16 ноября.

Канон обновлению храма святого великомученика Георгия Победоносца, иже в Лиде, идеже положено есть честное тело его.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко пле́нных свободи́тель и ни́щих защи́титель, немощству́ющих вра́чь, царе́й побо́рниче, победоно́сче, великому́чениче Гео́ргие, моли́ Христа́ Бо́га спасти́ся душа́м на́шим.

Кано́н свята́го Гео́ргия. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святы́й великому́чениче Гео́ргие, моли́ Бо́га о нас.

Де́лание Бо́жие гобзу́ющее яви́лся еси́, пита́я ве́рныя подража́нием благочести́вым, страстоте́рпче Гео́ргие, па́мять твою́ светоно́сную свяще́нно пра́зднующия и в се́й те́пло тя́ сла́вящия.

Припев: Святы́й великому́чениче Гео́ргие, моли́ Бо́га о нас.

Разжже́ твое́, страстоте́рпче, се́рдце боже́ственное раче́ние вои́стинну, самозва́н те́м к мучи́телем прише́л еси́, попаля́я многобо́жия пре́лесть и ра́зум све́тлости облиста́я спасе́ния.

Сла́ва Отцу́ и Сы́ну и Свято́му Ду́ху:

Яко ле́в, упова́я, суди́щу предста́л еси́, возвеща́я я́вственно воплоще́ние Христо́во, Имже ми́р изба́вися паде́ния дре́вняго, пе́рвое прия́т благопло́дие, треблаже́нне Гео́ргие.

И ны́не и при́сно и во ве́ки веко́в. Ами́нь.

Богородичен: Избавля́я на́с осужде́ния дре́вняго, Сы́н Бо́жий бы́сть Сы́н Де́вы я́ко Челове́к, те́м Сего́ во двою́ существу́ и хоте́нию правове́рным се́рдцем сла́вим.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святы́й великому́чениче Гео́ргие, моли́ Бо́га о нас.

Ро́да и оте́чества сла́вы ра́достию отве́ргся, Христу́ после́довал еси́ и Го́рняго Сио́на жи́тель, му́чениче, яви́лся еси́ красне́йший. [Два́жды.]

Сла́ва Отцу́ и Сы́ну и Свято́му Ду́ху:

Да насле́дник изя́щен и покори́в, Жива́го Бо́га сы́н яви́шися, претерпе́л еси́ ра́ны треволне́ния мучи́телей, му́чениче до́блий.

И ны́не и при́сно и во ве́ки веко́в. Ами́нь.

Богородичен: Во всего́ Ада́ма оде́яся, Иже милосе́рдия ра́ди Но́вый Ада́м бы́сть из Тебе́, Пренепоро́чная, еди́н сы́й челове́ков Созда́тель.

Седа́лен, свята́го Гео́ргия, гла́с 1.

Во́инство на земли́ возненави́дев, му́чениче, на небесе́х возжеле́л еси́ сла́вы и боле́зни поне́сл еси́ и лю́тую сме́рть. Те́м, дне́сь всесвяту́ю твою́ па́мять пра́зднующе, Христу́ прино́сим хвалу́, треблаже́нне Гео́ргие.

Слава И ны́не, Богородичен:

Упова́ние христиа́н, Пресвята́я Де́во, Его́же родила́ еси́, Бо́га, па́че ума́ и сло́ва, непреста́нно моли́ о воспева́ющих Тя́ пода́ти оставле́ние грехо́в на́ших все́х и исправле́ние жития́ ве́рою и любо́вию при́сно сла́вящим Тя́.

КрестоБогородичен:

Нескве́рная Агница, Агнца и Па́стыря пове́шена на дре́ве ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святы́й великому́чениче Гео́ргие, моли́ Бо́га о нас.

Умерщвле́нное твое́ те́ло му́ками, блаже́нне, умерщвле́ннаго Сло́ва вообража́ет стра́сти, дарова́вшаго ти́ живо́т ве́чный.

Припев: Святы́й великому́чениче Гео́ргие, моли́ Бо́га о нас.

