16 ноября.

Канон новомученикам Быковским: священномучеников пресвитеров Иоанна Кесарийскаго и Петра Косминкова, диакона Симеона Кречкова и мученицы Евдокии Сафроновой

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 6:

В годи́ну о́гненных искуше́ний Це́ркве Ру́сския,/ кро́тость и смире́ние стяжа́вше,/ любо́вь Христо́ву к па́стве свое́й яви́сте/ и, я́ко па́стыри до́брии,/ ду́ши своя́ за ню положи́сте./ Моли́теся о нас священному́ченицы Иоа́нне, Пе́тре и Симео́не,/ ку́пно с му́ченицею Евдоки́ею,// спасти́ и просвети́ти ду́ши на́ша.

Велича́ние:

Велича́ем вас,/ священному́ченицы Христо́ви Иоа́нне, Пе́тре, Симео́не и свята́я му́ченице Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Или́ сие́:

Велича́ем вас,/ святи́и му́ченицы Христо́ви Иоа́нне, Пе́тре, Симео́не и Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Стихи́ра, глас 6:

Любве́ Христо́вы и благода́ти Ду́ха Свята́го испо́лнени,/ душетле́нныя стра́сти победи́ли есте́,/ всеблаже́ннии страстоте́рпцы Бы́ковстии,/ и, гоне́ния от беззако́нников лю́тых претерпе́вше,/ преми́рных селе́ний дости́гли есте́/ и с ли́ки новому́чеников Це́ркве Ру́сския та́мо водвори́лися есте́.// Те́мже испроси́те душа́м на́шим мир и ве́лию ми́лость.

Кано́н святы́х, глас 6.

Песнь 1

Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припе́в: Святи́и новому́ченицы Бы́ковстии, моли́те Бо́га о нас.

Го́споди Бо́же наш, помози́ нам смире́нно воспе́ти по́двиги новому́чеников Бы́ковских, пресви́теров Иоа́нна и Петра́, диа́кона Симео́на и Евдоки́и, и́же страда́нии свои́ми внидо́ша в Черто́г Твой Небе́сный.

Припе́в: Святи́и новому́ченицы Бы́ковстии, моли́те Бо́га о нас.

Кий слове́сный дар принесе́м вам, до́блии страстоте́рпцы Бы́ковстии, ве́рнии свиде́телие Сло́ва? Недоумева́ем бо досто́йно воспе́ти вели́чие по́двигов ва́ших, дре́вних му́чеников подража́телие.

Сла́ва Отцу́ и Сы́ну и Свято́му Ду́ху:

Мно́ги ско́рби пра́ведным, и от всех изба́вит я́ Госпо́дь, рече́ проро́к. Те́мже и вы, проше́дше сквозе́ огнь и во́ду, в ра́дость жи́зни ве́чныя внидо́сте и со все́ми святы́ми ны́не сла́ву Бо́жию воспева́ете.

И ны́не и при́сно и во ве́ки веко́в. Ами́нь.

Богородичен: Во успе́нии Твое́м ми́ра не оста́вила еси́, Влады́чице, те́мже покрыва́еши при́сно лю́ди Твоя́ от вся́ких обстоя́ний и моли́твами Твои́ми избавля́еши от сме́рти ду́ши на́ша.

Песнь 3

Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Припе́в: Святи́и новому́ченицы Бы́ковстии, моли́те Бо́га о нас.

Кровь ва́шу, я́ко спаси́тельное се́яние, земля́ Ру́сская прия́т и сла́ва по́двигов ва́ших преде́лы ея́ облиста́. Те́мже, благодаря́ще Го́спода, торжеству́ем па́мять ва́шу, му́ченицы Бы́ковстии.

Припе́в: Святи́и новому́ченицы Бы́ковстии, моли́те Бо́га о нас.

