Шрифт

11 ноября.

Канон преподобному Аврамию Затворнику.

Преподобному Аврамию Затворнику
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, о́тче, изве́стно спасе́ся, е́же по о́бразу: прии́м бо кре́ст, после́довал еси́ Христу́, и де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней; те́мже и со Ангелы сра́дуется, преподо́бне Авра́мие, ду́х тво́й.

Кано́н преподо́бнаго,. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Аврамие, моли́ Бо́га о нас.

Боже́ственными сия́я блиста́нии, светоно́сный тво́й соверша́ющия пра́здник, страсте́й омраче́ния, всеблаже́нне, моли́твами твои́ми, Авра́мие, изба́ви.

Припев: Преподобне отче Аврамие, моли́ Бо́га о нас.

Боже́ственное разжже́ твою́ ду́шу, блаже́нне, жела́ние, угаси́ плотска́я разжже́ния, о́тче, и невеще́ственно на земли́ тя жи́ти сотвори́.

Сла́ва Отцу́ и Сы́ну и Свято́му Ду́ху:

Умертви́в у́ды, я́же на земли́, поще́нием и вся́кими злострада́нии, о́тче му́дре, жи́зни сподо́бился еси́ лу́чшия на небесе́х, богоно́се Авра́мие.

И ны́не и при́сно и во ве́ки веко́в. Ами́нь.

Богородичен: От крове́й Твои́х свяще́нных Бо́га Отца́ Сло́во воплоти́ся преесте́ственно, Де́во Мари́е, Его́же моли́ плотска́я моя́ умертви́ти взыгра́ния.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподобне отче Аврамие, моли́ Бо́га о нас.

Всеобра́зно возжеле́в жела́ний коне́чное, ми́ра и пло́ти, богоно́се, вне́ бы́л еси́, те́м восприя́л еси́ преми́рную сла́ву и ве́чнующее, о́тче, наслажде́ние.

Припев: Преподобне отче Аврамие, моли́ Бо́га о нас.

Хра́м жи́в яви́лся еси́ вседе́тельнаго Ду́ха, о́тче, в хи́жине те́ло заключи́в, преподо́бне. Те́мже облиста́л еси́ доброде́телей луча́ми, свяще́нно обожа́емь, блаже́нне Авра́мие.

Сла́ва Отцу́ и Сы́ну и Свято́му Ду́ху:

Де́ланием боле́зней, доброде́телей зре́л, преподо́бне, израсти́л еси́ кла́с стори́чествующь, и́мже пита́ются че́стно честно́е твое́ успе́ние торжеству́ющии.

И ны́не и при́сно и во ве́ки веко́в. Ами́нь.

Богородичен: В Тебе́, Всесвята́я, всего́ Вино́вный за премно́гое милосе́рдие хотя́ всели́ся и освяти́ челове́ческое существо́, преступле́нием пе́рвее попо́лзшееся.

Седа́лен, гла́с 1.

Иже дре́внему Авраа́му подо́бяся, о́тче, удали́лся еси́ сро́дников по пло́ти, повину́яся, Авра́мие, глаго́лу Бо́га на́шего. Те́мже, пости́вся, и ду́шу светле́йшу показа́л еси́ со́лнечных лу́чь, богому́дре всеблаже́нне.

Слава И ны́не, Богородичен:

Наста́ви ны́ на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная, Благослове́нная Мари́е, прибе́жище отча́янных челове́ков, Бо́жие обита́лище.

КрестоБогородичен:

Нескве́рная Агница, Агнца и Па́стыря, пове́шена на дре́ве, ме́ртва зря́щи, пла́чущи веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Аврамие, моли́ Бо́га о нас.

Струя́ми, о́тче, сле́з твои́х душе́вныя скве́рны омы́в, боже́ственное бы́л еси́ Ду́ха и честно́е, всеблаже́нне, жили́ще.

Припев: Преподобне отче Аврамие, моли́ Бо́га о нас.

Бде́ние всено́щно, моли́тву непреста́нну, безпристра́стие и любо́вь нелицеме́рну, и соверше́нну ве́ру удержа́л еси́.

