17 ноября.
Канон преподобному Иоанникию Великому.
![Преподобному Иоанникию Великому Преподобному Иоанникию Великому](img_i/047.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Сле́з твои́х тече́ньми пусты́ни безпло́дное возде́лал еси́, и, и́же из глубины́ воздыха́ньми, во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Иоанни́кие, о́тче на́ш, моли́ Христа́ Бо́га спасти́ся душа́м на́шим.
Кано́н преподо́бнаго. Гла́с 4.
Пе́снь 1.
Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Припев: Преподобне отче Иоанникие, моли́ Бо́га о нас.
Све́том благода́ти озаря́емь, преподо́бне, ве́рою па́мять твою́ торжеству́ющия просвети́ и тмы́ грехо́вныя моли́твами твои́ми изба́ви, Иоанни́кие.
Припев: Преподобне отче Иоанникие, моли́ Бо́га о нас.
Пу́ть вводя́щий невозвра́тно ше́ствовал еси́ ко гра́ду небе́сному, Иоанни́кие, Святы́й бо наста́ви тя́ Ду́х, почива́яй в се́рдцы твое́м.
Сла́ва Отцу́ и Сы́ну и Свято́му Ду́ху:
Вышша́ющее смире́ние, Иоанни́кие, име́л еси́, те́м мо́лимся тебе́: уще́дри, преподо́бне, смире́ние на́ше и боле́зни вся́ облегчи́ серде́ц на́ших.
И ны́не и при́сно и во ве́ки веко́в. Ами́нь.
Богородичен: Па́дших воззва́ние и стоя́щих укрепле́ние су́щи, Всенепоро́чная, те́м молю́ся Тебе́: па́дший мо́й у́м грехо́м, испра́ви, Влады́чице, я́ко да сла́влю Тя́.
Пе́снь 3.
Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
Припев: Преподобне отче Иоанникие, моли́ Бо́га о нас.
Теку́щая пребыва́ющими измени́л еси́, смы́сленно прие́м тво́й кре́ст, Иоанни́кие, и на невосходи́мыя го́ры, я́ко Илия́ вели́кий, возше́д, пребы́л еси́.
Припев: Преподобне отче Иоанникие, моли́ Бо́га о нас.
Пу́ть тебе́, зело́ жела́емый, отце́в показа́ дво́ица, ю́же обре́л еси́ ле́ты множа́йшими сокрове́нну в гора́х, проро́ческим да́ром просвеще́н, блаже́нне.
Сла́ва Отцу́ и Сы́ну и Свято́му Ду́ху:
Коле́блеми страстьми́ разли́чными, ве́рою притека́ем к твоему́ покро́ву, Иоанни́кие, святы́ми твои́ми хода́тайствы вся́ ны́ посети́, моля́ся Человеколю́бцу.
И ны́не и при́сно и во ве́ки веко́в. Ами́нь.
Богородичен: Кропле́нием ми́лости Твоея́, Де́во, у́глие погаси́ мои́х страсте́й, Богора́дованная, и уга́сший возжзи́ свети́льник се́рдца моего́, златы́й свети́льниче, Всенепоро́чная.
Седа́лен, гла́с 8.
Страсте́й мра́к очи́стив, Христо́вых повеле́ний я́ко и́стинно све́т прие́м, в посте́ просия́л еси́ и, умертви́в те́ло, ду́хом ожи́л еси́, вра́жия се́ти попра́л еси́, блаже́нне. Те́м и вы́шних безпло́тных Ангелов соприча́стник бы́л еси́ Ду́ха благода́тию, Иоанни́кие, о́тче на́ш, моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.
Пе́снь 4.
Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.
Припев: Преподобне отче Иоанникие, моли́ Бо́га о нас.
Го́ры высоча́йшия пости́г, верхи́ де́монов возвыша́емыя, смире́нием смири́л еси́, му́дре, и на ни́х му́жествовал еси́, сла́ва мона́шествующих и утвержде́ние.
