27 мая.
Канон первый святителю Никите епископу Новгородскому
![Святителя Никиты епископа, Новгородскаго чудотворца Святителя Никиты епископа, Новгородскаго чудотворца](img_i/073.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Наслади́вся, богому́дре, воздержа́ния и жела́ние пло́ти твоея́ обузда́в, на престо́ле святи́тельства се́л еси́, и я́ко звезда́ многосве́тлая, просвеща́я ве́рных сердца́ заря́ми чуде́с твои́х, о́тче на́ш, святи́телю Ники́то, и ны́не моли́ Христа́ Бо́га, да спасе́т ду́ши на́ша.
Други́й кано́н. Гла́с 7.
Пе́снь 1.
Ирмос: Поспешествова́вшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися.
Припев: Святи́телю о́тче Ники́то, моли́ Бо́га о нас.
Щедро́ты Твоя́ призыва́ем, Го́споди, да досто́йно пе́ние принесе́м уго́днику Твоему́, святи́телю Ники́те, Тя́ воспева́юще, я́ко просла́вися.
Припев: Святи́телю о́тче Ники́то, моли́ Бо́га о нас.
Ше́ствие твое́ до́бре сконча́л еси́ и на небеса́ возше́л еси́, престо́лу Влады́чню предстоя́, со Ангелы Того́ воспева́еши, я́ко просла́вися.
Сла́ва Отцу́ и Сы́ну и Свято́му Ду́ху:
Что́ шу́м пра́зднующих быва́ет и лю́дие све́тло торжеству́ют? Дне́сь бо обрето́шася честны́я мо́щи святи́теля Ники́ты, и вси́ ра́достно вопию́т Христу́, я́ко просла́вися.
И ны́не и при́сно и во ве́ки веко́в. Ами́нь.
Богородичен: Цари́цу и Влады́чицу Тя́ имену́ем, Де́во, под кро́в Тво́й прибега́юще и по́мощи от Тебе́ прося́ще, Сы́ну Твоему́ воспева́юще, я́ко просла́вися.
Пе́снь 3.
Ирмос: Утверди́ся ве́рою Христо́ва Це́рковь, и́бо непреста́нно пе́сньми вопие́т, пою́щи: Свя́т еси́, Го́споди, и Тя́ пое́т ду́х мо́й.
Припев: Святи́телю о́тче Ники́то, моли́ Бо́га о нас.
От земны́х не́др восприе́млем, я́ко да́р освяще́н, честны́я мо́щи твоя́, святи́телю, и от си́х освяще́ние прие́млем, Христа́ воспева́юще: Свя́т еси́, Го́споди, спаса́яй ду́ши на́ша.
Припев: Святи́телю о́тче Ники́то, моли́ Бо́га о нас.
Хра́м Свята́го Ду́ха от ю́ности бы́л еси́, о́тче, сего́ ра́ди и по сме́рти соблюде́ся те́ло твое́ нетле́нно, и, сие́ ра́достно лобыза́юще, вопие́м Христу́: Свя́т еси́, Го́споди, спаса́яй ду́ши на́ша.
Сла́ва Отцу́ и Сы́ну и Свято́му Ду́ху:
Фарисе́йское тщесла́вие отри́нувше, со смире́нием и ра́достию целу́ем честны́я твоя́ мо́щи, святи́телю Ники́то, Христу́ вопию́ще: Свя́т еси́, Го́споди, спаса́яй ду́ши на́ша.
И ны́не и при́сно и во ве́ки веко́в. Ами́нь.
Богородичен: Укра́шена ря́снами чистоты́, Пречи́стая Отрокови́це, благослове́нная Влады́чице, Предста́тельнице ро́да на́шего.
Седа́лен, гла́с 1:
Яко са́д присноцвету́щь, лю́ди твоя́ сотвори́л еси́, сия́ во благоче́стии возрасти́в, умно́жил еси́, и от сего́ ве́рен ра́б и де́латель виногра́да Христо́ва показа́лся еси́, и трудо́м возме́здие досто́йно восприя́л еси́, святи́телю, моли́ Христа́ Бо́га, да спасе́т ду́ши на́ша. [Дважды.]
Сла́ва, и ны́не, Богородичен:
Все́х Творца́, Бо́га же и Соде́теля, Всенепоро́чная Чи́стая, Ду́хом Боже́ственным в ложесна́х Твои́х заче́нши, без нетле́ния родила́ еси́. Его́же сла́вяще, Тя́ воспева́ем, Де́во, я́ко пала́ту Царя́ все́х и ми́ра заступле́ние.
