11 ноября.

Канон святой преподобномученице Анастасии Римляныне.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́я, гла́с 4:

Агница Твоя́, Иису́се, Анастаси́я, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́; тоя́ моли́твами, я́ко Ми́лостив, спаси́ ду́ши на́ша.

Кано́н преподо́бныя. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святая преподобномученице Анастасие, моли́ Бо́га о нас.

Сию́ светоно́сную па́мять твою́ почита́ющему, богому́драя, просвеще́ние ми́ пода́ждь, души́ моея́ тму́ отгоня́щи.

Припев: Святая преподобномученице Анастасие, моли́ Бо́га о нас.

Всю́ от пеле́н тебе́ саму́ю возложи́ла еси́ Зижди́телю твоему́ и огне́м воздержа́ния теле́сныя стра́сти попали́ла еси́.

Сла́ва Отцу́ и Сы́ну и Свято́му Ду́ху:

К высоте́ муче́ния, му́ченице, возшла́ еси́, непощаде́вши пло́ти, и черто́гов мы́сленных, я́ко де́ва, сподо́билася еси́.

И ны́не и при́сно и во ве́ки веко́в. Ами́нь.

Богородичен: Тя́, небоме́рную Ле́ствицу, на не́йже Бо́г утверди́ся, челове́ки небе́сны соде́лав, Отрокови́це, почита́ем.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Святая преподобномученице Анастасие, моли́ Бо́га о нас.

Стоя́ла еси́ пред суди́щем мучи́теля, Христа́, сла́вная, Творца́ все́х и Влады́ку, Бо́га Сло́ва пропове́дающи.

Припев: Святая преподобномученице Анастасие, моли́ Бо́га о нас.

Добро́та серде́чная ви́димым зра́ком, сла́вная, изда́вшися, тя́, красне́йшую, зря́щим яви́ла е́сть.

Сла́ва Отцу́ и Сы́ну и Свято́му Ду́ху:

Бога́тство неистощи́мо исцеле́ний тебе́ подаде́, отрокови́це, Христо́с, Его́же нищету́ во́льно возлюби́ла еси́.

И ны́не и при́сно и во ве́ки веко́в. Ами́нь.

Богородичен: Ве́щь грехо́в мои́х Твои́х моли́тв огне́м попали́, Ма́ти Све́та, ро́су ми́ Боже́ственную оставле́ния нося́щи.

Седа́лен, гла́с 8.

Воздержа́ния росо́ю страсте́й погаси́ла еси́ пла́мень ю́ношески, огне́м же крове́й твои́х всю́ пре́лесть попали́ла еси́ и Жениху́ Сло́ву, я́ко да́р, принесла́ еси́ честно́е де́вство и до́блественное страда́ние. Те́мже в черто́г введе́ тя сла́вы, све́тле до́бльствовавшую и зми́я попра́вшую, Анастаси́е многострада́льная, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святая преподобномученице Анастасие, моли́ Бо́га о нас.

Тя́, и́го легча́йшее Христо́во, му́ченице, поне́сшую от ю́ности, желе́зное у́же носи́ти пребеззако́ннующии осуди́ша.

Припев: Святая преподобномученице Анастасие, моли́ Бо́га о нас.

Ка́пли крове́й твои́х многобо́жия угаси́ша у́глие, лучи́ же чуде́с твои́х страсте́й ве́щь попали́ша.

Сла́ва Отцу́ и Сы́ну и Свято́му Ду́ху:

Не обнажи́ благода́ти, те́ло твое́ обнажи́в, лука́внейший, истка́ну же па́че свы́ше нераздра́ну ри́зу исхода́таи тебе́.

И ны́не и при́сно и во ве́ки веко́в. Ами́нь.

Богородичен: По рождестве́ пребыла́ еси́ нетле́нна Де́ва, я́коже пре́жде рождества́, Юна бо Младе́нца родила́ еси́, пре́жде ве́к познава́ема.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Святая преподобномученице Анастасие, моли́ Бо́га о нас.

Не изнуре́на огне́м веще́ственным яви́лася еси́, му́ченице Анастаси́е, о́гнь бо тя́ серде́чный Боже́ственныя любве́ ороша́ше.

Припев: Святая преподобномученице Анастасие, моли́ Бо́га о нас.

Ударе́ньми лица́, му́ченице Анастаси́е, украси́вшися, враго́в отрази́ла еси́ ме́рзское неразу́мие.

