3 мая.

Канон преподобному Феодору Трихине

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Фео́доре, дух твой.

Кано́н, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Феодоре, моли́ Бо́га о нас.

Дарова́нии боже́ственными обога́щся, да́р я́ко многоце́нен, Творцу́, о́тче, себе́ приве́л еси́. Те́мже мо́й облагодати́ по́мысл, восхваля́ющу твою́ дне́сь па́мять светоно́сную и житие́ равноа́нгельное.

Припев: Преподобне отче Феодоре, моли́ Бо́га о нас.

Яко напита́вся боже́ственными добро́тами, взя́л еси́ на ра́мо твое́ по́стнически кре́ст, Фео́доре, и после́довал еси́ во́льное тебе́ ра́ди Претерпе́вшему распя́тие, блаже́нне, стра́сти умертви́в теле́сныя.

Сла́ва Отцу́ и Сы́ну и Свято́му Ду́ху:

Кре́пко, о́тче, проти́ву врага́ ополчи́вся, и, кре́стным ору́жием огражде́н, сего́ смири́л еси́, смири́вся и му́дре возноша́емь. Те́мже победоно́сец яви́лся еси́ и преподо́бных равностоя́тель.

И ны́не и при́сно и во ве́ки веко́в. Ами́нь.

Богородичен: Спа́сшиися, Де́во, Тебе́ ра́ди, Пренепоро́чную в жена́х и Бо́жию Роди́тельницу пе́сньми ублажа́ем, и почита́ем, и согла́сно зове́м: ра́дуйся, вино́вная пра́дедняго назда́ния.

Пе́снь 3.

Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподобне отче Феодоре, моли́ Бо́га о нас.

Процве́л еси́ в поро́де воздержа́ния, преподо́бне, я́ко ши́пок благово́нен, сердца́ благоуха́я на́м боже́ственным твои́м житие́м, пресла́вне.

Припев: Преподобне отче Феодоре, моли́ Бо́га о нас.

Кре́постию возмога́емь Спа́совою, ше́ствовал еси́ те́сным, сла́вне, жесто́ким и ско́рбным путе́м и к широте́ Вы́шняго Сио́на дости́гл еси́.

Сла́ва Отцу́ и Сы́ну и Свято́му Ду́ху:

Ви́дится тво́й гро́б, благово́нно мѵ́ро благода́тию источа́я, преподо́бне, и пропове́дует Бо́гу бы́вша тя́ благово́ние, о́тче свяще́нне.

И ны́не и при́сно и во ве́ки веко́в. Ами́нь.

Богородичен: Черто́г безсме́ртия Твое́ чре́во бы́сть, из него́же Жени́х Госпо́дь возсия́в, Де́во Пречи́стая, преподо́бных ли́к Себе́ собра́.

Седа́лен, гла́с 4.

Яко чи́ст, к чи́стому присту́пль ча́стыми моли́твами и чистото́ю, освяти́лся еси́ Ду́хом, Фео́доре, отону́дуже со Ангелы ны́не водворя́яся, пое́ши пе́снь трисвяту́ю все́х Влады́це. Те́мже моли́, преподо́бне, Христа́ поми́ловати любо́вию чту́щих тя́.

Сла́ва, и ны́не, Богородичен:

По Бо́зе во Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу; моле́ние сотвори́, Чи́стая, к Сы́ну Твоему́ от си́х изба́вити мя́.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Припев: Преподобне отче Феодоре, моли́ Бо́га о нас.

Воздержа́ния ча́стыми я́звами ура́нил еси́ стра́сти Еги́пта и наста́вил еси́, Фео́доре, к земли́ небе́сней благоче́стно и преподо́бно после́дующия тебе́.

Припев: Преподобне отче Феодоре, моли́ Бо́га о нас.

Истка́нии доброде́тельными соде́лал еси́, Фео́доре, себе́ уго́дну и чисте́йшую оде́жду, в ню́же оде́явся, в черто́г вы́шний вше́л еси́.

