28 мая.

Канон Святого благоверного царевича князя Димитрия, Московскаго и всея России новаго чудотворца.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Ца́рскую диади́му обагри́л еси́ кро́вию твое́ю, богому́дре му́чениче, за ски́птр — кре́ст в руку́ прии́м, яви́лся еси́ победоно́сец и же́ртву непоро́чную Влады́це прине́сл еси́ себе́: я́ко бо а́гнец незло́бив, от раба́ заколе́н еси́. И ны́не, ра́дуяся, предстои́ши Святе́й Тро́ице, моли́ся о держа́ве сро́дников твои́х богоуго́дней бы́ти и сыново́м росси́йским спасти́ся.

Други́й кано́н, Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святы́й му́чениче княже Дими́трие, моли́ Бо́га о нас.

Христе́ мо́й Преблаги́й, отжени́ тму́ от мра́чнаго ума́ моего́, и просвети́ отягче́нную мою́ ду́шу мно́гими грехи́, и напра́ви мы́сль мою́, да досто́йно воспою́ но́ваго сего́ страда́льца, царе́вича Дими́трия.

Припев: Святы́й му́чениче княже Дими́трие, моли́ Бо́га о нас.

В му́ченических ли́цех предстоя́ и неизрече́нный све́т зря́, страда́льче Дими́трие, просвети́ моя́ недоуме́нная помышле́ния, я́ко да воспою́ тя́, я́коже подоба́ет ми́ рещи́.

Сла́ва Отцу́ и Сы́ну и Свято́му Ду́ху:

Аще ра́б тво́й и уби́йца земна́го тя́ ца́рства и лиши́, ты́ же вме́сто того́, страда́льче Дими́трие, небе́сное восприя́л еси́ и, та́мо наслажда́яся боже́ственных красо́т и весе́лия, моли́ Христа́ Бо́га дарова́ти на́м ве́лию ми́лость.

И ны́не и при́сно и во ве́ки веко́в. Ами́нь.

Богородичен: Ле́ствица еси́ вои́стинну высо́кая Ты́, Влады́чице, ю́же Иа́ков ви́дев, я́ко Ангели Бо́жии восхожда́ху и низхожда́ху по не́й, Госпо́дь же утвержда́шеся на Тебе́; очи́сти ти́ну грехо́в мои́х и спаси́ мя, недосто́йнаго раба́ Твоего́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святы́й му́чениче княже Дими́трие, моли́ Бо́га о нас.

Юношескаго соверше́ннаго цве́та не доспе́в, пожа́лся еси́, непови́нный страда́льче Дими́трие, и ну́ждную сме́рть претерпе́л еси́, того́ ра́ди ны́не лику́еши с ли́ки му́ченическими, предстоя́ у Царя́ и Бо́га все́х.

Припев: Святы́й му́чениче княже Дими́трие, моли́ Бо́га о нас.

Сме́рть твоя́ уби́ раба́ твоего́ и уби́йцу, благоро́дне, нарица́вшихся же во твое́ благоро́дное и́мя, та́кожде до конца́ все́х погуби́, ты́ же сме́ртию твое́ю ве́чный живо́т приобре́л еси́.

Сла́ва Отцу́ и Сы́ну и Свято́му Ду́ху:

Лю́тое колеба́ние бы́сть в Росси́йстей земли́ по сме́рти твое́й, благове́рный Дими́трие, от о́нех злы́х и наве́тных челове́к, лжу́щихся и́менем твои́м; Бо́г же моли́тв ра́ди твои́х до конца́ все́х погуби́ и лю́тое колеба́ние от ни́х укроти́.

И ны́не и при́сно и во ве́ки веко́в. Ами́нь.

Богородичен: Аще Бо́г Тя́ избра́ Себе́ небе́сное селе́ние, Де́во Ма́ти Чи́стая, и кто́ не подиви́тся пресла́вному Рождеству́ Твоему́, и́мже все́х искупи́ от кля́твы зако́нныя? Те́м и а́з молю́ Ти ся: свободи́ и мене́, недосто́йнаго раба́ Твоего́, от кля́твы грехо́вныя.

Седа́лен, гла́с 4.

