Шрифт

30 мая.

Канон святому апостолу Андронику и иже с ним

Святого апостола Андроника и иже с ним
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святы́й апо́столе Андрони́че, моли́ Бо́га о нас.

Хвалу́ Бо́гу прино́сит в пресвяте́й, блаже́нне, па́мяти твое́й честна́я Це́рковь, по́двиги твоя́ ве́рою сла́вящи.

Припев: Святы́й апо́столе Андрони́че, моли́ Бо́га о нас.

Напра́вил еси́ ума́ твоего́ вся́ движе́ния, свяще́нне, к Бо́жиим хоте́нием исполне́нию, ра́дуяся, Андрони́че.

Сла́ва Отцу́ и Сы́ну и Свято́му Ду́ху:

Неду́ги очища́ти, ду́хи отгоня́ти лука́выя, от Бо́га Боже́ственную благода́ть прия́л еси́, богому́дре Андрони́че.

И ны́не и при́сно и во ве́ки веко́в. Ами́нь.

Богородичен: Одожди́ ми́, Де́во, все́х согреше́ний избавле́ние и исправле́ние жития́ Твои́м хода́тайством и благода́тию.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Припев: Святы́й апо́столе Андрони́че, моли́ Бо́га о нас.

Умертви́в у́ды твоя́ по́двиги, жи́знь сподо́бился еси́ живу́щих зре́ти на земли́ пло́ть нося́ща Христа́ Бо́га на́шего, Андрони́че апо́столе.

Припев: Святы́й апо́столе Андрони́че, моли́ Бо́га о нас.

Огнедохнове́нен бы́л еси́, Боже́ственнаго Ду́ха чи́стою мы́слию твое́ю теплоту́, апо́столе, обнося́ и попаля́я пре́лести те́рние, Андрони́че всехва́льне.

Сла́ва Отцу́ и Сы́ну и Свято́му Ду́ху:

Глаго́л твои́х веща́ние и си́ла чуде́с обтече́ ми́ра концы́, учениче́ Госпо́день, Боже́ственныя Ду́ха благода́ти ве́рныя науча́ющи.

И ны́не и при́сно и во ве́ки веко́в. Ами́нь.

Богородичен: Не́сть пречи́сты, па́че Тебе́, Влады́чице, и не́сть непоро́чны, ра́зве Тебе́, Всенепоро́чная, Бо́га бо все́х вмести́лище простра́нное еди́на была́ еси́.

Седа́лен, гла́с 4.

Боже́ственный Андрони́к, светови́ден бы́в, сердца́ просвети́ богоразу́мия све́том ко Го́споду приходи́ти. Те́мже и по кончи́не источа́ет исцеле́ния ве́рою приступа́ющим честно́му его́ хра́му и все́м испроша́ет ве́рным ве́лию ми́лость.

Сла́ва, и ны́не, Богородичен:

Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Святы́й апо́столе Андрони́че, моли́ Бо́га о нас.

Тя́, я́ко сро́дника, целу́ет Па́вел, пред ве́рными боже́ственныя твоя́ похвалы́ пропове́дая, Андрони́че богоглаго́ливе, световоди́телю восхваляю́щим тя́.

Припев: Святы́й апо́столе Андрони́че, моли́ Бо́га о нас.

До́м бы́в Тро́ицы Пресвяты́я, хра́мы и тре́бища разори́л еси́ бла́зненныя и созда́л еси́, прехва́льне, це́ркви во спасе́ние ду́ш на́ших.

Сла́ва Отцу́ и Сы́ну и Свято́му Ду́ху:

Возмо́гл еси́, Бо́жиею мо́щию укрепи́вся, си́льнаго восхи́тити сосу́ды, блаже́нне, и соверши́ти Ду́ха Свята́го жили́ще, Андрони́че.

И ны́не и при́сно и во ве́ки веко́в. Ами́нь.

Богородичен: Тя́ всегда́, Де́во Богоро́дице, вси́ ве́рнии, согла́сно воспева́ем, я́ко тве́рдое и побо́рное предста́тельство и спасе́ние ду́ш на́ших.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Святы́й апо́столе Андрони́че, моли́ Бо́га о нас.

Яко сро́дника тя́ Па́влу и пре́жде его́ ученика́ бы́вша, с ни́мже тя́ почита́ем, ве́рою соше́дшеся, Андрони́че.

Припев: Святы́й апо́столе Андрони́че, моли́ Бо́га о нас.

Светоза́рныя зве́зды, свяще́нныя апо́столы почти́м, Иуни́ю боже́ственную и богоно́снаго Андрони́ка.

Сла́ва Отцу́ и Сы́ну и Свято́му Ду́ху:

Яко наро́читы су́ще во апо́столех, ва́с блаже́нный Па́вел пропове́дает в Це́ркви, блаже́ннии.

И ны́не и при́сно и во ве́ки веко́в. Ами́нь.

Богородичен: Тя́, Пресвята́я Отрокови́це, проро́ческий ли́к проначерта́ свяще́нными о́бразы бы́ти Госпо́дню Роди́тельницу.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святы́й апо́столе Андрони́че, моли́ Бо́га о нас.

До́м тво́й исцеле́ний исто́чники любо́вию притека́ющим источа́ет, апо́столе, омыва́я душе́вныя не́мощи.

Припев: Святы́й апо́столе Андрони́че, моли́ Бо́га о нас.