Сла́ва Отцу́ и Сы́ну и Свято́му Ду́ху:

Исцеля́ти стра́сти и отгони́ти, преподо́бне, ду́хи, благода́ть прия́л еси́, Авра́мие, я́ко Бо́жий уго́дник и́стиннейший.

И ны́не и при́сно и во ве́ки веко́в. Ами́нь.

Богородичен: Уны́нием одержи́ма и грехо́м ны́не погруже́на, мольбо́ю Твое́ю изба́ви мя́, Богоро́дице, Ма́ти Присноде́во.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Аврамие, моли́ Бо́га о нас.

Яко плодови́тая розга́, гро́зды израсти́л еси́, о́тче Авра́мие, доброде́телей боже́ственных, умиле́ния вино́ точа́щия и страсте́й пия́нство от ду́ш отгоня́щия, и сердца́ ве́рных веселя́щия.

Припев: Преподобне отче Аврамие, моли́ Бо́га о нас.

Напа́сти тебе́ разли́чны зми́й вселука́вый, о́тче, воздви́же, но того́ ору́жием креста́, богоно́се, умертви́л еси́, и побе́ды вене́ц от Бо́га пра́ведным судо́м прия́л еси́, богому́дре Авра́мие.

Сла́ва Отцу́ и Сы́ну и Свято́му Ду́ху:

Святы́ни до́м, о́тче, Боже́ственнаго Ду́ха ве́рою бы́в, созда́л еси́ до́м свяще́нный, и несвяще́нный собо́р несвяще́нныя ле́сти преложи́в наказа́ньми, все́х Бо́гу освяти́л еси́.

И ны́не и при́сно и во ве́ки веко́в. Ами́нь.

Богородичен: Ма́терь, Де́ву Отрокови́цу, Боже́ственным просвеща́еми Ду́хом, Пречи́стая, свяще́ннии проро́цы свяще́нными Тя́ гла́сы провозвести́ша, из Нея́же Бо́г Сло́во, па́че вины́ же и сло́ва, воплоти́ся за милосе́рдие безчи́сленное.

Пе́снь 6.

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя испо́лнися, и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Припев: Преподобне отче Аврамие, моли́ Бо́га о нас.

Свети́льника, тя́, су́щии во тме́ пре́лести, неле́стно наставля́юща, обре́тше к путе́м жи́зни, богоно́се, неве́дения тму́ отложи́ша и яви́шася светови́дни ве́рою боже́ственною, Авра́мие.

Припев: Преподобне отче Аврамие, моли́ Бо́га о нас.

Бо́дренно, умоли́в Бо́га, посыла́еши просвеще́ние спасе́ния су́щим в нощи́ идолонеи́стовства одержи́мым, богому́дре Авра́мие, и показа́л еси́ вся́ сы́ны све́та и дне́, благода́тию.

Сла́ва Отцу́ и Сы́ну и Свято́му Ду́ху:

Безмо́лвно твою́ жи́знь соверши́в, я́же в житии́ треволне́ния, всеблаже́нне, Бо́жиими наде́ждами преше́л еси́ и к ти́хим приста́нищем дости́гал еси́, Авра́мие, небе́снаго Ца́рства и Боже́ственныя све́тлости.

И ны́не и при́сно и во ве́ки веко́в. Ами́нь.

Богородичен: Отягче́на мя́ дрема́нием уны́ния, возста́ви Твои́м хода́тайством, Ма́ти Бо́жия, и не да́ждь усну́ти в сме́рть греха́, Де́во, предста́тельницу бо и путевожда́ мое́й жи́зни напису́ю Тя́.

Конда́к Авра́мия, гла́с 3.

Во пло́ти, я́ко Ангел, на земли́ яви́лся еси́, и поще́нием бы́л еси́, я́ко дре́во насажде́нное, водо́ю воздержа́ния до́бре возрасти́вся, и тече́ньми твои́х сле́з скве́рну омы́в, сего́ ра́ди яви́лся еси́ прия́телище Боже́ственное, Авра́мие, Ду́ха.

