Шрифт

13 ноября.

Канон святому мученику Епимаху Новому.

Святому мученику Епимаху Новому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Епима́х во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н му́ченика. Гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Святый мучениче Епимаше, моли́ Бо́га о нас.

Воспою́ Тебе́, Го́споди Бо́же мо́й, я́ко показа́л еси́ на́м па́мять му́ченика, озаря́ющу вся́ческая, я́ко еди́н Многоми́лостив.

Припев: Святый мучениче Епимаше, моли́ Бо́га о нас.

Воспою́ Тебе́, Го́споди Бо́же мо́й, я́ко непобеди́ма Твоего́ показа́л еси́ му́ченика, побо́рника в му́ченицех на безбо́жие.

Сла́ва Отцу́ и Сы́ну и Свято́му Ду́ху:

Воспою́ Тебе́, Го́споди Бо́же мо́й, я́ко дарова́нии боже́ственными Твоего́ страда́льца украси́л еси́, Епима́ха, и че́стию венча́л еси́.

И ны́не и при́сно и во ве́ки веко́в. Ами́нь.

Богородичен: Воспою́ Тебе́, Го́споди Бо́же мо́й, я́ко безсе́менно из утро́бы Де́вы роди́лся еси́, Ея́же ра́ди и спаса́еши вся́, я́ко еди́н Многоми́лостив.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святый мучениче Епимаше, моли́ Бо́га о нас.

Суровство́ нечести́вых омрачи́л е́сть, всехва́льным Кресто́м хваля́ся, непобеди́мый венцено́сец Христо́в, му́ченик Епима́х.

Сла́ва Отцу́ и Сы́ну и Свято́му Ду́ху:

Сла́ву презре́в привре́менную и к подвиго́м совле́кся, ра́довашеся богому́дрый и насле́дник Христо́в, му́ченик Епима́х.

И ны́не и при́сно и во ве́ки веко́в. Ами́нь.

Богородичен: Ра́дуйся, Ма́ти Присноде́во, Бо́га Сло́ва во чре́ве Твое́м вмести́вшая и ро́ждшая воплоще́ннаго я́ко Бо́га ку́пно и Челове́ка.

Пе́снь 4.

Ирмос: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

Припев: Святый мучениче Епимаше, моли́ Бо́га о нас.

Безбо́жных неради́в преще́ния, к по́двигом ополчи́ся, дерзнове́нно вопия́, благосла́вный Епима́х: сла́ва си́ле Твое́й, Го́споди. [Два́жды.]

Сла́ва Отцу́ и Сы́ну и Свято́му Ду́ху:

Земна́я оплева́в, сме́ртию Ца́рство насле́дова сла́вный Епима́х, ве́рно вопия́: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Иже со Отце́м и Ду́хом славосло́вимаго в вы́шних добропобе́дный Епима́х на три́знищи Го́спода все́м неве́дущим пропове́да.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святый мучениче Епимаше, моли́ Бо́га о нас.

Защити́вся благода́ти ору́жием Креста́, нечести́вым вопия́ше му́ченик: ме́чь же и о́гнь не отсече́т мя́ Христо́вы любве́.

Припев: Святый мучениче Епимаше, моли́ Бо́га о нас.

Благосла́вный Епима́х, суди́щу предстоя́ беззако́ннующих, вопия́ше благоде́рзостне: земли́ и небесе́ бо́зи несотво́ршии, нечести́вии да поги́бнут.

Сла́ва Отцу́ и Сы́ну и Свято́му Ду́ху:

Благосла́вный Епима́х, от Бо́га вдохну́вся, Отца́, Сло́ва и Свята́го Ду́ха во еди́ном естестве́ неве́дущим Тро́ицу пропове́да.

И ны́не и при́сно и во ве́ки веко́в. Ами́нь.

Богородичен: Кто́ изрещи́ возмо́жет Рождества́ Твоего́, Чи́стая, па́че сло́ва пресла́вный о́браз? Естество́м бо Бо́га воплоще́нна па́че сло́ва родила́ еси́.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святый мучениче Епимаше, моли́ Бо́га о нас.

Оста́ви я́же в ми́ре и ми́р Епима́х, и те́ло му́кам му́жественно предаде́ за Влады́ку, и Христо́в насле́дник бы́сть.

Припев: Святый мучениче Епимаше, моли́ Бо́га о нас.

Упраздни́ и́долов ле́сть Епима́х и сла́вы сподо́бися и́стинныя, прие́м врачева́ний благода́ть, от ни́хже вси́ ве́рнии почерпа́ем.

Сла́ва Отцу́ и Сы́ну и Свято́му Ду́ху:

Приобщи́вся Христо́вым страсте́м Епима́х си́лою распе́ншагося пло́тию Христа́ Бо́га и венцы́ сла́вы от Него́ я́ко ве́рен прия́т.

И ны́не и при́сно и во ве́ки веко́в. Ами́нь.

