31 мая.

Канон праведному Иоанну (Гашкевичу) пресвитеру Кормянскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Святче Божий, отче наш праведне Иоанне, пресвитере славне стада Христова, свято житие твое совершив, даром прозрения и исцеления Господь тя одари, и ныне нетленным телесем с нами пребывая, моли Христа Бога нашего, да спасет Господь души наша, почитающих, блаженне, святую память твою.

Величание:

Величаем тя, святый праведный отче Иоанне, и чтим святую память твою, ты бо молиши за нас Христа Бога нашего.

Канон, глас 4.

Песнь 1.

Ирмос: Моря чермную пучину невлажными стопами древний пешествовав Израиль, крестообразныма Моисеовыма рукама амаликову силу в пустыне победил есть.

Припев: Праведне отче Иоанне, моли́ Бо́га о нас.

Похваляющу мне твое житие, яко ко Христу дерзновение стяжав, от богатых Духа сокровищ каплю разума дати ми, молюся, яко да достойно похвалите тя возмогу, хвалы достойного.

Припев: Праведне отче Иоанне, моли́ Бо́га о нас.

Отечество наше возрадовашеся, яко виде в тебе, отче Иоанне, новаго светильника и молитвенника за Церковь нашу и за вся яже к тебе прибегнет с молитвою и прошением, ходатая тя имея пред Господом.

Сла́ва Отцу́ и Сы́ну и Свято́му Ду́ху:

Юный возрастом был еси отче, но разумом старцы превзошел и мудро лето своея юности проводя под кровом храма Покрова Богородицы, Ея же яко лучезарную зарю в сердце своем имел еси, ныне же предстоиши Престолу Царя Славы со ангелы и лики святых, молим тя спастися молитвами твоими.

И ны́не и при́сно и во ве́ки веко́в. Ами́нь.

Богородичен: Приими от уст скверных хвалу, Дево Пречистая, Богородице чистая, Ты бо еси миру защищение и спасение, прилежно молим Тя спастися душам нашим.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище и утверждение.

Припев: Праведне отче Иоанне, моли́ Бо́га о нас.

Разум твой отче просветлен бысть, яко дивно позна силу Божию, излиянную благодатно на тя Духом Святым, Его же действием и мы просветимся, отче всеблаженне Иоанне.

Припев: Праведне отче Иоанне, моли́ Бо́га о нас.

Аще и низу шествовал по земли, но сердце пребысть горе, волю Божию исполняя, пастырь добрый был еси стаду Христову, да и нас сопричтеши ко избранным овцам твоим, святче Божий преблаженне.

Сла́ва Отцу́ и Сы́ну и Свято́му Ду́ху:

Возлюбив мудрости начало — страх Божий, и заповедям Его присно поучаяся, древом добрым насадился еси при исходищах вод духовных, от них же, отче, напояем, плод Христу принеслся еси.

И ны́не и при́сно и во ве́ки веко́в. Ами́нь.

Богородичен: Егда прииде Христос судити люди Своя, тогда и Ты, Пречистая Дево, буди ми помощница и молитвенница в день страшнаго Суда Божия.

Седален, глас 8:

Веры православныя украшение, церкви Божия похвало и удобрение, отче праведный Иоанне, вся страждующия от себе не отверг еси и помощь духовную и телесную всякой душе христианской в жизни временней подавал еси. Ныне же душею преселился во обители Отца Небеснаго, телесем нетленным с нами пребывавши, да и мы прибегаем в скорбях и радостях наших к тебе, делателю добрый винограда Христова, не остави и нас, сирых и убогих, вопиющих Ти тако: отче праведне Иоанне, спасай нас молитвами Твоими.

Слава, и ныне, Богородичен:

О Тебе радуется, Благодатная, всякая тварь, ангельский собор и человеческий род, освященный храме и раю словесный, девственная похвало, из Нея же Бог воплотися и младенец бысть, прежде век сый Бог наш: ложесна бо Твоя престол сотвори и чрево Твое пространнее небес содела. О Тебе радуется Благодатная, всякая тварь, слава Тебе.

Песнь 4.

Ирмос: Вознесена Тя видевши Церковь на Кресте, Солнце праведное, ста в чине своем, достойно взывающи: слава силе Твоей, Господи.

Припев: Праведне отче Иоанне, моли́ Бо́га о нас.

Данный обет жития постническаго добре соблюл еси, аще и в мире пожил еси, но духом яко в пустыне пребыв, показуя нам путь правый ко спасению, исправити нам житие наше на Тя зряще.

Припев: Праведне отче Иоанне, моли́ Бо́га о нас.

Ныне наста время ко Христу всем сердцем прилепитися и исполнити волю Его, твоему последующе примеру жития святаго, сице и в мире живуще отвержемся мира сего, и мир пустынею соделаем ко спасению душ наших.

Сла́ва Отцу́ и Сы́ну и Свято́му Ду́ху:

Отверзи наш разум твоими молитвами, отче праведне, да и мы познаем волю Творца Небеснаго, блудное житие наше исправим и новую песнь Ему воспоим: молитвами праведника, Господи, спаси души наша.

