11 ноября

Канон преподобному Аврамию Ростовскому, чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Просвети́вся Боже́ственною благода́тию, неве́рныя лю́ди наста́вил еси́ к све́ту богоразу́мия: и по сме́рти сия́я све́тлостию жития́ твоего́, источа́еши исцеле́ния притека́ющим с ве́рою к ра́це моще́й твои́х, Авра́мие о́тче на́ш, Христа́ Бо́га моли́ дарова́ти на́м ве́лию ми́лость.

Велича́ние:

Ублажа́ем тя́, преподо́бне о́тче Авра́мие, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 8:

Прииди́те, мона́хов мно́жества, прииди́те, пусты́нное воспита́ние, прииди́те и ли́к соста́вим, дне́сь бо трапе́за поставля́ется и па́че благово́нных арома́т облагоуха́ет на́с па́мять преблаже́ннаго Авра́мия. Прииди́те, стеце́мся к ра́це его́ и любе́зно целу́ем пречестно́е о́но те́ло, нетле́нно во гро́бе лежа́що, и на́м оби́льно исто́чник чуде́с источа́ющо, и к нему́ возопие́м: о́тче Авра́мие, твои́ми моли́твами проси́ на́м у Христа́ ми́ра и ве́лия ми́лости.

Кано́н преподо́бнаго, гла́с 1.

Пе́снь 1.

Ирмос: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Припев: Преподобне отче Аврамие, моли́ Бо́га о нас.

Лю́тыми страстьми́ побежда́емь е́смь, окая́нный, и сего́ ра́ди молю́ Тя, Христе́ Бо́же, от си́х изба́вити мя́, я́ко да по достоя́нию возмогу́ воспе́ти Твоего́ уго́дника, Авра́мия преподо́бнаго.

Припев: Преподобне отче Аврамие, моли́ Бо́га о нас.

Лю́тых смуще́ний свободи́ мя, о́тче, да наставля́емь твои́ми моли́твами, све́тло воспою́ твое́ торжество́, богоно́се Авра́мие.

Сла́ва Отцу́ и Сы́ну и Свято́му Ду́ху:

Лю́таго и́дола искорени́л еси́, о́тче преблаже́нне, и ко Христу́ приве́л еси́ неве́рных собо́рища, и ты́я, я́ко ке́др, и́же в Лива́не, умно́жил еси́ твои́ми моли́твами, во сто́ плодонося́щия и врага́ попира́ющия.

И ны́не и при́сно и во ве́ки веко́в. Ами́нь.

Богородичен: Лю́тых напа́стей и мно́гих прегреше́ний свободи́ мя, Влады́чице, и проще́ние пода́ждь ми́, я́ко дерзну́х написа́ти мое́ю скве́рною десни́цею свято́е Твое́ и́мя.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Преподобне отче Аврамие, моли́ Бо́га о нас.

Да утверди́тся се́рдце мое́ моли́твами твои́ми, свя́те, и научи́ мя, недосто́йнаго, похвали́ти по досто́инству пресла́вную па́мять твою́, богоно́се о́тче на́ш Авра́мие.

Припев: Преподобне отче Аврамие, моли́ Бо́га о нас.

Да утверди́ши ны́, богому́дре, на безпло́тныя враги́, е́же прогони́ти ты́я, твою́ же па́мять велича́ти и Христа́ прославля́ти, тебе́ просла́вльшаго, о́тче Авра́мие.

Сла́ва Отцу́ и Сы́ну и Свято́му Ду́ху:

Да утверди́мся на ка́мени непоколеби́мем твои́х моли́тв, да не поколе́блют на́с прило́зи льсти́ваго, и у́м на́ш просвети́ све́том за́поведей Христо́вых, я́ко да ве́рою воспева́ем тя́, преблаже́нне Авра́мие.

И ны́не и при́сно и во ве́ки веко́в. Ами́нь.

Богородичен: Да утвержде́н бу́ду ми́лостию Твое́ю, Влады́чице, и покрове́н кро́вом кри́л Твои́х, Богоро́дице, и избе́гну сете́й лука́ваго, воспева́я пресла́вное Твое́ торжество́.