Припев: Преподобне отче Иоанникие, моли́ Бо́га о нас.
Яко мече́м обоюдоо́стрым, Христо́вым стра́хом вооружи́вся, зми́я отсту́пника низложи́л еси́ разу́мно и чу́вственно, блаже́нне, свяще́нными побе́дами прославля́емь.
Сла́ва Отцу́ и Сы́ну и Свято́му Ду́ху:
Весь Боже́ственным Ду́хом распали́вся, о́тче, мра́з претерпе́л еси́, мно́жайшими ле́ты в пусты́нях вселя́яся, ища́й Го́спода, благода́тию тя́ Боже́ственною согрева́юща.
И ны́не и при́сно и во ве́ки веко́в. Ами́нь.
Богородичен: Тя́, очище́ние все́х земны́х, ве́рою молю́ и припа́даю, Благослове́нная: ми́лостива ми́ Судию́ и Сы́на Твоего́ сотвори́, я́ко да по до́лгу сла́влю Тя́.
Пе́снь 5
Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Припев: Преподобне отче Иоанникие, моли́ Бо́га о нас.
Ше́ствовал еси́, преподо́бне, те́сный и приско́рбный пу́ть боже́ственными восхожде́ньми се́рдца, и виде́нии разширя́емь, и положе́нием обожа́емь я́ве. Те́м бы́сть мона́шествующим утвержде́ние и украше́ние.
Припев: Преподобне отче Иоанникие, моли́ Бо́га о нас.
Око очи́стившу помышле́ния, преподо́бне, благода́ть тебе́ даде́ся проро́чества, я́ко настоя́щая глаго́лати бу́дущая, зре́ти же да́льняя, я́ко бли́жняя. О, Иоанни́кие, Бо́жие оби́телище!
Сла́ва Отцу́ и Сы́ну и Свято́му Ду́ху:
Боле́зни мя́ изба́ви грехо́в и скорбе́й, утоли́ се́рдца моего́ боле́знь и грехопаде́ний разреше́ние да́руй, Благоде́теля Бо́га име́я, послу́шающа честны́х твои́х моли́тв.
И ны́не и при́сно и во ве́ки веко́в. Ами́нь.
Богородичен: Ума́ моего́ уврачу́й изступле́ния, Всенепоро́чная, и уврачи́ стра́сти души́ моея́, и уны́ния тму́ отжени́, я́ко да восхваля́ю Тя́ пе́сненно, Присноблаже́нная Богоро́дице Всепе́тая.
Пе́снь 6.
Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Припев: Преподобне отче Иоанникие, моли́ Бо́га о нас.
Увяди́в стра́сти теле́сныя, я́ко дре́во узре́лся еси́ высокове́рхое, плоды́ чуде́сныя и честна́я исправле́ния свяще́ннейше нося́, богоблаже́нне.
Припев: Преподобне отче Иоанникие, моли́ Бо́га о нас.
Уврачи́ тя Госпо́дь явле́нием Евста́фия му́ченика, я́д всепа́губный испи́вша, всеблаже́нне, чрез ру́ку непра́ведную и бе́дствующа.
Сла́ва Отцу́ и Сы́ну и Свято́му Ду́ху:
Тма́м боле́зней приобщи́лся еси́, те́лом не́мощен пребы́в, Иоанни́кие. Те́м ве́рою зову́ ти: боле́зни утоли́ се́рдца моего́.
И ны́не и при́сно и во ве́ки веко́в. Ами́нь.
Богородичен: Еди́на все́х по́моще, помози́ на́м, бе́дствующим, и ру́ку пода́ждь, и к приста́нищем введи́ спасе́ния, Отрокови́це Богоблагода́тная.
Конда́к, гла́с 8.
