31 мая.

Канон святому мученику Феодоту Анкирскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченик Твой, Го́споди, Феодо́т,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н му́ченика гла́с 4.

Пе́снь 1.

Ирмос: Пои́м Го́сподеви, пресла́вно погрузи́вшему фарао́на в мо́ри, пе́снь побе́дную, я́ко просла́вися.

Припев: Святы́й му́чениче Феодо́те, моли́ Бо́га о нас.

Пое́м Го́сподеви, челове́ческую не́мощь на неви́димаго врага́ укре́пльшему и побе́дами венча́вшему.

Припев: Святы́й му́чениче Феодо́те, моли́ Бо́га о нас.

Богода́нную, страстоте́рпче, побе́ду прие́мь, не побежде́н супоста́ты яви́лся еси́, Феодо́те сла́вне, те́х побежда́я.

Сла́ва Отцу́ и Сы́ну и Свято́му Ду́ху:

Чистоты́ боже́ственныя добро́тою укра́шени, в суди́лище, я́коже в неве́стник, де́вы внидо́сте, пою́ще Жениха́ Христа́.

И ны́не и при́сно и во ве́ки веко́в. Ами́нь.

Богородичен: Бы́хом, Богоро́дице, Твои́м Рождество́м вси́ о́бщницы боже́ственныя сла́вы, и́же любо́вию сла́вяще Ма́терь Тя́ все́х Бо́га.

Пе́снь 3.

Ирмос: В Го́споде Бо́зе мое́м се́рдце мое́ утверди́ся, те́м немощству́ющии препоя́сашася си́лою.

Припев: Святы́й му́чениче Феодо́те, моли́ Бо́га о нас.

О Го́споде Бо́зе твое́м укре́плься, му́чениче Феодо́те, враги́ супроти́вныя и́стиною уничижи́л еси́.

Припев: Святы́й му́чениче Феодо́те, моли́ Бо́га о нас.

Дебельство́ плотско́е воздержа́нием отло́жше, к высоте́, страстоте́рпцы, страда́ния впери́стеся.

Сла́ва Отцу́ и Сы́ну и Свято́му Ду́ху:

К ласка́нием враго́в слу́ха не прикло́ньше, пострада́сте зако́нно, зако́нов боже́ственных послу́шавше.

И ны́не и при́сно и во ве́ки веко́в. Ами́нь.

Богородичен: На ка́мени, Де́во, Твое́ю наде́ждею утвержде́ни, ника́коже треволне́нием искуше́ний поколеби́мся.

Седа́лен, гла́с 4.

Все́м служи́тель, Ду́хом Боже́ственным пома́зався, бы́л еси́, сла́вне, и, пострада́в тве́рдо, вельми́ просла́вился еси́. Те́мже тя́, соше́дшеся, Феодо́те, почита́ем, ве́рою соверша́юще святу́ю твою́ па́мять, в не́йже моли́твами твои́ми вся́ спаса́й.

Пе́снь 4.

Ирмос: Услы́шах слу́х Твоего́ смотре́ния, я́ко от Де́вы роди́лся еси́, ро́ждшую не опали́в: и просла́вих, Спа́се, снизхожде́ние Твое́.

Припев: Святы́й му́чениче Феодо́те, моли́ Бо́га о нас.

Ты́, кровьми́ страда́льческими, я́коже в мо́ри, гони́теля, му́чениче, погру́жь, в нетле́нне наслажде́нии весели́шися, поя́ Христа́ Венцеда́вца.

Сла́ва Отцу́ и Сы́ну и Свято́му Ду́ху:

Просия́ благохва́льный ли́к страстоте́рпиц, се́дмь му́дрых де́в, многосве́тлы свещи́ вже́гше, в Христо́ве боже́ственнем черто́зе.

И ны́не и при́сно и во ве́ки веко́в. Ами́нь.

Богородичен: Яко вене́ц Тя́ мы́сленный, де́вы страстоте́рпицы иму́ще, о Тебе́, Де́во, хва́лятся, пою́ще Сы́на и Бо́га Твоего́, Жениха́ и Влады́ку.

Пе́снь 5

Ирмос: Возсия́вый Све́т, и просвети́вый у́тро, и показа́вый де́нь, сла́ва Тебе́, сла́ва Тебе́, Иису́се, Сы́не Бо́жий.

Припев: Святы́й му́чениче Феодо́те, моли́ Бо́га о нас.

От ча́ши, му́дре, души́ твоея́, пролива́я вино́ уче́ния, сердца́ возвесели́л еси́ благочести́вых, Феодо́те сла́вне.

Припев: Святы́й му́чениче Феодо́те, моли́ Бо́га о нас.

Воздержа́ния, честны́я, напи́вшеся росы́, цве́ты чистоты́ разу́мно израсти́сте и Христо́во благово́ние яви́стеся.

Сла́ва Отцу́ и Сы́ну и Свято́му Ду́ху:

Плотски́я боле́зни, я́ко наслажде́ние, де́вы Влады́чния ра́ди любве́ вменя́юще, Его́ ра́ди до́бле пострада́ша.

И ны́не и при́сно и во ве́ки веко́в. Ами́нь.

Богородичен: Изба́вльшеся пре́лести и́дольскаго беше́ния Рождество́м Твои́м боже́ственным, Тя́ пое́м, Чи́стая, благи́х вину́ и Хода́таицу.

Пе́снь 6.

Ирмос: Якоже проро́ка Ио́ну от ки́та изба́вил еси́, Христе́ Бо́же, и мене́ из глубины́ прегреше́ний возведи́ и спаси́ мя, еди́не Человеколю́бче.

Припев: Святы́й му́чениче Феодо́те, моли́ Бо́га о нас.

