27 мая.

Канон святому Исидору, Христа ради юродивому, Ростовскому чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Просвети́вся боже́ственною благода́тию, богому́дре, целому́дрием мно́гим и терпе́нием во вре́менней жи́зни тече́ние до́бре сконча́л еси́. Те́м и по сме́рти яви́ тя све́тлость жития́ твоего́: источа́еши бо исцеле́ний благода́ть и́же с ве́рою притека́ющим ко свято́му твоему́ гро́бу, Иси́доре блаже́нне, моли́ Христа́ Бо́га, да спасе́т ду́ши на́ша.

Кано́н свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Блаже́нне Иси́доре, моли́ Бо́га о нас.

Вы́спрь житие́ стяжа́в благодея́нием боже́ственным и ве́сь светообра́зен бы́в, просвеще́ние ми́ низпосли́, я́ко да, ра́дуяся, восхвалю́ пресве́тлое житие́ твое́, е́же до́бре соверши́в, восприя́л еси́, я́же угото́ва Бо́г лю́бящим Его́, богому́дре Иси́доре.

Припев: Блаже́нне Иси́доре, моли́ Бо́га о нас.

Боже́ственным разже́гся жела́нием, вся́ оте́ческия отве́ргл еси́ нра́вы, Христа́ же обрести́ потща́лся еси́. И сего́ ра́ди, бе́гая, удали́вся нечести́вых сожи́тельства, благоче́стия све́том озаре́н бы́л еси́ и боже́ственными доброде́тельми укра́шен, досточу́дне Иси́доре.

Сла́ва Отцу́ и Сы́ну и Свято́му Ду́ху:

Дрема́ния ве́ждома не да́л еси́, блаже́нне Иси́доре, ниже́ поко́я твоему́ те́лу, до́ндеже сно́м пра́ведным почи́в, и непоколеби́мь бы́л еси́, я́ко сто́лп, вра́г неви́димых ополче́нием, Бо́гу при́сно предстоя́ во всено́щном стоя́нии и славосло́вии, те́мже от Него́ ны́не просла́вился еси́.

И ны́не и при́сно и во ве́ки веко́в. Ами́нь.

Богородичен: Яко ло́жницу Боже́ственную и ле́ствицу, к небе́сней возводя́щую высоте́ челове́ческое естество́, кади́льницу же Невеще́ственнаго и Светоно́снаго Угля, в ложесне́х поне́сшу Богоизбра́нную Отрокови́цу Мари́ю, вси́ ублажа́ем, зову́ще: ра́дуйся, Чи́стая, ро́ждшая Нача́льника жи́зни на́шея.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Блаже́нне Иси́доре, моли́ Бо́га о нас.

Глаго́лом боже́ственным после́дуя и си́м вы́ну поуча́яся, испо́лнился еси́ во́д благода́тных, и источи́л еси́ пото́ки чуде́с, и, чу́ждь бы́в вся́каго плотска́го жела́ния, воспева́я, глаго́лал еси́ Бо́гу, Иси́доре: не́сть свя́т, па́че Тебе́, Человеколю́бче.

Припев: Блаже́нне Иси́доре, моли́ Бо́га о нас.

Благоутро́бие стяжа́л еси́, ми́лостивому Бо́гу подо́бствовав, расточи́л еси́ бога́тство убо́гим; те́мже на небесе́х присносу́щее блаже́нство тебе́ угото́вася, его́же получи́в, Иси́доре, вопие́ши: не́сть свя́т, па́че Тебе́, Человеколю́бче.

Сла́ва Отцу́ и Сы́ну и Свято́му Ду́ху:

Благоугоди́в Зижди́телю де́лы боже́ственными, насле́довал еси́ благи́х восприя́тие; дре́ва у́бо живо́тнаго при́сно наслажда́яся, блаже́нне Иси́доре, воспева́еши непреста́нно: не́сть свя́т, па́че Тебе́, Человеколю́бче.

И ны́не и при́сно и во ве́ки веко́в. Ами́нь.

Богородичен: Святы́х Ангел су́щи святе́йши, Яже си́х Соде́теля во Твое́й утро́бе поне́сшая и ро́ждшая, Богоотрокови́це Чи́стая, Изба́вителя челове́ком. Те́мже Ти́ согла́сно вопие́м: не́сть свя́ты и пречи́сты, ра́зве Тебе́, Влады́чице.

