30 мая

Канон праведному Ионе пресвитеру Одесскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

Православия ревнителю, раскола и ереси искоренителю, / Одесский целебниче и к Богу теплый молитвенниче, / житием и чудесы твоими уподобился еси Кронштадтскому чудотворцу, / Ионо праведный, моли Христа Бога спастися душам нашим.

Канон святаго, глас 6.

Песнь 1

Ирмос: Колесницы фараоновы и силу его вверже в море Крепкий во бранех, воспоем песнь новую, яко прославися.

Припев: Праведне отче Ионо, моли́ Бо́га о нас.

Пеcнь победную воспевающе, приидите, составим лицы, и радостию восхвалим Иону праведнаго, преславнаго чудотворца и молитвенника о душах наших.

Припев: Праведне отче Ионо, моли́ Бо́га о нас.

Всесвященный сосуд благодати Божия днесь радостию вси воспоим, во умилении сердец наших взывающе: радуйся, Ионо блаженне, молитвенниче о душах наших.

Сла́ва Отцу́ и Сы́ну и Свято́му Ду́ху:

Троицы Божественныя всечудное жилище, града Одессы сокровище многоценное, радуйся, Ионо праведный, исцелений источниче и молитвенниче о душах наших.

И ны́не и при́сно и во ве́ки веко́в. Ами́нь.

Богородичен: Поим Господеви, воплощение от Девы приявшему, и от работы всегорькия избавившему род человеческий, славно бо прославися.

Песнь 3

Ирмос: Лук сильных изнеможе, и немощствующии препоясашася силою: сего ради утвердися в Господе сердце мое.

Припев: Праведне отче Ионо, моли́ Бо́га о нас.

От юности сердце твое во Господе утвердил еси, отче Ионо праведне, сего ради вопием ти: в любви Господней утверди чада твоя.

Припев: Праведне отче Ионо, моли́ Бо́га о нас.

Господь сохраняше тя во всех путех твоих, егда родители твоя в селения вечная отыдоша, темже и ныне молитвою теплою утверди чада твоя.

Сла́ва Отцу́ и Сы́ну и Свято́му Ду́ху:

Горечь сиротства и скорби тяжкия от юности вкусивый, отче наш Ионо праведне, не остави ныне сиры нас, чада твоя.

И ны́не и при́сно и во ве́ки веко́в. Ами́нь.

Богородичен: Утверждение сердец наших, Заступнице Милостивая, Богородице Дево, матернею Твоею любовию от всякаго зла огради чада твоя.

Седален, глас 4:

Пастырю наш добрый, Ионо праведне, покаяния учителю и образе целомудрия, исповедниче преславный и чудотворче предивный, моли спастися всем верою тя воспевающим.

Слава, и ныне, Богородичен, глас тойже:

Мати наша Преблагословенная человеком утешение, смиренномудрия образе, Тя бо имамы, грешнии, Заступницу милостивую и о Тебе славим Спасителя нашего Господа.

Песнь 4

Ирмос: Услышах слух Твой, Господи, яко явился еси на земли, и прославих Твою силу.

Припев: Праведне отче Ионо, моли́ Бо́га о нас.

Божественная благодать, немощи человеческия врачующая, избра тя на подвиг священнолепный, и крест многотрудный служения пастырскаго на рамена твоя Христос Бог возложи, сего ради людие православнии взывают: радуйся, пастырю наш добрый, Ионо праведный.

Припев: Праведне отче Ионо, моли́ Бо́га о нас.

Архиерея Великаго, Спаса душ наших, раб добрый и верный был еси, не о земных ревнуя, но о небесном рачение присно имевый, темже вси ти днесь взываем: радуйся, пастырю наш добрый, Ионо праведный.

Сла́ва Отцу́ и Сы́ну и Свято́му Ду́ху:

От волка душехищнаго, человекоубийцы древняго, молитвами твоими сохранил еси стадо твое, богомудре, и жезлом проповеданий твоих упасл еси взывающих: радуйся, пастырю наш добрый, Ионо праведный.

И ны́не и при́сно и во ве́ки веко́в. Ами́нь.