Пе́снь 4.
Ирмос: Плотско́е прише́ствие Твое́, Христе́, уверя́я, проро́к Авваку́м взыва́ше: сла́ва си́ле Твое́й, Го́споди.
Припев: Святи́телю о́тче Ники́то, моли́ Бо́га о нас.
Тя́ моли́твенника непосты́дна ко Влады́це стяжа́хом, святи́телю, моли́ о воспева́ющих па́мять твою́, изба́вити в бу́дущем Суде́ ве́чнующаго осужде́ния.
Припев: Святи́телю о́тче Ники́то, моли́ Бо́га о нас.
Све́тлыми сия́ньми провозсия́вшия честны́я твоя́ мо́щи от мно́гих бо ле́т бы́ша сокрове́ны, ны́не же, я́ко заря́ пресве́тла, просвеща́ют и освяща́ют пою́щия тя́.
Сла́ва Отцу́ и Сы́ну и Свято́му Ду́ху:
Ра́дость, и весе́лие, и ра́дование неизрече́нно твоему́ ста́ду, святи́телю, показа́ся обре́тение честны́х моще́й твои́х, в не́же испроси́ на́м оставле́ние грехо́в и вели́кую ми́лость.
И ны́не и при́сно и во ве́ки веко́в. Ами́нь.
Богородичен: Правосла́вною ве́рою и любо́вию притека́ющих Ти́ и со стра́хом пою́щих Тя́ моле́бный гла́с услы́ши, Влады́чице.
Пе́снь 5
Ирмос: Утренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.
Припев: Святи́телю о́тче Ники́то, моли́ Бо́га о нас.
Умиле́ния исто́чник мне́ испроси́, в честне́м твое́м торжестве́, святи́телю Ники́то, да отмы́ю скве́рну души́ моея́ и покая́ние моли́твами твои́ми обря́щу на по́мощь ору́жие.
Припев: Святи́телю о́тче Ники́то, моли́ Бо́га о нас.
Нова́града бы́в первосвяти́тель и́стинен, облагово́ни на́ша чу́вства душе́вная, да моли́твы твоя́ предста́виши на́м на по́мощь ору́жие.
Сла́ва Отцу́ и Сы́ну и Свято́му Ду́ху:
Мно́жеством искуше́ний содержи́мь е́смь, на тя́ наде́жду возлага́ю, святи́телю Ники́то, да предста́виши ми́ моли́тву твою́ на по́мощь ору́жие.
И ны́не и при́сно и во ве́ки веко́в. Ами́нь.
Богородичен: Ле́ствица прообража́ше Тя́ патриа́рха Иа́кова, Всенепоро́чная Влады́чице, Бо́жие схожде́ние на́м я́ве сказу́ющи.
Пе́снь 6.
Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти́: из смертоно́сныя глубины́ возведи́ мя.
Припев: Святи́телю о́тче Ники́то, моли́ Бо́га о нас.
Кре́пость и утвержде́ние испроси́ нам, святи́телю Ники́то: да моли́твами твои́ми христиа́нский ро́д в тишине́ пребу́дет, воспева́ющий тя́, я́ко те́пла засту́пника.
Припев: Святи́телю о́тче Ники́то, моли́ Бо́га о нас.
Изба́витися ста́ду твоему́ вся́каго озлобле́ния и ско́рби моли́ся, святи́телю Ники́то: ты́ бо еси́ наде́жда непосты́дна, упова́ние изве́стно и стена́ необори́мая.
Сла́ва Отцу́ и Сы́ну и Свято́му Ду́ху:
И на́м, пою́щим и сла́вящим твою́ па́мять, испроси́, святи́телю Ники́то, грехо́в разреше́ние, суда́ и му́ки избавле́ние и Ца́рствия небе́снаго сподо́битися.
И ны́не и при́сно и во ве́ки веко́в. Ами́нь.
Богородичен: Земноро́дных естество́ на не́бо Тобо́ю взы́де, пала́та бо Царе́ва обрела́ся еси́, Богоро́дице, те́мже согла́сно воспева́ем Тя́.
Конда́к, гла́с 6.