Сла́ва Отцу́ и Сы́ну и Свято́му Ду́ху:

Изсуше́нием, се́туя, соверша́л еси́, Фео́доре, власяны́ми истка́ньми твою́ пло́ть покрыва́я, отону́дуже ти́ возсия́ мы́сленное весе́лие Боже́ственным Ду́хом.

И ны́не и при́сно и во ве́ки веко́в. Ами́нь.

Богородичен: В ча́с мя́ стра́шный, Пречи́стая, суди́ма спаси́ и изба́ви, гее́нны исхити́, я́ко да ублажа́ю Тя́ и по до́лгу честву́ю, Непоро́чная.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Феодоре, моли́ Бо́га о нас.

Житие́ равноа́нгельное восприе́м на земли́, преподо́бне, по́стнически вся́ким озлобле́нием умертви́л еси́ страсте́й воста́ния, богому́дре Фео́доре.

Припев: Преподобне отче Феодоре, моли́ Бо́га о нас.

Ча́с Суда́ помышля́я всегда́, отри́нул еси́ от души́ со́н уны́ния, у́тренюя к Бо́гу и боже́ственною любо́вию удобря́емь.

Сла́ва Отцу́ и Сы́ну и Свято́му Ду́ху:

Любя́ Вы́шния оби́тели, я́ко мона́х и́стинен, воздви́гл еси́ на земли́ оби́тели мона́шествующим, в ни́хже тобо́ю насажде́ни бы́вше почита́ют тя́, преподо́бне.

И ны́не и при́сно и во ве́ки веко́в. Ами́нь.

Богородичен: Еди́на родила́ еси́ Ипо́стасную Жи́знь, Пречи́стая, Творца́ все́х и Влады́ку, Его́же лю́бяще, мно́жество оте́ц преподо́бных преподо́бно пожи́ша.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподобне отче Феодоре, моли́ Бо́га о нас.

Просве́щся виде́нии лу́чшими, от все́х земны́х ду́шу обнажи́л еси́ и о Бо́зе упраздни́лся еси́ непреста́нными поуче́нии, Фео́доре.

Припев: Преподобне отче Феодоре, моли́ Бо́га о нас.

Све́тлаго твоего́ жития́ све́тлостию поднебе́сная освети́шася, блаже́нне, восто́чнаго со́лнца светосия́нную тя́ звезду́ пропове́дающе.

Сла́ва Отцу́ и Сы́ну и Свято́му Ду́ху:

Мра́зом и сту́дению утесня́емь, и́же к Бо́гу огрева́лся еси́ манове́нии и зи́му отгна́л еси́ страсте́й боже́ственною теплото́ю, Фео́доре.

И ны́не и при́сно и во ве́ки веко́в. Ами́нь.

Богородичен: Яко добру́, я́ко красну́ я́вльшуюся, Сло́во кра́сное возлюби́, Чи́стая, и в Твою́ утро́бу всели́ся в на́ше, ве́рных, избавле́ние.

Конда́к, гла́с 4.

Яви́лся еси́ преди́вен житие́м, Фео́доре му́дре о́тче, власяны́ми ру́бы измени́в па́че ца́рских сокро́вищ, я́же на земли́, сего́ ра́ди небе́сную оде́жду восприя́л еси́, при́сно моли́ о на́с, преподо́бне.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобне отче Феодоре, моли́ Бо́га о нас.

Миродохнове́н бы́л еси́ доброде́тельными твои́ми обе́ты, Фео́доре, и ми́ро благово́нно от честны́х твои́х моще́й источа́еши на́м, ве́рно чту́щим тя́, ду́ши и сердца́ благоуха́я, преподо́бне.

Припев: Преподобне отче Феодоре, моли́ Бо́га о нас.

