14 ноября.

Канон иной святым чудотворцам и безсребреникам Косме и Дамиану Асииским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Святи́и безсре́бреницы и чудотво́рцы, Космо́ и Дамиа́не, посети́те не́мощи на́ша: ту́не прия́сте, ту́не дади́те на́м.

Стихи́ра, гла́с 2:

Се́ ко́ль добро́ и ко́ль красно́, е́же жи́ти бра́тии вку́пе в Ду́се Святе́м, я́коже рече́ богооте́ц Дави́д, любо́вию нелицеме́рною и ве́рою несомне́нною, сло́вом и́стинным, я́ко ря́сны зла́ты, дру́г дру́зе себе́ придержа́ща. Прииди́те, ны́не благослови́м Го́спода, да́вшаго на́м святы́я Своя́ безме́здники, Косму́ и Дамиа́на, врачи́ боля́щих, свети́ла те́мных, прогони́тели де́монов, и́миже боля́щии исцеля́ются, и́миже ме́ртвии воскреса́ют, и́миже прокаже́ннии очища́ются, по гла́су Госпо́дню: ту́не у́бо прия́ша, ту́не же и подаю́т боля́щим исцеле́ния. Ихже моли́твами, Христе́ Бо́же, просвети́ ду́ши на́ша.

Други́й кано́н. Гла́с 1.

Пе́снь 1.

Ирмос: Пои́м, вси́ лю́дие, от го́рькия рабо́ты фарао́ни Изра́иля Изме́ншему и во глубине́ морсте́й нога́ми немо́крыми Наста́вльшему, пе́снь побе́дную, я́ко просла́вися.

Припев: Святии безсребренницы Космо и Дамиане, моли́те Бо́га о нас.

От благода́ти Нача́льныя Тро́ицы, дво́ица чу́дная и честна́я свеща́ема, все́м исцеле́ния приходя́щим ве́рно подае́т, при́сно источа́ющи.

Припев: Святии безсребренницы Космо и Дамиане, моли́те Бо́га о нас.

Тайноучи́ми живоно́сным словесе́м, я́ко свети́ла в ми́ре возсия́вше, стра́стную мглу́ удо́бь разгоня́ете теплото́ю ве́ры, всеблаже́ннии.

Сла́ва Отцу́ и Сы́ну и Свято́му Ду́ху:

Зако́ну покаря́ющеся Спа́сову, всесла́внии, сладостра́стие у́бо плотско́е отри́нуша: доброде́тельными же душа́ми светле́йше просвеща́ющеся, в ми́ре преизя́ществоваша, досточу́днии.

И ны́не и при́сно и во ве́ки веко́в. Ами́нь.

Богородичен: Во всего́ челове́ка в Твою́ утро́бу всели́выйся, Богома́ти, неизрече́нне облече́ся, из Отца́ возсия́вый Сы́н, безле́тне Пребоже́ственный, Тому́ воспои́м, я́ко просла́вися.

Пе́снь 3.

Ирмос: Утверди́ мене́, Христе́, на недви́жимом ка́мени за́поведей Твои́х и просвети́ мя све́том лица́ Твоего́: не́сть бо свя́т па́че Тебе́, Человеколю́бче.

Припев: Святии безсребренницы Космо и Дамиане, моли́те Бо́га о нас.

Врачева́ний исто́чники, даро́в же Боже́ственных струи́, невеще́ственнаго Све́та светле́йшая прия́телища, вси́ досто́йне воспои́м.

Припев: Святии безсребренницы Космо и Дамиане, моли́те Бо́га о нас.

Яко теле́сныя и душе́вныя врачу́юще стра́сти и боле́зни приходя́щих к ва́м, всечестни́и усе́рдно ны́не я́ко благоде́телие исцеля́ете.

Сла́ва Отцу́ и Сы́ну и Свято́му Ду́ху:

Пло́дными доброде́тельми украша́еми, вся́ку тле́емую сла́дость жите́йскую я́ве отрази́сте, к Бо́жией добро́те непреста́нно взира́юще.

И ны́не и при́сно и во ве́ки веко́в. Ами́нь.

Богородичен: В ви́де на́шем пре́жде Неви́димый яви́ся, о Богороди́тельнице, сте́кшуся с пло́тию Божеству́ во утро́бе Твое́й пресвяте́й, Богоневе́сто.

Седа́лен, гла́с 8.