Наста́, празднолю́бцы, све́тлое торжество́, па́мять сла́вная страстоно́сца Христо́ва, веселя́щи вся́ческая, сия́ющи в ми́ре заря́ми чуде́с. Те́мже непреста́нную благода́ть твои́ми моли́твами у Христа́ испроси́, му́чениче Дими́трие, душа́м на́шим и ве́лию ми́лость.

Сла́ва: Яко от младе́нства лише́н еси́ земна́го ца́рства, благоро́дне Дими́трие, и в того́ ме́сто в небе́сное пресели́вся, та́мо сподо́бился еси́ небе́сная блага́я ви́дети, и ны́не я́сно зри́ши Святу́ю Тро́ицу и мо́лишися о держа́ве твои́х сро́дников и за вся́ ве́рныя лю́ди, во е́же бы и́м получи́ти вся́ блага́я и поле́зная.

И ны́не, Богородичен: Де́во Всенепоро́чная, Яже пресу́щнаго Бо́га ро́ждшая, с му́чеником Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святы́й му́чениче княже Дими́трие, моли́ Бо́га о нас.

Вме́сто земны́я высоты́, небе́сную дости́гл еси́, благоро́дне Дими́трие, и ны́не с пра́ведными ли́ки водворя́ешися, и пое́ши, и сла́виши Бо́га, Ему́же пое́м: си́ле Твое́й сла́ва, Человеколю́бче.

Припев: Святы́й му́чениче княже Дими́трие, моли́ Бо́га о нас.

Удиви́ Бо́г все́х Свои́х чудотворе́нием, я́ко посла́ на раба́ твоего́ уби́йцу не́коего врага́ и отме́тника пра́выя на́шея ве́ры, наре́кшагося тезоиме́нством твои́м, да све́ржет уби́йцу твоего́ с престо́ла ца́рска, е́же и бы́сть.

Сла́ва Отцу́ и Сы́ну и Свято́му Ду́ху:

Ца́рь царе́й и Госпо́дь господе́й дарова́ тебе́ вме́сто земна́го ца́рства — небе́сное, рабу́ же твоему́ и уби́йце даде́ зде́ зло́е отмще́ние, во о́ном же ве́це по лука́вству сугу́бая муче́ния, я́коже Са́м, вся́ ве́дый, ве́сть.

И ны́не и при́сно и во ве́ки веко́в. Ами́нь.

Богородичен: Ада́мова дщи́ и вну́ка Ты́ была́ еси́, Влады́чице, от него́же ве́сь ро́д челове́чь произы́де, Ты́ же все́х Живо́т породила́ еси́ — Христа́ Бо́га на́шего, Его́же моли́, да спасе́т ду́ши на́ша, я́ко Бла́г и Человеколю́бец.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святы́й му́чениче княже Дими́трие, моли́ Бо́га о нас.

Рожде́ние твое́ от ца́рскаго ко́рене бы́сть, убие́ние же твое́ от ра́бскаго зва́ния случи́ся, ты́ же, страда́льче Дими́трие, си́м не повреди́лся еси́, но и па́че от земна́го ца́рствия в небе́сное пресели́лся еси́.

Припев: Святы́й му́чениче княже Дими́трие, моли́ Бо́га о нас.

Ей, вои́стинну рече́ся, я́ко пра́ведник и по сме́рти жи́в бу́дет, та́кожде и ты́, непови́нный страда́льче Дими́трие, и по сме́рти твое́й жи́в и ца́рствуеши со все́ми святы́ми во Ца́рствии небе́снем.

Сла́ва Отцу́ и Сы́ну и Свято́му Ду́ху:

Ве́лия ра́дость сотвори́ся по все́й Росси́йстей земли́, я́ко Бо́г моли́твами твои́ми погуби́ вся́ враги́ и наве́тники челове́ки, смуща́ющия держа́ву сро́дник твои́х, о ни́хже ны́не мо́лишися дарова́ти и́м ве́лию ми́лость.

И ны́не и при́сно и во ве́ки веко́в. Ами́нь.

