5 мая.
Канон преподобному Феодору Сикеоту
![Преподобнаго отца нашего Феодора Сикеота Преподобнаго отца нашего Феодора Сикеота](img_i/010.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь преподобному Феодору Сикеоту
Позна́н быв от пеле́н освяще́н/ и я́влься благода́тей испо́лнен,/ чудесы́ мир озари́л еси́/ и де́монов мно́жество отгна́л еси́,/ священноде́телю Фео́доре,// те́мже о нас моли́ся Го́сподеви.
Кано́н, творе́ние Ио́сифово, гла́с 4.
Пе́снь 1.
Ирмос: Наста́вльшему дре́вле Изра́иля, бежа́щаго от рабо́ты фарао́новы, и в пусты́ни пита́вшему, пои́м Изба́вителю, Бо́гу на́шему, я́ко просла́вися.
Припев: Преподобне отче Феодоре, моли́ Бо́га о нас.
Богосия́нную тя́ звезду́ мы́сленное Со́лнце тве́рди, прему́дре, церко́вней показа́, лучи́ чуде́с испуща́юща всегда́ и страсте́й мглу́ потребля́юща.
Припев: Преподобне отче Феодоре, моли́ Бо́га о нас.
От ма́терних тя́ ложе́сн Творе́ц, преподо́бне, я́коже Иереми́ю пе́рвее, освя́щ, соде́ла сосу́д Ду́ха благопотре́бен, ду́хи отгоня́ща лука́выя, о́тче Фео́доре.
Сла́ва Отцу́ и Сы́ну и Свято́му Ду́ху:
По́том воздержа́ния пла́мень страсте́й погаси́л еси́ и одожде́нием моли́тв струи́ чуде́с источи́л еси́, боле́зней разжже́ние, преподо́бне, погаша́юща я́ве, Фео́доре.
И ны́не и при́сно и во ве́ки веко́в. Ами́нь.
Богородичен: Невозде́ланный Гро́зд от Твоея́ утро́бы процвете́, Де́во Ма́ти, сла́дость источа́я оставле́ния и весе́лие безсме́ртно, Чи́стая, от пия́нства лю́тых объюроде́вшим.
Пе́снь 3.
Ирмос: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.
Припев: Преподобне отче Феодоре, моли́ Бо́га о нас.
Яко чу́дно житие́ твое́, богому́дре, я́ко стра́шна чудеса́, я́ко высо́ко твое́, е́же к Бо́гу, и присвое́ние, и манове́ние, и неукло́нно восхожде́ние, всесла́вне Фео́доре.
Припев: Преподобне отче Феодоре, моли́ Бо́га о нас.
Стремле́ние страсте́й возрази́л еси́, преблаже́нне, боле́зненными отда́нии и де́монов лука́вая потреби́л еси́ ловле́ния Пресвята́го Ду́ха кре́постию, Фео́доре.
Сла́ва Отцу́ и Сы́ну и Свято́му Ду́ху:
Иже к честне́й притека́юще ра́це твое́й, от сея́ почерпа́ем исцеле́ний сокро́вища, и чуде́с пучи́ны, и да́р незави́стный, пою́ще тя́, Фео́доре.
И ны́не и при́сно и во ве́ки веко́в. Ами́нь.
Богородичен: Зако́ны естества́ в Тебе́, Де́во, обновля́ются, ражда́еши бо па́че естества́ Соде́теля, па́че сло́ва Влады́ку. Его́же приле́жно моли́ спасти́ ду́ши на́ша.
Седа́лен, гла́с 8.
От Бо́га тезоимени́т да́р да́н бы́в челове́ком, на избавле́ние боле́зней мно́гих, вели́ка и ужа́сна сотвори́л еси́ чудеса́, я́зю вся́ку и неду́г исцеля́я и де́монов полки́ отгоня́я сло́вом. Те́мже и досто́йно Христо́ву Це́рковь упа́сл, единожи́тель апо́столов бы́л еси́, святи́телю Фео́доре, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.
Сла́ва, и ны́не, Богородичен:
В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному без се́мене, моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.
Пе́снь 4.
Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.
Припев: Преподобне отче Феодоре, моли́ Бо́га о нас.
Пото́к сы́й я́ве, испо́лнен во́д боже́ственных, дарова́ний Ду́ха напоя́еши всю́ Це́рковь, о́тче Фео́доре.
Припев: Преподобне отче Феодоре, моли́ Бо́га о нас.
