10 ноября.

Канон иной святой мученице Параскеве, нареченной Пятница.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Прему́драя и всехва́льная Христо́ва му́ченица Параске́ва, му́жескую кре́пость прие́мши, же́нскую же не́мощь отве́ргши, диа́вола победи́ и мучи́теля посрами́, вопию́щи и глаго́лющи: прииди́те, те́ло мое́ мече́м ссецы́те и огне́м сожги́те, а́з бо, ра́дующися, иду́ ко Христу́, Жениху́ моему́. Тоя́ моли́твами, Христе́ Бо́же, спаси́ ду́ши на́ша.

Стихи́ра, гла́с 6:

С вы́шними чи́нми причта́лася еси́, сла́вная, ми́р оста́вльши и Христа́ возжеле́вши, Параске́во всечестна́я, проси́ на́м ми́ра и ве́лия ми́лости.

Други́й кано́н, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святая великомученице Параскево, моли́ Бо́га о нас.

Пои́м Го́сподеви, просла́вльшему па́мять му́ченицы, и приводя́щу земны́я ли́ки к похвале́нию дне́сь.

Припев: Святая великомученице Параскево, моли́ Бо́га о нас.

Сла́ву презре́ла еси́, о бога́тстве неради́вши, честна́я му́ченице Параске́во, на стра́сть себе́ вдала́ еси́.

Сла́ва Отцу́ и Сы́ну и Свято́му Ду́ху:

Возжела́ Влады́ка твоея́ добро́ты, му́ченице, и в небе́сный черто́г всели́ тя.

И ны́не и при́сно и во ве́ки веко́в. Ами́нь.

Богородичен: Ро́д Ада́мов па́че ума́ блаже́нства Тобо́ю, ра́й отве́рст, обре́тше Богоро́дице, досто́йно хва́лим Тя́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных и пое́т Тя́ ду́х мо́й.

Припев: Святая великомученице Параскево, моли́ Бо́га о нас.

Ты́ еси́ утвержде́ние мое́, Го́споди, — глаго́лаше му́ченица, — Ты́ же и заступле́ние, и к Тебе́ прибего́х, Царю́ ми́ра.

Припев: Святая великомученице Параскево, моли́ Бо́га о нас.

Яви́лася еси́ на суди́щи, мужеу́мну ду́шу иму́щи, и врага́, я́ко нехра́бра су́ща, победи́ла еси́, всехва́льная.

Сла́ва Отцу́ и Сы́ну и Свято́му Ду́ху:

Души́ моея́ зе́ницы исцели́, всехва́льная му́ченице, моли́твами твои́ми и у́м мо́й упра́ви.

И ны́не и при́сно и во ве́ки веко́в. Ами́нь.

Богородичен: Пода́ждь на́м по́мощь моли́твами Твои́ми, Пречи́стая, сове́ты отрева́ющи лю́тых обстоя́ний.

Седа́лен, гла́с 8.

Крове́й твои́х струя́ми, му́ченице Христо́ва, пото́ки нече́стия изсуши́вши, всехва́льная Параске́во, одожде́нием же благода́ти слове́сныя напая́еши бразды́, в ни́хже прозяба́еши кла́с ве́ры. К сему́ же, сла́вная, и по сме́рти яви́лася еси́, точа́щи жи́знь муче́ния ра́ди, страстоте́рпице всехва́льная. Моли́ Христа́ Бо́га дарова́ти душа́м на́шим ве́лию ми́лость.

Сла́ва, други́й седа́лен, гла́с 4.

Посто́м украси́вши чистоту́ душе́вную, луча́ми страда́ния просвеща́еши ве́рныя, му́ченице многострада́льная Параске́во. Те́м тво́й святы́й и светоно́сный де́нь ве́рою соверша́юще, благоче́стно вопие́м: я́ко име́я дерзнове́ние ко Го́споду, моли́ спасти́ся на́м.

И ны́не, богоро́дичен:

Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́, и воздви́гла еси́ вся́ от сме́рти к жи́зни нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святая великомученице Параскево, моли́ Бо́га о нас.

Услы́шавши, Го́споди, му́ченица Параске́ва за́поведи ева́нгельския, просла́ви Твое́ Божество́.

Припев: Святая великомученице Параскево, моли́ Бо́га о нас.

Не принесла́ еси́ отню́д же́ртвы де́моном ме́рзским, же́ртву жи́ву себе́ Го́споду вдала́ еси́.

Сла́ва Отцу́ и Сы́ну и Свято́му Ду́ху:

Кре́пко на суди́щи ста́вши, вопия́ше му́ченица: со Христо́м, Женихо́м мои́м, распну́ся и возца́рствую с Ни́м.

