14 ноября.

Канон собору всех святых безсребренников.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Святи́и безсре́бреницы и чудотво́рцы,/ посети́те не́мощи на́ша:/ ту́не прия́сте, ту́не дади́те нам.

Кано́н, глас 4. (по 8-ми тропаре́й во вся́кой пе́сни).

Песнь 1

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святии безсребренницы и целители, молите Бога о нас!

Ве́рою прося́щу ми да́тися сло́ву прему́дрости моли́те, светоза́рнии Госпо́дни служи́тели, я́ко да воспою́ ра́дуяся вку́пе честно́е ва́ше торжество́.

Припев: Святии безсребренницы и целители, молите Бога о нас!

Безсре́бреников па́мять чту́ще днесь, чи́стым се́рдцем и непоро́чною со́вестию те́х воспои́м, я́ко да прии́мем предста́тельством их благода́ть врачева́ния.

Припев: Святии безсребренницы и целители, молите Бога о нас!

Земля́ израсти́ ва́с, Божественнии Безме́здницы, Не́бо же и́мать ду́хи ва́ши, сла́внии, Небе́сную бо жизнь на земли́ пожи́вше, ны́не та́мо свеселите́ся.

Припев: Святии безсребренницы и целители, молите Бога о нас!

Душ врачевству́ па́че теле́с научи́вся хи́трости, и обою́ду вседо́бр показа́лся еси́, Луко́, Бо́жиею му́дростию вдохнове́н, е́юже врачу́еши призыва́ющих тя́.

Припев: Святии безсребренницы и целители, молите Бога о нас!

Стра́сти душ ку́пно и теле́с твои́х певце́в уврачи́, всеблаже́нне Луко́, та́инственным рукоде́ланием греха́ гни́лость изрезу́я, Богому́дре апо́столе.

Припев: Святии безсребренницы и целители, молите Бога о нас!

Боля́щим врачевство́ есть це́рковь, в ней же, священному́чениче Анти́по, терпели́вое твое́ лежи́т те́ло, Боже́ственную зарю́ дарова́ний испуща́ет Ду́ха.

Сла́ва: Свяще́нных твои́х моще́й свяще́нная ра́ка ми́ро исцеле́ний то́чит, злосмра́дныя стра́сти отгоня́ющи и твою́, Анти́по, сла́вящия па́мять благоуха́ющи.

И ны́не: Саму́ю Тебе́ приво́дим ро́ждшую Тя пло́тию, Присноде́ву, на мольбу́ держа́ве Твое́й, Христе́, и Безсре́бреник собо́р. Тех моли́твами умири́ живо́т наш.

Песнь 3

Ирмо́с: Твоя́ песносло́вцы, Богоро́дице,живы́й и незави́стный источниче, лик себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Припев: Святии безсребренницы и целители, молите Бога о нас!

Я́коже свети́ла на Боже́ственней тве́рди Це́ркве, ве́рныя озаря́ете све́том чуде́с, я́же соверша́ти не престае́те, сла́внии, неду́ги исцеля́юще.

Припев: Святии безсребренницы и целители, молите Бога о нас!

Ра́вно тече́ние соверши́вше, ра́вных даро́в сподо́бистеся, и по́честей ра́вных на Небеси́ получи́сте, чудоде́йственнии Безме́здницы.

Припев: Святии безсребренницы и целители, молите Бога о нас!

Любо́вию к Бо́гу и бли́жним связа́еми, всю зло́бу де́монов разруша́ете благода́тию: сего́ ра́ди ва́ше, досточу́днии, соверша́ем торжество́.

Припев: Святии безсребренницы и целители, молите Бога о нас!

Огнь Боже́ственный внутрь нося́щим ва́м, страстны́й пла́мень наш угаси́те, Богоблаже́ннии, в ве́ре смы́сл согрева́юще.

Припев: Святии безсребренницы и целители, молите Бога о нас!

Тро́йственный сопру́г Безме́здников Космы́ и Дамиа́на всечестны́й ны́не воспева́ем, де́лы едина́ковых, я́коже и именова́нием.

Припев: Святии безсребренницы и целители, молите Бога о нас!

Све́тлии житие́м, тве́рдии ве́рою и ре́вностию ра́внии возсия́ша из Ри́ма, от Аси́и же и Арави́и. Те́мже на́ми вку́пе да почте́ни бу́дут.

Сла́ва: Прииди́те, исцели́теся от неду́г, боля́щии: тричи́сленная бо дво́ица благода́тию Тро́ицы обогаще́нна, врачева́ния подае́т ве́рою пою́щим ю.

