13 ноября.

Канон святым апостолам Стахию, Амплию, Апеллию, Аристовулу, Наркиссу, Урвану.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н апо́столов, Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святии апостоли, моли́те Бо́га о нас.

Ве́рою почита́ющия ва́шу, свяще́ннии благоглаго́ливии, па́мять и торжеству́ющия ра́достно, страсте́й мглы́ изба́вите и ве́чныя ра́дости прича́стники соде́лайте.

Припев: Святии апостоли, моли́те Бо́га о нас.

Стопа́м после́дующе Христа́, воплоще́ннаго за милосе́рдие, пребога́тии, Сего́ же повеле́нием богонача́льным служа́ще, яви́стеся все́х заблу́ждших наста́вницы к благоче́стию.

Сла́ва Отцу́ и Сы́ну и Свято́му Ду́ху:

Стахи́я и Ампли́я му́драго, и Урва́на, Апе́ллия же, и Нарки́сса, и Аристову́ла, Христо́вы ученики́ бы́вшия, ве́рою соше́дшеся, до́лжно ублажи́м.

И ны́не и при́сно и во ве́ки веко́в. Ами́нь.

Богородичен: Явственную го́ру Бо́жию, киво́т святы́й и трапе́зу, ста́мну же всезлату́ю, чи́стую Иису́сову пала́ту, Благослове́нную в жена́х ублажи́м.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святии апостоли, моли́те Бо́га о нас.

Яко кла́с многопло́ден, му́дре, яви́лся еси́, сло́вом зна́ния, гла́дом та́ющия ве́ры пита́я, Стахи́е богоблаже́нне, и пи́щи лу́чшия прича́стники благода́тию соде́лав си́лою Ду́ха.

Припев: Святии апостоли, моли́те Бо́га о нас.

Мре́жею язы́ка, благоесте́ственно взе́м, улови́л еси́ из глубины́ ле́сти, апо́столе, и прине́сл еси́ боже́ственно пи́щу прише́дшему, Нарки́ссе, спасти́ заблу́ждшаго, Царю́ и Влады́це тва́ри.

Сла́ва Отцу́ и Сы́ну и Свято́му Ду́ху:

Поте́кл еси́, я́коже звезда́ от восто́ка, устреми́вся и Вретани́йския гра́ды пости́гл еси́, Христо́во пропове́дуя Ева́нгелие и просвеща́я благода́тию, блаже́нне Аристову́ле, ве́рно прие́млющия сло́во твое́.

И ны́не и при́сно и во ве́ки веко́в. Ами́нь.

Богородичен: Черто́г светоно́сен Христо́в и престо́л высоча́йший, Богороди́тельнице, яви́лася еси́, Всенепоро́чная: в Тебе́ бо Еди́н почи́в, на́ша отъя́т труды́ и бу́дущую досто́йным угото́ва осла́бу.

Седа́лен апо́столов, гла́с 1.

Протече́ зе́млю честно́е ва́ше веща́ние, просвеща́ющее ду́ши неве́рных челове́к, апо́столи сла́внии, свяще́нными хода́тайствы ва́шими. Те́м дне́сь ра́достно соверша́ем всечестну́ю и светоза́рную ва́шу па́мять, ве́рно веселя́щеся.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святии апостоли, моли́те Бо́га о нас.

Облиста́в на земли́ пра́вды Со́лнце, я́коже лучи́ та́инственныя происпусти́ я́ве, Стахи́я же и Нарки́сса, Урва́на и Ампли́я, Аристову́ла и Апе́ллия, су́щих во тме́ просвеща́ющия.

Припев: Святии апостоли, моли́те Бо́га о нас.

Кре́постию Боже́ственнаго укрепля́емь Ду́ха, живу́щия во тме́ сы́ны показа́л еси́ све́та, Ампли́е апо́столе, соверша́я чуде́с дела́ пресла́вная и упраждня́я де́монов полки́.

Сла́ва Отцу́ и Сы́ну и Свято́му Ду́ху:

Во́д боже́ственных испо́лнен, поте́кл еси́ я́коже струя́, Урва́не, спаси́тельная, го́рькия и непи́тныя во́ды отгоня́я, и напая́я благода́тию благоче́ствующих, преблаже́нне, полноту́.