Богородичен: Господи, услышаша слух схождения Твоего вселенная, и убояшася: како Бог непреложный человек явитися хощеши и от Девы воплощение прияти, Ейже вси взываем: радуйся, Обрадованная, Господь с Тобою.

Пе́снь 5

Ирмос: Возсиявый свет и просветивый утро, и показавый день, слава Тебе, слава Тебе, Иисусе, Сыне Божий.

Припев: Праведне отче Ионо, моли́ Бо́га о нас.

Свет повелений Господних облиста сердце твое, Ионо, отче наш, и словеса Божия чиста утробу твою разжегоша, сего ради явился еси проповедник неленостный и ко спасению чадом твоим путевождю всехвальный.

Припев: Праведне отче Ионо, моли́ Бо́га о нас.

Тьма зловерия и мрак безбожия отгна1ни быша светом проповеди твоея, отче наш Ионо, и благочестие христианское в сердцах многих насадишася, пастырю добрый и наставниче наш всехвальный.

Сла́ва Отцу́ и Сы́ну и Свято́му Ду́ху:

Правде Божией научал еси земнородных, Истины Воплощенныя неленостный служителю, словесы и деяньми своими образ явился еси людем христоименитым, сего ради величаем тя, Ионо милостиве, пастырю наш всехвальный.

И ны́не и при́сно и во ве́ки веко́в. Ами́нь.

Богородичен: От нощи утренююще вопием Ти, Владычице, богопознания светом души наша просвети и мир благословенный подаждь людем Твоим, Всепетая.

Песнь 6

Ирмос: Внегда скорбети ми, возопих ко Господу, и услыша мя Бог спасения моего.

Припев: Праведне отче Ионо, моли́ Бо́га о нас.

Благодатию Божиею укрепляемь, недугов целебник преславный и врач всескорый явился еси, темже молим тя, Ионо праведне, души наша, язвою греховною пораженныя, исцели, чудотворче дивный и всеславный.

Припев: Праведне отче Ионо, моли́ Бо́га о нас.

Исцелений источниче неоскудевающий и чудес реко приснотекущая, власть приемый от Господа недуги врачевати, сего ради взываем ти: радуйся, чудотворче дивный и всеславный.

Сла́ва Отцу́ и Сы́ну и Свято́му Ду́ху:

Росою молитвы твоея огнь недугов угашается и пламенным дерзновением твоим дуси темныя низлагаются и имене твоего трепещут, чудотворче дивный и всеславный.

И ны́не и при́сно и во ве́ки веко́в. Ами́нь.

Богородичен: Вопием в скорбех наших, молитвы Ти приносяще, Дево Чистая, от зверя душетленнаго и чрева адова люди Твоя свободи и ко спасению окорми, Владычице Милостивая и Всепетая.

Кондак, глас 8:

Многоразличныя подвиги жития твоего кто исповесть? / Многообразныя милости Божия тобою явленныя кто исчислит? / Дерзновение же твое у Всещедраго Бога и Пречистыя Богородицы добре ведуще, / во умилении сердечнем зовем ти: / не лиши и нас твоея помощи и заступления, // пастырю Христов и чудотворче Ионо.

Икос:

Многоплодное древо благодати Утешителя, верою Авраамлею Триипостасному Божеству угодити сподобился еси, и Моисею равно люди заповедям Господним научал еси, ревностию пламенною и чудесы преславными Илии небошествователю уподобился еси, Ионе древнему в проповедании покаяния совозвестник явился еси, яко Давид песнословец сладкозвучный показался еси, новый апостол любве и милосердия ныне восхваляешися, за велие сострадание и правоверия крепкое исповедание со славным Ликийских Мир святителем прославляешися, яко Саровский старец священнотаинник и прозорливец стезей Божиих ублажаешися, пастырю Христов и чудотворче Ионо.

Песнь 7

Ирмос: Спасый во огни авраамския Твоя отроки, и халдеи убив, яже правда праведнаго уловляше: препетый Господи, Боже отец наших благословен еси.

Припев: Праведне отче Ионо, моли́ Бо́га о нас.

Пещь огненную гонений новых на Церковь Христову мира сего князь разже, и полчища адския брань на верныя воздвигнути тщашася, ты же, отче Ионо, посреде искушений столп непоколебимый явился еси веры православныя.

