́вле, не терпе́л еси́ взя́тия церко́внаго достоя́ния, но сему́ му́жески противуста́л еси́, изгна́ние от престо́ла твоего́ претерпе́в, я́ко вои́стинну испове́дник пра́вды Бо́жия.

Припев: Святителю отче Павле, моли́ Бо́га о нас.

Разуме́вши от виде́ния свы́ше твоего́ по́двига пра́вость, Благове́рная Цари́ца, по жела́нию твоему́, святи́телю Па́вле, в Ла́вру Пече́рскую жи́тельствовати тя́ посыла́ет, да иде́же постриже́н бы́л еси́ во и́ночество, та́мо сконча́еши живо́т тво́й в по́двизех поста́ и моли́твы.

Сла́ва Отцу́ и Сы́ну и Свято́му Ду́ху:

Нищету́ духо́вную возлюби́в, о́тче богому́дре, зла́то, Цари́цею тебе́ по́сланное, прия́ти не восхоте́л еси́, до́ндеже не бы́сть оно́ назначе́но на благу́ю потре́бу Ла́вры Пече́рския, в не́йже па́че зла́та дража́йшия, честву́ем ны́не твоя́ многоцеле́бныя мо́щи.

И ны́не и при́сно и во ве́ки веко́в. Ами́нь.

Богородичен: Изумева́ет вся́к у́м челове́ческий, Твоего́ присноде́вства ве́лию та́йну пости́гнути, Богоро́дице, ка́ко в рождестве́, и по рождестве́, де́вство сохрани́ла еси́ нетле́нно, те́мже, испыта́ние су́етное о се́м отве́ргше, правосла́вно и несомне́нно Ма́терь Де́ву Тя́ испове́дуем, мо́лимтися приле́жно: в чистоте́ и целому́дрии на́с утверди́, Всеблага́я.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святителю отче Павле, моли́ Бо́га о нас.

К ли́ку преподо́бных оте́ц Пече́рских причте́н бы́ти сподо́бился еси́ от Го́спода, святи́телю Па́вле, Иже яви́ на́м твоя́ нетле́нием процве́тшия мо́щи, и чудесы́ от ни́х истека́ющими все́х уверя́ет, я́ко вои́стину уго́дник еси́ Бо́жий, и моли́твенник многомо́щный о душа́х на́ших.

Припев: Святителю отче Павле, моли́ Бо́га о нас.

Аще и в после́дняя ле́та пожи́л еси́, святи́телю преподо́бне, но с дре́вними святы́ми соравни́лся еси́ дарми́ исцеле́ний, я́же источа́ют на́м твоя́ святы́я мо́щи, я́ко цве́т ра́йский, благоуха́нием святы́ни услажда́ющия ду́ши на́ша.

Сла́ва Отцу́ и Сы́ну и Свято́му Ду́ху:

Све́том небе́сным осия́нный яви́лся еси́, свя́тче Бо́жий, Ки́евскому митрополи́ту Евге́нию, ему́ повеле́в, да обре́тенный гро́б тво́й оста́вит в поко́и. Те́мже со слеза́ми мно́гими и усе́рдным моле́нием, припаде́ о́н к твои́м тле́нию неприча́стным моще́м, во всеуслы́шание испове́дуя твое́ посеще́ние.

И ны́не и при́сно и во ве́ки веко́в. Ами́нь.

Богородичен: В пучи́не мо́ря жите́йскаго лю́те бе́дствуем, и боя́щеся потопле́ния грехо́внаго, к Тебе́, Ма́ти Бо́жия, вопие́м от души́: помози́ на́м, и не попусти́ погрузи́тися в про́пасть поги́бели, но изведи́ на́с, Блага́я, на зла́чную па́жить спасе́ния, да сла́вим моли́тв Твои́х си́лу, и благослови́м и́мя Твое́ во ве́ки.