Икос:

Тле́нная презре́в, нетле́нныя восприя́л еси́ красоты́: сла́сти плотски́я возненави́дел еси́, му́дре, измла́да возлюби́в чистоту́. Те́м, черто́га мирска́го отбежа́в, сопру́жницы же благосла́вныя и роди́телей уклони́вся, Еди́наго Бо́га я́сно, Рачи́теля, возжела́в и возлюби́в от всея́, о́тче, души́ и се́рдца и́стинно: сего́ ра́ди показа́лся еси́ де́вства и чистоты́ прия́телище Боже́ственное, Авра́мие, Ду́ха.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Аврамие, моли́ Бо́га о нас.

Да вы́шнее Ца́рство получи́ши и сла́ву неизрече́нную, сла́ву же попира́емую, му́дре, и тле́нную я́ко смы́слен и разу́мен преоби́дел еси́ му́дренно.

Припев: Преподобне отче Аврамие, моли́ Бо́га о нас.

Егда́ во́лк лука́вый а́гницу твою́ расто́ргне льсти́вне, тогда́ сего́, му́дре, че́люсти сокруши́л еси́, сию́ же я́ко па́стырь изря́днейший к жи́зни приве́л еси́.

Сла́ва Отцу́ и Сы́ну и Свято́му Ду́ху:

Зако́ном повину́яся Влады́чним, заблу́ждшее взыска́л еси́ и обре́л еси́, и на ра́мена твоя́ взе́м, всеблаже́нне, я́ко па́стырь вве́л еси́ во огра́ду покая́ния.

И ны́не и при́сно и во ве́ки веко́в. Ами́нь.

Богородичен: Еди́на Еди́наго от Тро́ицы родила́ еси́ во дву́ существу́, Ипоста́си же еди́ней Ви́димаго, Де́во. Ему́же песнопое́м: благослове́н еси́, Го́споди Бо́же, во ве́ки.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Преподобне отче Аврамие, моли́ Бо́га о нас.

В поги́бели ро́в чи́стую све́рже голуби́цу твою́ злоде́йственный зми́й, но сию́ изве́л еси́, о́тче, всему́дренно, благослови́те, поя́, дела́ Го́спода и превозноси́те Его́ во ве́ки.

Припев: Преподобне отче Аврамие, моли́ Бо́га о нас.

И в житии́ обходя́, о́тче Авра́мие, и по кончи́не вра́чь боля́щих яви́лся еси́, Ду́ха благода́тию Боже́ственною, благослови́те, поя́, дела́ Го́спода и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Незло́бием, блаже́нне, пра́вдою же и целому́дрием, и ве́рою просия́в, Ангелом, преподо́бне, счи́слился еси́, благослови́те, поя́, дела́ Го́спода и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Струи́ живы́я яви́лася еси́ всесвято́е селе́ние, от Нея́же пию́ще, умертви́вшиися, жи́знь насле́дуем, вопию́ще: благослови́те дела́ вся́ Го́спода и превозноси́те Его́ во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Преподобне отче Аврамие, моли́ Бо́га о нас.

Ви́дети сподо́бился еси́, о́тче богоно́се, чрез наде́жду тебе́ дре́вле жела́емая, и́хже о́ко не ви́де и у́хо не слы́ша.

Припев: Преподобне отче Аврамие, моли́ Бо́га о нас.

Красе́н яви́лся еси́, боже́ственными доброде́телей луча́ми сия́я, Авра́мие, и кра́сному Влады́це, ра́дуяся, предстои́ши.

Припев: Преподобне отче Аврамие, моли́ Бо́га о нас.

Совокупи́лся еси́ лико́м все́х преподо́бных, и с ни́ми обоже́ния, преподо́бне, получи́в, моли́ е́же спасти́ся все́м на́м.

Сла́ва Отцу́ и Сы́ну и Свято́му Ду́ху:

Де́нь весе́лия приво́дит ра́достно, свяще́нное твое́, Авра́мие, успе́ние, Це́рковь честву́ющи житие́ твое́.

И ны́не и при́сно и во ве́ки веко́в. Ами́нь.

Богородичен: Благолюби́вая Де́во, озло́бленную грехо́м ду́шу мою́ ублажи́ и бла́г небе́сных прича́стника сотвори́.

Молитва

О свяще́нная главо́, преподо́бне о́тче, преблаже́нне а́вво Аврамие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Аврамию Затворнику