По 3-й пе́сни седа́лен, гла́с 5:

Апо́столов ревни́тель бы́в, преподо́бне, сего́ ра́ди и Богосло́ву бесе́довати сподо́бился еси́, и сего́ же́зл прии́м, Веле́са разруши́л еси́ и того́ ко́зни до конца́ искорени́л еси́, и неве́рныя ко Христо́ве ве́ре приве́л еси́. Ны́не же Христа́ Бо́га моли́ о чту́щих па́мять твою́, дарова́ти на́м ми́р и ве́лию ми́лость.

Сла́ва, и ны́не, Богородичен:

Побе́ду иму́ще кре́пкия си́лы на Тя́ любо́вию ве́рно наде́ющиися, Чи́стая Цари́це Де́во Богоро́дице, враги́ покаря́юще, побо́рницу иму́щи Тя́, весели́мся.

Пе́снь 4.

Ирмос: Разуме́х, Всеси́льне, Твое́ смотре́ние и со стра́хом просла́вих Тя́, Спа́се.

Припев: Преподобне отче Аврамие, моли́ Бо́га о нас.

Разуме́х, преподо́бне, мое́ недосто́инство и со стра́хом косну́хся к твоему́ хвале́нию, но ты́, свя́те, приими́, я́ко убо́гия две́ ца́те, с ве́рою тебе́ приноси́мое хвале́ние, всехва́льне о́тче Авра́мие.

Припев: Преподобне отче Аврамие, моли́ Бо́га о нас.

Разуме́л еси́, о́тче преблаже́нне, кова́рствия лука́ваго Веле́са и сего́ до конца́ низложи́л еси́, на́с на моли́тву воздви́гни дне́сь, да ве́рно ликовству́ем, преблаже́нне, в па́мяти твое́й, о́тче Авра́мие.

Сла́ва Отцу́ и Сы́ну и Свято́му Ду́ху:

Разуме́л еси́, свя́те, де́мона во умыва́льницу твою́ вше́дша и па́кость тебе́ сотвори́ти хотя́ща, сосу́д кресто́м покры́в, того́ опали́л еси́: ны́не же на́с спаси́ от его́ ловле́ния твои́ми моли́твами, о́тче Авра́мие.

И ны́не и при́сно и во ве́ки веко́в. Ами́нь.

Богородичен: Разуме́ла еси́, Влады́чице, воплоти́вшагося из Тебе́ Христа́ Бо́га на́шего, Того́ моли́, Богоблаже́нная, да Твои́ми моли́твами сохрани́т на́с от вся́каго наве́та льсти́ваго.

Пе́снь 5

Ирмос: От но́щи у́тренююще, пое́м Тя́, Христе́, Отцу́ Собезнача́льна и Спа́са ду́ш на́ших: ми́р ми́рови пода́ждь, Человеколю́бче.

Припев: Преподобне отче Аврамие, моли́ Бо́га о нас.

Из но́щи тмы́ глубо́кия возве́л еси́ лю́ди твоя́, и покая́ния све́том просвети́в, ко Христу́ приве́л еси́, богоно́се Авра́мие, и на́с просвети́, блаже́нне, сия́нием твоея́ благода́ти, я́ко да при́сно тя́ ублажа́ем.

Припев: Преподобне отче Аврамие, моли́ Бо́га о нас.

Из но́щи идолонеи́стовства извле́кл еси́, о́тче, мно́жество люде́й и си́х погруже́нием благода́ти озари́л еси́ духо́вныя; и ны́не на́с озари́ све́том невеще́ственным, и моли́твами твои́ми просвети́, я́ко да по до́лгу велича́ем тя́.

Сла́ва Отцу́ и Сы́ну и Свято́му Ду́ху:

Из но́щи страсте́й мои́х возведи́ мя, свя́те, и да́руй ми́ све́т мы́сленный, да возмогу́, недосто́йный, от гру́баго ума́ моего́ худо́е сие́ плете́ние принести́ к похвале́нию чуде́с пресла́внаго твоего́ торжества́, богоно́се Авра́мие.