Сла́ва Отцу́ и Сы́ну и Свято́му Ду́ху:

Протяже́на на дре́ве, богому́драя Анастаси́е, любо́вию Жениха́ твоего́, Боже́ственную стра́сть образова́ла еси́.

И ны́не и при́сно и во ве́ки веко́в. Ами́нь.

Богородичен: Пое́м Тя́, Всепе́тая Влады́чице Богоро́дице, Бо́га бо препе́таго пло́тию родила́ еси́, Пречи́стая.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святая преподобномученице Анастасие, моли́ Бо́га о нас.

Сокруша́емо те́ло ра́нами явля́ше пра́вость твоея́ со́вести, страстоте́рпице, ко Христу́ Бо́гу на́шему.

Припев: Святая преподобномученице Анастасие, моли́ Бо́га о нас.

Ви́сящи высоко́, ра́ны, му́ченице, терпя́щи и не уя́звлено храня́щи души́ благоро́дие, достохва́льная.

Сла́ва Отцу́ и Сы́ну и Свято́му Ду́ху:

Претерпе́ла еси́ зубо́в, и ру́к, и но́г отъя́тие, му́ченице многострада́льная, взира́ющи ко Христу́, Жениху́ твоему́.

И ны́не и при́сно и во ве́ки веко́в. Ами́нь.

Богородичен: Человеколю́бца ро́ждши, Бо́га, Благолюби́вая Влады́чице, Того́ моли́ гее́нны огня́ изба́витися на́м.

Конда́к Анастаси́и, гла́с 3.

Де́вства вода́ми очище́нна, преподо́бная, му́ченичества кровьми́, Анастаси́е, венча́вшися, подае́ши су́щим в ну́ждах неду́гов исцеле́ние и спасе́ние, приступа́ющим от се́рдца, кре́пость бо тебе́ подае́т Христо́с, источа́я благода́ть приснотеку́щую.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святая преподобномученице Анастасие, моли́ Бо́га о нас.

Шу́м гла́са пра́зднующих иде́же е́сть лику́еши, страстоте́рпице, с де́вами Бо́гу Зижди́телю песнопою́щи: благослове́н еси́, Го́споди Бо́же, во ве́ки.

Припев: Святая преподобномученице Анастасие, моли́ Бо́га о нас.

Уды сокруша́емы зря́щи и ногте́й истерза́ние терпя́щи, принесла́ся еси́ Бо́гу же́ртва, песнопою́щи: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Яви́лася еси́, я́ко лоза́, богому́драя, ру́це и но́зе, я́ко ве́тви, ре́жемы, и на́м мы́сленно вино́ источа́ющи, сердца́ утеша́ющее и страсте́й отрева́ющее пия́нство.

И ны́не и при́сно и во ве́ки веко́в. Ами́нь.

Богородичен: Во всего́ челове́ка обле́кся Нескве́рный, кроме́ греха́, из утро́бы Твоея́, Чи́стая, про́йде Плотоно́сец, Его́же умоли́ ве́рою Тя́ честву́ющия спасти́.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святая преподобномученице Анастасие, моли́ Бо́га о нас.

Юношески до́бльствовавши, страстоно́сице всехва́льная, и на пре́лесть воздви́гла еси́ побе́ды. Ру́к бо лише́ния и но́г терпе́ла еси́, сосце́в же и зубо́в твои́х искорене́ние, му́ченице, претерпе́ла еси́, в ра́дости песнопою́щи: лю́дие, превозноси́те Христа́ во ве́ки.

Припев: Святая преподобномученице Анастасие, моли́ Бо́га о нас.

Всесветла́, я́ко со́лнце, де́вства све́тлостьми, и муче́ния добро́тами облиста́ла еси́, и ми́р просвети́ла еси́ светолу́чными сия́нии твоего́ терпе́ния, страстоте́рпице, вопию́щи: о́троцы, благослови́те, свяще́нницы, воспо́йте, лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Оскверне́нную страстьми́ ду́шу мою́, богоневе́сто, и очерне́нную прило́ги зми́я, твои́ми мольба́ми от лю́тых очи́сти, и све́тлым осене́нием твои́м, му́ченице Анастаси́е, озари́ вопи́ти: свяще́нницы, по́йте, лю́дие, превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Тя́, Чи́стую и Непоро́чную, де́ва жела́ющи, непоро́чно и те́ло и ду́шу соблюде́, страсте́й подпале́ния терпе́нием испепели́вши, искуше́ние же мно́гих претерпе́вши му́к, и ны́не в небе́сных черто́зех лику́ет с Тобо́ю, веселя́щися во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святая преподобномученице Анастасие, моли́ Бо́га о нас.

