31 мая.

Канон святым мученикам Петру, Дионисию и иже с ними, и святым седми девам

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченицы Твои́, Го́споди,/ во стра́даниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кано́н святы́х му́чеников, гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Святи́и му́ченицы, моли́те Бо́га о нас.

Ве́ры побо́рницы, ве́рою свяще́нное ва́ше всегда́ творя́щия торжество́, страсте́й изба́вите и вся́каго обстоя́ния.

Припев: Святи́и му́ченицы, моли́те Бо́га о нас.

Ве́трилом впери́вшеся, богоно́снии, кре́стным пресла́вно, немо́кренно пучи́ну муче́ний преплы́сте, враги́ пото́пльше.

Припев: Святи́и му́ченицы, моли́те Бо́га о нас.

Совокупи́стеся чино́м небе́сным, претерпе́вше я́звы в телеси́, святи́и, те́мже боже́ственную дне́сь ва́шу па́мять почита́ем.

Сла́ва Отцу́ и Сы́ну и Свято́му Ду́ху:

Зако́ном боже́ственным утвержда́еми, беззако́ннующих сове́ты, му́дрии, упраздни́сте, пострада́вше же зако́нно, Бо́жию сла́ву улучи́сте.

И ны́не и при́сно и во ве́ки веко́в. Ами́нь.

Богородичен: Яко престо́л, Де́во, Царя́, на него́же все́д, ве́рным седа́лище небе́сное угото́вал еси́, почита́ем и любо́вию Тя́ сла́вим.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святи́и му́ченицы, моли́те Бо́га о нас.

Поста́вль на ка́мени ве́ры, Пе́тре, души́ твоея́ но́ги, блаже́нне, сопротивле́нием не победи́лся еси́ безбо́жных, всеблаже́нне.

Припев: Святи́и му́ченицы, моли́те Бо́га о нас.

Якоже тя́ звезду́ сия́ющу, гра́д тво́й, Пе́тре, ми́рови предлага́ет, отгоня́ща безбо́жия но́щь Боже́ственною благода́тию.

Припев: Святи́и му́ченицы, моли́те Бо́га о нас.

Воззре́нием к Бо́гу вжиля́яся, Пе́тре, колесы́ и у́зами сокруша́емь и бие́мь непреста́нно, венцено́сец показа́лся еси́.

Сла́ва Отцу́ и Сы́ну и Свято́му Ду́ху:

Пе́ние Бо́гови принося́ще, вся́ко, страстоте́рпцы, нанесе́ние му́к претерпе́сте: сего́ ра́ди венце́в сподо́бистеся.

И ны́не и при́сно и во ве́ки веко́в. Ами́нь.

Богородичен: Еди́на де́вствуеши, ро́ждши, еди́на та́инства вели́каго вои́стинну Служи́тельница позна́лася еси́, Бо́га ро́ждши, Богоро́дице Ма́ти Де́во.

Седа́лен, гла́с 4.

Му́ченическими кровьми́ удобре́ни, Го́сподеви предстоите́, все́х Царю́, добропобе́днии му́ченицы. Те́мже с весе́лием честну́ю ва́шу па́мять дне́сь соверша́ем, долго́в разреше́ние прося́ще прия́ти ва́ми и ве́лию ми́лость.

Слава и ны́не, Богородичен:

Де́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святи́и му́ченицы, моли́те Бо́га о нас.

Дрема́ние от ве́ждей душе́вных оттря́сше, е́же от ле́ности, бо́дростию боже́ственною, все́ успи́сте безбо́жных зло́е умышле́ние.

Припев: Святи́и му́ченицы, моли́те Бо́га о нас.

Яко пречестни́и и боже́ственнии Сло́ва ка́мение, уморе́ни бы́вше ка́мением, Андре́й, Па́вел и Диони́сий присносу́щныя жи́зни сподо́бишася.

Припев: Святи́и му́ченицы, моли́те Бо́га о нас.