Яко а́гнец незло́бив, воспита́н на зла́це воздержа́ния, преподо́бне, всели́лся еси́ во огра́ду небе́сную весели́тися с нача́льным Па́стырем, те́мже твоя́ о́вцы при́сно помина́й.

Сла́ва Отцу́ и Сы́ну и Свято́му Ду́ху:

Ка́плями сле́з твои́х погаси́л еси́ вря́щую телесе́ пе́щь, свяще́нне, огне́м Боже́ственнаго Ду́ха распала́емь, свети́льник до́блести и све́т су́щим во тме́, о́тче, бы́л еси́.

И ны́не и при́сно и во ве́ки веко́в. Ами́нь.

Богородичен: Показа́ купина́ Тя́, повива́ема огне́м, Пренепоро́чная, ника́коже опаля́ема у́бо, Огнь бо носи́ла еси́ Божества́, Иже неопа́льну Тя́ соблюде́, Чи́стая, и по рождестве́ Де́ву нетле́нну.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Припев: Преподобне отче Феодоре, моли́ Бо́га о нас.

Скве́рну отмы́л еси́ души́ сле́зными тече́нии и пото́к пи́щный насле́довал еси́ и кро́тких зе́млю, я́ко кро́ток, преподо́бне, и незло́бив, и пра́вдою я́ве украше́н.

Припев: Преподобне отче Феодоре, моли́ Бо́га о нас.

Сво́йственными к Бо́гу взира́нии при́сно просвеща́емь, непреткнове́нно премину́л еси́ страстны́я по́мыслы и все́ омраче́ние теле́сное и к све́ту преше́л еси́ безстра́стия, о́тче.

Сла́ва Отцу́ и Сы́ну и Свято́му Ду́ху:

Да и́стинному жела́нию присту́пиши, возде́ржник, и смиренному́др, и долготерпели́в яви́лся еси́, и ми́лостив вои́стинну, власяны́ми ру́бы покрыва́яся и де́монскую обнажа́я пре́лесть.

И ны́не и при́сно и во ве́ки веко́в. Ами́нь.

Богородичен: Украси́вшися добро́тами доброде́телей и ря́сны преиспещре́нна златы́ми, Де́во, я́же па́че все́х челове́к красне́йшаго Сло́ва породила́ еси́. Его́же пое́т преподо́бных мно́жество во ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Припев: Преподобне отче Феодоре, моли́ Бо́га о нас.

Распе́н пло́ть твою́ стра́хом Влады́ки твоего́, умертви́лся еси́ ми́ру, о́тче Фео́доре, и ны́не преше́л еси́, ра́дуяся, к жи́зни живы́х, треблаже́нне, прича́стием обоже́н и све́та при́сно исполня́емь.

Припев: Преподобне отче Феодоре, моли́ Бо́га о нас.

Де́нь пра́зднственный и испо́лнен свяще́ния, твою́ боже́ственную па́мять соверша́ем дне́сь: ты́ бо све́та и дне́ я́ко вои́стинну сы́н показа́лся еси́ и во све́те невече́рнем живе́ши, ра́дуяся.

Сла́ва Отцу́ и Сы́ну и Свято́му Ду́ху:

Свети́льниче светоза́рне, Бо́жия да́ра тезоимени́те, богосия́нное свети́ло, невече́рняя заря́, доброде́телей мирополо́жниче и непрекло́нен сто́лпе мона́шествующих, ста́до твое́ изба́ви моли́твами твои́ми от вся́кия ско́рби.

И ны́не и при́сно и во ве́ки веко́в. Ами́нь.

Богородичен: Све́та жили́ще чре́во Твое́ бы́сть, Де́во, просве́щшаго ми́р заря́ми Божества́, две́ре Со́лнца сла́вы, в жена́х прера́дованная, преподо́бных похвало́, Всесвята́я и Преблагослове́нная.

Молитва

О свяще́нная главо́, преподо́бне о́тче, преблаже́нне а́вво Фео́доре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.