И ны́не и при́сно и во ве́ки веко́в. Ами́нь.

Богородичен: Млеком питала еси, Дево, плотоносца Твоего Бога рожденнаго, яко да болезнь Адамову, сущую во аде, облегчит, от древа снедша знания и заповедь преслушания.

Пе́снь 5

Ирмос: Ты, Господи мой, свет в мир пришел еси, свет святый обращаяй из мрачна неведения верою воспевающия Тя.

Припев: Праведне отче Иоанне, моли́ Бо́га о нас.

Утишение бысть людям православным, отче Иоанне, егда славне мощи твоя обретоша, тогда воздаша хвалу Богови, и труды твоя со молитвы воспеша, почитающе, блаженне, память твою.

Припев: Праведне отче Иоанне, моли́ Бо́га о нас.

Имел еси мудрование во благочестии, свыше сподобился Божественнаго откровения, приходящих в вере наставляя и к покаянию всех призывая, возлюбити ближняго своего и брата не осудити, сподоби, блаженне, и нас сие исполнити.

Сла́ва Отцу́ и Сы́ну и Свято́му Ду́ху:

Очесами зрим нетление телесе твоего на земли, имеюще мощи твоя святыя, яко залог любви ко стаду своему, дарова нам их Господь Промыслитель о людях своих, да взирающе на тя и мы исполним волю Его.

И ны́не и при́сно и во ве́ки веко́в. Ами́нь.

Богородичен: Агнице нескверна явилася нам Пресвятая Дево, яко плотию Христа родила еси, да тако и Дева в рождестве и по рождестве пребыла еси. Спаси и нас вопиющих: Мати Божия, слава Тебе.

Песнь 6.

Ирмос: Пожру Ти со гласом хваления, Господи, Церковь вопиет Ти, от бесовския крове очищшеся, ради милости от ребр Твоих истекшею Кровию.

Припев: Праведне отче Иоанне, моли́ Бо́га о нас.

Наслаждатися небеснаго лицезрения Владыки Христа Бога нашего сподобился еси, блаженне Иоанне, в райских чертозех пребываеши днесь, телесем же твоим не оставил нас, грешных.

Припев: Праведне отче Иоанне, моли́ Бо́га о нас.

Нов явился ревнитель, яко вторый Моисей, не знаменми страшными удивляя, но Божественных словес учении наставляя, тихому пристанищу новаго Израиля от страстей Египта нас изводя.

Сла́ва Отцу́ и Сы́ну и Свято́му Ду́ху:

Ум и душу твою направил к горнему Иерусалиму и нас сему поучал, блаженне Иоанне, како есть угождати Господеви и работати единому Господину, Творцу и Создателю нашему.

И ны́не и при́сно и во ве́ки веко́в. Ами́нь.

Богородичен: Помышляю Владычице страшное и скверное деяние мое и плачуся дел моих горько, но молитвами угодника твоего Иоанна, да очистит Сын Твой, Христос Бог наш, душу мою от скверны и похоти блудяыя.

Кондак, глас 6:

От чрева матери дивно прореченный, избранник Божий явился еси, не токмо в житии Богом прославленный, но и по смерти нас не оставивый в дивном явлении руце за род православный ко Христу простирая, молися Владыце всех Царю, помиловати нас, чтущих святую память твою.

Икос:

Дух Святый во пророцех глаголавый и апостоли всю вселенную просветивый, мученником крепость даровавый, и чрез святители веру православную уяснивый, Той же Дух и тя ко Христу приведе, обильно излияся на тя в житии твоем, ревнитель бо апостольских писаний был еси и преподобных отцев, похвало святителей и праведных сослужитель, Ангелов небесных сожителю, душу свою уготовал еси Господеви. Ныне же в небесных чертозех обитаеши, в телесе нетленном на земли почиваеши, не остави и нас грешных, почитающих присно святую память твою, отче праведне наш Иоанне.

Песнь 7.

Ирмос: В пещи авраамстии отроцы персидстей, любовию благочестия паче, нежели пламенем опаляеми взываху: благословен еси в храме славы твоея, Господи.

Припев: Праведне отче Иоанне, моли́ Бо́га о нас.

Едем отверзеся тебе отче Иоанне, еще сый пребывая на земли телесем, но духом в Царствии Божиим обитал еси, пищи сладкия Царския, и нас не остави молитвами твоими.

Припев: Праведне отче Иоанне, моли́ Бо́га о нас.

Солнце праведное возсиял еси, отче, в мире сем, благодать дара прозрения от Господа сподобился еще на земле сый, многих от бед отвращая, отврати и мое сердце от злых дел мира сего.

Сла́ва Отцу́ и Сы́ну и Свято́му Ду́ху:

Наше спасение Господь устрояя, пастыря добраго нам тебе показа, праведне отче Иоанне, да и мы последуем примеру твоему, обрящемся яко пастыри добрии, а не хищницы.