Кто Бог ве́лий, я́ко Бог наш? Ты еси́ Бог, творя́й чудеса́, – си́це вопия́ху новому́ченицы Бы́ковстии, претерпева́юще мучи́тельства безбо́жных и ве́ру Христо́ву кровьми́ свои́ми утвержда́юще.

Сла́ва Отцу́ и Сы́ну и Свято́му Ду́ху:

Служи́телие Бо́жия Ма́тере бы́сте, страстоте́рпцы Иоа́нне и Пе́тре, Симео́не и Евдоки́е. Те́мже, ве́лиею любо́вию к Ро́ждшемуся от Нея́ испо́лнившеся, не убоя́стеся ни мук, ни са́мыя сме́рти и венцы́ по́двигов свои́х прия́сте.

И ны́не и при́сно и во ве́ки веко́в. Ами́нь.

Богородичен: Премилосе́рдая Ма́ти, Пречи́стая Де́во, ве́мы Тя ско́рую Уте́шительницу в напа́стех и ско́рбех, подаю́щую по́мощь рабо́м Твои́м.

Седа́лен, глас 4:

Тьму́ неве́рия сло́вом и́стины просвеща́юще,/ на брань духо́вную проти́ву отсту́пников и безбо́жников лю́тых дерзнове́нно подвиго́стеся,/ сла́внии па́стырие на́ши Иоа́нне и Пе́тре, с Симео́ном диа́коном./ Сего́ ра́ди, укрепля́юще нас му́жески испове́дати ве́ру правосла́вную,/ моли́теся о спасе́нии душ на́ших.

Сла́ва, и ны́не, Богородичен:

Чудотво́рною ико́ною Твое́ю Влади́мирскою дре́вле Оте́чество на́ше укрепи́ла еси́, Пресвята́я Де́во,/ та́кожде и в годи́ну безбо́жных гоне́ний/ но́выя ратобо́рцы к подвиго́м му́ченическим утверди́ла еси́./ Те́мже с любо́вию и благодаре́нием ублажа́ем Тя, Пречи́стая.

Песнь 4

Ирмос: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста, о Го́споде пра́зднующи.

Припе́в: Святи́и новому́ченицы Бы́ковстии, моли́те Бо́га о нас.

Сла́вный священному́чениче Иоа́нне, прему́дрость кни́жную разуме́в, вы́сшее и соверше́ннейшее уче́ние Ева́нгельское пости́гл еси́, и ду́шу твою́ за о́вцы ста́да Христо́ва положи́л еси́.

Припе́в: Святи́и новому́ченицы Бы́ковстии, моли́те Бо́га о нас.

Ди́вный священному́чениче Пе́тре, ты, науча́я люби́ти Христа́ всем се́рдцем, чад ма́лых и соверше́нных во́зрастом учи́тель был еси́, ты и кро́вию му́ченическою уче́ние запечатле́л еси́, те́мже па́стырь усе́рдный и страстоте́рпец пресла́вный яви́лся еси́.

Сла́ва Отцу́ и Сы́ну и Свято́му Ду́ху:

Прехва́льный му́чениче Симео́не диа́коне! Возлюби́л еси́ нача́ло прему́дрости, страх Госпо́день, те́мже, во олтаре́ святе́м усе́рдно служа́, мно́гим благогове́нием Бо́гу угоди́л еси́. Ны́не пред лице́м Его́ пое́ши, ра́дуяся.

И ны́не и при́сно и во ве́ки веко́в. Ами́нь.

Богородичен: Богоро́дице Де́во Пречи́стая, я́ко Госпожу́, Цари́цу и Влады́чицу пою́т Тя святи́и новому́ченицы Це́ркве Ру́сския. С ни́миже приими́ и на́ша моле́ния и спаси́ ду́ши на́ша.

Пе́снь 5

Ирмос: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Припе́в: Святи́и новому́ченицы Бы́ковстии, моли́те Бо́га о нас.

