10 ноября.

Канон преподобному Стефану Савваиту творцу канонов.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, архиере́ов богодохнове́нное удобре́ние, Стефа́не прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Кано́н преподо́бнаго. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподобне отче Стефане, моли́ Бо́га о нас.

Всю́ мою́ мра́чную, о́тче, мглу́ уны́ния све́том Боже́ственным разори́, Боже́ственную благода́ть пода́в, Стефа́не, пе́ти па́мять твою́.

Припев: Преподобне отче Стефане, моли́ Бо́га о нас.

Еди́ный тебе́ доброде́телей иску́с ве́дом, мирски́я бо всеконе́чно зло́бы не прия́л еси́, от мла́денства Бо́гу, Стефа́не, возложе́н.

Припев: Преподобне отче Стефане, моли́ Бо́га о нас.

Всего́ Христу́ Спа́су ты́ тебе́ сама́го приве́д воздержа́тельно, заколе́ние све́тло благоприя́тно, безсме́ртнаго жития́, сла́вне, бы́л еси́ прича́стник.

Сла́ва Отцу́ и Сы́ну и Свято́му Ду́ху:

Положи́ духо́вная мо́лния сто́лп тя́ всесве́тел, прие́мша достоя́ние слу́жбы та́инственныя, вся́ ве́рныя озаря́ющая.

И ны́не и при́сно и во ве́ки веко́в. Ами́нь.

Богородичен: Пречи́стая Богоро́дице, все́х ра́досте, Яже Бо́га в Твое́й утро́бе вмести́вши, Нескве́рная, изба́витися от вра́г моли́ся пою́щим Тя́.

Пе́снь 3.

Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Припев: Преподобне отче Стефане, моли́ Бо́га о нас.

Скверня́щих в житии́ челове́ческия ду́ши избежа́вша тя́, Стефа́не, плотски́х, очи́сти пусты́ня изде́тска Боже́ственным промышле́нием.

Припев: Преподобне отче Стефане, моли́ Бо́га о нас.

Небе́сное иму́щии житие́, по́стницы тя́ прие́мше, утверди́ша, блаже́нне, стра́хом Госпо́дним к му́дрости Боже́ственней.

Сла́ва Отцу́ и Сы́ну и Свято́му Ду́ху:

Отце́в повину́яся уче́нием прему́дрости, стра́х Бо́жий, я́ко основа́ние положи́л еси́ твоего́ небесоподо́бнаго, о́тче, жития́.

И ны́не и при́сно и во ве́ки веко́в. Ами́нь.

Богородичен: Безсе́менно зачала́ еси́, Богоневе́сто, Спа́са и Го́спода, избавля́ющаго ны́ от тли́, Тя́ вои́стинну песносло́вящия.

Седа́лен преподо́бнаго, гла́с 5.

Воздержа́нием житие́ украси́в и стра́сти умертви́в, попра́л еси́ вра́жия прило́ги, о́тче Стефа́не, и, преложи́вся к Бо́гу, чудотво́рец показа́лся еси́, в ве́чней сла́ве со Ангелы лику́я. С ни́миже моли́ непреста́нно поми́ловатися на́м.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Стефане, моли́ Бо́га о нас.

Зако́ном Боже́ственным Ду́ха все́ покори́л еси́ плотско́е мудрова́ние и сло́вом безслове́сная стремле́ния страсте́й отгна́л еси́, му́дре Стефа́не.

Припев: Преподобне отче Стефане, моли́ Бо́га о нас.

Ты́ я́рости во́лны на врага́ вооружи́л еси́, Стефа́не, к Еди́ному же Рачи́телю жела́ние, Бо́гу, просте́рл еси́.

Припев: Преподобне отче Стефане, моли́ Бо́га о нас.

Све́тлый све́т узре́л еси́ ты́ безстра́стия, преподо́бне Стефа́не, совле́кся мглы́ те́мныя страсте́й, благода́тию наставля́емь.

