10 ноября
Канон святителю Димитрию, митрополиту Ростовскому.
![Святителю Димитрию, митрополиту Ростовскому Святителю Димитрию, митрополиту Ростовскому](img_i/029.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Правосла́вия ревни́телю и раско́ла искорени́телю, Росси́йский целе́бниче и но́вый к Бо́гу моли́твенниче, списа́ньми твои́ми все́х уцелому́дрил еси́. Цевни́це духо́вная, Дими́трие блаже́нне, моли́ Христа́ Бо́га спасти́ся нам.
Стихи́ра, гла́с 8:
Благи́й ра́бе и ве́рный, умно́живый тала́нт, вруче́нный тебе́ от Влады́ки твоего́, научи́ и на́с после́довати достохва́льному приме́ру твоему́, да не с лука́выми раба́ми осу́димся, но да сподо́бимся ра́дости ве́чныя.
Кано́н свята́го, гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Святителю отче Димитрие, моли́ Бо́га о нас.
Со Ангельскими чинонача́лиями предстоя́й Святе́й Тро́ице, вели́кий иера́рше Дими́трие, моли́ о на́с гре́шных, да полу́чим грехо́в оставле́ние.
Припев: Святителю отче Димитрие, моли́ Бо́га о нас.
По́стничеством и воздержа́нием вся́ким порабо́тивый те́ло ду́ху, и те́лом соде́лавый нетле́ние и цельбоно́сную си́лу и бре́нному веществу́ твоему́, научи́ и на́с, о́тче святы́й, Бо́гу, а не мамо́не рабо́тати.
Сла́ва Отцу́ и Сы́ну и Свято́му Ду́ху:
Управля́я па́ству, вве́ренную тебе́ от Началопа́стыря Христа́, и отгоня́я душевре́дных волко́в от Христо́вы огра́ды твои́ми Богодухнове́нными уче́нии, назира́й и ны́не, святи́телю Дими́трие, да не ка́ко суему́дреннии раско́лы возмутя́т тишину́ церко́вную, но па́че моли́ Человеколю́бца Бо́га, да вско́ре вси́ еди́ными усты́ и еди́ным се́рдцем восхва́лим Его́ благоутро́бие.
И ны́не и при́сно и во ве́ки веко́в. Ами́нь.
Богородичен: Избра́нну и Всечи́сту разуме́в Тя́ Сы́н Бо́жий, Всенепоро́чная, Сы́н Тво́й бы́сть, сы́ны сотвори́ благода́тию, Богоро́дицу Тя́ чту́щия.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Святителю отче Димитрие, моли́ Бо́га о нас.
Утверди́вся на ка́мени ве́ры Христо́вы, тве́рд пребы́л еси́ во испове́дании Правосла́вия, и злоче́ствующих непреста́нно облича́л еси́.
Припев: Святителю отче Димитрие, моли́ Бо́га о нас.
Облича́я, моля́, сове́туя, не престава́л еси́ призыва́ти заблу́ждших ове́ц от Христо́ва ста́да, а́ще и не вси́ послу́шаша гла́са твоего́.
Сла́ва Отцу́ и Сы́ну и Свято́му Ду́ху:
Сыно́в Це́ркве, непоколеби́мо пребы́вших во объя́тиих ея́, ободря́л еси́. И мы́, со сла́достию вне́млюще уче́нию твоему́, вопие́м: не́сть свя́т па́че Бо́га на́шего.
И ны́не и при́сно и во ве́ки веко́в. Ами́нь.
Богородичен: Избавля́ющаго челове́ки преслуша́ния, и Кро́вию Свое́ю омы́вшаго перворо́дный гре́х Ада́мов, Чи́стая и Всенепоро́чная родила́ еси́.
Седа́лен, гла́с 8:
Исцеле́ния и чудеса́, истека́ющая от чудото́чных моще́й твои́х, святи́телю Дими́трие, ра́дуют ве́рных сердца́ и возбужда́ют любо́вию пе́ти тебе́: ра́дуйся, о́тче, Росси́йская похвало́.