От исто́чника бе́здны, Иису́са, чуде́с струи́ благоле́пно поче́рпше, святи́и, та́йными ту́чами страсте́й мра́чныя о́блаки отгоня́ете и неду́гующим челове́ком исцеле́ния подае́те. Те́м, получи́вше здра́вое весе́лие, ва́ми, пресла́внии, удивля́еми, зове́м: богоно́снии безсре́бреницы, моли́те Христа́ Бо́га согреше́ний оставле́ние дарова́ти пра́зднующим любо́вию святу́ю па́мять ва́шу.

Сла́ва, и ны́не, Богородичен:

Яко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

КрестоБогородичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмос: Разуме́х, Всеси́льне, Твое́ смотре́ние и со стра́хом просла́вих Тя́, Спа́се.

Припев: Святии безсребренницы Космо и Дамиане, моли́те Бо́га о нас.

Рече́нию Боже́ственному я́ве возсле́дующе, не зла́та блиста́ния, ниже́ сребра́, боже́ственнии, стяжа́сте.

Припев: Святии безсребренницы Космо и Дамиане, моли́те Бо́га о нас.

Сия́юще Боже́ственными чудесы́, безсре́бреницы вся́ благоде́тельствуют, благода́ть подаю́ще.

Сла́ва Отцу́ и Сы́ну и Свято́му Ду́ху:

Вра́чеве му́дрии показа́стеся страсте́й боле́знем, исцели́тельныя ру́ки простира́юще.

И ны́не и при́сно и во ве́ки веко́в. Ами́нь.

Богородичен: Да залани́тствятся ны́не ли́ца, Богоро́дицу Тя́ не испове́дающих, Пречи́стая Влады́чице.

Пе́снь 5

Ирмос: От но́щи у́тренююще, пое́м Тя́, Христе́, Отцу́ Собезнача́льна и Спа́са ду́ш на́ших: ми́р ми́рови пода́ждь, Человеколю́бче.

Припев: Святии безсребренницы Космо и Дамиане, моли́те Бо́га о нас.

Яко пото́ки богото́чныя, источа́ете ве́рным благодея́ния во́ды, душе́вныя же ку́пно и теле́сныя исцеля́юще неду́ги, сла́внии безсре́бреницы.

Припев: Святии безсребренницы Космо и Дамиане, моли́те Бо́га о нас.

Исто́чник благода́ти, честни́и безсре́бреницы, разверза́юще, все́м здра́вие раздае́те, ве́рою и любо́вию к ва́м ны́не притека́ющим.

Сла́ва Отцу́ и Сы́ну и Свято́му Ду́ху:

Све́тлии и всему́дрии зве́зды, и́же зе́млю я́ве онебеси́вше подо́бием све́тлости Ангельския, непреста́нно озаря́ют на́с.

И ны́не и при́сно и во ве́ки веко́в. Ами́нь.

Богородичен: Превы́шша яви́лася еси́, все́х Творца́, Отцу́ собезнача́льнаго, заче́нши, Ма́ти Де́во, и ро́ждшая ми́ру Спа́са и Го́спода.

Пе́снь 6.

Ирмос: Проро́ка спа́сл еси́ от ки́та, Человеколю́бче, и мене́ из глубины́ прегреше́ний возведи́, молю́ся.

Припев: Святии безсребренницы Космо и Дамиане, моли́те Бо́га о нас.

Спаси́тельныя цели́тели, благоде́тели богому́дрыя, Косму́ же и Дамиа́на боже́ственныя, усе́рдно да почти́м.

Припев: Святии безсребренницы Космо и Дамиане, моли́те Бо́га о нас.

Целому́дрие соблю́дше и ра́зумом укра́шени, Косма́ и Дамиа́н боже́ственнии со Христо́м ра́дуются.

Сла́ва Отцу́ и Сы́ну и Свято́му Ду́ху:

Единому́дренно пожи́вше, единоду́шно по́стничествовавше, ку́пно врачева́ния подая́ти на́м вве́рени бы́сте.

И ны́не и при́сно и во ве́ки веко́в. Ами́нь.

Богородичен: Све́т Непристу́пный родила́ еси́ пло́тию, Пречи́стая, ве́сь ми́р просвеща́юща заря́ми Божества́.

Конда́к, гла́с 2.

Благода́ть прии́мше исцеле́ний, простира́ете здра́вие су́щим в ну́ждах, вра́чеве, чудотво́рцы пресла́внии, но ва́шим посеще́нием ра́тников де́рзости низложи́те, ми́р исцеля́юще чудесы́.