Богородичен: Из Тебе́ Бо́г произы́де и спасе́ние дарова́ всему́ ро́ду челове́чу. Те́мже и а́з, недосто́йный ра́б Тво́й, молю́ Ти ся, Пречи́стая: спасе́ние ми́ да́руй, я́ко да пою́ Тя и велича́ю, Де́во Всепе́тая.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю, и спаси́.

Припев: Святы́й му́чениче княже Дими́трие, моли́ Бо́га о нас.

Чу́дно па́ки и ди́вно ви́дети, я́ко ра́б тво́й и уби́йца, седя́ на престо́ле оте́чествия твоего́ и слы́ша издале́ча благоро́дное твое́ и́мя, боя́знию обдержа́ся и сме́ртию сконча́ся, ты́ же при́сно живе́ши в Ца́рствии небе́снем.

Припев: Святы́й му́чениче княже Дими́трие, моли́ Бо́га о нас.

Аще и во еди́ном часе́, лю́тую сию́ сме́рть претерпе́л еси́, страда́льче Дими́трие, но со многострада́вшими му́ченики ве́чный живо́т приобре́л еси́, и ны́не с ни́ми наслажда́ешися ра́йския красоты́ и весе́лия.

Сла́ва Отцу́ и Сы́ну и Свято́му Ду́ху:

Ди́вство ве́лие показа́ Бо́г тобо́ю, ка́ко по толи́цех ле́тех вопию́щи непови́нная кро́вь твоя́, а́ки Авелева на Ка́ина, на раба́ твоего́ и уби́йцу, и́же и ца́рь бы́сть, и прише́дши, зле́ погуби́ его́. Ты́ же при́сно ра́дуешися, пребыва́я у Христа́ Царя́ и Бо́га все́х.

И ны́не и при́сно и во ве́ки веко́в. Ами́нь.

Богородичен: Из ко́рене Иессе́ева прозябла́ еси́, Влады́чице, и ко́рень породила́ еси́, все́х Царя́, Христа́ Бо́га на́шего, от Него́же вси́ спасе́ние получа́ем. Те́м непреста́нно моли́ Его́ дарова́ти на́м ве́лию ми́лость.

Конда́к, гла́с 8:

Возсия́ дне́сь в сла́вней па́мяти твое́й ве́рным весе́лие, я́ко бо доброра́сленный гре́зн, прозя́бл еси́ и Христу́ красе́н пло́д прине́сл еси́ себе́; те́мже и по убие́нии твое́м соблюде́ те́ло твое́ нетле́нно, страда́льчески обагре́ное кро́вию. Благоро́дне свя́те Дими́трие, соблюда́й оте́чество твое́ и гра́д тво́й невреди́м, тому́ бо еси́ утвержде́ние.

Икос:

Яко а́гнец непоро́чен, кро́вь твою́ излия́л еси́, богому́дре Дими́трие, и от Благода́теля все́х Бо́га чуде́с да́р прия́л еси́, и вме́сто тле́ннаго обре́л еси́ бога́тство нетле́нное, предстои́ши бо престо́лу сла́вы все́х Царя́. Ему́же о на́с, му́чениче, моли́ся, да твои́ми моли́твами от бе́д свободи́вшеся, ра́достно возопие́м, глаго́люще: ра́дуйся, ве́рных прави́телю; ра́дуйся, ве́ры тве́рдое забра́ло; ра́дуйся, чу́до чуде́с пресла́вное и приста́нище ти́хое притека́ющих к тебе́; ра́дуйся, ко́реню ве́ры и моле́бниче о моля́щих ти ся; ра́дуйся, оте́честву твоему́ похвала́ и на враги́ побо́рник. Сохраня́й гра́д тво́й невреди́м, тому́ бо еси́ утвержде́ние.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святы́й му́чениче княже Дими́трие, моли́ Бо́га о нас.

Мно́ги ко́зни умышля́ше на тя́ ра́б тво́й и уби́йца, да преда́ст тя́ непови́нней и лю́тей сме́рти, я́коже и бы́сть; по́слежде же са́м живота́ своего́ гонза́ет и ца́рства отбыва́ет, ты́ же, страда́льче, во ве́ки ца́рствуеши.

Припев: Святы́й му́чениче княже Дими́трие, моли́ Бо́га о нас.