Припев: Праведне отче Ионо, моли́ Бо́га о нас.

Не возмогоша, тя отче, любве Божия разлучити немощныя дерзости слуг адовых, адамант бо явился еси твердый и доблий исповедник веры православныя.

Сла́ва Отцу́ и Сы́ну и Свято́му Ду́ху:

Пагубныя плевелие обновленческия серпом обличения твоего исторгл еси от нивы Божией, и людем христоименитым явился еси правоверия образ и исповедник веры православныя.

И ны́не и при́сно и во ве́ки веко́в. Ами́нь.

Богородичен: Благословенная в родех родов, Дево Пречистая, Богородице, Покровом благости Твоея сохрани удел Твой земной - Русь Святую и до скончания века утверди в вере православней.

Песнь 8

Ирмос: Во образе ангела явльшагося в пещи огненней песнословцем, Христа Бога пойте, отроцы, священницы, благословите, людие, превозносите во вся веки.

Припев: Праведне отче Ионо, моли́ Бо́га о нас.

Всемилостиваго Спаса добрый учениче, огнем любве к ближним разжегл еси сердце твое и явился еси милости источник неоскудеваемый и отец чадолюбивый всем требующим твоея помощи.

Припев: Праведне отче Ионо, моли́ Бо́га о нас.

Гладных питатель, скорбных утешитель, нагих одеяние и сирых заступник явился еси, отче премилостивый, Ионо праведный, и помощник скорый всем требующим твоея помощи.

Сла́ва Отцу́ и Сы́ну и Свято́му Ду́ху:

Вся бе всем, отче Ионо праведный, сего ради люди православнии, яко пастыря своего добраго прославляют и песнословят тя, молитвенника усерднаго о всех требующих твоея помощи.

И ны́не и при́сно и во ве́ки веко́в. Ами́нь.

Богородичен: Благословите вся дела Господня Господа и радостно воспойте Пречистую Матерь Его, Сия бо есть скорая Помощница и присная Заступница всем требующим Ея помощи.

Песнь 9

Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый растоящаяся естества. Тем веселящеся, Тя, Богородице, величаем.

Припев: Праведне отче Ионо, моли́ Бо́га о нас.

Днесь град твой, отче приснопамятне Ионо, песни восписует ти похвальная и молитвою твоею от бед и скорбей сохраняется.

Припев: Праведне отче Ионо, моли́ Бо́га о нас.

Днесь Русь Святая, отче достохвальне Ионо, величие твое проповедует и ходатайством твоим в православной вере утверждается.

Сла́ва Отцу́ и Сы́ну и Свято́му Ду́ху:

Днесь вселенная вся, отче многочудне Ионо, велелепно величает тя и предстательством твоим в мире и благочестии утверждается.

И ны́не и при́сно и во ве́ки веко́в. Ами́нь.

Богородичен: Днесь людие православнии к Престолу Твоему, о Всепетая, прибегают и вся концы вселенныя Тя присно ублажают, яко Матерь Божию и христиан всех Покров и утверждение.

Светилен:

Светом Трисолнечным озаренный Божества Триипостаснаго, отче наш Ионо праведный, молитвою твоею души наша просвети и на путь доброделания стопы наша направи.

Слава, и ныне, Богородичен:

Теплое заступление в бедах и Помощницу нашу, и к Богу примирение, Ею же от тли избавихомся, Богородицу, вернии, ублажаем.

Молитва

О предивный и преславный отче наш Ионо, пастырю истинный и чудотворче всечудный! К тебе, яко к великому молитвеннику вси прибегаем и усердно просим: не остави нас смиренных и грешных, яви нам твое отеческое заступление, испроси нам у Господа, Его же верный служитель был еси, да дарует нам веры Православныя твердое и неизменное сохранение, Церкви и святителям нашим послушание, жития исправление, в нуждах, скорбех и немощех утешение, да низпошлет граду и отечеству нашему мир и благоустроение, земли плодоносие, воздухов благорастворение, вся благопотребная ко спасению преподавая, да, во благочестии и заповедех его возрастающе, купно с тобою и всеми святыми сподобимся воспевати Бога в Троице славимаго, Отца и Сына и Святаго Духа во веки веков. Аминь.