Прекра́сное цве́тие благоче́стия и и́стинное и боже́ственное Христо́во благово́ние, ве́рою восхва́лим му́ченики дне́сь.

Сла́ва Отцу́ и Сы́ну и Свято́му Ду́ху:

До́льняя презре́вше жела́нием боже́ственным и плотски́я боле́зни претерпе́вше до́блественне, ра́дующеся, к неболе́зненному животу́ преидо́ша.

И ны́не и при́сно и во ве́ки веко́в. Ами́нь.

Богородичен: Препе́тая Де́во Богороди́тельнице, пою́щия Тя́ спаса́й, на Тя́ упова́ющия, вся́каго обстоя́ния, и бе́д, и скорбе́й.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святи́и му́ченицы, моли́те Бо́га о нас.

Зна́менавшеся, му́ченицы, све́том разу́мным, муче́ния тму́ и но́чь злу́ю многобо́жия си́лою Боже́ственною непоткнове́нно преидо́сте.

Припев: Святи́и му́ченицы, моли́те Бо́га о нас.

Деви́ческими сия́ющи, Христи́но, добро́тами, я́звенными заря́ми све́тло украси́лася еси́ и в мы́сленный Христо́в черто́г всели́лася еси́, ра́дующися.

Сла́ва Отцу́ и Сы́ну и Свято́му Ду́ху:

Неи́стовне рачи́тельствующии те́ла твоего́, Христи́но му́ченице, сла́дким твои́м сло́вом жела́нию Бо́жию привя́зани, пострада́ша кре́пко.

И ны́не и при́сно и во ве́ки веко́в. Ами́нь.

Богородичен: Неве́сто Бо́жия Безневе́стная, Ея́же ра́ди ве́тхаго отреши́вшеся до́лга, сы́нове по благода́ти яви́хомся Отца́ Небе́снаго, пою́щия Тя́ сохраня́й.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святи́и му́ченицы, моли́те Бо́га о нас.

Сла́вный до́блествовав Иракли́й, прия́т ве́лию сла́ву, рая́ граждани́н бы́в и честны́м лико́м соедини́вся страда́лец, ны́не ра́дуется.

Припев: Святи́и му́ченицы, моли́те Бо́га о нас.

Воспое́м с Павли́ном боже́ственнаго Венеди́ма и Андре́я, Иракли́я и Диони́сия, Петра́ же, и Па́вла, и Христи́ну, Госпо́дни му́ченики.

Припев: Святи́и му́ченицы, моли́те Бо́га о нас.

Растерза́еми и ка́мением непра́ведно бие́ми, огне́м же скончава́еми, сла́внии му́ченицы, в Це́ркви пе́рвенец жи́ти сподо́бистеся.

Сла́ва Отцу́ и Сы́ну и Свято́му Ду́ху:

Показа́вшему прему́дрыя страстоте́рпцы, сия́юще, я́коже зве́зды, на тве́рди церко́вней, благоче́стно пою́ще: Сы́ну Бо́жию поклони́мся.

И ны́не и при́сно и во ве́ки веко́в. Ами́нь.

Богородичен: Яко ни́ва, плодоно́сный кла́с прозябла́ еси́, Богоро́дице, живо́тный, жи́знию ве́рныя препита́ющаго и гла́д преле́стный от земли́ вои́стинну отвраща́ющаго.

Конда́к, гла́с 2.

Свети́льницы све́тлии я́вльшеся,/ Боже́ственнии му́ченицы,/ тварь всю све́тлостию чуде́с озаря́ете,/ неду́ги разреша́юще,/ и глубо́кую тьму всегда́ отгоня́юще,// Христу́ Бо́гу моля́щеся непреста́нно о всех нас.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святи́и му́ченицы, моли́те Бо́га о нас.

Юным ревну́юще ве́рно в Вавило́не де́тем, во о́гнь усе́рдно внидо́сте, вопию́ще, блаже́ннии: оте́ц на́ших Бо́же, благослове́н еси́.