Из чре́ва ма́терня изы́де, и не во мно́зе вре́мени настоя́щее се́ житие́ ви́де, и лю́тою и непови́нною сме́ртию от о́наго раба́ своего́ и уби́йцы ко Го́споду оты́де, и в кро́вы небе́сныя всели́ся.

Сла́ва Отцу́ и Сы́ну и Свято́му Ду́ху:

Тече́т сла́ва, а́ки река́, в Росси́йстей земли́, пове́дающи и непови́нную сме́рть твою́: ка́ко повеле́нием о́наго раба́ твоего́ таково́ю сме́ртию ве́чный живо́т себе́ получи́л еси́.

И ны́не и при́сно и во ве́ки веко́в. Ами́нь.

Богородичен: Ро́д земны́х по достоя́нию воспе́ти Тя́ не мо́жет, Влады́чице, а́з же, окая́нный и скве́рный, ка́ко могу́ простре́ти недосто́йнии устне́ мои́ и воспе́ти Тя́, Де́во Всепе́тая?

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святы́й му́чениче княже Дими́трие, моли́ Бо́га о нас.

Из отца́, благочести́ва царя́, благода́ти тезоиме́нна, ма́тере же цари́цы, госпожи́ нарече́нныя, произше́л еси́, благоро́дне Дими́трие, и самаго́, ма́тере градово́м, Го́рняго Иерусали́ма, дости́гл еси́. Того́ ра́ди мо́лим тя́: не преста́й моли́ти о душа́х на́ших.

Припев: Святы́й му́чениче княже Дими́трие, моли́ Бо́га о нас.

Яко а́гнец незло́бив, ничи́мже проти́вися рабу́ твоему́ и уби́йце, о́н же за́вистию диа́волею я́т бы́сть и предаде́ тя́ непови́нней сме́рти, того́ ра́ди живота́ своего́ зле́ гонза́ет, ты́ же при́сно пребыва́еши во Ца́рствии небе́снем.

Сла́ва Отцу́ и Сы́ну и Свято́му Ду́ху:

Яви́ся пе́рвый вра́г в Росси́йстей земли́ по сме́рти твое́й, и́же пре́жде нося́й на себе́ о́браз и́ноческ, последи́ же све́рже его́ с себе́, и возложи́ на ся́ тезоимени́тство твое́, и бы́сть ца́рь, Бо́г же моли́тв ра́ди твои́х до конца́ сего́ погуби́.

И ны́не и при́сно и во ве́ки веко́в. Ами́нь.

Богородичен: Истинная еси́ Ма́ти небе́снаго Царя́ и Бо́га все́х, Влады́чице: Тобо́ю ве́сь ро́д челове́чь обнови́ся и от дре́вния кля́твы свободи́ся. Те́мже и а́з, недосто́йный, молю́ Ти ся: свободи́ и мене́, непотре́бнаго раба́ Твоего́, от содержа́щаго греха́ моего́.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святы́й му́чениче княже Дими́трие, моли́ Бо́га о нас.

Тезоимени́т еси́, страда́льче, дре́внему великому́ченику Дими́трию Селу́нскому, его́же у́бо моли́твами сла́вный му́ченик Не́стор Ли́я уби́, ты́ же и́менем твои́м раба́ твоего́ и уби́йцу зле́ погуби́л еси́.

Припев: Святы́й му́чениче княже Дими́трие, моли́ Бо́га о нас.

Аще, а́ки кла́с незре́л, и пожа́лся еси́ теле́сне, благове́рне царе́виче Дими́трие, но благоро́дною твое́ю душе́ю невреди́м пребы́л еси́, и ны́не пребыва́еши в небе́сных селе́ниих, ра́дуяся, и весели́шися, поя́ и славосло́вя Го́спода.

Припев: Святы́й му́чениче княже Дими́трие, моли́ Бо́га о нас.

Во осмоле́тном во́зрасте ко Го́споду отше́д и со многому́чившимися му́ченики в ра́дость и весе́лие вше́д, ра́дуешися с ни́ми и весели́шися у Христа́ и Бо́га все́х, Его́же поя́, моли́ся о на́с.