Истле́вшее безбо́жием мно́жество язы́к обнови́л еси́ но́выми твои́ми уче́нии, нетле́ннаго Иису́са дру́же и́скренний.

Сла́ва Отцу́ и Сы́ну и Свято́му Ду́ху:

Яко со́лнце, обте́кл еси́ зе́млю, Андрони́че прему́дре, трисо́лнечный и несозда́нный возвеща́я ве́рным све́т Божества́.

И ны́не и при́сно и во ве́ки веко́в. Ами́нь.

Богородичен: Боже́ственная ше́ствия на Тебе́ Влады́ки позна́шася, пло́тию обнища́вшаго и обогати́вша ве́рныя, Неискусобра́чная.

Конда́к, гла́с 2.

Звезду́ пресве́тлую, богоразу́мия све́том просве́щшаго язы́ки апо́стола Христо́ва Андрони́ка восхва́лим и с ни́м во благове́стии потруди́вшуюся Иуни́ю прему́друю, вопию́ще: моли́те Христа́ Бо́га непреста́нно о все́х на́с.

Пе́снь 7.

Ирмос: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Припев: Святы́й апо́столе Андрони́че, моли́ Бо́га о нас.

Неду́ги лю́тыя и вся́ку боле́знь от ду́ш вку́пе же и теле́с отго́ниши притека́ющих в до́м тво́й, му́дре учениче́ Христо́в.

Припев: Святы́й апо́столе Андрони́че, моли́ Бо́га о нас.

Де́монская наи́тия отгоня́еши и стра́сти лю́тыя очища́еши челове́ком, спострада́льчеством Христо́в самови́дче, сего́ ра́ди тя́ ве́рно ублажа́ем.

Сла́ва Отцу́ и Сы́ну и Свято́му Ду́ху:

Ри́торское, му́дре, глумле́ние низложи́в простото́ю уче́ний, Бо́га пропове́дуеши в виде́нии пло́тсте пожи́вша со земны́ми бла́гости ра́ди.

И ны́не и при́сно и во ве́ки веко́в. Ами́нь.

Богородичен: Во утро́бу Де́вы всели́выйся и в не́й Ада́ма назда́вый, благослове́н еси́, Го́споди, Бо́же оте́ц на́ших.

Пе́снь 8.

Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Святы́й апо́столе Андрони́че, моли́ Бо́га о нас.

Объюроде́вшая злы́м гно́ем челове́ческая, Андрони́че, сердца́ со́лию боже́ственною стягну́в, уче́нии твои́ми, излия́вшемуся Сло́ву спаса́емы предста́вил еси́, треблаже́нне.

Припев: Святы́й апо́столе Андрони́че, моли́ Бо́га о нас.

Свяще́нник же, и жре́ц, и же́ртва Поже́ршемуся за милосе́рдие позна́лся еси́ и к Нему́ восте́кл еси́, Андрони́че, вене́ц нетле́ния и пра́вды от Него́ прие́м.

Сла́ва Отцу́ и Сы́ну и Свято́му Ду́ху:

Пропове́дник боже́ственный и апо́стол богови́дец, разори́тель истука́нных ги́бельных и богати́тель ни́щих яви́лся еси́, сла́вне, и Сио́на вы́шняго вели́кий жи́тель, Андрони́че богому́дре.

И ны́не и при́сно и во ве́ки веко́в. Ами́нь.

Богородичен: Яко клеща́ми, рука́ми у́гль но́сиши, ро́су боже́ственную источа́ющаго, Де́во, пла́менем ле́сти бе́дствующим, попаля́юща же стра́сти песносло́вящих Того́ ца́рствие.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Святы́й апо́столе Андрони́че, моли́ Бо́га о нас.

Да о́ныя жи́зни яви́шися насле́дник, умерщвле́нныя пре́жде де́монскими прило́ги оживи́л еси́ живоно́сным твои́м сло́вом, достоблаже́нне Андрони́че.

Припев: Святы́й апо́столе Андрони́че, моли́ Бо́га о нас.

Яко и́стиннаго бы́в виногра́да, преблаже́нне, лоза́ благора́сленна, вино́ безсме́ртия иска́пал еси́ и челове́ков сердца́ возвесели́л еси́, прехва́льне Андрони́че.

Припев: Святы́й апо́столе Андрони́че, моли́ Бо́га о нас.

Ты́, я́ко мо́лния, попали́в ве́щь многобо́жия, я́ве показа́л еси́ све́т богоразу́мия су́щим во тме́ жития́, те́м тя́ прославля́ем вси́, Андрони́че.

Сла́ва Отцу́ и Сы́ну и Свято́му Ду́ху:

Свяще́нная твоя́ па́мять, простира́ема в концы́, дне́сь просвеща́ет сердца́ в не́й тя́ свяще́нно восхваля́ющих, достоблаже́нне Андрони́че.

И ны́не и при́сно и во ве́ки веко́в. Ами́нь.

Богородичен: Просвеще́ние на́м испроси́, Яже Све́т ро́ждшая, и согреше́ний оставле́ние и душа́м спасе́ние, ве́дущим Тя́, и́стинную Богоро́дицу, Чи́стая Де́во Всенепоро́чная.

Молитва

Святы́й сла́вный и всехва́льный апо́столе Христо́в Андрони́че, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святого апостола Андроника и иже с ним