Архиере́йства са́ном почти́вся и чи́сте Чисте́йшему предстоя́, приле́жно моле́ние за лю́ди твоя́ приноси́л еси́, я́ко и до́ждь моли́твою све́л еси́, овогда́ же и гра́да запале́ния угаси́л еси́. И ны́не, святи́телю Ники́то, моли́ Христа́ Бо́га спасти́ лю́ди твоя́ моля́щияся, да вси́ вопие́м ти́: ра́дуйся, святи́телю о́тче преди́вный.
Икос:
Кто не почуди́тся, кто́ не просла́вит неизсле́димую и несказа́нную глубину́ милосе́рдия Твоего́, Христе́ Бо́же? Яко просла́вил еси́ в после́днем ро́де уго́дника Твоего́, святи́теля Ники́ту, его́же обрето́шася честны́я мо́щи це́лы и неразруши́мы. Ему́же рече́м: егда́ во пло́ти бы́л еси́, преподо́бне, де́лании боже́ственными ду́шу предочи́стил еси́, святи́тельства па́ству восприи́м, сосу́д избра́н Боже́ственнаго Ду́ха показа́лся еси́ и ста́до твое́ до конца́ в ве́ре утверди́л еси́. Те́м ра́дуйся, о́тче преди́вный.
Пе́снь 7.
Ирмос: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще и глаго́люще: превозноси́мый отце́в Бо́г и препросла́влен.
Припев: Святи́телю о́тче Ники́то, моли́ Бо́га о нас.
Зе́льным воздержа́нием те́ло умертви́л еси́, ду́шу же просвети́л еси́ и равноа́нгельну сотвори́л еси́, Бо́гу вопия́: отце́в на́ших Бо́же, благослове́н еси́.
Припев: Святи́телю о́тче Ники́то, моли́ Бо́га о нас.
Жезло́м па́стырским, святи́телю, до́бре лю́ди твоя́ упа́сл еси́, от ни́хже я́ко ве́рен па́стырь Христу́ возопи́л еси́: отце́в на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Егда́ ся́деши суди́ти вся́ческая на престо́ле сла́вы Твоея́, тогда́ пощади́ рабы́ Твоя́, Влады́ко, моли́твами уго́дника Твоего́, святи́теля Ники́ты, да вси́ уми́льно вопие́м Ти́: отце́в на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Добро́та честны́х и святы́х Ангел, ра́дование челове́ков Ты́ еси́, Де́во Богоро́дице, Ты́ мя к жи́зни наста́ви, Сы́ну Твоему́ вопию́ща: отце́в на́ших Бо́же, благослове́н еси́.
Пе́снь 8.
Ирмос: В пещи́ о́троки подража́юще, духо́вную ро́су прие́мшии, ве́рою зове́м: благослови́те, дела́ Госпо́дня, Го́спода.
Припев: Святи́телю о́тче Ники́то, моли́ Бо́га о нас.
Го́споду просла́вльшу уго́дника Своего́ святи́теля Ники́ту, мно́гим бо ле́том преше́дшим сокрове́ны бы́ша честны́я его́ мо́щи, ны́не же вси́, я́ве зря́ще, согла́сно воспева́ют: благослови́те, дела́ Госпо́дня, Го́спода.
Припев: Святи́телю о́тче Ники́то, моли́ Бо́га о нас.
Уви́дехом и почуди́хомся, па́че же стра́хом и ра́достию объя́ти бы́хом, я́ко по толи́цех ле́тех обрето́шася честны́я мо́щи святи́теля Ники́ты це́лы и неразруши́мы, и вси́ единогла́сно возопи́хом: благослови́те, дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху:
Бо́жиим манове́нием после́днему ро́ду явле́ны бы́ша честны́я мо́щи святи́теля Ники́ты, си́м у́бо прикаса́ющиися, освяще́ние прие́млем, Христа́ воспева́юще во ве́ки.
И ны́не и при́сно и во ве́ки веко́в. Ами́нь.
Богородичен: Ада́ма но́ваго родила́ еси́, пре́жде Ада́ма бы́вшего, Сего́ моли́, Богоро́дице, да спасе́т ду́ши на́ша.
Песнь 9
Ирмос: Па́че естества́ Ма́терь и по естеству́ Де́ву, еди́ну в жена́х Благослове́нную, пе́сньми, ве́рнии, Богоро́дицу велича́ем.
Припев: Святи́телю о́тче Ники́то, моли́ Бо́га о нас.
Львы́ укроти́ Дании́л дре́вле, ты́ же, святи́телю Ники́то, неви́димаго врага́, зия́ющаго на тя́, че́люсти сокруши́л еси́ и без ве́сти того́ сотвори́л еси́ моли́твами твои́ми.
