7 мая.
Канон святому мученику Савве Стратилату
![Святаго мученика Саввы Стратилата Святаго мученика Саввы Стратилата](img_i/013.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Му́ченик Тво́й, Го́споди, Са́вва во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.
Или се́й, гла́с 5:
Земна́го са́на по́яс оста́вив и по́чести, страда́льче, пред мучи́телем, льсти́вым царе́м, Христа́, Бо́га су́ща, испове́дал еси́ и Того́ ра́ди мно́га страда́ния подъя́л еси́, сла́вне. Те́м прекра́сным побе́ды венце́м увя́злся еси́ от Царя́ все́х ца́рствующаго, с небе́сными во́и све́тло преукра́шен. Предстоя́ Тому́, Са́вво, моли́, да спасе́т ду́ши на́ша.
Кано́н, гла́с 2.
Пе́снь 1.
Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.
Припев: Святый мучениче Савво, моли́ Бо́га о нас.
Ты́ на́ше, Го́споди, от а́довых вра́т естество́ изба́вль, того́ затвори́л еси́ в темни́цах ве́чных и, сме́рть умертви́в, жи́знь источи́л еси́.
Припев: Святый мучениче Савво, моли́ Бо́га о нас.
Иже на земли́, сла́вне, во́инство оста́вль, небе́сным чино́м и во́инством труды́ боже́ственными сла́вно приче́лся еси́, Са́вво, сла́вя Христа́.
Припев: Святый мучениче Савво, моли́ Бо́га о нас.
Си́лою, му́дре, свы́ше оде́ян на враги́, неподви́жимь и непобеди́мь яви́лся еси́, си́х побежда́я до́блественно бра́нь, пресла́вне.
Сла́ва Отцу́ и Сы́ну и Свято́му Ду́ху:
Присносия́нен озари́лся еси́ в преле́стней но́щи свети́льник, Христа́ Со́лнца пропове́дуя все́м пра́ведно и отгоня́ тму́ безбо́жия.
И ны́не и при́сно и во ве́ки веко́в. Ами́нь.
Богородичен: От земли́ преиспо́дния на́с исхи́ти из Тебе́ роди́выйся Сы́н Бо́жий, я́ко милосе́рд, Свои́м воскресе́нием к жи́зни ве́чней, при́сно пою́щия Тя́.
Пе́снь 3.
Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.
Припев: Святый мучениче Савво, моли́ Бо́га о нас.
Си́лу Христо́с борца́ и держа́ву низло́ж сме́рти, оживи́ естество́ на́ше Свои́м Воскресе́нием и укрепи́.
Припев: Святый мучениче Савво, моли́ Бо́га о нас.
Те́плая, прему́дре, Христо́ва любы́, тя́ боже́ственно разже́гши, земны́х и тле́нных все́х отлучи́ и пре́лести супоста́та показа́.
Сла́ва Отцу́ и Сы́ну и Свято́му Ду́ху:
Позна́в Творца́, еди́наго Го́спода, да́вшаго Себе́ избавле́ние челове́ком, твою́ кро́вь да́л еси́ за Него́, Са́вво, бу́дущаго ра́ди воздая́ния.
И ны́не и при́сно и во ве́ки веко́в. Ами́нь.
Богородичен: Преста́ мучи́тельство сме́ртное, Пречи́стая, и а́дова сокро́вища упраздни́шася воста́нием Ро́ждшагося из Тебе́, и жи́зни сокро́вища напо́лнишася.
Седа́лен, гла́с 4.
Неподви́жимь я́влься воево́да, ва́рварския ко́зни победи́л еси́ и, пострада́в, сла́вне, кре́пко, полки́ пребори́л еси́ вра́г неви́димых. Отону́дуже венце́м увя́злся еси́ побе́дным, о на́с моли́ приле́жно, Са́вво преблаже́нне, ве́рою пою́щих тя́.
Сла́ва, и ны́не, Богородичен:
По Бо́зе во Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.
Пе́снь 4.
Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.
Припев: Святый мучениче Савво, моли́ Бо́га о нас.
Ноже́м отсе́кл еси́ и́стинных глаго́л твои́х лжи́ сплете́ния до́блественне, Са́вво пресла́вне.