Якоже приста́нище тя́ боже́ственно ве́рнии, Феодо́те, обре́тше, злочести́вых треволне́ния уклони́шася, пою́ще ко́рмчию Христа́.

Припев: Святы́й му́чениче Феодо́те, моли́ Бо́га о нас.

Любле́нием Зижди́теля, есте́ственную укрепи́ша не́мощь, па́че есте́ственныя страстоте́рпицы по́двиги, и о се́м до́бре претерпе́ша.

Сла́ва Отцу́ и Сы́ну и Свято́му Ду́ху:

Седмосве́тлаго свети́льника равночи́сленны свещи́ вже́гше, я́коже в черто́зе, де́вы, внидо́сте в по́двиг страда́ния.

И ны́не и при́сно и во ве́ки веко́в. Ами́нь.

Богородичен: Земля́ от кля́твы изба́вися дре́вния, Де́во, Рождество́м Твои́м со живу́щими на не́й. Вину́ благослове́ния, всегда́ сла́вим Тя́.

Конда́к, гла́с 2.

Страда́льчески подвиза́вся до́бре, со сострада́льцы твои́ми, Феодо́те, и венцы́ по́чести прия́сте с честны́ми страстоте́рпицами де́вами. Те́мже Христа́ Бо́га моли́те непреста́нно о все́х на́с.

Пе́снь 7.

Ирмос: Глаго́лавый на горе́ с Моисе́ом и о́браз де́вства явле́й в купине́, благослове́н еси́, Бо́же оте́ц на́ших.

Припев: Святы́й му́чениче Феодо́те, моли́ Бо́га о нас.

Кова́рствия враго́в, страстоте́рпче, му́дростию духо́вною изоблича́я, от си́х пре́лести спа́сл еси́ пострада́вшия с тобо́ю му́ченики.

Припев: Святы́й му́чениче Феодо́те, моли́ Бо́га о нас.

Нетле́нных бла́г любо́вию, де́вы, окрили́вше помышле́ния, по́двиги взыдо́сте к си́м, воспева́юще Христа́.

Сла́ва Отцу́ и Сы́ну и Свято́му Ду́ху:

Зло́бы обрета́теля, страстоте́рпицы, ника́коже ле́стию прекло́ньшеся, це́лу Зижди́теля, сла́вныя, за́поведь соблюдо́сте.

И ны́не и при́сно и во ве́ки веко́в. Ами́нь.

Богородичен: Ви́дети сла́ву из Тебе́ Рожде́ннаго и сея́ наслади́тися с му́ченики, Тя́, Пречи́стая, пою́щия, Сего́ при́сно умоли́.

Пе́снь 8.

Ирмос: Царя́ Христа́, Его́же испове́даша плене́ннии о́троцы, в пещи́ глаго́люще ве́лиим гла́сом: вся́ дела́, по́йте Го́спода.

Припев: Святы́й му́чениче Феодо́те, моли́ Бо́га о нас.

Благоде́теля Христа́ име́я, Феодо́те, в боле́знех страда́ния, соблюда́юща и укрепля́юща при́сно тя́ во все́м, пачеесте́ственныя по́двиги подъя́л еси́, поя́ Самого́ Бо́га и Царя́.

Припев: Святы́й му́чениче Феодо́те, моли́ Бо́га о нас.

Благоволе́нием Христа́ до́брыя де́вы, ду́ши услади́вше, во сле́д Сего́ теча́ху, пострада́вше до́блественно, и в ра́дости вопия́ху: Тя́ превозноша́ем, Христе́, во ве́ки.

Сла́ва Отцу́ и Сы́ну и Свято́му Ду́ху:

Соде́телю вся́ческих, Ты́ не́мощь укрепи́л еси́, Сло́ве, же́нскаго естества́ во страда́ниих, я́ко Бо́г, те́мже, до́бре страда́вше, поя́ху святы́я Тя́, Бо́га и Царя́.

И ны́не и при́сно и во ве́ки веко́в. Ами́нь.

Богородичен: Новоде́тель челове́ча естества́, Чи́стая, из Тебе́ бо челове́ческое поне́сл, я́ко Человеколю́бец Бо́г и Творе́ц, естество́ созда́ на́ше, испове́дающих Тя́, вои́стинну Богоро́дицу.

Песнь 9

Ирмос: Безсе́менное Рождество́ Твое́, Богоро́дице Чи́стая, Христа́ Бо́га на́шего пе́сньми немо́лчными велича́ем.

Припев: Святы́й му́чениче Феодо́те, моли́ Бо́га о нас.

Преле́стныя полки́ победи́, сла́вне, си́лою духо́вною и прия́т вене́ц побе́ды, Феодо́те.

Припев: Святы́й му́чениче Феодо́те, моли́ Бо́га о нас.

Яко ма́сти, чудеса́ дыха́я, все́х благоуха́еши, Феодо́те, ве́рою и любо́вию тя́ сла́вящия.

Припев: Святы́й му́чениче Феодо́те, моли́ Бо́га о нас.

Заре́ю сия́юще чистоты́, красны́ показа́стеся добро́тою во страда́нии, доброде́вы.

Сла́ва Отцу́ и Сы́ну и Свято́му Ду́ху:

Мольбу́ седмосве́тлую, честны́я, вже́гше, на́с наста́вите к незаходи́мому све́ту Христа́ Бо́га.

И ны́не и при́сно и во ве́ки веко́в. Ами́нь.

Богородичен: Па́че вся́кия любве́ Твое́ жела́ние, Пречи́стая, су́щи, привлачи́т мя́ вопи́ти Тебе́ непреста́нно: ра́дуйся, Влады́чице.

Молитва

О святы́й уго́дниче Бо́жий, му́чениче Феодо́те! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.