Конда́к, гла́с 8:

Вы́шния красоты́ жела́я, святи́телю Па́вле, в ми́ре преми́рно пожи́л еси́, нището́ю, воздержа́нием и непреста́нными моли́твами предочища́я себе́ к небе́сней сла́ве. Це́ркве побо́рник бы́в, пра́вды ра́ди Бо́жия мно́гия ско́рби претерпе́л еси́, и испове́дания до́блестию укра́шен, вше́л еси́ в ра́дость Го́спода твоего́, Его́же моли́ непреста́нно о все́х на́с.

Икос:

Подража́вый соиме́нному ти́ апо́столу язы́ков в небоя́зненном испове́дании, святи́телю Па́вле, не убоя́лся еси́ гне́вавшихся на тя́ си́льных ми́ра сего́, но о пра́вде Бо́жией му́жески свиде́тельствовал еси́ пред ни́ми; сего́ ра́ди престо́л тво́й святи́тельский оста́вити принужде́н бы́л еси́, и мно́гия ско́рби претерпе́в кре́пости ра́ди испове́дания твоего́, в Ла́вре Пече́рстей ти́хое приста́нище спасе́ния себе́ обре́л еси́, иде́же свя́то сконча́в жи́знь земну́ю, ко Го́споду преше́л еси́ в селе́ния святы́х, но, я́ко име́яй дерзнове́ние у престо́ла Христо́ва, моли́ся непреста́нно о все́х на́с.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святителю отче Павле, моли́ Бо́га о нас.

Яко звезда́ путево́дная све́тиши все́м, хотя́щим жи́ти в преподо́бии и чистоте́, святи́телю о́тче на́ш Па́вле, оста́вив бо престо́л тво́й святи́тельский, в Ла́вре Пече́рстей ре́вностно подвиза́лся еси́ в бде́ниих, поще́ниих и моли́твах непреста́нных, во умерщвле́нном телеси́ сла́дце воспева́я: благослове́н еси́, Бо́же оте́ц на́ших.

Припев: Святителю отче Павле, моли́ Бо́га о нас.

Ти́хо и богоуго́дно сконча́в жи́знь твою́ земну́ю, святи́телю, я́ко пшени́ца зре́лая, пожа́т бы́л еси́ и преста́вился еси́ в небе́сную жи́тницу Христо́ву, в ра́дость ве́чную святы́х, иде́же подвиго́м твои́м воздая́ние блаже́нное прия́в, со безпло́тными зове́ши: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Испо́лнися на тебе́, о́тче, рече́ние Христо́во: блаже́ни изгна́ни пра́вды ра́ди, я́ко те́х е́сть Ца́рство Небе́сное. Се́ блаже́н еси́ вои́стину, блаже́нство Ца́рствия Христо́ва унасле́дивый, и от страны́ изгна́ния, в оте́чество небе́сное восприя́тый бла́гостию человеколю́бца Бо́га, Ему́же во гла́се ра́дования и хвале́ния вопие́ши: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Тебе́ необори́мую сте́ну, и спасе́ния хода́таицу стяжа́хом, Богоро́дице Де́во; Тобо́ю хва́лимся, смире́ннии и гре́шнии, иму́ще Тя́ покро́в и защи́ту от враго́в на́ших; Тебе́ у́бо мо́лимся, Влады́чице, помози́ рабо́м Твои́м, и изба́ви на́с от поги́бели ве́чныя.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святителю отче Павле, моли́ Бо́га о нас.

Его́же возлюби́л еси́, Его́же ра́ди и подвиза́лся еси́, святи́телю, Христо́с Госпо́дь, То́й воздаде́ тебе́ ще́дрою руко́ю мзду́ небе́сную, и я́ко ве́рный ра́б Его́, вше́л еси́ в ра́дость черто́га Его́ пресве́тлаго, иде́же не забу́ди на́с, о́тче, в моли́твах твои́х благоприя́тных к Бо́гу, превозноси́мому во ве́ки.

Припев: Святителю отче Павле, моли́ Бо́га о нас.

Лице́ Христо́во пресве́тлое и превожделе́нное созерца́еши, святи́телю, и со святы́ми предстои́ши престо́лу Го́спода Сла́вы, просла́вльшаго тя́ на небеси́ и на земли́: на небеси́ блаже́нства ра́йскаго наслажда́ешися, на земли́ же нетле́нием и чудесы́ ве́рныя просвеща́еши, приводя́ и́х к славосло́вию Бо́га, превозноси́маго во ве́ки.