Оскверне́нная де́лы безбо́жными земля́ Ру́сская кропле́нием крове́й ва́ших па́ки освяща́ется, да позна́ют язы́цы, я́ко с на́ми Бог, и покоря́тся пра́вде Его́.

Припе́в: Святи́и новому́ченицы Бы́ковстии, моли́те Бо́га о нас.

Вси лю́дие правосла́внии ско́рби испо́лнишася, егда́ безбо́жнии мучи́тели на Це́рковь Ру́сскую ополчи́шася. Вы же, я́ко во́ини кре́пцыи, беззако́нию их му́жественне противуста́сте и ве́ру правосла́вную до́бле утверди́сте.

Сла́ва Отцу́ и Сы́ну и Свято́му Ду́ху:

Во мра́це безбо́жия заблу́ждшим яви́стеся огневи́днии свети́льницы, Иоа́нне, Пе́тре, Симео́не и Евдоки́е, новому́ченицы пресла́внии, указу́юще благоче́стия путь спаси́тельный.

И ны́не и при́сно и во ве́ки веко́в. Ами́нь.

Богородичен: Пречи́стая Де́во Богома́ти, Наста́внице и́щущим спасе́ния, сподо́би и нас мы́слити, глаго́лати и де́яти то́чию пра́вая, после́дующе новому́чеником Це́ркве Ру́сския, я́ко испове́дником тве́рдым.

Песнь 6

Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Припе́в: Святи́и новому́ченицы Бы́ковстии, моли́те Бо́га о нас.

Еде́ма сладча́йшаго насле́дницы показа́стеся, новому́ченицы Бы́ковстии, вы бо, ско́рбни бы́вше в ми́ре сем, на Небеси́ ны́не утеша́етеся; непра́вды же и гоне́ния претерпе́вше, жизнь ве́чную, я́ко воздая́ние пра́ведное, от Бо́га улучи́ли есте́.

Припе́в: Святи́и новому́ченицы Бы́ковстии, моли́те Бо́га о нас.

Cвященному́ченицы Бы́ковстии Иоа́нне, Пе́тре, Симео́не с му́ченицею Евдоки́ею! Вы заточе́ния темни́чнаго и лю́тыя сме́рти не убоя́лися есте́, ны́не же в ри́зах све́тлых с чи́нми А́нгельскими Святе́й Тро́ице предстои́те и мо́литеся о душа́х на́ших.

Сла́ва Отцу́ и Сы́ну и Свято́му Ду́ху:

О ра́тницы Христо́ви непобеди́мии, новому́ченицы Бы́ковстии! Вы опло́т Правосла́вия яви́стеся; огради́те убо и нас, немощны́х в ве́ре, по́двиг ваш кре́стный помина́ющих.

И ны́не и при́сно и во ве́ки веко́в. Ами́нь.

Богородичен: Богоро́дице Де́во, упова́ние христиа́ном, покры́й, соблюди́, сохрани́ и спаси́ Русь Правосла́вную, к заступле́нию Твоему́ прибега́ющую.

Конда́к, глас 2:

О́браз есте́ чту́щим по́двиги ва́ша,/ но́вии страстоте́рпцы Бы́ковстии,/ испове́днически по́прище земно́е прете́кшии./ Вас бо ни скорбь, ни теснота́, ни смерть/ от любве́ Бо́жия разлучи́ти возмого́ша./ Те́мже, страда́ньми дерзнове́ние стяжа́вше,/ моли́теся Христу́, вас укрепи́вшему,// да и мы му́жества дар от Бо́га восприи́мем.

И́кос:

Прииди́те, правосла́внии лю́дие, пе́сньми ублажи́м но́выя свети́льники Це́ркве Ру́сския, Иоа́нна, Петра́, Симео́на и Евдоки́ю, те́плыя моли́твенники, усе́рдныя предста́тели, проти́ву безбо́жия тве́рдыя ору́жники, ду́ши своя́ за Христа́ положи́вшия и венце́в му́ченических сподо́бльшияся. К ни́мже с любо́вию припа́даем, зову́ще си́це: ра́дуйтеся, страстоте́рпцы Бы́ковстии, ве́ру правосла́вную по́двигом до́брым утверди́вшии.