Икос:

Вся́каго ра́зума и му́дрости прехо́дит сло́во му́дрых враче́в, и все́м зна́ние подаю́т: Высоча́йшаго бо благода́ть прие́мше, неви́димо здра́вие да́руют все́м. Отню́дуже и мне́ по́вести благода́ть дарова́ся пе́ти, я́ко богоно́сныя уго́дники Христо́вы и служи́тели, исцеле́ний мно́жество подаю́щия, боле́зней бо вся́ избавля́ют, ми́р исцеля́юще чудесы́.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии безсребренницы Космо и Дамиане, моли́те Бо́га о нас.

Всеце́лы Бо́гу богому́дренне яви́стеся, вси́ Бо́га вмести́тельны, ми́р бо ве́сь Бо́га ра́ди оста́висте, стопа́м после́дующе Спа́совым, всесла́внии, боголе́пне отце́в Бо́га почита́юще.

Припев: Святии безсребренницы Космо и Дамиане, моли́те Бо́га о нас.

Преесте́ственно, вра́чеве всеизря́днейшии, немощны́х я́звы рукоде́йствы та́инственными вся́ исцеля́ете, лечбы́ спаси́тельныя от сокро́вищ почерпа́юще боже́ственных и воспева́юще Бо́га пресла́внаго.

Сла́ва Отцу́ и Сы́ну и Свято́му Ду́ху:

Венце́м Твоего́ Ца́рствия, Влады́ко, и багряни́цею све́тлою украси́л еси́ боголе́пне превозлю́бльшия добро́ту непости́жную, Христе́, Твоея́ красоты́, и ве́рным благоде́тели о́бщия сия́ показа́л еси́.

И ны́не и при́сно и во ве́ки веко́в. Ами́нь.

Богородичен: Восто́ку свы́ше, Пречи́стая, я́вльшуся на земли́, показа́лася еси́ всеблаголе́пная две́рь и всесве́тлая, ми́р озаря́ющи луча́ми чистоты́ и ве́рным лучи́ чуде́с при́сно посыла́ющи.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии безсребренницы Космо и Дамиане, моли́те Бо́га о нас.

Уме́рше ми́ра сего́ кра́сным и сребролю́бия неду́г отсе́кше, наименова́ни бы́сте, му́дрии, все́ми безсре́бреницы, вопию́щими: вся́ дела́ Го́спода по́йте и превозноси́те во вся́ ве́ки.

Припев: Святии безсребренницы Космо и Дамиане, моли́те Бо́га о нас.

Ве́чныя прича́стницы жи́зни бы́сте проявле́нне, жи́зни бо тле́емыя вся́ оста́висте кра́сная, согла́сне зову́ще: благослови́те вся́ дела́ Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Изба́ви вся́, Влады́ко Христе́, лю́тых боле́зней моли́твами безсре́бреников и сподо́би при́сно согла́сне зва́ти Тебе́: благослови́те вся́ дела́ Го́спода, по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ра́дующеся, вси́ ве́рнии, и благода́тию укре́пльшеся, и́же Рождество́м Твои́м изба́влени бы́вше, Чи́стая Ма́ти Де́во, непреста́нно вопие́м: благослови́те вся́ дела́ Го́спода, по́йте и превозноси́те во вся́ ве́ки.

Песнь 9

Ирмос: Тебе́, све́тлую свещу́ и Ма́терь Бо́жию, пречу́дную сла́ву и вы́шшую все́х тва́рей, пе́сньми велича́ем.

Припев: Святии безсребренницы Космо и Дамиане, моли́те Бо́га о нас.

Пе́сньми му́друю дво́ицу Све́та у́мнаго, облиста́ющую зарю́ и просвеще́ние все́м подаю́щу, непреста́нно ублажа́ем.

Припев: Святии безсребренницы Космо и Дамиане, моли́те Бо́га о нас.

Кре́пость душе́внаго здра́вия творя́ще ве́рным, и теле́сныя врачу́ете вве́рении ва́м стра́сти, я́ко спаси́телие, те́мже и воспева́еми есте́ при́сно.

Припев: Святии безсребренницы Космо и Дамиане, моли́те Бо́га о нас.

Богосве́тлая свети́ла, у́мне не́бо честны́я Це́ркве светодая́ния ли́тием, ны́не све́т подаю́ще, непреста́нне озаря́ют.

Сла́ва Отцу́ и Сы́ну и Свято́му Ду́ху:

От Честны́я Тро́ицы богозва́нная дво́ица похваля́ема, источа́ет прося́щим врачева́ний все́м подая́ния, любо́вию те́х блажа́щим.

И ны́не и при́сно и во ве́ки веко́в. Ами́нь.