И ны́не и при́сно и во ве́ки веко́в. Ами́нь.

Богородичен: Из но́щи а́да преиспо́дняго изведе́ ны Сы́н Тво́й, Пречи́стая, и рая́ жи́тели па́ки соде́лав: сего́ ра́ди, покланя́ющеся Ему́, Тебе́, Де́во, ублажа́ем.

Пе́снь 6.

Ирмос: Отве́ргл мя́ еси́ во глубины́ се́рдца морска́го, и спа́сл еси́ мя́, Спа́се, от рабо́ты сме́ртныя, и разреши́л еси́ у́зы беззако́ний мои́х.

Припев: Преподобне отче Аврамие, моли́ Бо́га о нас.

Отверго́шася неразу́мнии твоего́ уче́ния, блаже́нне, и к Веле́су, глу́ху и́долу, ниже́ глаго́лющу, ниже́ осяза́ющу притека́ху. И егда́ сего́ пробо́л еси́ тро́стию Богосло́вовою, тогда́ и си́х к ра́зуму благоче́стия наста́вил еси́, о́тче Авра́мие.

Припев: Преподобне отче Аврамие, моли́ Бо́га о нас.

Отве́ржен е́смь в ро́в неча́яния, многостра́стный, но ты́ возведи́ мя, свя́те, на стезю́ покая́ния, я́ко да отве́ргу вся́ моя́ зла́я дея́ния и облеку́ся све́том моли́тв твои́х, о́тче Авра́мие блаже́нне.

Сла́ва Отцу́ и Сы́ну и Свято́му Ду́ху:

Отве́ржен бы́в окая́нный де́мон, восхоте́ спо́ну тебе́ сотвори́ти, преобразу́ется в во́ина лука́вый, и предстае́т тогда́ владу́щему благове́рному кня́зю Влади́миру, и того́ на тя́ вооружа́ет. Ты́ же, сего́ прогна́в, вя́щше прославля́ешися и кня́зя в ве́ре утвержда́еши.

И ны́не и при́сно и во ве́ки веко́в. Ами́нь.

Богородичен: Отве́рзи мне́, Влады́чице, две́ри ми́лости Твоея́, я́коже Сы́н Тво́й отве́рзе разбо́йнику и блудни́це, и блу́дному две́ри милосе́рдия; я́ко да и а́з Твои́ми моли́твами улучу́ жи́знь ве́чную, воспева́я Твою́ бла́гость.

Конда́к, гла́с 2:

Иго Христо́во прие́м, Авра́мие, и Того́ кре́ст на ра́мо взе́м, после́довал еси́ Ему́, насажде́н бы́в в дому́ Госпо́дни и процве́л еси́, я́ко фи́никс, и я́ко ке́др, и́же в Лива́не, умно́жил еси́ ча́да твоя́, му́ж жела́ний духо́вных: от возлю́бленнаго же апо́стола Иоа́нна Богосло́ва благода́ть восприи́м, жезло́м сокруши́л еси́ и́дола и разсы́пал еси́ его́, я́ко пра́х, и чудотво́рец у́бо ве́лий яви́лся еси́, преподо́бне. Те́мже Христа́ Бо́га моли́ непреста́нно о все́х на́с.

Икос:

Авра́мие богому́дре, житие́ непоро́чно стяжа́л еси́, и ки́й язы́к челове́чь довле́ет когда́ к похвале́ пове́дати, я́же о тебе́? Оба́че воспое́м Бо́жию му́дрость и твоя́, преподо́бне, стра́сти и по́двиги, я́же на земли́, я́ко свети́льника тя́, я́вльшася все́м челове́ком и мно́гим терпе́нием в ли́це Ангельстем возсия́вша. Те́м в пе́снех вопие́м ти́ си́це: ра́дуйся, Авра́мие преподо́бне и богоно́се, небе́сный челове́че и земны́й Ангеле; ра́дуйся, Ду́ха Свята́го оби́телище; ра́дуйся, я́ко из мла́да после́довал еси́ Святе́й Тро́ице; ра́дуйся, целому́дрия сто́лпе, низложи́вый де́мона многокова́рственнаго; ра́дуйся, я́ко от млады́х ногте́й после́довал еси́ Христу́; ра́дуйся, свети́льниче многосве́тлый, приведы́й ко Христу́ мона́хов мно́жества; ра́дуйся, разори́вый и́дола и воздви́гнувый Христо́ву це́рковь; ра́дуйся, и́же идолопокло́нники сотвори́л еси́ Пресвяте́й Тро́ице покло́нники; ра́дуйся, я́ко моли́твами твои́ми де́мони побежда́ются; ра́дуйся, гра́ду Росто́ву похвала́, я́ко пе́рвую о́бщую оби́тель воздви́гл еси́, и в не́й мно́гия мона́хи, я́ко виногра́д Христо́в, насади́л еси́ и Тро́ицу сла́вити научи́л еси́; ра́дуйся, похвала́ и утвержде́ние, соблюди́ нас моли́твами твои́ми от вра́г ненаве́тна, да зове́м ти́: ра́дуйся, о́тче Авра́мие блаже́нне, и Христа́ Бо́га моли́ непреста́нно о все́х на́с.

Пе́снь 7.

Ирмос: Явле́йся в купине́ законополо́жнику огне́м, и рождество́ Де́вы проображе́й в не́й, благослове́н еси́ Го́споди, Бо́же оте́ц на́ших.

Припев: Преподобне отче Аврамие, моли́ Бо́га о нас.

Яви́лся еси́ в Росси́и свети́льник пресве́тлый, о́тче Авра́мие, Трисо́лнечными светосия́нии к богозна́нию на́с приводя́ и пе́ти науча́я: благослове́н Бо́г оте́ц на́ших.

Припев: Преподобне отче Аврамие, моли́ Бо́га о нас.

Яви́лся еси́ река́ медото́чных уче́ний, богоно́се, ве́рныя напая́я, грехи́ же потопля́я и к позна́нию благоче́стия все́х возводя́, и науча́я пе́ти: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Явлься тебе́ учени́к Христо́в богослове́снейший и де́вственник возлю́бленный, тро́сть тебе́, блаже́нне, дарова́, е́юже диа́вола пробо́л еси́ и ктому́ неви́дима сего́ сотвори́л еси́, и челове́ки научи́л еси́ вопи́ти: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Явле́йся я́ко Челове́к Сы́н Тво́й, Богоневе́сто, на́с обожи́ и к ра́зуму ми́лости возведе́, и во све́те непристу́пнем ликова́ти устро́и воспева́ющия и глаго́лющия: благослове́н Бо́г оте́ц на́ших.

Пе́снь 8.

Ирмос: Пе́снь Тебе́ прино́сим безпло́тных, я́коже о́троцы в пещи́, и, пою́ще, глаго́лем: благослови́те вся́ дела́ Госпо́дня Го́спода.

Припев: Преподобне отче Аврамие, моли́ Бо́га о нас.

Пе́снь тебе́ приношу́, о́тче богоно́се Авра́мие, е́юже пропове́даю твоя́ по́двиги и чудеса́, и прославля́ю твое́ вели́чество, вопия́: благослови́те вся́ дела́ Госпо́дня Го́спода.

Припев: Преподобне отче Аврамие, моли́ Бо́га о нас.

Пе́снь прино́сиши Христу́, лику́я со Ангелы, о́тче Авра́мие, те́х бо житию́ поревнова́л еси́ и на́с в па́мять твою́ ликова́ти устро́ил еси́, пою́щих: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Пе́снь пое́ши херуви́мскую, и́мже и подо́бник бы́л еси́, кри́ла о́гненная восприе́м, и́миже го́рняго Иерусали́ма дости́г, о на́с моли́ся, о́тче Авра́мие, пою́щих ве́рно: благослови́те вся́ дела́ Госпо́дня Го́спода.