И ны́не и при́сно и во ве́ки веко́в. Ами́нь.

Богородичен: Очище́ние на́ших да́руй согреше́ний, я́ко Безгре́шен, и умири́ лю́ди Твоя́, я́ко Бла́г, моли́твами Ро́ждшия Тя́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Святая великомученице Параскево, моли́ Бо́га о нас.

Утренюющи, му́ченица вопия́ше Параске́ва: ничто́же мя́ разлучи́т от любве́ Христо́вы.

Припев: Святая великомученице Параскево, моли́ Бо́га о нас.

Боже́ственную му́ченицу мне́в ослабе́ти, сме́х са́м яви́ся пронырли́вый.

Сла́ва Отцу́ и Сы́ну и Свято́му Ду́ху:

Просвеще́ние пода́ждь мне́, всехва́льная, и многомяте́жный мо́й у́м просвети́ моли́твами твои́ми.

И ны́не и при́сно и во ве́ки веко́в. Ами́нь.

Богородичен: Низложи́ непрестаю́щую бу́рю страсте́й, Христа́ Ро́ждшая, ко́рмчию и Го́спода.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святая великомученице Параскево, моли́ Бо́га о нас.

Ри́зою мя́ с небесе́ приоде́й, Го́споди, вопия́ше Параске́ва, Иже о́блаками небеса́ одева́яй, Многоми́лостиве.

Припев: Святая великомученице Параскево, моли́ Бо́га о нас.

Якоже из ро́ва Дании́ла услы́ша Госпо́дь, та́ко и тебе́, в темни́це моля́щейся, исцеле́ние подава́ет.

Сла́ва Отцу́ и Сы́ну и Свято́му Ду́ху:

Мучи́телеву го́рдость низложи́ла еси́, сама́ же, невреди́ма пребы́вши, на му́ки дерзну́ла еси́.

И ны́не и при́сно и во ве́ки веко́в. Ами́нь.

Богородичен: Сло́во Бо́жие Тя́ земны́м показа́ небе́сную ле́ствицу: Тобо́ю бо к на́м сни́де.

Конда́к, гла́с 3.

Всесвято́е и непоро́чное муче́ние прине́сши, я́ко ве́но пречестно́е, безсме́ртному Жениху́ Христу́, Ангельское ликостоя́ние возвесели́ла еси́ и победи́ла еси́ де́монския ко́зни. Сего́ ра́ди тя́ че́стно ве́рою чти́м, му́ченице Параске́во многострада́льная.

Икос:

Кто́ изглаго́лет си́лы Госпо́дня? Или́ кто́ пове́сть страда́ния твоя́ и доброде́тели, му́ченице? Или́ ки́й язы́к воспе́ти возмо́жет по досто́инству? Но а́з, недосто́йный, воспе́ти покуша́юся, хвали́ти же и сла́вити Влады́ку Жизнода́вца, да́вшаго тебе́ на три́знищи кре́пость мучи́телей не убоя́тися, испове́дающей Истиннаго Бо́га. Сего́ ра́ди тя́ чти́м ве́рою и любо́вию, му́ченице Параске́во многострада́льная.

Пе́снь 7.

Ирмос: От Иуде́и доше́дше о́троцы, в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святая великомученице Параскево, моли́ Бо́га о нас.

Яви́шася па́че ума́ чудеса́ боже́ственныя му́ченицы, во ю́нотстве бо де́вства, победи́ мучи́теля, зову́щи: оте́ц на́ших Бо́же, благослове́н еси́.

Припев: Святая великомученице Параскево, моли́ Бо́га о нас.

Бу́их загради́ла еси́ богоме́рзская уста́, среди́ суди́ща ста́вши, Бо́га испове́дала еси́, взыва́ющи: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Забы́вши же́нскую не́мощь, му́жественно укрепи́вшися терпе́нием, стра́ждущи, вопия́ла еси́: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Из Деви́ческу боку́ вопло́щся, яви́лся еси́ на спасе́ние на́ше. Те́м Твою́ Ма́терь ве́дуще Богоро́дицу, благода́рно Ти́ взыва́ем: оте́ц на́ших Бо́же, благослове́н еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Святая великомученице Параскево, моли́ Бо́га о нас.

Царя́ Христа́ Бо́га, Его́же испове́да де́ва му́ченица Параске́ва, воспева́ющи: хвали́те и превозноси́те во вся́ ве́ки.

Припев: Святая великомученице Параскево, моли́ Бо́га о нас.