Сла́ва Отцу́ и Сы́ну и Свято́му Ду́ху:

Яко алава́стр враче́бный и сокро́вище исцеле́ний, и́мать Ла́вра Пече́рская ра́ку моще́й твои́х святы́х, о́тче Па́вле, но́вый испове́дниче Це́ркве Ру́сския, испове́дание бо твое́ процвете́ нетле́нием и чудесы́, и си́ми я́сно свиде́тельствует, я́ко благоуго́дно бы́сть Бо́гу, превозноси́мому во ве́ки.

И ны́не и при́сно и во ве́ки веко́в. Ами́нь.

Богородичен: Пречи́стая Богоро́дице Де́во, в Пече́рстей оби́тели Твое́й са́д духо́вен возрасти́вшая преподо́бных оте́ц, чудесы́ просия́вших во вселе́нней, в ни́хже и Па́вел святи́тель просла́вися да́ры благода́тными, умоли́ с ни́ми покланя́емую Тро́ицу, поми́ловати на́с, обнища́вших грехопаде́ньми, и не лиши́ти спасе́ния ве́чнаго.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святителю отче Павле, моли́ Бо́га о нас.

Ада и сме́рти победи́тель Христо́с, по сме́рти нетле́нием тя́ почте́, святи́телю приснопа́мятне, си́м показу́я, я́ко душа́ твоя́ жива́ во ве́ки о Го́споде пребыва́ет, в блаже́нстве невече́рнем святы́х; его́же дости́гнути, о́тче, и на́с сподо́би твои́ми моли́твами.

Припев: Святителю отче Павле, моли́ Бо́га о нас.

Вели́каго в доброде́телех, вели́кими чудесы́ Бо́г тя́ просла́ви, святи́телю Па́вле, яви́в на́м твоя́ нетле́нныя мо́щи во врачевство́ неду́гом душе́вным и теле́сным, и́мже усе́рдно покланя́ющеся, тя́, засту́пника на́шего, по до́лгу ублажа́ем.

Сла́ва Отцу́ и Сы́ну и Свято́му Ду́ху:

Любо́вию тя́ воспева́ющих, святи́телю блаже́нне, и честву́ющих усе́рдно твою́ святу́ю па́мять, не лиши́ предста́тельства твоего́ небе́снаго: искуше́нный по вся́ческим, и на́м, искуша́емым, помози́, да тя́ немо́лчно ублажа́ем.

И ны́не и при́сно и во ве́ки веко́в. Ами́нь.

Богородичен: Аще и мно́го согреша́ем, но не отчаява́емся покро́ва твоего́, Влады́чице, Спору́чнице гре́шных и Взыска́ние поги́бших от на́с имену́емая, по достоя́нию Твоего́ к на́м милосе́рдия; те́мже воззри́ на на́с Ма́тернею любо́вию, и возста́ви от паде́ния грехо́внаго, да Тя́, Помо́щницу на́шу, немо́лчно ублажа́ем.

Свети́лен:

Звезда́ пресве́тлая, от Тобо́льска в Ки́ев прише́дшая, явля́ешися ве́рным, святи́телю о́тче на́ш Па́вле: сия́нием бо чуде́с твои́х, все́м зарю́ безсме́ртия я́сно показу́еши, и челове́ки ублажа́еши преоби́дети сла́дкая, да возмо́гут, я́коже и ты́, стяжа́ти возме́здие небе́сное и ве́чную сла́ву святы́х.

Сла́ва, и ны́не, Богородичен:

Госпоже́ Богоро́дице, христиа́н Засту́пнице, поми́луй на́с, гре́шных, и в доброде́тели укрепи́, соблюди́ на́с Твои́м покро́вом, да на́глая сме́рть не похи́тит на́с негото́вых, и доведи́ на́с, Де́во, в го́рнее Ца́рство и ве́чную сла́ву святы́х.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Павле, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.