Щито́м и́стинным огражде́н, побо́рники лжи́выя кре́пким смы́слом ку́пно погуби́л еси́, богому́дре Гео́ргие.

Сла́ва Отцу́ и Сы́ну и Свято́му Ду́ху:

Просла́вися твои́ми у́ды святы́ми, и́же в земны́х оде́яся неможе́ние, Сло́во. Те́м ве́чно тя́ прославля́ем, Гео́ргие.

И ны́не и при́сно и во ве́ки веко́в. Ами́нь.

Богородичен: Иже бытие́ дарова́вый челове́ком и е́же до́бре бы́ти те́м, преступле́нием истле́вшим, Пречи́стая, дарова́, бы́в Челове́к.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святы́й великому́чениче Гео́ргие, моли́ Бо́га о нас.

Вше́д му́жески в му́ченический по́двиг, и порази́л еси́ и́дольское, страстоте́рпче, свире́пство, те́лом сокруша́емь.

Припев: Святы́й великому́чениче Гео́ргие, моли́ Бо́га о нас.

Тебе́ ка́мень све́тлый Влады́ка в венце́х вонзе́, страстоте́рпче, Свое́й Це́ркви подо́бно сия́юща.

Сла́ва Отцу́ и Сы́ну и Свято́му Ду́ху:

Пожре́ся, я́ко а́гнец, до́браго Пастыренача́льника сме́рть вообрази́в, и прине́слся еси́ вы́шней трапе́зе же́ртва непоро́чна.

И ны́не и при́сно и во ве́ки веко́в. Ами́нь.

Богородичен: Спаси́ ны от бе́д и скорбе́й, Пречи́стая Богоро́дице, и му́к изба́ви бу́дущих моли́твами Твои́ми.

Пе́снь 6.

Ирмос: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Припев: Святы́й великому́чениче Гео́ргие, моли́ Бо́га о нас.

Сосу́д раздробля́емь те́ла страда́нии, му́чениче, вра́жия вся́ ко́зни лука́выя му́жески разруши́л еси́, всеблаже́нне Гео́ргие. [Два́жды.]

Сла́ва Отцу́ и Сы́ну и Свято́му Ду́ху:

Остроты́, разсека́ющия те́ло, и колесе́, му́чениче, и распаля́емы ве́щи пе́щныя, и́же к Бо́гу любо́вию распаля́емь, отню́д не устраши́лся еси́.

И ны́не и при́сно и во ве́ки веко́в. Ами́нь.

Богородичен: Святы́й хра́м во святы́х Почива́ющему была́ еси́, Богома́ти: те́мже на́с, ве́рно пою́щих Тебе́, освяща́еши, Присноде́во.

Конда́к свята́го Гео́ргия, гла́с 8.

К возбра́нному и ско́рому заступле́нию Твоему́ прибе́гше, ве́рнии, мо́лим изба́витися, страстоте́рпче Христо́в, от собла́зн вра́жиих воспева́ющим тя́, и вся́ких бе́д, и озлобле́ний, да зове́м: ра́дуйся, му́чениче Гео́ргие.

Икос:

Вели́к в предста́тельствах на земли́ показа́лся еси́, Госпо́день уго́дниче и дру́же, ве́рныя бо лю́ди покрыва́я, спаса́еши при́сно, сла́вне. Те́м ве́рою и любо́вию вопие́м тебе́, многострада́льче: ра́дуйся, и́мже просвеща́ется ми́р; ра́дуйся, и́мже во́инство озаря́ется; ра́дуйся, ве́рных от пле́на избавле́ние; ра́дуйся, ю́зников ско́рое заступле́ние; ра́дуйся, высото́ с ве́рою притека́ющих к тебе́ те́пле; ра́дуйся, обогати́телю лю́бящих тя́ и в ско́рби весе́лие; ра́дуйся, я́ко сы́й царе́й огражде́ние; ра́дуйся, я́ко подае́ши во бране́х побежде́ние; ра́дуйся, звездо́, просвеща́ющая пла́вающия; ра́дуйся, реши́телю вся́каго озлобле́ния; ра́дуйся, к нему́же вся́к ве́рный прибега́ет; ра́дуйся, и́мже восхваля́ется Созда́тель; ра́дуйся, му́чениче Гео́ргие.