Припев: Святый мучениче Савво, моли́ Бо́га о нас.
Цвету́щая телесе́ красота́ в тебе́ и́стинно яви́, страстоте́рпче, души́ твоея́ боже́ственное благоле́пие.
Сла́ва Отцу́ и Сы́ну и Свято́му Ду́ху:
Расту́щим, сла́вне, душе́вным му́жеством дре́вняго страда́ньми победи́л еси́ борца́.
И ны́не и при́сно и во ве́ки веко́в. Ами́нь.
Богородичен: Яко от зве́ря, челове́ка Тво́й Сы́н исхи́тив сме́ртна, к животу́, Де́во, сего́ преста́ви.
Пе́снь 5
Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припев: Святый мучениче Савво, моли́ Бо́га о нас.
Ты́ погребе́нием пло́ти борца́ на́шего погре́бл еси́ и, я́ко Бо́г, истощи́в а́да, воскреси́ ме́ртвыя Свои́м Воскресе́нием, Христе́, Тя́ просла́вльшия.
Припев: Святый мучениче Савво, моли́ Бо́га о нас.
Укра́шене му́дре тва́рей добро́те, позна́л еси́ все́х Влады́ку, те́мже Его́ ра́ди, Са́вво, пострада́в, венце́в сподо́бился еси́.
Сла́ва Отцу́ и Сы́ну и Свято́му Ду́ху:
Та́йных получи́в дарова́ний Христо́вых, сла́вне, и Того́ незави́стным сия́нием боже́ственно уясни́вся, свети́льник показа́лся еси́ в ми́ре, сла́вне.
И ны́не и при́сно и во ве́ки веко́в. Ами́нь.
Богородичен: Исто́чник жи́зни, из Тебе́ вопло́щся, воскре́с, источи́ земноро́дных естество́, Богоро́дице, и сие́ я́ко Бо́г безсме́ртия напои́ вода́ми.
Пе́снь 6.
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припев: Святый мучениче Савво, моли́ Бо́га о нас.
Погуби́в сме́ртию сме́рть, Иже на́с ра́ди во́лею ме́ртв вмени́лся еси́, Христе́, ме́ртвыя оживи́л еси́ и сея́ у́з изба́вил еси́.
Припев: Святый мучениче Савво, моли́ Бо́га о нас.
Окропи́вся Христа́ Боже́ственною кро́вию, и́дольских тре́б оскверне́ния отступи́л еси́, Са́вво сла́вне, и све́том оде́явся благода́ти.
Сла́ва Отцу́ и Сы́ну и Свято́му Ду́ху:
Зимы́ пре́лести отбе́гл еси́ и к ти́хой весне́ дости́гл еси́ Христо́вым позна́нием, и́мже и озари́лся еси́, пресла́вне.
И ны́не и при́сно и во ве́ки веко́в. Ами́нь.
Богородичен: Истле́вшия ны́ прегреше́ньми, Сы́н Тво́й, Пречи́стая, Воскресе́нием Свои́м обнови́, и онебеси́, и бо́ги соде́ла благода́тию.
Конда́к, гла́с 4.
Непобеди́мый я́влься стратила́т, ва́рварския ко́зни победи́л еси́ и, страда́льчествовав, сла́вне, тверде́йши, мно́жество враго́в неви́димых побори́л еси́, те́мже вене́ц испле́л еси́ побе́ды. О на́с моли́ Христа́, Са́вво всеблаже́нне, ве́рою почита́ющих тя́.
Пе́снь 7.
Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.
Припев: Святый мучениче Савво, моли́ Бо́га о нас.
Усну́в Христо́с во́лею я́ко ме́ртв, пло́тию во гро́бе, ме́ртвыя, и́же во а́де спя́щия, от ве́ка возбуди́ и живоно́сным воста́нием си́х воскреси́, пою́щия: благослове́н Бо́г оте́ц на́ших.
Припев: Святый мучениче Савво, моли́ Бо́га о нас.
Ору́жие, му́дре, боже́ственных слове́с, я́ко но́ж держа́в, в сердца́ си́х вонзи́л еси́ нече́ствующих, и уязви́л еси́ сопроти́вных ло́жная беззако́ния, и взыва́л еси́: благослове́н Бо́г оте́ц на́ших.