Сла́ва Отцу́ и Сы́ну и Свято́му Ду́ху:

Во уме́ ты́ бу́дущая помышля́я, возгнуша́лся еси́ мимотеку́щих безслове́сия. Те́мже вся́ насле́довал еси́ боле́зньми присносу́щая.

И ны́не и при́сно и во ве́ки веко́в. Ами́нь.

Богородичен: Бо́га, Его́же родила́ еси́, Чи́стая Де́во, Сего́ умоли́, рабо́м Твои́м дарова́ти согреше́ний проще́ние и проти́вных избавле́ние.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Преподобне отче Стефане, моли́ Бо́га о нас.

Явля́ешися, я́ко свети́льник, с небе́с пою́щим тя́, отгоня́ де́л омраче́ние и боже́ственнаго вообража́я дея́ния осия́ние.

Припев: Преподобне отче Стефане, моли́ Бо́га о нас.

Бо́дренну моли́тву и стоя́ние всено́щное, ру́к приле́жное воздея́ние стяжа́л еси́, о́тче, и исто́чники сле́з, Стефа́не.

Сла́ва Отцу́ и Сы́ну и Свято́му Ду́ху:

Но́в и́стинно пусты́ни яви́лся еси́ све́тел свети́льник, о Стефа́не, просвеща́я во тме́ держи́мыя злы́х.

И ны́не и при́сно и во ве́ки веко́в. Ами́нь.

Богородичен: Моли́ при́сно Сы́на Твоего́ и Бо́га на́шего, Неискусобра́чная Мари́е Чи́стая, низпосла́ти на́м ве́рным ми́лость.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же свя́зана мре́жами вра́жиими, я́ко от тли́ о́наго, спаси́.

Припев: Преподобне отче Стефане, моли́ Бо́га о нас.

Ты́ рука́ми, ви́ден бы́л еси́, Стефа́не, се́рне подава́я пи́щу, душе́вныя бо стра́сти оттря́с, над ди́виими живо́тными, я́коже пе́рвее во Еде́ме Ада́м, ца́рствовал еси́.

Припев: Преподобне отче Стефане, моли́ Бо́га о нас.

Путетворя́ Христу́ селе́ние твоея́ в кле́ти души́, чре́во твое́, Стефа́не, и язы́к удержа́в, и плотски́я сла́сти до конца́ умертви́л еси́.

Сла́ва Отцу́ и Сы́ну и Свято́му Ду́ху:

Победи́тельными венча́лся еси́ венцы́, Стефа́не, по́стничества, де́монов бо полки́ победи́л еси́ и помышле́ний и страсте́й прило́ги низложи́л еси́, блаже́нне.

И ны́не и при́сно и во ве́ки веко́в. Ами́нь.

Богородичен: Па́че ума́ воплоще́ннаго Го́спода во чре́ве Твое́м сотвори́ Твои́м рабо́м ми́лостива бы́ти Твои́ми моли́твами, Чи́стая, я́ко да стра́шнаго изба́вимся муче́ния.

Конда́к Стефа́на, гла́с 4.

Насади́л еси́ доброде́телей ра́й и напои́л еси́ то́ками сле́з твои́х, я́ко жи́зни, всесла́вне, дре́во получи́в, спаси́ моли́твами твои́ми от тли́ ста́до твое́, изба́ви от обстоя́ний те́пле чту́щих тя́, Стефа́не, тя́ бо предста́теля велича́йша, му́дре, вси́ ве́рою и любо́вию стяжа́хом.

Пе́снь 7.

Ирмос: Отроки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.

Припев: Преподобне отче Стефане, моли́ Бо́га о нас.

Вои́стинну Нетле́нныя тя́ Тро́ицы благода́ть обре́тши, сосу́д, Стефа́не, избра́н, я́коже жела́ше, в тебе́ упоко́ися, и дарова́нии обогати́, и врача́ душе́вных страсте́й показа́.

Припев: Преподобне отче Стефане, моли́ Бо́га о нас.