На дре́ве пове́шена была́ еси́, Сло́ва Бо́жия образу́ющи Стра́сть блаже́нную, и отсече́ние терпе́ла еси́ ру́к твои́х и но́г, зубо́в искорене́ние, язы́ка же отре́зание и сосце́в, чи́стая Анастаси́е, мона́шествующих сла́во и му́чеников украше́ние.

Припев: Святая преподобномученице Анастасие, моли́ Бо́га о нас.

Яко неве́ста, украси́лася еси́ добро́тою, обручи́вшися Жениху́ страда́ньми добротво́рными, вну́трь же черто́гов светови́дных, я́ко избра́нная, всели́лася еси́, нося́щи свещу́ де́вственную. И ны́не ца́рствуеши с Живу́щим во ве́ки, Анастаси́е, сия́ющи.

Припев: Святая преподобномученице Анастасие, моли́ Бо́га о нас.

Иска́пают боле́зни твоя́ сла́дость, греха́ го́ресть отъе́млющу, ра́ка же то́чит исцеле́ний ре́ки и потопля́ет вся́ стра́сти, и неду́ги лю́тыя в сла́ву Спа́сову, честна́я Анастаси́е, и́же по достоя́нию тя́ сла́вят.

Сла́ва Отцу́ и Сы́ну и Свято́му Ду́ху:

До́блествоваша жены́, Твои́м Кресто́м укре́пльшеся, Христе́ Всеси́льне, и вра́жию главу́ многоко́зненную му́жески, Сло́ве Бо́жий, сокруши́ша, и рая́ ра́достно селе́ние получи́вше, обоже́ние прия́ша ди́вное, воспева́юще Тя́.

И ны́не и при́сно и во ве́ки веко́в. Ами́нь.

Богородичен: Поне́сшаго Тя́ пло́ть от Жены́, я́ко позна́ му́ченица Твоя́, Го́споди, де́вственными укра́шена луча́ми и муче́ния кро́вию обагрена́, Тебе́, Бо́гу, во сле́д Ма́тере Твоея́, сла́вно приведе́ся, я́ко ца́рствующему тва́рию.

Молитва преподобномученице Анастасии Римляныне

Де́вственниц похвало́ и му́чениц сла́во, Анастаси́е преподо́бная! К тебе́ во умиле́нии серде́ц на́ших припа́даем и твоего́ заступле́ния у Го́спода о нас мо́лим. А́ще бо чистоте́ твое́й не поревнова́хом и безбоя́зненнаго испове́дания твоего́ не приобщи́хомся, па́че же мно́гими прегреше́ньми и лю́тыми паде́ньми и отсту́пствы гнев Бо́жий привлеко́хом, но не хо́щем во гресе́х на́ших умре́ти и, на твоя́ му́жеския по́двиги взира́юще, па́ки на одоле́ние страсте́й на́ших ополча́емся. Сие́ же ве́дуще, я́ко кроме́ благода́тныя по́мощи ничто́ же благо́е сотвори́ти возмо́жем, ту́ю нам от Го́спода пода́ти тебе́ про́сим. Ты бо, преподобному́ченице пресла́вная, ве́лие ко Влады́це дерзнове́ние стяжа́ла еси́, я́ко просла́вившая Его́ в чи́стой души́ твое́й и в телеси́ твое́м страда́льчестем, зане́ вся прельще́ния и преще́ния мучи́теля презре́вши, искорене́ние же зубо́в и ногте́й истерза́ние, и сосце́в и рук и ног отсече́ние сла́дце претерпе́вши, дерзнове́нно вопия́ла еси́: “Христо́с есть бога́тство мое́ и похвала́”. Те́мже от того́ бога́тств и на́шей нищете́ духо́вная пода́ждь дарова́ния и от безме́рных прегреше́ний живо́т наш соблюди́, мир и безмяте́жие нам испроси́, от нужды́ и уны́ния нас предста́тельством твои́м огради́, друг ко дру́гу нас в послуша́нии и братолю́бии наста́ви и ко Го́споду о́чи серде́ц на́ших всегда́ возводи́, во е́же при́сно сла́вити нам Отца́ и Сы́на и Свята́го Ду́ха держа́ву, и твое́ те́плое предста́тельство во ве́ки веко́в. Ами́нь.