Сла́ва, и ны́не, Богородичен:
Еди́на и́стинная христиа́н Покрови́тельнице, вся́ких лю́тых обстоя́ний, бе́д и скорбе́й на́с изба́ви, и мольба́ми Твои́ми спаси́ ду́ши на́ша.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Святителю отче Димитрие, моли́ Бо́га о нас.
Из мла́да воспи́тан в до́бром науче́нии, остроту́ ума́ твоего́ не на суему́дренная у́мствования обрати́л еси́, святи́телю Дими́трие, но на созида́ние и утвержде́ние правосла́вных, да обличе́ние же и обузда́ние еретико́в; те́мже и яви́лся еси́ досто́йный апо́стольскаго престо́ла наме́стник.
Припев: Святителю отче Димитрие, моли́ Бо́га о нас.
Неистощи́мое врачевство́ источа́ют многоцеле́бная ра́ка моще́й твои́х, и и́же ве́рою к ни́м притека́ющии, обрета́ют от злы́х избавле́ние.
Сла́ва Отцу́ и Сы́ну и Свято́му Ду́ху:
За любо́вь, ю́же ко Христу́ име́л, просла́вился еси́ да́ром чуде́с и исцеле́ний, сего́ ра́ди покланя́емся тебе́ и мо́лим тя́, я́ко уго́дника и дру́га Бо́жия, да помяне́ши на́с во святы́х твои́х к Бо́гу моли́твах.
И ны́не и при́сно и во ве́ки веко́в. Ами́нь.
Богородичен: Моли́ о на́с Человеколю́бца Бо́га, Пресвята́я Влады́чице, да не помяне́т беззако́ний на́ших, но да сотвори́т с на́ми по ми́лости Свое́й.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Святителю отче Димитрие, моли́ Бо́га о нас.
Сохрани́, святи́телю Христо́в, оте́чество твое́ ненаве́тно от враго́в и да́руй на сопроти́вныя побе́ду и одоле́ние.
Припев: Святителю отче Димитрие, моли́ Бо́га о нас.
Огради́ на́с, уго́дниче Бо́жий Дими́трие, от все́х ко́зней лука́ваго диа́вола, да не преткнове́нно возмо́жем преити́ пу́ть жития́ сего́ во исполне́ние за́поведей Бо́жиих.
Сла́ва Отцу́ и Сы́ну и Свято́му Ду́ху:
Разжени́, о́тче Дими́трие, тьму́ грехо́вную от душе́вных оче́с на́ших и просвети́ на́с позна́нием во́ли Бо́жией, да во све́те за́поведей Его́ соверши́м до́бре тече́ние на́ше.
И ны́не и при́сно и во ве́ки веко́в. Ами́нь.
Богородичен: Де́во Непоро́чная, ро́ждшая Све́т и́стинный, облиста́й на́м све́т Богове́дения во спасе́ние на́ше.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Святителю отче Димитрие, моли́ Бо́га о нас.
Воззри́ милосе́рдным о́ком, святи́телю Христо́в, на волне́ние грехо́вное, на́с обурева́ющее, и упра́ви пла́вание на́ше в ти́хое Приста́нище милосе́рдия Бо́жия.
Припев: Святителю отче Димитрие, моли́ Бо́га о нас.
Бу́ди на́м до́брый ко́рмчий, о́тче Дими́трие, и не оста́ви на́с поги́бнути во гресе́х на́ших, но в ни́хже са́м, я́ко челове́к искуша́емь бы́л еси́, помози́ и на́м, искуша́емым.
Сла́ва Отцу́ и Сы́ну и Свято́му Ду́ху:
Свя́те Дими́трие, бу́ди о на́с засту́пник и хода́тай ко Многоми́лостивому Бо́гу, да возведе́т от тли́ живо́т на́ш.