И ны́не: Цели́теля душ и теле́с ро́ждшая, исцеле́ние пода́ждь нам, Богоро́дице, еле́й милосе́рдия Твоего́ излива́ющи ко здра́вию и спасе́нию на́шему.

Седа́льны Безме́здником, глас 8:

Я́ко кри́ни, я́ко шипцы́, Ду́хом преукра́шени, благово́ние всем воспуща́ете. Сего́ ра́ди к вам прибега́ем, Богоно́снии Безсре́бреницы, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.

Сла́ва: Блаже́нныя наде́жды прии́мше, от всех досто́йно блажите́ся, я́ко исполни́телие Бо́га на́шего Боже́ственных хоте́ний, вра́чеве неисце́льных неду́гов я́вльшеся, великоимени́тии Безме́здницы. Стра́сти у́бо на́ша исцели́те и уны́ния разжени́те о́блаки, с ве́рою вас призыва́ющих.

И ны́не: Прииди́те, Всецари́цу во гла́сех велича́ем, и пою́ще, возопии́м: Я́же ра́дости вина́, Де́во всепе́тая, чту́щих Тя спаса́й, и покры́й от искуше́ний вся́ческих, и боле́зней, и скорбе́й. И́маши бо я́ко Ма́терь Бо́жия дерзнове́ние ми́ловати нас. Сего́ ра́ди мо́лим Тя: моли́ся Сы́ну Твоему́ и Бо́гу да́ти проще́ние рабо́м Твои́м.

Песнь 4

Ирмо́с: Неизсле́дный Бо́жий Сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Припев: Святии безсребренницы и целители, молите Бога о нас!

Се сла́вная и всея́сная Богосве́тлых враче́в па́мять возсия́, и весели́т сердца́ христоимени́тых люде́й, притека́ющих к целе́бным моще́м их.

Припев: Святии безсребренницы и целители, молите Бога о нас!

Пантелеи́мона, прехва́льнаго великому́ченика, со Ермола́ем, сла́вным огласи́телем его́, зело́ ле́по есть воспомяну́ти днесь, я́ко в Безсре́бреницех нача́льных.

Припев: Святии безсребренницы и целители, молите Бога о нас!

Усты́ вси́ и се́рдцем воспои́м страстоте́рпцы Христо́вы, Ермола́я и Пантелеи́мона, ра́дуйтеся, – зову́ще, – предста́телие и засту́пницы оби́тели сея́ и цели́телие на́ши.

Припев: Святии безсребренницы и целители, молите Бога о нас!

Ермола́я свяще́нными мольба́ми и Пантелеи́мона, ми́лости тезоимени́та, не отри́ни от нас ми́лости Твоя́, Всеми́лостиве Го́споди, но обы́чно уще́дрив, от злых изба́ви.

Припев: Святии безсребренницы и целители, молите Бога о нас!

Све́тлый яви́лся еси́ житие́м и боре́нии светле́йший, Пантелеи́моне, зва́нием свы́ше богате́я, е́же возвеща́еши де́лы, всех призыва́ющих тя на по́мощь ми́луя.

Припев: Святии безсребренницы и целители, молите Бога о нас!

К твоему́ покро́ву прибега́ющих, Целе́бниче, отъе́млеши вся́ку боле́знь, и ны́не посети́ с ве́рою моля́щихся тебе́ и изба́ви неду́г многообра́зных.

Сла́ва: Добро́то честны́х Безсре́бреник, благоле́пие святы́х му́ченик, врачу́ неду́гующих, бу́ди, Пантелеи́моне, хода́тай о нас ко Пресвяте́й Тро́ице.

И ны́не: Я́коже ча́ша преисполня́ется, Владыко, благода́ть Твоя́ и мно́гое бога́тство человеколю́бия Всеблаго́ю Ма́терию Твое́ю и Безсре́бреники пречестны́ми.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, всем воспева́ющим Тя мир подава́ющая.

Припев: Святии безсребренницы и целители, молите Бога о нас!

Ки́ра и Иоа́нна Боже́ственную любо́вь и му́ченическую за Христа́ смерть воспои́м, боре́нием бо сла́вным му́жески противуста́вше, яви́шася похвала́ му́чеников.

Припев: Святии безсребренницы и целители, молите Бога о нас!

Свети́ла сия́ют два – Кир и Иоа́нн, чуде́с сия́ния от исто́чника еди́наго светоно́снаго, немощны́м источа́юще нетле́нную благода́ть, и́хже да ублажи́м.

Припев: Святии безсребренницы и целители, молите Бога о нас!

Христо́вы ору́жницы, неду́гующим вра́чеве, Ки́ре и Иоа́нне пребога́тии, чуде́с де́йство от Всеще́драго Бо́га прии́мшии, исцели́те пою́щия вы.