Пе́снь 7.

Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Припев: Святы́й великому́чениче Гео́ргие, моли́ Бо́га о нас.

Жива́ бы́л еси́ же́ртва, му́чениче, за ны́ Пожре́ному, я́ко овча́ти, де́моном же́ртвы, всу́е приноси́мыя, упраздни́л еси́, о Христе́ укрепля́емь.

Припев: Святы́й великому́чениче Гео́ргие, моли́ Бо́га о нас.

Яви́ся благопло́ден, я́ко лоза́, принося́ гро́здие на́м терпе́ния, сла́вне, вино́ ка́плюще боже́ственное, сердца́ все́х благочести́вых веселя́щее.

Сла́ва Отцу́ и Сы́ну и Свято́му Ду́ху:

Уды да́л еси́ усе́рдно разсека́ти за Христа́, пребы́л же еси́ неотлуче́н Того́ любве́, преблаже́нне, и насле́дник все́х бла́г, веселя́ся.

И ны́не и при́сно и во ве́ки веко́в. Ами́нь.

Богородичен: Хвалу́ Бо́гу прино́сит вся́ тва́рь, от Твоего́ ро́ждшуся, Пренепоро́чная Отрокови́це, пречи́стаго чре́ва и дре́вния все́х на́с кля́твы Изба́вльшему.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святы́й великому́чениче Гео́ргие, моли́ Бо́га о нас.

Упра́витель пла́вающим изя́щный, помо́щник в ско́рбех вели́к яви́лся еси́, Гео́ргие, спаса́еши ве́рою к тебе́ и несомне́нным се́рдцем притека́ющия.

Припев: Святы́й великому́чениче Гео́ргие, моли́ Бо́га о нас.

Истины яви́лся еси́ побо́рник и лжи́ бы́л еси́ оглаго́льник, на́м же па́ки утвержде́ние, страстоте́рпче, ве́рою вопию́щим: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Кропле́нием крове́й твои́х погаси́л еси́ пре́лести, Гео́ргие, у́глие и ве́рных напои́л еси́ сердца́, ве́рно тя́ воспева́ющих и соверша́ющих сла́вную па́мять твою́.

И ны́не и при́сно и во ве́ки веко́в. Ами́нь.

Богородичен: От Иессе́ева ко́рене прозябла́ еси́ и зло́бный ко́рень исто́ргнула еси́, Соде́теля тва́ри прозя́бши, Отрокови́це, Ему́же пое́м: благослови́те вся́ дела́ Госпо́дня Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святы́й великому́чениче Гео́ргие, моли́ Бо́га о нас.

Яко у́тро, я́ко со́лнце, све́тло возсия́в, и тва́рь просвети́л еси́ страсте́й незаходи́мыми заря́ми, чуде́с же мно́гих явле́нии, Гео́ргие, му́чеников ра́дование. Те́м тя́ любо́вию ублажа́ем.

Припев: Святы́й великому́чениче Гео́ргие, моли́ Бо́га о нас.

Ка́пля боже́ственныя сла́дости, Гео́ргие, яви́лся еси́, стра́стную на́шу го́ресть взе́мля и ослажда́я всегда́ ду́ши же и сердца́ ве́рою тя́ блажа́щих, достосла́вне.

Сла́ва Отцу́ и Сы́ну и Свято́му Ду́ху:

Освяти́л еси́ кро́вию зе́млю и ду́хом весе́лия небе́сная испо́лнил еси́, му́чениче. Те́м вся́ка душа́ тя́ благочести́вых, я́ко уго́дника Госпо́дня, лю́бит при́снаго и помо́щника тя́ напису́ет.

И ны́не и при́сно и во ве́ки веко́в. Ами́нь.