Припев: Святый мучениче Савво, моли́ Бо́га о нас.
Запе́н бы́в от вра́г, не поколеба́л еси́ души́, ни низложе́н бы́л еси́, Христа́ бо име́я, назира́юща и укрепля́юща тя́ непоколеби́ма. Ему́же и взыва́л, Са́вво, и благода́рно воспева́л еси́: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Ме́ртва врага́ подложи́ под но́ги твои́, страда́льче, я́коже коры́сть сего́ взя́л еси́ прельще́нныя и да́л еси́ си́х Влады́це все́х, позна́нием зову́щия: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богородичен: В кре́пость держа́вную оде́явся, челове́ческое немощно́е естество́, Де́во Пресла́вная, в воста́нии Рождества́ Твоего́, и, вооруже́но му́жески на сме́рть, сла́вит Тя́, безсме́ртия и жи́зни Ма́терь Чи́стую.
Пе́снь 8.
Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припев: Святый мучениче Савво, моли́ Бо́га о нас.
Сме́рти обрета́теля, сме́ртию твое́ю плотско́ю уби́в, Ще́дре, сего́ все́м показа́л еси́ челове́ком ве́чную сме́рть: Тя́ превозно́сим, Животе́ и Нетле́ние.
Припев: Святый мучениче Савво, моли́ Бо́га о нас.
Тиме́ния всего́ очи́щся безбо́жнаго и служе́ния и́дольскаго ба́нею, страстоте́рпче, креще́ния, Зижди́телю чи́сте приступи́л еси́, Са́вво, в по́двизех терпя́ до́блественне.
Сла́ва Отцу́ и Сы́ну и Свято́му Ду́ху:
Медото́чным сло́вом, му́дре, и взо́ром сла́дким удивля́я мучи́теля, де́лы победи́тельныя на ни́х поста́вил еси́ и взыва́л: Тя́ превозно́сим, Го́спода, во ве́ки.
И ны́не и при́сно и во ве́ки веко́в. Ами́нь.
Богородичен: Живота́ моего́ Нача́льник, к сме́рти пло́тию приступи́в, умертви́ сию́. Оживи́, Де́во, любо́вию пою́щия Тя́ и превознося́щия Того́ во ве́ки.
Песнь 9
Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.
Припев: Святый мучениче Савво, моли́ Бо́га о нас.
Ты́, утро́бу а́дову расто́рг, Ще́дре, истощи́л еси́ того́, я́ко си́лен, и небе́сный оскуде́вший напо́лнил еси́ ми́р, воздви́г и оживи́в ме́ртвыя, и челове́ки вся́ возне́сл еси́ разуме́нием Твои́м.
Припев: Святый мучениче Савво, моли́ Бо́га о нас.
Восте́к на высоту́ у́мно, страстоте́рпче, боже́ственнаго позна́ния Христо́ва, пре́лесть, до́лу влеку́щую, оста́вил еси́ и крилы́ страда́ния к Сему́ возне́слся еси́, приле́жно велича́я и сла́вя Его́ я́ко Пребла́га.
Сла́ва Отцу́ и Сы́ну и Свято́му Ду́ху:
Стре́лы младе́нец вменя́я стреля́ния мучи́телей, си́лою отража́я те́х Христо́вою, Са́вво пресла́вне, спобо́рника име́л еси́ Того́ и помога́юща ти́ при́сно, Его́же ве́рою и любо́вию непреста́нно велича́л еси́.
И ны́не и при́сно и во ве́ки веко́в. Ами́нь.
Богородичен: Облиста́, Де́во, Сы́н и Бо́г Тво́й, от гро́ба воста́в, Боже́ственныя зари́ и сла́вы испо́лни вселе́нную и сия́нием нетле́ния и́же ве́рою све́тел Тя́ о́блак сла́вящия просвети́л е́сть.
Молитва
О святы́й уго́дниче Бо́жий, му́чениче Са́вво! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святаго мученика Саввы Стратилата Святаго мученика Саввы Стратилата](img_b/013.jpg)