И ны́не и при́сно и во ве́ки веко́в. Ами́нь.

Богородичен: Пе́снь приими́, Влады́чице, от несоверше́ннаго ума́ на́шего и моли́ся Сы́ну Твоему́ и Бо́гу на́шему, пода́ти на́м оставле́ние грехо́в, я́ко да воспева́ем Тя́ во вся́ ве́ки.

Песнь 9

Ирмос: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богоро́дицу, ве́рнии, велича́ем.

Припев: Преподобне отче Аврамие, моли́ Бо́га о нас.

Живоно́сный исто́чник благода́тных во́д яви́лся еси́, Авра́мие богоблаже́нне: пода́ждь ми́ исто́чник сле́з, да омы́ю душе́вныя моя́ стра́сти и убелю́ све́том покая́ния очерне́вшую ду́шу мою́.

Припев: Преподобне отче Аврамие, моли́ Бо́га о нас.

Живоно́сный Кре́ст на ра́мо взе́м, преподо́бне, распе́ншемуся на не́м Христу́ после́довал еси́, о́тче Авра́мие, и вра́жия полки́ прогна́л еси́, и на́м проси́ ми́лости, торжеству́ющим твое́ пра́зднество, богоно́се.

Сла́ва Отцу́ и Сы́ну и Свято́му Ду́ху:

Живоно́сным Кресто́м врага́ опали́л еси́, и сего́ в сосу́де запеча́тав, ученико́м рабо́тати отше́л еси́, показу́я смире́ния о́браз, и си́х науча́я любому́дренно после́довати тебе́.

И ны́не и при́сно и во ве́ки веко́в. Ами́нь.

Богородичен: Исто́чник ро́ждши на́м, Влады́чице, житие́ ми́рно рабо́м Твои́м испроси́ и  на иноплеме́нники посо́бствуй, я́ко Ты́ еси́ спасе́ние на́ше, Богоневе́стная.

Свети́лен.

По́стнически пожи́в, о́тче Авра́мие, и на враги́ вла́сть прии́м, я́ко и в сосу́де ты́я затворя́ти и кресто́м опаля́ти; и челове́ки от неду́г исцелева́еши, притека́ющия с ве́рою к ра́це моще́й твои́х и почита́ющия, богоно́се, всечестну́ю па́мять твою́.

Сла́ва, и ны́не, Богородичен:

Зачала́ еси́ во утро́бе Бо́га, Его́же трепе́щут вся́ небе́сныя си́лы, Сего́, Де́во, родила́ еси́ пло́тию, на́ше естество́ обожи́вшаго. Его́же моли́, богоблаже́нная, с преподо́бным Авра́мием, да спасе́т Тебе́ ра́ди ду́ши на́ша.

Молитва преподобному Авраамию, архимандриту Ростовскому

О, преподо́бне о́тче наш Авраа́мие! Не забу́ди нас, но помина́й всегда́ во святы́х твои́х благоприя́тных моли́твах к Бо́гу. Помяни́ ста́до твое́, е́же сам и пасл еси́, и не забу́ди посеща́ти ча́да твоя́, и моли́ за ны, о́тче свяще́нный, я́ко име́я дерзнове́ние ко Го́споду: не мним бо тя ме́ртва су́ща, а́ще и преста́вился еси́ от нас, па́стырю наш до́брый! Се мо́щи твоя́ святы́я пред очи́ма на́шима: свята́я же твоя́ душа́ с А́нгельскими Безпло́тных ли́ки у Престо́ла Всех Царя́ пред стоя́щий досто́йно весели́тся. Испроси́ у́бо нам вре́мя на покая́ние, е́же невозбра́нно прейти́ от земли́ на Не́бо, и ве́чнныя му́ки изба́витися, и Небе́снаго Ца́рствия насле́дниками бы́ти со все́ми пра́ведными, от ве́ка благоугоди́вшими Го́споду на́шему Иису́су Христу́. Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом, ны́не, и при́сно, и во ве́ки веко́в. Ами́нь.