За любо́вь Боже́ственныя Тро́ицы о́гнь безбо́жия погаси́ла еси́, вопию́щи: превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

По́двиги, и́же к Бо́гу, тмы́ нача́льника низложи́ла еси́, пою́щи: превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Проти́вных прило́га на ны́ угаси́ и́скры, Де́во, я́ко да пое́м Го́спода и превозно́сим Его́ во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святая великомученице Параскево, моли́ Бо́га о нас.

Вои́стинну тезоимени́та назва́лася еси́, Параске́во, подо́бящися страсте́м Христо́вым, с небе́сными во́инствы лику́ющи.

Припев: Святая великомученице Параскево, моли́ Бо́га о нас.

Пости́гла еси́ коне́ц муче́ния мно́гими страстьми́ и боле́зньми твои́ми, со Ангелы Христа́ сла́вящи на небесе́х, всечестна́я.

Сла́ва Отцу́ и Сы́ну и Свято́му Ду́ху:

Дерзнове́ние иму́щи ко Спа́су и Влады́це, моли́ за пою́щия твою́ па́мять, му́ченице сла́вная Параске́во.

И ны́не и при́сно и во ве́ки веко́в. Ами́нь.

Богородичен: Пе́сньми Тя́ пое́м, Богоблагода́тная, и немо́лчно Тебе́, ра́дуйся, прино́сим, Ты́ бо источи́ла еси́ все́м на́м весе́лие.

Свети́лен.

Яко ши́пок красне́йший от терно́внаго прозябла́ еси́ ко́рене, де́во Параске́во, оброше́нием, му́ченице, свяще́ннаго страда́ния обагри́вшися кро́вию. И ны́не боже́ственную твою́ па́мять творя́щия любо́вию спаса́й ны́ от бе́д.

Сла́ва, и ны́не, богоро́дичен:

Стоя́ще о́крест Тебе́ де́вы богому́дрыя, Богороди́тельнице Мари́е, я́ко Цари́це ро́дом, Твоему́ Сы́ну приведо́шася невестоле́пно, Пречи́стая, я́ко Царю́ вся́ческих, Его́же, Ма́ти Де́во Отрокови́це, о на́с моли́.

Молитва святой великомученице Параскеве, нареченной Пятница

Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя Славы, Христа Спасителя, и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею Ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты, именем Господа нашего Иисуса Христа и силою молитвы твоею в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возжженным чрез Ангела Божия, попаливши неистовых беззаконников, мног народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, возшедши душею твоею на Небеса, в чертог вожделеннаго твоего Жениха Христа Царя Славы, радостно сретшаго тя сим небесным гласом: «Радуйтеся, праведнии, яко мученица Параскева увенчася!» Темже и мы днесь приветствуем тя, многострадальная, и, взирающе на святую твою икону, с умилением вопием ти: всечестная Параскево! Вемы, яко велие имаши дерзновение ко Господу: умоли убо Его, Человеколюбца, и о нас предстоящих и молящихся ти. Да подаст Он и нам, якоже тебе, терпение и благодушие в бедах и скорбных обстояниях; да дарует Он, ходатайством твоим и заступлением, радостное, благоденственное и мирное житие, здравие же и спасение, и во всем благое поспешение возлюбленному нашему отечеству да ниспослет святое Свое благословение и мир, и всем православным христианом да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели; да очистит нас грешных от всякия скверны и порока; да оградит нас святыми Своими ангелами, да заступит, сохранит и помилует всех святою Своею благодатию и соделает наследниками и причастниками Небеснаго Своего Царствия. И тако улучивше спасение твоими святыми молитвами, предстательством и заступлением, всеславная невесто Христова Параскево, прославим все пречестное и великолепое имя дивнаго во святых Своих истиннаго Бога, Отца, и Сына, и Святаго Духа, всегда, ныне и присно, и во веки веков. Аминь.

Молитва иная святой великомученице Параскеве, нареченной Пятница

О, святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице, идольския льсти обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная! Молим тя, святая мученице, буди о нас печальница ко Христу Богу, Его же преблаженнейшим зрением присно веселитися; моли Всемилостиваго, иже словом очи слепым отверзе, да избавит нас от болезни очес наших, телесных вкупе и душевных; разжени твоими святыми молитвами темный мрак прибывший от грехов наших, испроси у Отца Света свет благодати душевным и телесным очесем нашим; просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О, великая угодница Божия! О, мужественнейшая дево! О, крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощны есмы. Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами пособствоваши, мрака же греховнаго избывше, во свете истинныя веры и деяний Божественных внидем во свет вечный дне невечерняго, во град веселия приснаго, в немже ты ныне светло блистаеши славою и веселием безконечным, славословящи и воспевающи со всеми Небесными Силами Трисвятительное Единое Божество, Отца и Сына и Святаго Духа, ныне и присно и во веки веков. Аминь.