И ны́не и при́сно и во ве́ки веко́в. Ами́нь.
Богородичен: Устна́ми и се́рдцем велича́ем Тя́, Ма́терь Бо́жию: Ты́ же, примири́вшая Бо́гу ве́сь ро́д челове́ческий, не отри́ни на́с от Твоего́ заступле́ния.
Конда́к свята́го, гла́с 8:
Звезду́ Росси́йскую, от Ки́ева возсия́вшую и чрез Но́вград Се́верский в Росто́в дости́гшую, всю́ же страну́ сию́ уче́ньми и чудесы́ озари́вшую, ублажи́м златослове́снаго учи́теля Дими́трия, то́й бо все́м вся́ написа́, я́же к наставле́нию, да все́х приобря́щет, я́коже Па́вел Христу́, и спасе́т правове́рием ду́ши на́ша.
Икос:
Пра́ведным о ка́ющихся на небеси́, на́м же, гре́шным, на земли́, о тебе́, пра́ведниче Дими́трие, подоба́ет возра́доватися, я́ко но́ваго тя́ к Бо́гу моли́твенника о на́с стяжа́хом, его́же досто́йными похвала́ми ублажа́юще, си́це от ра́дости зове́м: ра́дуйся, Росто́вская похвало́ и всея́ Росси́и прославле́ние.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Святителю отче Димитрие, моли́ Бо́га о нас.
Христо́ва ра́ди смире́ния, о́браз смире́ния яви́лся еси́, свя́те Дими́трие. И мне́ пода́ждь, не в го́рдости, но во смире́нии взыва́ти: благослове́н еси́, Бо́же оте́ц на́ших.
Припев: Святителю отче Димитрие, моли́ Бо́га о нас.
Воздержа́нием покори́л еси́ те́ло ду́ху твоему́, святи́телю Дими́трие. Пода́ждь и мне́ в воздержа́нии пожи́ти, да нескве́рными устна́ми воззову́: благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Уче́ниями твои́ми, о́тче Дими́трие, управля́еши мы́сли на́ши. И мы́, подража́юще тебе́, воспева́ем Бо́гу: благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Безнача́льнаго Бо́га зачала́ еси́ во чре́ве Твое́м, Пречи́стая Де́во, Его́же пою́ще, зове́м: благослове́н Бо́г оте́ц на́ших.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Святителю отче Димитрие, моли́ Бо́га о нас.
Ты́ бы́л еси́ строи́тель спасе́ния на́шего, о́тче Дими́трие, вопия́ все́м послу́шающим уче́ния твоего́: превозноси́те Христа́ во ве́ки.
Припев: Святителю отче Димитрие, моли́ Бо́га о нас.
Богому́дрый иера́рше, всеблаже́нне Дими́трие, ми́лостивою и человеколю́бною к на́м любо́вию, моли́ о на́с Человеколюби́ваго Бо́га, Его́же превозно́сим во вся́ ве́ки.
Сла́ва Отцу́ и Сы́ну и Свято́му Ду́ху:
Зловре́дное мудрова́ние раско́льников испрове́ргл еси́, свя́те Дими́трие, ве́рныя же наста́вил еси́ пребы́ти тве́рдым во и́стинней ве́ре, превозноси́те, вопия́, Христа́ во ве́ки.
И ны́не и при́сно и во ве́ки веко́в. Ами́нь.
Богородичен: Преесте́ственное и чу́дное Рождество́ Твое́, Де́во, воспева́ем благоче́стно, превознося́ще Христа́ во вся́ ве́ки.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Святителю отче Димитрие, моли́ Бо́га о нас.
Наслажда́яся, о́тче, ве́чныя жи́зни, о не́йже усе́рдно подвиза́лся еси́, моли́ и на́м дости́гнути о́ныя.
Припев: Святителю отче Димитрие, моли́ Бо́га о нас.