Припев: Святии безсребренницы и целители, молите Бога о нас!

Моки́я пе́сньми восхваля́ю, Фо́тия же и Аники́ту, в ли́це Богоно́сных Безме́здников су́щия, ско́рыя помо́щники призыва́ющих их в беда́х и ско́рбех.

Припев: Святии безсребренницы и целители, молите Бога о нас!

Тя́ иму́щи све́тла би́сера и че́стна во у́вязе́нии свое́м, честна́я Це́рковь украша́ется, всеблаже́нне Моки́е, врачу́ безме́здный.

Припев: Святии безсребренницы и целители, молите Бога о нас!

Яви́стеся я́ко вели́ции свети́льницы, просвеща́юще луча́ми исцеле́ний и Боже́ственных по́двиг всю тварь, страда́льцы Христо́вы Фо́тие и Аники́то.

Сла́ва: Исцеля́ете стра́сти ве́рных, изобрази́вше страсть блаже́нную ва́шими страстьми́, и отъе́млете неду́ги, и отгоня́ете лю́тыя ду́хи, Фо́тие и Аники́то сла́внии.

И ны́не: Не́мощь и разслабле́ние, всемо́щная Влады́чице, душ и теле́с на́ших преложи́ в кре́пость и здра́вие, во е́же бо́дренно твори́ти повеле́ния Сы́на Твоего́ и Бо́га.

Песнь 6

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Припев: Святии безсребренницы и целители, молите Бога о нас!

Всечестно́е соверша́юще пра́зднество ва́ше, христоподража́телие прехва́льнии и хода́тае тепле́йшии, е́же у вас про́сим ве́рно по́мощи.

Припев: Святии безсребренницы и целители, молите Бога о нас!

Повеле́нию Боже́ственному повину́ющеся, Богому́дрии, не восхоте́сте ничесо́же взя́ти в возме́здие, ту́не прия́сте, ту́не дае́те, я́же к животу́ и спасе́нию.

Припев: Святии безсребренницы и целители, молите Бога о нас!

Сампсо́на преподо́бнаго с Диоми́дом днесь честна́я похвале́ния ли́ка Безсре́бреник вси почти́м, моли́твенники предлага́юще сих к Бо́гу и Царю́ всех.

Припев: Святии безсребренницы и целители, молите Бога о нас!

Твои́м пресла́вным, о́тче, врачевство́м, е́же боле́зньми стяжа́л еси́, посеща́ти не оскуде́й, мо́лимся, в сострада́нии облегча́я боле́зни и труды́ душ на́ших.

Припев: Святии безсребренницы и целители, молите Бога о нас!

Боже́ственною оде́ян, му́чениче Диоми́де, си́лою, уставля́еши боле́зни, разрешаеши неду́ги и отгоня́еши ду́хи лука́выя, я́ко в Безме́здницех преизря́дный.

Припев: Святии безсребренницы и целители, молите Бога о нас!

Бога́тыми тя украси́ благода́ть Духа дарова́нии: моли́твами бо твои́ми, Арте́мие сла́вне, всяк неду́г престае́т в лю́дех, прибега́ющих к тебе́.

Сла́ва: Страсте́й тли́тельных изми́ ны, великому́чениче, искуше́ний же и скорбе́й тя призыва́ющия с ве́рою, подража́телю Спа́сов, Арте́мие, Тро́ицы уго́дниче.

И ны́не: Изба́ви нас, Пречи́стая Влады́чице, вся́каго гне́ва, гла́да же и всегуби́тельства, и ве́чнаго муче́ния, Дево, свободи́ Арте́мия предста́тельством.

Конда́к, глас 2:

Благода́ть прии́мше исцеле́ний, простира́ете здра́вие су́щим в ну́ждах, вра́чеве, чудотво́рцы пресла́внии; но ва́шим посеще́нием ра́тников де́рзости низложи́те, мир исцеля́юще чудесы́.

И́кос:

Вся́каго ра́зума и му́дрости прехо́дит сло́во му́дрых враче́в, и всем зна́ние подаю́т: Высоча́йшаго бо благода́ть прие́мше, неви́димо здра́вие да́руют всем. Отню́дуже и мне по́вести благода́ть дарова́ся пе́ти, я́ко Богоно́сныя уго́дники Христо́вы и служи́тели, исцеле́ний мно́жество подаю́щия: боле́зней бо вся избавля́ют, мир исцеля́юще чудесы́.

Песнь 7

Ирмо́с: Не послужи́ша тва́ри Богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бог благослове́н еси́.