Таи́нниче пресве́тлаго богонача́лия, зри́телю сла́вы неизрече́нныя Бо́жия причаща́яйся, пода́ждь на́м просвеще́ние, творя́щим ве́рою па́мять твою́, уго́дниче Христо́в, преблаже́нне Стефа́не.

Сла́ва Отцу́ и Сы́ну и Свято́му Ду́ху:

Во́ду Моисе́йски в земли́ невла́жней, жа́ждущу твоему́ ученику́, Стефа́не, твои́м жезло́м начерта́в, источи́л еси́, преподо́бне, песнопоя́ Христу́ Вседержи́телю: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Подоба́ше безсе́менно Воплоще́нному из Тебе́ проити́, Мари́е Чи́стая, па́че со́лнца я́вльшися Чи́стая и Нескве́рная, на объя́тиих бо носи́ла еси́, Благослове́нная, Бо́га Вседержи́теля.

Пе́снь 8.

Ирмос: Мусики́йским орга́ном согласу́ющим и лю́дем безчи́сленным, покланя́ющимся о́бразу в Деи́ре, три́ о́троцы не повину́вшеся, Го́спода воспева́ху и славосло́вяху во вся́ ве́ки.

Припев: Преподобне отче Стефане, моли́ Бо́га о нас.

Повину́лся еси́, блаже́нне, Го́споду, пребыва́нием жития́ непоро́чнаго, и, отту́ду укрепи́вся, враги́ покоря́еши под но́зе твои́ и сокруша́еши, на ты́я боле́зньми, я́ко ору́жии, до́блествовав.

Припев: Преподобне отче Стефане, моли́ Бо́га о нас.

Единообра́зно житие́ име́я, и́стины сло́во показа́ и обы́чай про́ст и пра́в, нелука́в нра́в, боголюби́в ра́зум. Те́мже тя́ пою́ще, Христа́ превозно́сим во ве́ки.

Сла́ва Отцу́ и Сы́ну и Свято́му Ду́ху:

Вседу́шно, о́тче, возлюби́л еси́ Бо́га, пли́щей отврати́лся еси́, непрохо́дныя же обходя́ пусты́ни, наслажда́лся еси́ Еди́наго Рачи́теля твоего́, Его́же ра́ди уме́ты вмени́л еси́ вся́.

И ны́не и при́сно и во ве́ки веко́в. Ами́нь.

Богородичен: Изве́стно ве́дящии Тя́, Де́ву и Бо́жию Ма́терь, па́че сло́ва, пое́м Тя́ всеблагоче́стно, ве́рою песнопою́ще: Го́спода по́йте и превозноси́те Его́ во ве́ки.

Песнь 9

Ирмос: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Припев: Преподобне отче Стефане, моли́ Бо́га о нас.

Те́сный пу́ть ше́ствовал еси́, его́же ничто́же в ми́ре и́стинно ну́жднейше, сего́ ра́ди во Еде́м вше́л еси́, простра́нное поко́ище.

Припев: Преподобне отче Стефане, моли́ Бо́га о нас.

Ти́х яви́лся еси́, о Стефа́не, на небесе́х бо венце́м сла́вы венча́лся еси́, блаже́нне, досто́йно, поя́ Венча́вшаго тя́.

Сла́ва Отцу́ и Сы́ну и Свято́му Ду́ху:

Чу́дно житие́ твое́ просия́, благово́нно, я́ко ши́пок в ве́рте, и я́ко све́щник на возду́се, светови́дно озаря́я, всеблаже́нне, честву́ющии тя́.

И ны́не и при́сно и во ве́ки веко́в. Ами́нь.

Богородичен: Де́ву вси́ и Пречи́стую, ве́рнии, Богоро́дицу, неизрече́нно носи́вшую во утро́бе Бо́га и Спа́са, в пе́снех велича́ем.

Молитва

О свяще́нная главо́, преподо́бне о́тче, преблаже́нне а́вво Стефане, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.