Аще и пресели́лся еси́ от на́с на го́рняя, святи́телю Дими́трие, оба́че ду́хом пребыва́еши с призыва́ющими тя́, науча́я и укрепля́я ходи́ти по стезе́ спаси́тельных за́поведей Бо́жиих.
Сла́ва Отцу́ и Сы́ну и Свято́му Ду́ху:
Яви́лся еси́ благоче́стия свети́льник всесве́тлый, ри́тор изя́щнейший и правосла́вных архиере́ев удобре́ние. Те́м тя́ серде́чною любо́вию досто́йно велича́ем.
И ны́не и при́сно и во ве́ки веко́в. Ами́нь.
Богородичен: Богоро́дице Де́во, Его́же родила́ еси́ Человеколю́бца Бо́га, моли́ со святи́телем Дими́трием, да спасе́т ду́ши на́ша.
Свети́лен:
Во́ждь спасе́ния яви́лся еси́ на́м, о́тче Дими́трие, златоза́рными словесы́ твои́ми уча́ и наказу́я, и ны́не не престава́й озаря́ти сердца́ на́ши све́том и́стиннаго богове́дения.
Сла́ва, и ны́не, Богородичен:
Влады́чице Ми́лостивая, моли́ Сы́на Твоего́ о на́с гре́шных, да изба́вимся ве́чныя тли́ и вся́кия ско́рби, и да получи́м ве́чная блага́я: вся́ бо мо́жеши, ели́ка хо́щеши.
Молитва святителю Димитрию, митрополиту Ростовскому
О, всеблаже́нный святи́телю Дими́трие, вели́кий уго́дниче Христо́в, Златоу́сте Росси́йский, услы́ши нас гре́шных, моля́щихся тебе́, и принеси́ моли́тву на́шу к Ми́лостивому и Человеколю́бцу Бо́гу, Ему́же ты ны́не в ра́дости святы́х и с ли́ки А́нгелы предстои́ши! Умоли́ Его́ благоутро́бие, да не осу́дит нас по беззако́ниям на́шим, но да сотвори́т с на́ми по ми́лости Свое́й. Испроси́ нам у Христа́ и Бо́га на́шего ми́рное и безмяте́жное житие́, здра́вие душе́вное и теле́сное, земли́ благопло́дие и во всем вся́кое изоби́лие и благоде́нствие, и да не во зло обрати́м блага́я, да́руемая нам от Ще́дрого Бо́га, но в сла́ву Его́ и в прославле́ние твоего́ заступле́ния. Да́руй нам богоуго́дно прейти́ по́прище вре́менныя жи́зни; изба́ви нас возду́шных мыта́рств и наста́ви нас на путь, веду́щий в селе́ния пра́ведных, иде́же пра́зднующих глас непреста́нный, зря́щих Бо́жия лица́ неизрече́нную добро́ту. Це́рковь же Святу́ю от раско́лов и ересе́й сохрани́, ве́рных укрепи́, заблужда́ющих обрати́ и всем да́руй вся, я́же ко спасе́нию и сла́ве Бо́жией подоба́ющая; Оте́чество твое́ сохрани́ от враго́в ненаве́тно, но побора́й ору́жие Крестоно́снаго во́инства; и пода́ждь нам всем твое́ архипа́стырское и свято́е благослове́ние, да о́ным осеня́еми, изба́вимся от ко́зней лука́ваго и избе́гнем от вся́кия беды́ и напа́сти. Услы́ши моле́ние на́ше, о́тче Дими́трие, и моли́ непреста́нно о нас Всеси́льнаго Бо́га, сла́вимаго и поклоня́емаго в Трие́х Ипоста́сех, Ему́же подоба́ет вся́кая сла́ва, честь и держа́ва во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителю Димитрию, митрополиту Ростовскому Святителю Димитрию, митрополиту Ростовскому](img_b/029.jpg)