Припев: Святии безсребренницы и целители, молите Бога о нас!

Ка́ко восхва́лим вас, всехва́льнии, превосходя́щии и ум и сло́во на́ше, и зело́ удивля́ющии чудесы́, о ни́хже зове́м: отце́в Госпо́дь Бог благослове́н еси́.

Припев: Святии безсребренницы и целители, молите Бога о нас!

Не возлюби́сте отню́дь суеты́ Богому́дрии, ниже́ сла́дких жития́, но вся во уме́ты вмени́сте, Христа́ иму́ще, Ему́же взыва́ете: Госпо́дь Бог благослове́н еси́.

Припев: Святии безсребренницы и целители, молите Бога о нас!

Ка́ко не воспое́м печа́ть и хвалу́ сла́внаго ли́ка Безме́здников, честну́ю дво́ицу – Фалале́я же и Три́фона доблему́дрых, чуде́с непрестаю́щее творя́щих мно́жество.

Припев: Святии безсребренницы и целители, молите Бога о нас!

Яви́шася исцеле́ние ве́рным крове́й твои́х ка́пли, Фалале́е, неду́ги отмыва́юще и огнепале́ния лю́тая угаша́юще, благода́тию Христа́ Венцеда́вца.

Припев: Святии безсребренницы и целители, молите Бога о нас!

Гу́си пасы́й в лузе́х, от Бо́га прия́л еси́ благода́ть исцеле́ний, великому́чениче Три́фоне – безме́здный врачу́, исцеля́ти челове́ческия не́мощи и неду́ги.

Припев: Святии безсребренницы и целители, молите Бога о нас!

Стру́пи твои́, му́чениче Три́фоне, я́ко ми́ро благоуха́ют, кровь твоя́ источа́ет исцеле́ния, оста́нцы же те́ла твоего́ ду́ши освяща́ют каса́ющихся им.

Сла́ва: Теле́сныя боле́зни изба́ви и душе́внаго неможе́ния рабы́ Твоя́, Триипоста́сный Бо́же, и сохрани́ неврежде́нны от всех жите́йских искуше́ний.

И ны́не: Источа́еши с Безсре́бреники честны́ми исцеле́ний струи́ боля́щим, Дево, всю́ду: Тя́ бо исто́чника милосе́рдия показа́ милости Госпо́дь, из Тебе́ воплоти́выйся.

Песнь 8

Ирмо́с: О́троки благочести́выя в пещи́ Рождество́ Богоро́дичо спасло́ есть, тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́, и превозноси́те Его́ во вся ве́ки.

Припев: Святии безсребренницы и целители, молите Бога о нас!

Свя́т еси́, Вседержи́телю, прославля́я святы́я Твоя́: ми́р бо те́х ра́ди избавля́еши от бе́д и просвеща́еши пою́щия и превознося́щия Тя́ во ве́ки.

Припев: Святии безсребренницы и целители, молите Бога о нас!

В се́ла Вы́шняя вселя́еми, всеприснопа́мятнии, милосе́рдовати не престае́те о су́щих на земли́ и благоде́тельствуете пою́щим и превознося́щим Го́спода во ве́ки.

Припев: Святии безсребренницы и целители, молите Бога о нас!

Слове́сным тя́ и безслове́сным благоде́теля е́же к Бо́гу присвое́ние показа́, блаже́нне Вла́сие, исправле́ний твои́х; те́мже у́бо прия́л еси́ исцеле́ний дарова́ния.

Припев: Святии безсребренницы и целители, молите Бога о нас!

Святи́тель преподо́бен сый, Вла́сие, страсте́й Христо́вых ра́ны но́сиши, да́вшаго Ти благода́ть врачева́ти вся болезни; те́мже дарова́нии благи́ми на́м бу́ди на по́мощь.

Припев: Святии безсребренницы и целители, молите Бога о нас!

Ум тво́й Спиридо́не, безстра́стием просвети́в и смире́нием украси́вся, дарова́нми Ду́ха обогати́лся еси́ отгоня́ти ду́хи и реши́ти неду́ги ве́рно чту́щим тя́.

Припев: Святии безсребренницы и целители, молите Бога о нас!

Река́ су́щих в тебе́ дарова́ний вся́ко напоя́ет, преподо́бне Спиридо́не, се́рдце; всем да́рует здра́вие, вся Бо́га к сла́ве возставля́ет просла́вльшаго тя́.

Сла́ва: Ми́лостива еси́, Тро́ице Неразде́льная, ми́луеши бо всех я́ко всеще́дра, те́мже прибега́ем к Тебе́, и́же грехми́ отягча́еми, взыва́юще: очи́сти рабы́ Твоя́.