Припев: Святи́телю о́тче Ники́то, моли́ Бо́га о нас.
Кре́пкою твое́ю моли́твою, святи́телю, я́звы души́ моея́ исцели́, и находя́щих искуше́ний изба́ви мя́, молю́ся, и се́рдца моего́ напра́ви стезю́ на Бо́жия за́поведи пресве́тлыя, да тя́ непреста́нно велича́ю.
Сла́ва Отцу́ и Сы́ну и Свято́му Ду́ху:
Разжени́ мно́жество зо́л мои́х, святи́телю, богоприя́тными твои́ми моли́твами, одожди́ ми ка́пли покая́ния: бою́ся бо та́мошняго суди́ща, в не́мже Судия́ хо́щет суди́ти всему́ ми́ру.
И ны́не и при́сно и во ве́ки веко́в. Ами́нь.
Богородичен: Милосе́рдие на рабы́ Твоя́, Чи́стая, простри́, при́сно моля́щия Тя́, стра́шныя му́ки избавля́ющи моли́твами Твои́ми.
Свети́лен:
Плотска́я мудрова́ния ду́ху повину́л еси́ и, я́ко зла́то, огне́м искуси́вся, прия́телище бы́л еси́ Ду́ху Пресвято́му, о́тче Ники́то святи́телю.
Сла́ва, и ны́не, Богородичен:
Тя́ пе́сньми ублажа́ем, Де́во, Бо́га бо роди́вши, на руку́ носи́ла еси́, Того́ моли́ за ду́ши на́ша.
Стихи́ры, гла́с 4.
Свети́льник тя́ стяжа́вше, / свяще́нную твою́ па́мять восхваля́ем, / свяще́нно ублажа́юще, / Це́рковь бо Христо́ву украси́л еси́ / и лю́ди твоя́ просвети́л еси́, / вруче́нный тебе́ тала́нт умно́жив, / ра́дости сподо́бился еси́ Го́спода твоего́. / И ны́не, святи́телю, моли́ся / о душа́х на́ших.
Воздержа́нием до́бре воспита́вся, / в пресла́вную доброде́телей высоту́ возше́л еси́, / святи́тельства оде́ждею, пребога́те, / и венце́м доброде́телей укра́шен. / Благода́тию Боже́ственнаго Ду́ха осия́емь, / просвети́ моли́твами твои́ми, святи́телю Ники́то, / достодо́лжно восхваля́ющих / свяще́нную и честну́ю па́мять твою́.
Яко зла́то чи́сто, обрето́хом / честны́я твоя́ мо́щи, Ники́то святи́телю, / и си́х любо́вию почита́ем, / торжеству́юще ра́достно / и я́ко свяще́ние душа́м обнося́ще, / Христа́ прославля́ем, / просла́вльшаго тя́, уго́дника Своего́, / да и на́с сподо́бит ве́чнаго наслажде́ния.
Молитва святителю Никите, затворнику Печерскому, епископу Новгородскому
О, архиере́ю Бо́жий, святи́телю Ники́то! Услы́ши нас гре́шных, днесь во свяще́нный храм сей сте́кшихся, и честно́му о́бразу твоему́ поклоня́ющихся, и ко свяще́нней твое́й ра́це припа́дающих, и умиле́нно вопию́щих: я́коже си́дя на престо́ле святи́тельства в Вели́ком Но́вегра́де сем, и еди́ною належа́щу бездо́ждию, дождь моли́твами свел еси́, и па́ки гра́ду сему́ о́гненным пла́менем обстои́му, моли́твою пла́мень о́гненный угаси́л еси́. И ны́не мо́лим тя, о святи́телю Христо́в Ники́то: моли́ся ко Го́споду, е́же изба́вити Вели́кий Но́вград сей и вся гра́ды и страны́ христиа́нские от тру́са, пото́па, гла́да, огня́, гра́да, меча́ и от всех враго́в ви́димых к неви́димых, я́ко да изря́дных ра́ди моли́тв твои́х спаса́еми, сла́вим Пресвяту́ю Тро́ицу, Отца́ и Сы́на и Свята́го Ду́ха, и твое́ ми́лостивное предста́тельство, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителя Никиты епископа, Новгородскаго чудотворца Святителя Никиты епископа, Новгородскаго чудотворца](img_b/073.jpg)