Припев: Святи́и му́ченицы, моли́те Бо́га о нас.

Не поклони́стеся истука́нным, страда́льцы сла́внии, небре́гше, приснопа́мятную сме́рть претерпе́сте, безсме́ртная наслажде́ния я́ве восприе́мше.

Припев: Святи́и му́ченицы, моли́те Бо́га о нас.

Му́жественною душе́ю и кре́постию нра́ва беззако́ннующих шата́ния низложи́ша му́ченицы, вопию́ще ве́рно: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Глаго́лы боже́ственных му́ченик укре́плься, Павли́не, умре́ти произво́лил еси́, пресла́вне, вопия́ Сотво́ршему вся́ческая: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Киво́т Бо́жий, боже́ственныя ма́нны ста́мну, златы́й све́щник и трапе́зу, го́ру святу́ю, Богоро́дицу вси́ пе́сненно сла́вим, ве́рнии.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святи́и му́ченицы, моли́те Бо́га о нас.

Истка́нную от вы́шния благода́ти совлече́нием бре́ннаго телесе́ страда́льцы в ри́зу облеко́шася, любо́вию вопию́ще: вся́ дела́, благослови́те, по́йте Го́спода.

Припев: Святи́и му́ченицы, моли́те Бо́га о нас.

Кропле́нием боже́ственныя кро́ве, му́ченицы, очи́стившеся, кро́вь ва́шу за Христа́ излия́сте, пою́ще непреста́нно: вся́ дела́, благослови́те, по́йте Го́спода.

Сла́ва Отцу́ и Сы́ну и Свято́му Ду́ху:

Красны́ гро́зды яви́стеся мы́сленнаго виногра́да, блаже́ннии, вино́ на́м пролива́юще благоче́стия, любо́вию взыва́ющим: вся́ дела́, благослови́те, по́йте Го́спода.

И ны́не и при́сно и во ве́ки веко́в. Ами́нь.

Богородичен: Мы́сленное очисти́лище бы́сть, все́х моли́твы прие́млющи и Сы́ну Твоему́, Пречи́стая, вознося́щи во избавле́ние пою́щим: вся́ дела́, благослови́те, по́йте Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святи́и му́ченицы, моли́те Бо́га о нас.

Поже́рше жела́нием са́ми себе́, му́ченицы до́блии, ра́дующеся, преда́ша кро́ви усе́рдно, и бога́тство неотъе́млемо прия́ша, и ны́не му́ченическим причто́стеся ликостоя́нием, всехва́льнии.

Припев: Святи́и му́ченицы, моли́те Бо́га о нас.

Яви́стеся цве́ти мы́сленнии, благоуха́юще, страстоно́сцы, благоче́стие, и боже́ственнаго гра́да гра́ждане, приста́нища су́щим в бу́ри спаси́тельна, свети́льницы и́стины и побо́рницы, те́мже досто́йно блажи́ми есте́.

Припев: Святи́и му́ченицы, моли́те Бо́га о нас.

С Петро́м и Па́влом му́драго Иракли́я, Павли́на и Венеди́ма, вку́пе Андре́я, и Христи́ну, и Диони́сия почти́м, кре́пко за Христа́ пострада́вшия и ле́сть потре́бльшия.

Сла́ва Отцу́ и Сы́ну и Свято́му Ду́ху:

Земля́ у́бо кро́ви ва́ша прия́т, излия́вшияся, великоимени́тии, за все́х Благоде́теля, жили́ща же пра́ведных ду́хи, с ни́миже лику́юще, помяни́те помина́ющия ва́с всегда́.

И ны́не и при́сно и во ве́ки веко́в. Ами́нь.

Богородичен: Гла́с Тебе́, ве́рнии, ра́достно приноша́ем Ангелов, Богоневе́сто: ра́дуйся, помо́щнице челове́ком, му́ченик и апо́стол утвержде́ние и все́х проро́ков оглаше́ние, Богороди́тельнице Всенепоро́чная.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.