И ны́не: О и́же на Тя́ наде́жды возложи́вших, Влады́чице, с Безсре́бреники моли́ся, я́ко да бу́дущаго осужде́ния изба́вимся и вхо́да в Ца́рствие Небе́сное сподо́бимся.

Песнь 9

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святии безсребренницы и целители, молите Бога о нас!

Па́мять соверша́юще о́бщих засту́пников на́ших, приле́жно возопии́м к ни́м: от вся́каго вре́да, и ско́рби, и неду́гов лю́тых изми́те воспева́ющия вы́.

Припев: Святии безсребренницы и целители, молите Бога о нас!

Во святи́телех чудоде́йственника и в страстоте́рпцех помо́щника безме́зднаго, неду́жных врача́ и язвы моровы́я прогони́теля, Харала́мпия да ублажи́м.

Припев: Святии безсребренницы и целители, молите Бога о нас!

Ве́лий защи́тник ве́рных и изба́витель от бе́д показа́лся еси́, Богому́дре Харала́мпие, вся́каго у́бо свободи́ гне́ва и всегуби́тельства сла́вящия тя́.

Припев: Святии безсребренницы и целители, молите Бога о нас!

Теле́снии неду́зи и душе́внии преста́ют, твои́м, Харала́мпие, моще́м почита́емым и лобыза́емым: Христо́с бо дарова́ сия́ целе́бны и лю́тых отрази́тельны.

Припев: Святии безсребренницы и целители, молите Бога о нас!

Свети́льника Це́ркве, на све́щнице Сио́на поста́вленнаго, восхва́лим дне́сь Моде́ста, милосе́рдия луча́ми сия́юща, челове́ков и ското́в боле́зни исцеля́юща.

Припев: Святии безсребренницы и целители, молите Бога о нас!

Иерусали́ма до́льняго па́стырь был еси́, сострада́тельствуя слове́сным и безслове́сным, и Го́рняго гра́да еси́ все́льник, иде́же помина́й помина́ющия тя́.

Сла́ва: Приими́те, христоподража́тельнии Безсре́бреницы, сие́ ма́лое песнопе́ние на́ше, и мно́гим грехо́м пови́нным су́щим, проще́ние на́м у Тро́ицы испроси́те.

И ны́не: Спа́се Благи́й, препе́тыя Твоея́ Матере мольба́ми и все́х прехва́льных Безме́здников, ми́лость Твою́ и по́мощь с Небесе́ ниспосли́ на́м, призыва́ющим Тя́.

Свети́лен:

Я́ко зве́зды пресве́тлыя, разу́мную твердь украша́ете, святи́и Безсре́бреницы, и зна́мений заря́ми ве́рныя просвеща́ете. Те́мже мо́лим ва́с, Богоно́снии: разжени́те тьму́ страсте́й на́ших ва́шим ко Го́споду предста́тельством.

Молитва святым бессребреникам

О чудотворцы славнии, врачеве безмезднии, земнии ангели и небеснии человецы, скоропослушливии помощницы всем к вам прибегающим! Вы бо, угодницы Божии, безчисленными чудесы весь мир наполняете и не токмо телесныя недуги исцеляете, но и верою Христовою души просвещаете, в терпении болезней укрепляете, в тяжких недузех сущих о исправлении жития вразумляете, ко Христу покаянием направляете и силою Всемогущаго Бога обильныя дары благодатныя помощи источаете. Сего ради к вам, яко благодатным врачем, мы, недостойнии и грешнии, с благоговейною любовию припадаем и молимся: услышите воздыхания множества страждущих людей, умолите Небеснаго Врача душ и телес наших и Его Пречистую Матерь даровати нам исцеление от недугов наших, сохраните нас от лютых и неисцельных болезней, от разслабления тела, от исступления ума и смертоносныя язвы, от внезапныя смерти, от всякия беды и скорби и от всякаго зла; помозите всем в немощех лежащим и в человеческой помощи отчаявшимся, к вам же с надеждою прибегающим; утешение и отраду подайте всем в тяжких работах, в заточении и темницех унывающим и, теплым ходатайством вашим к Богу, соблюдите в вере Православней, в богомыслии, в молитвах к Богу прилежных; умолите Господа, да подаст всем нам христианскую кончину безболезненну, непостыдну, мирну, Божественных Таин причастну, и добрый ответ на Страшнем Суде Своем, да с надеждою спасения достигнем Царствия, егоже уготова Господь любящим Его, и сподобимся купно с вами, угодницы Божии, славити Отца и Сына и Святаго Духа во веки веков. Аминь.