Удави́л еси́ врага́ жи́лами боле́зней твои́х, преблаже́нне, и того́ потреби́л еси́ лука́вая во́инства моли́тв твои́х мече́м, Фео́доре.
Сла́ва Отцу́ и Сы́ну и Свято́му Ду́ху:
Поуча́яся в зако́не Бо́жии, при исхо́дищих воздержа́ния боже́ственное дре́во возрасти́л еси́, благопло́дие дея́ний доброде́тельных принося́, Фео́доре.
И ны́не и при́сно и во ве́ки веко́в. Ами́нь.
Богородичен: Блаже́нна от родо́в все́х показа́лася еси́, Христа́ ро́ждши, блаже́нны содева́ющаго тому́ рабо́тающия, Де́во Ма́ти Чи́стая Влады́чице.
Пе́снь 5
Ирмос: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
Припев: Преподобне отче Феодоре, моли́ Бо́га о нас.
Неусыпа́ющую свещу́ тя́ и све́щник неугаса́ющь Све́т Безле́тный показа́ мра́ком держи́мым страсте́й, Фео́доре, очерне́нием мно́гих грехо́в.
Припев: Преподобне отче Феодоре, моли́ Бо́га о нас.
До́бре на стезю́ тя́ наставля́юща му́ченика Гео́ргия от млады́х ногте́й име́л еси́ и сему́ уподо́бился еси́ вся́ким усе́рдием и ко Го́споду, о́тче преподо́бне, любо́вию.
Сла́ва Отцу́ и Сы́ну и Свято́му Ду́ху:
Непоро́чно воздержа́ние, терпе́ние несосу́дно, ве́ру, и наде́жду, и смире́ние, любо́вь же и стоя́ние име́л еси́ па́че челове́ка. Те́мже премно́гую благода́ть обре́л еси́ от Бо́га.
И ны́не и при́сно и во ве́ки веко́в. Ами́нь.
Богородичен: Кропле́нием ми́лости Твоея́ напо́й, Пречи́стая, иста́явшую мою́ мы́сль пла́менем греха́ и уга́сший се́рдца моего́ возжзи́ свети́льник, две́ре Све́та.
Пе́снь 6.
Ирмос: Бу́ря мя́ помышле́ний пости́гши, во глубину́ низвлачи́т мя́ безме́рных грехо́в, но Ты́, Упра́вителю Благи́й, предвари́в, упра́ви, я́ко проро́ка, и спаси́ мя.
Припев: Преподобне отче Феодоре, моли́ Бо́га о нас.
Печа́ль земны́х оттря́сл еси́ и все́ истощи́л еси́ жела́ние ко Влады́це, наслажда́яся Сего́ добро́тами и истека́ющими отту́ду, о́тче, светлостьми́.
Припев: Преподобне отче Феодоре, моли́ Бо́га о нас.
Растопи́л еси́ мра́з грехо́вный, сту́дению напоя́емь, стоя́ посреде́ ве́тренника, я́ко безпло́тен, о́тче, прило́ги претерпе́л еси́ возду́шныя, Боже́ственною согрева́емь благода́тию.
Сла́ва Отцу́ и Сы́ну и Свято́му Ду́ху:
Ра́це твое́й свяще́нней приступа́юще, благово́ния боже́ственнаго ра́зума исполня́емся, святи́телю, смра́да избавля́ющеся страсте́й, любо́вию тя́ чту́щии, чудотво́рче о́тче преподо́бне.
И ны́не и при́сно и во ве́ки веко́в. Ами́нь.
Богородичен: Страсте́й мя́ треволне́ние смуща́ет, глубина́ отча́яния, обурева́ет мое́ се́рдце. Ко́рмчию ро́ждши Христа́, Де́во, и Спа́са, изба́ви мя́ и спаси́ моли́твами Твои́ми.
Конда́к, гла́с 3.
Яко на о́гненную колесни́цу доброде́тельми, богоно́се, возше́д, восте́кл еси́ на небе́сная жили́ща, я́ко Ангел, с челове́ки пожи́л еси́ и, я́ко челове́к, со Ангелы о́крест ликовству́еши. Сего́ ра́ди показа́лся еси́ чуде́с боже́ственное прия́телище, Фео́доре преподо́бне.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Преподобне отче Феодоре, моли́ Бо́га о нас.
Яко нело́жен святи́тель, же́ртву безкро́вную прине́сл еси́ ду́хом и страсте́й умерщвле́нием, же́ртву благово́нну, преблаже́нне, тебе́ Влады́це прине́сл еси́ ве́рою.
