10 ноября

Канон святым мученикам Терентию и Неониле.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н му́чеников. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святии мученицы, моли́те Бо́га о нас.

Глубино́ю обурева́емь греха́, Человеколю́бче, к еди́ной пучи́не благоутро́бия Твоего́ взира́ю очесы́ моего́ се́рдца, окорми́ и спаси́ мя страстоте́рпец моли́твами.

Припев: Святии мученицы, моли́те Бо́га о нас.

Незаходи́мое ва́с Со́лнце зве́зды показа́ на тве́рди Це́ркве Своея́, озаря́ющия сия́нием по́двиг, му́ченицы прехва́льнии, сея́ исполне́ние.

Сла́ва Отцу́ и Сы́ну и Свято́му Ду́ху:

Ве́ры побо́рницы, Це́ркве утвержде́ние, Тере́нтий бы́сть, Нитта́ же, Сарви́л, Феоду́л, Иера́кс, Неони́ла, и Ви́л чу́дный, Евни́кия же и Фо́т.

И ны́не и при́сно и во ве́ки веко́в. Ами́нь.

Богородичен: Ра́дости на́м хода́таица, я́ко прие́мши полноту́ всего́ Божества́, яви́лася еси́, Всенепоро́чная. Те́мже вси́ Тебе́, е́же ра́дуйся, со Ангелом согла́сно зове́м, Богора́дованная.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Святии мученицы, моли́те Бо́га о нас.

Якоже со́лнце со многосве́тлою луно́ю, соединя́емь Неони́ле сла́вный Тере́нтий, породи́ зве́зд седмочи́сленный ли́к му́чеников Христо́вых.

Припев: Святии мученицы, моли́те Бо́га о нас.

Сокруше́ние твои́х уде́с, страда́льче Тере́нтие, пре́лести ко́сти, я́коже пра́х, истни́, тебе́ же исхода́таи сла́ву неизглаго́ланную.

Сла́ва Отцу́ и Сы́ну и Свято́му Ду́ху:

Златы́ми впери́вшися крилы́, Евники́е, беззако́нных лове́ц кова́рствия избе́гла еси́ и вну́трь всели́лася еси́ черто́га мы́сленнаго.

И ны́не и при́сно и во ве́ки веко́в. Ами́нь.

Богородичен: Тя́ Му́дрость Бо́жия чисте́йшее селе́ние обре́тши, от Твои́х чи́стых крове́й воплоти́ся, и по рождестве́ нетле́нну показа́.

Седа́лен му́чеников, гла́с 8.

Яко зве́зды со́лнцу светови́дны, Тере́нтию, де́ти свяще́нныя я́ве совозсиява́ют и тва́рь просвеща́ют, му́жескими по́двиги до́блественно сия́юще, многобо́жия но́щь разоря́ют. Ихже с весе́лием ублажа́ем ве́рою, я́ко су́щия уго́дники Бо́жия, и возопии́м: страстоте́рпцы всехва́льнии, моли́те Христа́ Бо́га грехо́в оставле́ние пода́ти чту́щим любо́вию святу́ю па́мять ва́шу.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии мученицы, моли́те Бо́га о нас.

Окормля́еми дла́нию всеси́льною, му́к пучи́ну немо́кренно преидо́ша, до́ндеже достиго́ша в приста́нище ти́хое вы́шняго Ца́рствия, му́ченицы.

Припев: Святии мученицы, моли́те Бо́га о нас.

Возвыша́емаго держа́вою нече́стия го́рдаго мучи́теля, ве́ры ору́жии, му́ченицы всехва́льнии, низложи́сте, пою́ще: слава́ си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Седмобра́тный ли́к страстоте́рпцев с двои́ми роди́тели, непоро́чная же́ртва Тебе́, те́х ра́ди чу́дно поже́ршемуся, я́ко овча́, Влады́ко Христе́, приведо́шася.

И ны́не и при́сно и во ве́ки веко́в. Ами́нь.

Богородичен: Иже во́лею вся́ческая Созда́вый, зи́ждется хотя́ из Тебе́ па́че сло́ва, спаса́я, Неискусобра́чная, ве́рою зову́щия: сла́ва си́ле Твое́й, Го́споди.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии мученицы, моли́те Бо́га о нас.

Тя́, Го́споди, кре́пость стяжа́вше му́ченицы, терза́ния, и ра́ны, и о́гнь, и сме́рть му́жески преоби́деша.

Припев: Святии мученицы, моли́те Бо́га о нас.

О, де́ти свяще́нныя! О, богоприя́тная заколе́ния! О, совокупле́ние, разори́вшее ко́зни многоплете́нныя врага́ борю́щаго!

Сла́ва Отцу́ и Сы́ну и Свято́му Ду́ху:

Побе́дами главу́ безсме́ртными венча́ла еси́, победи́вшая зми́я, Еву победи́вшаго, Евни́кие доброде́во.

И ны́не и при́сно и во ве́ки веко́в. Ами́нь.

Богородичен: Све́т безле́тный на́м, Отчее Сия́ние родила́ еси́, под ле́том бла́гости бога́тством бы́вша, Всенепоро́чная.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии мученицы, моли́те Бо́га о нас.

Простре́ти неми́лостивно повеле́в мучи́тель и к колесе́м привяза́ти многообра́зными ви́ды му́ченики, но посрами́ся, непобеди́мы ты́я ви́дев.