Песнь 7

Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.

Припе́в: Святи́и новому́ченицы Бы́ковстии, моли́те Бо́га о нас.

Го́споди Бо́же наш, при́зри на Це́рковь Ру́сскую, отврати́ гнев Твой, на ны дви́жимый, прости́ грехи́ и беззако́ния на́ша и поми́луй нас, предста́тельством святы́х сро́дников на́ших, непреста́нно за ны моля́щихся.

Припе́в: Святи́и новому́ченицы Бы́ковстии, моли́те Бо́га о нас.

Го́споди, моли́твами новому́чеников Це́ркве Ру́сския отжени́ тьму от серде́ц на́ших сло́вом Твоея́ и́стины, не даждь сатане́ льсти́вому погуби́ти ду́ши на́ша, утверди́ нас в Правосла́вии и да́руй нам в благоче́стии пожи́ти вся дни живота́ на́шего.

Сла́ва Отцу́ и Сы́ну и Свято́му Ду́ху:

Ди́внии уго́дницы Бо́жии, сла́внии му́ченицы Бы́ковстии, вы, не убоя́вшеся преще́ний безбо́жных, рекли́ есте́: не пощади́м естества́ тле́ннаго, изво́лим смерть, да венцы́ побе́дными увязе́мся от Христа́, Бо́га на́шего.

И ны́не и при́сно и во ве́ки веко́в. Ами́нь.

Богородичен: Засту́пнице усе́рдная, Ма́ти Го́спода Вы́шняго, покры́й Це́рковь Ру́сскую держа́вным Твои́м покро́вом, христолюби́вым лю́дем на враги́ спобо́рствуй и належа́щих скорбе́й душе́вных и теле́сных свободи́, Ма́ти Де́во Пречи́стая.

Песнь 8

Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Припе́в: Святи́и новому́ченицы Бы́ковстии, моли́те Бо́га о нас.

Убели́сте ри́зы ва́ша, до́блии новому́ченицы, кро́вию А́гнца Бо́жия, за челове́ки закла́ннаго. Его́же, о́троцы благослови́те, свяще́нницы, воспо́йте, лю́дие, превозноси́те во вся ве́ки.

Припе́в: Святи́и новому́ченицы Бы́ковстии, моли́те Бо́га о нас.

Вои́стину дру́зи Христо́ви яви́стеся, новому́ченицы Бы́ковстии, плоть бо и мир возненави́девше, ве́тхаго челове́ка совлеко́стеся, во оде́жду же нетле́ния обле́кшеся, реко́сте: не ктому́ уже́ мы живе́м, но живе́т в нас Христо́с.

Сла́ва Отцу́ и Сы́ну и Свято́му Ду́ху:

Рече́ Госпо́дь Свои́м ученико́м: не бо́йся, ма́лое ста́до, я́ко благоизво́ли Оте́ц ваш да́ти вам Ца́рство. Вы же, сло́ву сему́ после́дующе, черто́га Небе́снаго достиго́сте. Те́мже, сла́внии добропобе́дницы, помози́те и нам спасе́ние улучи́ти.

И ны́не и при́сно и во ве́ки веко́в. Ами́нь.

Богородичен: Пресвята́я Влады́чице Богоро́дице, защити́ и спаси́ нас от ко́зней вра́жиих и многоразли́чных напа́стей, да́руй нам кре́пость в терпе́нии, на Тебе́ бо наде́емся и Тобо́ю хва́лимся.

Песнь 9

Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Припе́в: Святи́и новому́ченицы Бы́ковстии, моли́те Бо́га о нас.

На Пречи́стую Богоро́дицу все упова́ние возложи́вше, страстоте́рпцы Бы́ковстии, да́же до сме́рти пострада́ли есте́ и, то́кмо Еди́наго на Небесе́х Живу́щаго боя́щеся, Того́ со вся́ким дерзнове́нием испове́дали есте́.