Звезда́ яви́лся еси́ всесве́тлая, в ми́ре просвеща́яй и су́щия во мра́це страсте́й облистава́яй, вра́чь же крепча́йший яви́лся еси́, но я́ко прия́л еси́ благода́ть исцеле́ний, прося́щим тя́ пода́ждь исцеле́ние, да зове́м: ра́дуйся, о́тче Иоанни́кие.
Икос:
Други́й, о́тче, яви́лся еси́ вра́чь и предста́тель, неду́ги одержи́мым и скорбьми́, Иоанни́кие чу́дне, исцеля́я все́х, ве́рно притека́ющих под боже́ственный кро́в тво́й. Те́м и от на́с слы́шиши: ра́дуйся, отца́ блага́го ко́рене о́трасль; ра́дуйся, ма́тере блага́я ве́твь; ра́дуйся, и́же те́х любо́вь отри́нувый; ра́дуйся, и́же еди́наго Бо́га прие́мый; ра́дуйся, я́ко оста́вил еси́ земно́е во́инство; ра́дуйся, я́ко низложи́л еси́ ва́рварскую горды́ню; ра́дуйся, стена́ и храни́тель царе́м бы́вый; ра́дуйся, ору́жие и сто́лп ми́рови я́влься; ра́дуйся, язы́ческия разруша́я бра́ни; ра́дуйся, свети́льниче, сия́я чудесы́; ра́дуйся, наги́х покрови́телю; ра́дуйся, плене́нных изба́вителю; ра́дуйся, о́тче Иоанни́кие.
Пе́снь 7.
Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
Припев: Преподобне отче Иоанникие, моли́ Бо́га о нас.
Се́рдце твое́ Тро́ицы жили́ще соде́лал еси́, три́ созда́в хра́мы, в ни́хже Боже́ственною благода́тию, Иоанни́кие, мѵ́ро источа́еши в просвеще́ние и очище́ние ве́рно тебе́ приходя́щих.
Припев: Преподобне отче Иоанникие, моли́ Бо́га о нас.
Душа́ твоя́, светозаре́нием Боже́ственнаго Ду́ха освеща́ема при́сно, ду́ш зря́ше ве́рно приходя́щих тебе́ сове́ты, блаже́нне, проро́ческими прозна́ньми свяще́нно удивля́ема.
Сла́ва Отцу́ и Сы́ну и Свято́му Ду́ху:
Неду́гов, обурева́ющих мя́, блаже́нне, души́ же и телесе́ твои́ми святы́ми моли́твами ско́ро изба́ви и пе́ти сотвори́: препе́тый оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Непреме́ннаго ро́ждшая еди́на Го́спода, Богора́дованная, десни́цею Его́, Чи́стая, премени́ти мо́й у́м моли́ся к лу́чшим, лю́те превраща́емый жите́йскими печа́льми.
Пе́снь 8.
Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Припев: Преподобне отче Иоанникие, моли́ Бо́га о нас.
Стоя́ высо́ко на горе́, я́ко на све́щнице свети́льник, преподо́бне, все́х помышле́ния ве́рою просвеща́л еси́, показу́я изря́днейше словесы́ и де́лы стезю́ жи́зни и возводя́ ты́я Боже́ственным сло́вом к высоте́ безстра́стия.
Припев: Преподобне отче Иоанникие, моли́ Бо́га о нас.
Ум безстра́стием очи́щшему, бесе́довал еси́ Го́споду Вседержи́телю, от Него́же неизглаго́ланным, преподо́бне, науча́емь, проро́чески предглаго́лал еси́, просвеща́я ду́ши, я́ко велича́йш, всеблаже́нне, проро́к. Те́м тя́ согла́сно, ве́рнии, восхваля́ем.
Припев: Преподобне отче Иоанникие, моли́ Бо́га о нас.
Постиго́ша мя́ ра́ны тя́жкия, и неду́зи разли́чнии смуща́ют. Си́х мя́ изба́ви, о́тче, молю́ся тебе́, я́ко от Бо́га прие́м, Иоанни́кие, благода́ть врачева́ти стра́сти и боле́зни ве́рных облегчева́ти.