И ны́не и при́сно и во ве́ки веко́в. Ами́нь.

Богородичен: Пресвятая, Слово Святое рождшая, освяти наша души и телеса, блажащих Тя, Всенепорочная.

Песнь 8.

Ирмос: Руце распростер Даниил, львов зияние в рове затче: огненную же силу угасиша, добродетелию препоясавшеся, благочестия рачители отроцы взывающе: благословите вся дела Господня Господа.

Припев: Праведне отче Иоанне, моли́ Бо́га о нас.

Роса благодатная, душу твою ороси, отче блаженне, очисти и наша помышления сердечныя, да тобою наставлями Богу взываем: благословите вся дела Господня Господа.

Припев: Праведне отче Иоанне, моли́ Бо́га о нас.

Аще и забвена быша память твоя, но Господь дивно прослави тя вновь, мы же Божие помышление о людях зряще, созерцая высшую мудрость Его, присно Ему взываем: благословите вся дела Господня Господа.

Сла́ва Отцу́ и Сы́ну и Свято́му Ду́ху:

Возшел еси на высоту небесную и нас на земли не оставил, телесем нетленным с нами почиваеши, мы же зряще дивные дела Божия, во умилении сердцем взываем: благословите вся дела Господня Господа.

И ны́не и при́сно и во ве́ки веко́в. Ами́нь.

Богородичен: Единая имущая дерзновение, Владычице, за весь мир Христу молишися, не помяни бесчисленных наших грехов, покрый люди Твоя омофором, вопиющия Богу умильным гласом: благословите вся дела Господня Господа.

Песнь 9.

Ирмос: Камень нерукосечный, от несекомыя горы Тебе Дево краеугольный отсечеся, Христос, совокупивый разстоящаяся естества. Тем веселящеся Тя, Богородице, величаем.

Припев: Праведне отче Иоанне, моли́ Бо́га о нас.

Доброту видевше в тебе, отче праведный, притекаше к Тебе вдовы и сироты, яко не оставиши их без помощи у тебе просящих, но даруеши им на потребу, да прославят Творца во веки.

Припев: Праведне отче Иоанне, моли́ Бо́га о нас.

Нищету духовную возлюбил, отче Иоанне, паче нежели богатство земное. Неимущим сие подавал еси, подаждь и нам твоими молитвами духом разумом и благочестием, да и мы сподобимся с тобою пребывати, идеже дух твой веселится.

Сла́ва Отцу́ и Сы́ну и Свято́му Ду́ху:

Умильно молим тя отче наш Иоанне не остави нас погибнути в мире сем, не попусти стаду твоему ввергнутися в море страстей, но твоими молитвами и мы обрящемся в раи с Тобою.

И ны́не и при́сно и во ве́ки веко́в. Ами́нь.

Богородичен: Юницу светлейшую и голубицу нескверную воспоим Пречистую Деву Марию, плотию родшую нам Христа Бога нашего, спасение бо Господь содела, Христос в вышних к нижним чрез Нея прейде, не рушил ключи девства Пресвятыя.

Светилен, глас 7:

Просвети, праведне, наша сердечныя очи, возрети на Божественную доброту. Освяти наша души и телеса, да достойно песнь хваления Тебе приносим. Молися, отче наш Иоанне, за чтущия Тя и верою почитающих память Твою, присноблаженне.

Слава, и ныне, Богородичен:

Радуйся, Тебе зовем, Благословенная Богородице Дево, яко Тобою вечныя радости пречастницы быхом, из Тебе бо возсия Христос Бог наш, да сиянием славы Отчия, просветит души наша.

Моли́тва

Опресла́вный уго́дниче Бо́жий, святы́й пра́ведный о́тче на́ш Иоа́нне! Ны́не припа́дая к ра́це с цельбоно́сными моща́ми твои́ми, из глубины́ души́ тебе́ зове́м, о свя́тче Бо́жий, не отри́ни на́с, си́рых и убо́гих, во гресе́х рожде́нных и пло́д досто́йный покая́ния не прине́сших. Тебе́, я́ко име́ющему дерзнове́ние пред Го́сподем, со слеза́ми взыва́ем: исцели́ боле́зни на́ша теле́сныя, укрепи́ ду́ши на́ша малове́рныя. Умоли́ Го́спода дарова́ти на́м ра́дость покая́ния и жития́ на́шего исправле́ние. Испроси́ у Бо́га земли́ на́шей плодоро́дие, дожди́ ми́рны и возду́хи благорастворе́нны. Це́рковь на́шу твои́ми моли́твами незы́блемо огради́ от ересе́й и раско́лов. Оби́тель сию́ и хра́м се́й до сконча́ния ве́ка сохрани́, и по кончи́не жития́ на́шего во оби́тели Отца́ Небе́снаго на́с водвори́, да и мы́ та́мо ку́пно с тобо́ю и все́ми святы́ми просла́вим в Тро́ице Еди́наго Бо́га Отца́, и Сы́на, и Ду́ха Свята́го. Ами́нь.