Богородичен: Моли́ о рабе́х Твои́х, Де́во Богоро́дице, из Тебе́ вопло́щшагося Бо́га на́шего, я́ко Тя́ и еди́ну Предста́тельницу на́шу ве́мы.

Седа́лен му́ченика, гла́с 3.

Сто́лп одушевле́н, Истины свиде́тель бы́л еси́ во страда́нии, неви́димыя враги́ победи́в ви́димыми мучи́тели, всеизря́дне, от Христа́ вене́ц прие́м. Те́мже зове́м ти́: не преста́й моля́ся, сла́вне, дарова́ти на́м ве́лию ми́лость.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святый мучениче Епимаше, моли́ Бо́га о нас.

Со огне́м ле́сть попира́я му́жески, Распе́ншемуся добропобе́дный вопия́ше Епима́х: оте́ц на́ших Бо́же, благослове́н еси́.

Припев: Святый мучениче Епимаше, моли́ Бо́га о нас.

Не убоя́ся пла́мене, ниже́ звере́й ди́виих, ниже́ му́к непобеди́мый Епима́х, зовы́й: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Со Отце́м Сло́ва и Всесвята́го Ду́ха не ве́дущим Епима́х пропове́дуя, взыва́ше: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Неопа́льною купино́ю и росода́тельною пе́щию Ты́ пронаписа́вшаяся, Ма́ти Чи́стая, несказа́нно бо родила́ еси́ воплоще́ннаго Христа́ Бо́га, Благослове́нная.

Пе́снь 8.

Ирмос: Во о́бразе Ангела, я́вльшагося в пещи́ о́гненней песносло́вцем, Христа́ Бо́га по́йте, о́троцы, свяще́нницы, благослови́те, лю́дие, превозноси́те во вся́ ве́ки.

Припев: Святый мучениче Епимаше, моли́ Бо́га о нас.

Победи́теля ле́сти показа́вшаго и беззако́нных муже́й, венцено́сца Епима́ха, по́йте, о́троцы, свяще́нницы, благослови́те, лю́дие, превозноси́те во вся́ ве́ки.

Припев: Святый мучениче Епимаше, моли́ Бо́га о нас.

Врача́ страсте́й и неду́гов, на́м Дарова́вшаго, лю́тых, страстоно́сца Епима́ха, по́йте, о́троцы, свяще́нницы, благослови́те, лю́дие, превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

На земли́ па́мять Епима́ха, возвели́чившаго Христа́ и Те́м исцели́вшаго разли́чныя неду́ги, свяще́ннии, по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Неизрече́нно и безсе́менно заче́ншую и ро́ждшую Де́ву Христа́ Бо́га на́шего, по́йте, де́ти, свяще́нницы, благослови́те, лю́дие, превозноси́те Ю во ве́ки.

Песнь 9

Ирмос: Тя́, невмести́мое Сло́во во утро́бу вмести́вшую, небе́с простра́ннейшую и херуви́мов сла́внейшую, Богоро́дице Чи́стая, пе́сньми велича́ем.

Припев: Святый мучениче Епимаше, моли́ Бо́га о нас.

Ты́ я́ко возлюби́л еси́ соверше́нно и умре́ти за уме́ршаго на́с ра́ди Христа́. Те́мже от Него́ в вы́шних вво́инился еси́, му́чениче, Его́же со Отце́м и Ду́хом пе́сньми велича́ем.

Сла́ва Отцу́ и Сы́ну и Свято́му Ду́ху:

Ты́ я́ко на земли́ Спа́са Бо́га испове́дал еси́ пред нечести́выми мучи́тели ве́рно; ны́не в вы́шних от Него́ пред Ангелы, свиде́телю Епима́ше, и от Отца́ и Ду́ха сла́вою венча́лся еси́.

И ны́не и при́сно и во ве́ки веко́в. Ами́нь.

Богородичен: Тя́, светоно́сный о́блак, и Чи́стую и сла́вную Де́ву и Ма́терь Бо́жию, Моисе́ю я́вльшуюся та́инственно на горе́ Сина́йстей неопали́мую купину́, в пе́ниих велича́ем.

Свети́лен.

Боже́ственный Аристову́л и Стахи́й пребога́тый, и Апе́ллий богому́дрый, и Нарки́сс, и Ампли́й, и Урва́н, всему́дрии, ны́не от на́с да почту́тся я́ко Христо́вы апо́столи, и́миже ми́р от ле́сти многообра́зныя изба́вися.

Сла́ва, и ны́не, Богородичен:

Яви́лася еси́ преиму́щи херуви́мов, Всепе́тая, Седя́щаго бо на си́х ра́менах, Пречи́стая Отрокови́це, на объя́тиих Твои́х носи́ла еси́ и Младе́нца млекопита́ла еси́. Его́же приле́жно моли́ о на́с, пою́щих Тя́, Богоро́дицу вои́стинну.

Молитва

О святы́й уго́дниче Бо́жий, му́чениче Епима́ше! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому мученику Епимаху Новому