Богородичен: Гла́с Ти́ прино́сим боже́ственнаго Гаврии́ла весе́лия, зову́ще: ра́дуйся, ра́дость вселе́нней, ско́рби Потреби́теля поро́ждши и Евино отъе́мши поноше́ние; ра́дуйся, Де́во Неискусобра́чная.

Свети́лен, Гео́ргию.

Струя́ми крове́й твои́х преле́стныя пла́мы погаси́л еси́, блаже́нне, и мучи́телей свире́пство до конца́ погуби́л еси́, и Христа́ просла́вил еси́, Гео́ргие страстоте́рпче. Те́м вене́ц прия́л еси́ нетле́ния и жи́зни от десни́цы Вы́шняго.

Молитва первая великомученику Георгию Победоносцу

Святы́й, сла́вный и всехва́льный великому́чениче Гео́ргие! Со́браннии в хра́ме твое́м и пред ико́ною твое́ю свято́ю поклоня́ющиися лю́дие, мо́лим тя, изве́стный жела́ния на́шего хода́таю, моли́ с на́ми и о нас умоля́емаго от своего́ благоутро́бия Бо́га, да ми́лостивно услы́шит нас, прося́щих Его́ благосты́ню, и не оста́вит вся на́ша ко спасе́нию и житию́ ну́ждная проше́ния, и да́рует стране́ на́шей побе́ду на сопроти́вныя; и па́ки, припа́дающе, мо́лим тя, святы́й победоно́сче: укрепи́ да́нною тебе́ благода́тию во бра́нех правосла́вное во́инство, разруши́ си́лы востаю́щих враго́в, да постыдя́тся и посра́мятся, и де́рзость их да сокруши́тся, и да уве́дят, я́ко мы име́ем Боже́ственную по́мощь, и всем, в ско́рби и обстоя́нии су́щим, многомо́щное яви́ свое́ заступле́ние. Умоли́ Го́спода Бо́га, всея́ тва́ри Созда́теля, изба́вити нас от ве́чнаго муче́ния, да прославля́ем Отца́, и Сы́на, и Свята́го Ду́ха и твое́ испове́дуем предста́тельство ны́не, и при́сно, и во ве́ки веко́в. Ами́нь.

Молитва вторая великомученику Георгию Победоносцу

О, всехва́льный, святы́й великому́чениче и чудотво́рче Гео́ргие! При́зри на ны ско́рою твое́ю по́мощию, и умоли́ Человеколю́бца Бо́га, да не осу́дит нас, гре́шных, по беззако́ниям на́шим, но да сотвори́т с на́ми по вели́цей Свое́й ми́лости. Не пре́зри моле́ния на́шего, но испроси́ нам у Христа́ Бо́га на́шего ти́хое и богоуго́дное житие́, здра́вие же душе́вное и теле́сное, земли́ плодоро́дие, и во всем изоби́лие, и да не во зло обрати́м блага́я, да́руемая нам тобо́ю от Всеще́драго Бо́га, но во сла́ву свята́го и́мени Его́ и в прославле́ние кре́пкаго твоего́ заступле́ния, да пода́ст Он стране́ на́шей и всему боголюби́вому во́инству на супоста́ты одоле́ние и да укрепи́т непременя́емым ми́ром и благослове́нием. Изря́днее же да огради́т нас святы́х А́нгел Свои́х ополче́нием, во е́же изба́витися нам, по исхо́де на́шем из жития́ сего́, от ко́зней лука́ваго и тя́жких возду́шных мыта́рств его́, и неосужде́нным предста́ти Престо́лу Го́спода сла́вы. Услы́ши ны, страстоте́рпче Христо́в Гео́ргие, и моли́ за ны непреста́нно Триипоста́снаго Влады́ку всех Бо́га, да благода́тию Его́ и человеколю́бием, твое́ю же по́мощию и заступле́нием обря́щем ми́лость, со А́нгелы и Арха́нгелы и все́ми святы́ми одесну́ю Правосу́дного Судии́ ста́ти, и Того́ вы́ну сла́вити со Отце́м и Святы́м Ду́хом, ны́не и при́сно, и во ве́ки веко́в. Ами́нь.