Сла́ва Отцу́ и Сы́ну и Свято́му Ду́ху:
Тро́ичен: Со все́ми Вы́шними во́инствы — Отца́, Сы́на и Свята́го Ду́ха — Тро́ицу Неразде́льную, Несозда́нное Божество́ песносло́вяще: свя́т, свя́т, свя́т, возопии́м в ра́дости, еди́на Вла́сть, Нача́ло и Ца́рство.
И ны́не и при́сно и во ве́ки веко́в. Ами́нь.
Богородичен: Яви́лася еси́ Ангелов превы́шшая, Бо́га неизрече́нно воплоти́вши, Того́ умоли́, Влады́чице Всенепоро́чная, плотски́х вы́шша страсте́й бы́ти мя́ умо́м, высото́ю смире́ния, песносло́вяща Твою́ велича́йшую благода́ть.
Песнь 9
Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Припев: Преподобне отче Иоанникие, моли́ Бо́га о нас.
Укрепи́ся Бо́гу, у́м тво́й утверди́вшу удержа́ти стра́сти, Ангел в телеси́ отсю́ду, о́тче, ты́ бы́л еси́, и со Ангелы на небесе́х живе́ши всегда́, сла́вы престо́лу предстоя́ и Све́та невече́рняго исполня́емь.
Припев: Преподобне отче Иоанникие, моли́ Бо́га о нас.
Якоже на небеси́, в гора́х и верте́пах всели́лся еси́, преподо́бне: те́м укроти́шася тебе́ ди́вии зве́рие, покори́вшу стра́сти душе́вныя, неудо́бь покори́мыя, Иоанни́кие, и пра́ведну же бы́вшу. Сего́ ра́ди ве́рно тя́ почита́ем.
Припев: Преподобне отче Иоанникие, моли́ Бо́га о нас.
Твоя́ свяще́нныя и святы́я мо́щи во гро́бе лежа́ще, неду́ги погружа́ют и попаля́ют полки́ де́монския всегда́, му́дре Иоанни́кие, Бо́жиею благода́тию источа́ют все́м врачева́ния, ве́рно тя́ при́сно блажа́щим.
Сла́ва Отцу́ и Сы́ну и Свято́му Ду́ху:
Уже́ Христу́ приближа́яся я́снше и чи́стше, помяни́ ве́рою тя́ помина́ющих, Иоанни́кие, грехо́в проще́ние на́м прося́, и неду́гов все́х избавле́ния, и небе́снаго Ца́рствия селе́ние.
И ны́не и при́сно и во ве́ки веко́в. Ами́нь.
Богородичен: Просвети́, Чи́стая, души́ моея́ о́чи, Све́т ро́ждшая, да не пости́гнет мя́ грехо́вная тма́ тяжча́йшая, ниже́ глубина́ покры́ет мя́ отча́яния, но Ты́ мя́ спаси́ и окорми́ ко приста́нищу Боже́ственнаго хоте́ния.
Свети́лен.
Благода́ть преизбы́сть Бо́жия в души́ твое́й, му́дре Иоанни́кие, безпло́тно живу́ща. Те́м чту́щия тя́ страсте́й изба́ви те́мных облако́в, к ти́хому приста́нищу вводя́ и отгоня́я полки́ де́монския.
Богородичен: Сотвори́ и́стинно с Тобо́ю вели́чия Сы́н предве́чный Отчим сове́том: Жи́знь бо нетле́нную без стра́сти родила́ еси́ и пребыла́ еси́ я́коже пре́жде рождества́, ма́терских избе́гши боле́зней, и Де́ва, па́ки по рождестве́ пребы́вши Де́ва.
Молитва
О свяще́нная главо́, преподо́бне о́тче, преблаже́нне а́вво Иоанни́кие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Иоанникию Великому Преподобному Иоанникию Великому](img_b/047.jpg)