И ны́не и при́сно и во ве́ки веко́в. Ами́нь.

Богородичен: Яви́лася еси́ Ангелов преиму́щи, Влады́чице: о́ным бо Стра́шнаго во утро́бе несказа́нно вмести́ти сподо́билася еси́ и на рука́х носи́ти я́коже Младе́нца дне́й же и ле́т древне́йша.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святии апостоли, моли́те Бо́га о нас.

Па́стыря до́браго богоизбра́нныя о́вцы посреди́ волко́в от Него́ я́ве по́слани бы́ша, сия́ укроща́юще и приводя́ще ко огра́де мы́сленней ве́рою.

Припев: Святии апостоли, моли́те Бо́га о нас.

Вели́кий тя́ Андре́й Византи́и поста́ви епи́скопа, и́же та́мо ве́рно пла́вающия, Стахи́е свяще́ннейше, и управля́ющаго к приста́нищем ти́хим Боже́ственною благода́тию.

Сла́ва Отцу́ и Сы́ну и Свято́му Ду́ху:

Якоже многоце́нен ка́мень, тя́ имя́ше, краеуго́льный, Иракли́йская честна́я Це́рковь, укрепля́юща, Апе́ллие блаже́нне, сию́ сло́вом и́стины, те́м досто́йно почита́ем тя́.

И ны́не и при́сно и во ве́ки веко́в. Ами́нь.

Богородичен: Зачала́ еси́ па́че сло́ва Сло́во и родила́ еси́, Всепе́тая, Его́же Оте́ц из чре́ва роди́ пре́жде веко́в, Чи́стая, те́мже я́ко Сего́ Ма́терь Тя́ до́лжно ублажа́ем.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святии апостоли, моли́те Бо́га о нас.

Мо́ря язы́ков возмути́вше Боже́ственными восхожде́нии, спасо́сте дре́вле в го́рцем мо́ри пото́пльшияся и приведо́сте Изба́вителю спа́сшияся, богоблаже́ннии.

Припев: Святии апостоли, моли́те Бо́га о нас.

Ми́лости Воли́теля Бо́га пропове́дал еси́ и ле́сти свободи́л еси́, боже́ственный Нарки́ссе, ду́ши благочести́вых, вели́кий бы́в, афи́нян председа́тель и насади́тель садо́в кра́сных, богоблаже́нне.

Сла́ва Отцу́ и Сы́ну и Свято́му Ду́ху:

Боже́ственный Урва́н, сло́во жизното́чное и благода́ть врачева́ний источи́в, привлече́ лю́ди к просвеще́нию боже́ственнаго ра́зума, я́ко подража́тель Воплоти́вшагося и ми́р Спа́сшаго.

И ны́не и при́сно и во ве́ки веко́в. Ами́нь.

Богородичен: Пое́м Тя́, Еюже оправди́хомся, и́же пе́рвее осужде́ннии, и совокупи́хомся невеще́ственным служи́телем, и рая́ сподо́бихомся, в жена́х благослове́нная, Богора́дованная.

Конда́к апо́столов, гла́с 8.

Яко свяще́нная сокро́вища Всесвята́го Ду́ха и Со́лнца Сла́вы сия́ния, по до́лгу воспои́м му́дрыя апо́столы, Апе́ллия, Урва́на же и Аристову́ла, Ампли́я, Нарки́сса и Стахи́я, я́же благода́ть собра́ Бо́га на́шего.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии апостоли, моли́те Бо́га о нас.

Терпе́нием напа́стей изба́вистеся врага́, искуша́ющаго вы́, ту́чами же сло́ва живо́тнаго, сла́внии апо́столи, ве́сь угаси́сте пла́мень ле́сти, зову́ще: хва́льный и превозноси́мый оте́ц на́ших Бо́же, благослове́н еси́.

Припев: Святии апостоли, моли́те Бо́га о нас.

Пресве́тло и изря́дно совеща́л еси́ и соверше́нно твоя́, Аристову́ле, ученики́, блаже́нне, наказа́л еси́, я́ко Ипоста́сную Му́дрость име́я, тя́ наказу́ющу хва́льнаго возвеща́ти отце́в Бо́га и препросла́вленна.