Припе́в: Святи́и новому́ченицы Бы́ковстии, моли́те Бо́га о нас.

Блаже́ннии страстоте́рпцы Бы́ковстии, приими́те сие́ смире́нное и убо́гое моле́ние на́ше, да, ве́рно почита́юще па́мять ва́шу, улучи́м от Го́спода и Влады́ки живота́ на́шего оставле́ние грехо́в и ве́лию ми́лость.

Сла́ва Отцу́ и Сы́ну и Свято́му Ду́ху:

О богоизбра́ннии новому́ченицы Бы́ковстии, я́ко зве́зды, Не́бо церко́вное украси́вшии, моли́теся ко Го́споду о земне́м оте́честве ва́шем и о ве́рою и любо́вию вас почита́ющих.

И ны́не и при́сно и во ве́ки веко́в. Ами́нь.

Богородичен: О Всепе́тая Ма́ти, а́ще и разори́ся от злых храм Твой Влади́мирский, иде́же новому́ченицы Бы́ковстии подвиза́шася, но ми́лостию Твое́ю благоволи́ла еси́ его́ во сла́ве обнови́ти. Те́мже, соше́дшеся днесь, благода́рственными пе́сньми Тя велича́ем.

Свети́лен, глас 1:

Све́том Христо́вым просвети́вшеся,/ святи́и новому́ченицы Бы́ковстии,/ во мра́це безбо́жия свети́льницы ве́рным яви́стеся,/ страда́ньми бо ва́шими и доны́не ве́ра правосла́вная пропове́дуется,/ наде́жда укрепля́ется, любо́вь умножа́ется/ и Це́рковь Ру́сская до́блестию ва́шею озаря́ется.

Сла́ва, и ны́не, Богоро́дичен, глас то́йже:

Прииди́те, восхва́лим Пречи́стую Ма́терь Бо́жию,/ Вы́шшую всех земноро́дных/ и Честне́йшую го́рних во́инств,/ Засту́пницу усе́рдную ро́да христиа́нскаго.

Моли́тва

О святи́и священному́ченицы Бы́ковстии Иоа́нне, Пе́тре, Симео́не и му́ченице Евдоки́е, в годи́ну лю́тых гоне́ний за Христа́ пострада́вшии, ве́рность Ему́ да́же до сме́рти сохрани́вшии и вене́ц жи́зни от Него́ прие́мшии!

Вы, во дни искуше́ния тя́жкаго, прише́дшаго на Це́рковь Ру́сскую от безбо́жных, муче́ния многоразли́чная и лю́тую смерть претерпе́вше, любо́вь ко Го́споду и о́браз непосты́днаго упова́ния на Него́ му́жественно яви́ли есте́. И ны́не, в раи́ сла́дости наслажда́ющеся, Престо́лу Бо́жию во сла́ве предстои́те и при́сно хвалу́ со А́нгелы и все́ми святы́ми Триеди́ному Бо́гу возно́сите.

Сего́ ра́ди мы, недосто́йнии, мо́лим вас: умоли́те Го́спода сил, да утверди́т Це́рковь Ру́сскую непоколеби́му в многомяте́жнем ми́ре сем, да да́рует нам дух братолю́бия и ми́ра, и приведе́т нас, заблу́ждших, к покая́нию, да водворя́тся в душа́х на́ших любо́вь и благогове́ние, да испо́лнятся уста́ на́ша непреста́ннаго благодаре́ния Спаси́телю на́шему. Моли́твенным же предста́тельством ва́шим да возгори́тся в сердца́х на́ших ре́вность о сла́ве Бо́жией и о вся́ком де́лании пра́вды, да сподо́бимся при́сно с ва́ми прославля́ти Еди́наго во Святе́й Тро́ице и́стиннаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.