Богородичен: Тебе́, све́та о́блак, и святы́й киво́т, и всесве́тлую две́рь мы́сленнаго Со́лнца, я́ко Богоро́дицу пе́сньми велича́ем.

Свети́лен.

Благода́ть врачева́ний от Бо́га прие́мше, безсре́бреницы блаже́ннии, е́же врачева́ти неду́жныя и исцеля́ти вся́ ве́рно притека́ющия к боже́ственному ва́шему хра́му. Сего́ ра́ди согла́сно ублажа́ем досто́йне честну́ю ва́шу па́мять.

Богородичен:

Родила́ еси́, Пречи́стая, Бо́жие Бо́га Сло́во, ми́рови спаси́тельное соверша́ющаго всему́дре строе́ние изря́дное. Сего́ ра́ди Тя́ вси́ песносло́вим досто́йне, я́ко моля́щуюся к Нему́, изба́витися на́м неду́гов и вся́ких бе́д.

Молитва святым бессребреникам Косме и Дамиану, чудотворцам Асийским

Чудотво́рцы сла́внии, вра́чеве безме́зднии, Космо́ и Дамиа́не! Вы от ю́ности Христа́ Бо́га возлюби́вше и Того́ повеле́ния всем се́рдцем соблюда́ющи, а́ще и вда́сте себе́ уче́нию враче́бному, но доброде́тельнаго ра́ди жития́ и чистоты́ душе́вныя, си́лою Христа́ Бо́га, не врачева́ния то́кмо иску́сство, но па́че неоску́дную благода́ть исцеле́ния вся́ких неду́гов от Бо́га прия́ли есте́. Отоню́дуже любо́вию и милосе́рдием к неду́гующим подвиза́еми, не то́кмо лю́дем, но и ското́м исцеле́ния боле́зней подава́ете, неисче́тным мно́жеством чуде́с ва́ших весь мир наполня́ете, и не теле́сныя то́кмо неду́ги исцеля́ете, но и ве́рою Христо́вою ду́ши просвеща́ете, в терпе́нии боле́зней укрепля́ете, в тя́жких неду́зех о исправле́нии жития́ вразумля́ете и ко Христу́ покая́нием привлека́ете. Тем же ны́не и нас, припа́дающих к вам пред честно́ю ико́ною ва́шею, ско́ро услы́шите, ю́ныя де́ти, ва́шей по́мощи во уче́нии кни́жном прося́щия, ва́шими моли́твами наста́вите, да ва́шему житию́ ревну́юще, не земно́е то́чию науче́ние приобря́щут, но па́че во благоче́стии и пра́вой ве́ре вы́ну да преуспе́ют. На одре́ боле́зни лежа́щим, челове́ческая по́мощи отча́янным, к вам же те́пле с ве́рою и усе́рдною моли́твою прибега́ющим, исцеле́ние боле́зней ва́шим ми́лостивым, чудоде́йственным посеще́нием да́руйте. Мно́гажды в боле́зни впа́дающия и от лю́тых неду́гов в уны́ние, малоду́шие и ропта́ние прише́дшия, да́нною вам от Бо́га благода́тию в терпе́нии утверди́те, и наста́вите, да уразуме́ют во́лю о них Бо́жию святу́ю и благу́ю и са́ми себе́ и живо́т свой во́ли Христа́ Бо́га предаю́т. В неду́зех су́щих, о исправле́нии же жития́ не радя́щих, во гресе́х не раска́ивающихся, се́рдцем ожесточе́нных сокруши́те во спасе́ние и к покая́нию призови́те, да не́мощни су́ще те́лом, здра́ви пребу́дут душе́ю, и прича́стницы соде́лаются Бо́жия спаси́тельныя благода́ти. Бра́тию свята́го хра́ма сего́, ва́шему свято́му заступле́нию от Бо́га вруче́нную, и всех к вам усе́рдно прибега́ющих невреди́мы сохрани́те от долгонеду́жия, от боле́зней лю́тых и неисце́льных, от разслабле́ния те́ла, от иступле́ния ума́, от смертоно́сной я́звы, от внеза́пныя сме́рти, и всемо́щным хода́тайством ва́шим к Бо́гу соблюди́те в пра́вой ве́ре тве́рдых, во благоче́стии преспева́ющих, в до́брых де́лах усе́рдных, в моли́тве к Бо́гу приле́жных, да с ва́ми вку́пе сподо́бятся в бу́дущем ве́це при́сно воспева́ти и сла́вити всесвято́е и великоле́пое и́мя Отца́, и Сы́на, и Свята́го Ду́ха, во ве́ки веко́в. Ами́нь.