Сла́ва Отцу́ и Сы́ну и Свято́му Ду́ху:

Аще и не во мно́зем вре́мени пострада́л еси́, но во еди́ном часе́, сию́ лю́тую и непови́нную сме́рть претерпе́л еси́, страда́льче Дими́трие, сего́ ра́ди введе́ Бо́г тя́ в ве́чное весе́лие и неконча́емую ра́дость.

И ны́не и при́сно и во ве́ки веко́в. Ами́нь.

Богородичен: Соприсносу́щное Сло́во Отцу́ и Ду́ху, во чре́ве Твое́м заче́нши и бе́з се́мене поро́ждши, Ма́ти Де́во Чи́стая, от Него́же, ве́рнии, спасе́ние и просвеще́ние прие́млем душа́м и те́лом на́шим, Того́ моли́, да спасе́т ду́ши на́ша, я́ко Бла́г и Человеколю́бец.

Свети́лен:

Яко цве́т красне́йший, от ца́рска прозя́бл еси́ ко́рене, прекра́сне Дими́трие, и обагре́нием страда́ния твоего́, я́ко ца́рскою порфи́рою, обагри́лся еси́ кро́вию. Те́м всечестну́ю твою́ па́мять любо́вию творя́щия от бе́д спаса́й.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Стоя́ще о́крест Тебе́ де́вы богому́дрыя, Богороди́тельнице Мари́е, я́коже царе́вы дще́ре, Сы́ну Твоему́ приведо́шася невестоле́пно, Пречи́стая, я́ко Царю́ вся́ческих, Его́же, Ма́ти Де́во Отрокови́це, о на́с моли́.

Молитва благоверному царевичу Димитрию, Угличскому и Московскому

О, пресла́вный и ди́вный в чудесе́х, красото́ му́чеников, страстоте́рпче царе́вичу кня́же Дими́трие! Ско́ро предста́ни Небе́сному Царю́ и му́ченическия твои́ ру́це о нас, гре́шных, моле́бне к Нему́ простри́, я́ко име́яй дерзнове́ние вели́ко; сохрани́ же твои́ми моли́твами град сей, и вся гра́ды и ве́си правосла́вныя, и Святе́йшаго Патриа́рха (имя рек) и преосвяще́нныя митрополи́ты, архиепи́скопы, епи́скопы и весь свяще́нный чин церко́вный, и в пала́те бра́тию на́шу, и вся правосла́вныя христиа́ны; всех нас приими́ во твое́ заступле́ние, и от всех бед и зол избавля́я, и от наше́ствия ви́димых и неви́димых борю́щих нас враго́в свобожда́я, и тех всяк наве́т и злохи́трство погубля́я и отгоня́я; та́же прегреше́ний на́ших проще́ние испроси́, и в век бу́дущий Небе́снаго Ца́рствия нас сподо́би, и спасе́нных Бо́гу предста́ви, благода́тию и человеколю́бием Го́спода и Спа́са на́шего Иису́са Христа́, Ему́же честь и поклоне́ние подоба́ет, ны́не, и при́сно, и во ве́ки веко́в. Ами́нь.

Молитва вторая благоверному царевичу Димитрию, Угличскому и Московскому

О, святы́й му́чениче, благове́рный царе́вичу и кня́же Дими́трие! Я́ко а́гнец незло́бив от раба́ заколе́нный, венце́м ца́рским от Го́спода венча́лся еси́, и сын царе́в быв, му́ченик непобеди́м яви́лся еси́, и вме́сто земны́х и тле́нных на Небеси́ нетле́нное восприя́л еси́. И ны́не предстоя́ в ра́дости Святе́й Тро́ице, посеща́й творя́щыя ве́рно твою́ светоно́сную па́мять: соблюда́й оте́чествие твое́ и град твой невреди́м, тому́ бо еси́ утвержде́ние: утверди́ правосла́вных жи́тельство в ми́ре глубо́це: междоусо́бную брань укроти́, и вся поле́зная да́руй всегда́ лю́дем твои́м моли́твами твои́ми, да ве́рою и любо́вию вопие́м: ти ра́дуйся, свя́те Дими́трие, ве́рных люде́й те́плый засту́пниче и прибе́жище и земли́ Росси́йския украше́ние. Ами́нь.