Припев: Святии мученицы, моли́те Бо́га о нас.

Звере́м в сне́дь пре́дани бы́вше, показа́сте я́ кротча́йшия ове́ц непреста́нными ва́шими моли́твами и вре́да от те́х ника́коже прия́сте, святи́и.

Сла́ва Отцу́ и Сы́ну и Свято́му Ду́ху:

Сарви́л, Неони́ла, Фо́т и Феоду́л, Ви́л, Иера́кс, Евни́кия же и Нитта́ боже́ственный с Тере́нтием, я́ко до́блии, благоче́стно да восхва́лятся, му́ченицы.

И ны́не и при́сно и во ве́ки веко́в. Ами́нь.

Богородичен: Купина́ прообразова́ше вели́кое та́инство, е́же па́че ума́, Твоего́ Рождества́, огне́м всю́ду окружа́ема и ника́коже опаля́ема, Де́во Всепе́тая.

Конда́к, му́чеников, гла́с 4.

Му́ченическая честна́я па́мять прии́де дне́сь, веселя́щи вся́ческая, Тере́нтия прему́драго и подру́жии его́. Те́пле у́бо стеце́мся, да прии́мем исцеле́ние, си́и бо благода́ть прие́мше от Ду́ха Свята́го исцеля́ти неду́ги и боле́зни ду́ш на́ших.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии мученицы, моли́те Бо́га о нас.

В пе́щь муче́ний вве́ржени бы́вше, му́ченицы, ро́су с небесе́ обрето́сте терпе́нием, благода́рно взыва́юще: благослове́н еси́ в хра́ме сла́вы Твоея́, Го́споди.

Припев: Святии мученицы, моли́те Бо́га о нас.

Вкорене́но душе́вное иму́ще мудрова́ние на ка́мени непрело́жныя ве́ры Христо́вы, безбо́жных свире́пства тру́с, му́ченицы моли́твою творя́ще, низложи́ша.

Сла́ва Отцу́ и Сы́ну и Свято́му Ду́ху:

Пове́шени бы́вше и по ре́бром кре́пко стру́жеми, о́цтом люте́йшим же и огне́м сожига́еми, блаже́ннии, всю́ попали́сте ве́щь ле́стную, сла́внии.

И ны́не и при́сно и во ве́ки веко́в. Ами́нь.

Богородичен: Одева́яй не́бо о́блаки, Пречи́стая, Тя́ не́бо показа́ на земли́, из Тебе́ облече́ся во всего́ челове́ка и обожа́ет мя́ за милосе́рдие безчи́сленное.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии мученицы, моли́те Бо́га о нас.

На о́гнь дерзну́ша, све́том Боже́ственнаго Ду́ха просвеща́еми, коно́бов вре́ния показа́ша неде́йственна, боже́ственный хла́д с небесе́ боже́ственныя му́ченицы прие́мше, и́хже по достоя́нию, ве́рнии, восхва́лим.

Припев: Святии мученицы, моли́те Бо́га о нас.

Ангелов яви́ся мно́жество, на три́знищи я́сно укрепля́юще ва́с, всехва́льнии му́ченицы, и боле́зни отъе́млюще; с ни́миже отроко́в пе́снь взыва́ете: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Бо́дро име́я к Бо́гу о́ко, Сарви́ле, се́рдца твоего́, оче́с терпе́л еси́ избоде́ние, облича́я мучи́теля, безбо́жия мгло́ю одержи́маго. Те́м вси́ тя́, я́ко дне́ сы́на, ублажа́ем.

И ны́не и при́сно и во ве́ки веко́в. Ами́нь.

Богородичен: Отчим благоволе́нием Сы́на во утро́бе прия́ла еси́, осени́вшу Боже́ственному Ду́ху, Пречи́стая, и ро́ждши я́ко пе́рвее Пречи́ста пребыла́ еси́; к Нему́же непреста́нно моли́ся изба́витися все́м, Де́во, тли́ и озлобле́ния.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы, моли́те Бо́га о нас.

Ра́й яви́стеся, среде́ жи́зни дре́во иму́щ, исто́чник же, пролива́ющ ка́пли исцеле́ний и река́, и́стинно испо́лнена, святи́и, боже́ственных во́д Ду́ха.

Припев: Святии мученицы, моли́те Бо́га о нас.

Столпи́ Христо́вы Це́ркве и тиша́йшая приста́нища су́щих в пучи́не лю́тых обурева́емых, му́ченицы яви́стеся, и ми́ра пита́телие, и Ангелов сожи́тельницы.

Сла́ва Отцу́ и Сы́ну и Свято́му Ду́ху:

В небе́сных се́лех с ра́достию живете́, добро́ты недомы́сленныя вку́пе сматря́юще и наслажда́ющеся и́стиннаго обоже́ния, венцено́сцы великоимени́тии.

И ны́не и при́сно и во ве́ки веко́в. Ами́нь.

Богородичен: Яже небе́с ши́рши и херуви́мов святе́йши, всея́ же тва́ри вку́пе честне́йши, Бо́га, Его́же родила́ еси́, о на́с моли́, Богороди́тельнице, чту́щих Тя́.

Молитва

Святи́и му́ченицы Христо́вы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.