Сла́ва Отцу́ и Сы́ну и Свято́му Ду́ху:

Ве́рных свяще́нное совокупле́ние свяще́ннейшими гла́сы блажи́т тя́, Апе́ллие, кончи́ну бо блаже́нну име́л еси́, житие́ же Ангельское, поя́ всегда́ хва́льнаго отце́в Бо́га и препросла́вленна.

И ны́не и при́сно и во ве́ки веко́в. Ами́нь.

Богородичен: Изба́ви ны́ от напа́стей, и скорбе́й, и печа́лей разли́чных, и язы́ков наше́ствия, Влады́чице Всепе́тая, я́ко да Тя́ сла́вим и Сы́ну Твоему́ взыва́ем: хва́льный оте́ц на́ших Бо́же, благослове́н еси́.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии апостоли, моли́те Бо́га о нас.

В ми́ре, я́коже мо́лния, яви́стеся, богови́дцы, попаля́юще у́бо ле́сть, пою́щия же, сы́ны дне́ показу́юще, и вопию́щия: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Припев: Святии апостоли, моли́те Бо́га о нас.

Сла́дкою со́лию твои́х, Ампли́е, уче́ний ле́сти гни́лость очи́стил еси́. Те́мже, чту́ще тя́, пое́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Да пое́тся Стахи́й сла́вный и Ампли́й, Апе́ллий же и Нарки́сс, Урва́н же и всему́дрый, вопия́й ве́рно, Аристову́л: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Тя́ и сте́ну, и прибе́жище, и ле́ствицу, к высоте́ преводя́щу челове́чество, Всенепоро́чная Чи́стая, ве́дяще, зове́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святии апостоли, моли́те Бо́га о нас.

Да земны́я концы́, испо́лненныя пре́лести борца́ и напо́лненныя омраче́ния безбо́жия, бла́гости све́том озари́ши зна́ния Твоя́ спаси́тельныя зари́, Ще́дре, си́м посла́л еси́.

Припев: Святии апостоли, моли́те Бо́га о нас.

Яви́лся еси́ тезоиме́нно, сла́вне, спаси́тельный кла́с, пшени́цу тре́бующим нося́щь, утвержде́ние богоразу́мия подаю́щую и гла́да у́мнаго изыма́ющую, ве́рою тя́ и любо́вию, священнопропове́дниче, пою́щим.

Припев: Святии апостоли, моли́те Бо́га о нас.

Уста́ Бо́жия бы́в, ри́торов язы́ки неглаго́ливы показа́л еси́ и из горта́ни вра́жия, Аристову́ле, извле́кл еси́ ду́ши, и приве́л еси́ Го́споду спасе́ны, соверше́нны позна́нием.

Сла́ва Отцу́ и Сы́ну и Свято́му Ду́ху:

Небеса́ у́бо бы́ша богови́дна живу́ща, Бо́жии апо́столи, и́же на земли́ чи́сто ва́с чту́щия и и́скренно вы́ну блажа́щия, прича́стники ве́чныя сподо́бите све́тлости.

И ны́не и при́сно и во ве́ки веко́в. Ами́нь.

Богородичен: Но́сиши вся́ Нося́щаго и млеко́м пита́еши все́м пи́щу Подаю́щаго. Ве́лие и стра́шно, е́же па́че ума́, Твое́ та́инство, киво́те честна́го свяще́ния, Де́во Богоро́дице, те́м Тя́ ве́рою ублажа́ем.

Свети́лен.

Боже́ственный Аристову́л и Стахи́й пребога́тый, и Апе́ллий богому́дрый, и Нарки́сс, и Ампли́й, и Урва́н, всему́дрии, ны́не от на́с да почту́тся я́ко Христо́вы апо́столи, и́миже ми́р от ле́сти многообра́зныя изба́вися.

Сла́ва, и ны́не, Богородичен:

Яви́лася еси́ преиму́щи херуви́мов, Всепе́тая, Седя́щаго бо на си́х ра́менах, Пречи́стая Отрокови́це, на объя́тиих Твои́х носи́ла еси́ и Младе́нца млекопита́ла еси́. Его́же приле́жно моли́ о на́с, пою́щих Тя́, Богоро́дицу вои́стинну.

Молитва

К вам, о святи́и Христо́вы апо́столи Аристову́ле, Стахи́е, Апе́ллие, Нарки́ссе, Ампли́е и Урва́не, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.