Припев: Преподобне отче Феодоре, моли́ Бо́га о нас.
Огнь сласте́й воздержа́ния по́том погаси́л еси́ и бездо́ждие земли́ уста́вил еси́ ту́чь пролия́нием, чудотво́рче, я́коже Илия́, небеса́ затворе́на моли́твами твои́ми отверза́я.
Сла́ва Отцу́ и Сы́ну и Свято́му Ду́ху:
Освя́щся от младе́нства, моли́твенною до́блестию непло́дныя сотвори́л еси́ утро́бы многоча́дны, слепы́м по́дал еси́ прозре́ние и хромы́м благотече́ние, Фео́доре треблаже́нне.
И ны́не и при́сно и во ве́ки веко́в. Ами́нь.
Богородичен: Добро́ту Иа́ковлю Тя́ Бо́г избра́, и в Тя́ всели́ся, и Тя́ соблюде́ по рождестве́ Де́ву, я́коже бе́ пре́жде рождества́, Де́во Богороди́тельнице.
Пе́снь 8.
Ирмос: Земля́ и вся́, я́же на не́й, мо́ре и вси́ исто́чницы, небеса́ небе́с, све́т и тма́, мра́з и зно́й, сы́нове челове́честии, свяще́нницы, благослови́те Го́спода и превозноси́те Его́ во ве́ки.
Припев: Преподобне отче Феодоре, моли́ Бо́га о нас.
На ка́мени терпе́ния утверди́в твоя́ восхожде́ния душе́вная, не победи́лся еси́ прило́ги сопроти́вными, не поколеба́лся еси́ наве́ты вра́жиими, но к высоте́ Боже́ственней восте́кл еси́, о и́же в ве́ре чту́щих тя́ моля́.
Припев: Преподобне отче Феодоре, моли́ Бо́га о нас.
Струя́ происхо́дит от ра́ки твоея́ исцеле́ний вся́ких, и омыва́ет скве́рны страсте́й, и гное́ние лю́тых очища́ет, и ве́рных напая́ет, Фео́доре, все́х сердца́, любо́вию чту́щих тя́.
Сла́ва Отцу́ и Сы́ну и Свято́му Ду́ху:
Даро́в Боже́ственных тезоимени́т и таи́нник Христо́в, по́стников добро́та, свяще́нников красота́, чуде́с исто́чник, честна́я мирополо́жница Ду́ха, ны́не да восхва́лится Фео́дор вели́кий.
И ны́не и при́сно и во ве́ки веко́в. Ами́нь.
Богородичен: Свяще́ннии Тя́ проро́ков пропове́дуют гла́си обра́зно: две́рь, и го́ру, и се́нь, зе́млю святу́ю, све́та о́блак, из него́же су́щим во тме́ и се́ни седя́щим возсия́ Со́лнце, Де́во, Христо́с светода́вец.
Песнь 9
Ирмос: Яко сотвори́ Мне́ вели́чие Си́льный, и свя́то и́мя Его́, и ми́лость Его́ в ро́д и ро́д боя́щимся Его́.
Припев: Преподобне отче Феодоре, моли́ Бо́га о нас.
Яко у́тро, я́ко де́нь све́тел, тво́й пра́здник яви́ся, просвеща́ющ на́ша сердца́, ве́рно восхваля́ющих честны́я боле́зни твоя́, о́тче Фео́доре.
Припев: Преподобне отче Феодоре, моли́ Бо́га о нас.
Собесе́дник Ангелов, апо́столов, страда́льцев, преподо́бных и пра́ведников бы́в, о́тче, и святи́телей, на небесе́х о на́с Христа́ мо́лиши при́сно.
Сла́ва Отцу́ и Сы́ну и Свято́му Ду́ху:
Де́нь спасе́ния, пра́здник весе́лия яви́ся, стеце́мся, ве́рнии, очи́стивше ду́ши, святи́тель созыва́ет на́с Фео́дор.
И ны́не и при́сно и во ве́ки веко́в. Ами́нь.
Богородичен: Стра́шно Твое́ рождество́, Богоро́дице, Ма́ти Христо́ва, те́мже Тя́ ублажа́ем, Чи́стая, и прославля́ем че́стно, ро́дове родо́в во ве́ки, ами́нь.
Молитва
О свяще́нная главо́, преподо́бне о́тче, преблаже́нне а́вво Фео́доре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобнаго отца нашего Феодора Сикеота Преподобнаго отца нашего Феодора Сикеота](img_b/010.jpg)