Седа́лен, гла́с 4:

От земли́ Воззва́вый тя́ на ве́чныя оби́тели соблюда́ет и по сме́рти неврежде́но те́ло твое́, свя́те: ты́ бо в целому́дрии и чистоте́ житие́ по́жил еси́, не порабо́тився плотски́м страсте́м, Иси́доре богому́дре. Те́мже тя́ любо́вию почита́ем.

Сла́ва, и ны́не, богоро́дичен.

Стена́ непобеди́мая на́м, христиа́ном, еси́, Богоро́дице Де́во: к Тебе́ бо прибега́юще, невреди́ми пребыва́ем и, па́ки согреша́юще, и́мамы Тя́ Моли́твенницу. Те́м, благодаря́ще, вопие́м Ти́: ра́дуйся, Благода́тная, Госпо́дь с Тобо́ю.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Блаже́нне Иси́доре, моли́ Бо́га о нас.

За́поведем боже́ственным соверши́тель яви́вся, неукло́нным ра́зумом, всеблаже́нне, оте́ческаго небре́гл еси́ неве́рствия, от ю́ности бо житие́ име́л еси́ нескве́рно и ми́лостивен ра́зум, досточу́дне, зовы́й непреста́нно: си́ле Твое́й сла́ва, Человеколю́бче.

Припев: Блаже́нне Иси́доре, моли́ Бо́га о нас.

Ни ми́ра возмуще́ние, ни вла́сти удержа́ние, ни сла́ва вре́менная, ниже́ тле́емое бога́тство твое́я к Бо́гу любве́ возмого́ша уклони́ти, Иси́доре. Но благоволи́л еси́ вои́стинну житие́ изря́дно, боже́ственным раче́нием укрепля́емь, взыва́я при́сно: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Возвыша́яся боже́ственными повеле́нии вы́ну, вра́г неви́димых смири́л еси́ возвыше́ния умиле́ния слеза́ми, я́коже ке́др, при́сно сы́й напоя́емь, прия́л еси́ исцеле́ний де́тель, Иси́доре, судо́м пра́ведным вся́ческая оправда́ющаго, Ему́же предстоя́, вопие́ши: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Преукра́шена боже́ственною сла́вою, вся́ческая от не су́щих сло́вом соста́вльшаго Бо́га Сло́ва родила́ еси́, Челове́ка вои́стинну бы́вша, Его́же о на́с, рабе́х Твои́х, моля́щи не преста́й, Богоро́дице Ма́ти Присноде́во, ве́рою Тебе́ зову́щих: си́ле Твое́й сла́ва, Влады́чице.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Блаже́нне Иси́доре, моли́ Бо́га о нас.

Све́том невеще́ственным трисия́ннаго Божества́ озаре́н, досточу́дне Иси́доре, но́щь жития́ настоя́щаго непоткнове́нно преше́л еси́, и ны́не, в ве́чных оби́телех с ли́ки преподо́бных водворя́яся, помина́й на́с, всечестну́ю твою́ па́мять на земли́ торжеству́ющих.

Припев: Блаже́нне Иси́доре, моли́ Бо́га о нас.

Ны́не е́же о тебе́ чу́до ве́лие зри́мо е́сть и у́жаса испо́лнено, богоблаже́нне Иси́доре: ка́ко на мно́га ле́та земле́ю покрове́нно нетле́нно твое́ те́ло, во гро́бе лежа́ще, соблюда́ется, судьба́ми, и́миже ве́сть Бо́г, прославля́я тя́.

Сла́ва Отцу́ и Сы́ну и Свято́му Ду́ху:

Богоприя́тному твоему́ начина́нию и чу́дному соверше́нию по Христе́ жития́ твоего́ Ангельстии чи́ни удиви́шася, богому́дре Иси́доре, и́бо во пло́ти сы́й, те́х житию́ подража́тель яви́лся еси́. Те́мже и да́р прозре́ния от Бо́га прия́л еси́, е́же пресла́вная твори́ти чудеса́.

И ны́не и при́сно и во ве́ки веко́в. Ами́нь.

Богородичен: Моли́ из Тебе́ ро́ждшагося Го́спода, Де́во Отрокови́це Чи́стая, сохрани́ти рабы́ Твоя́ от сопроти́вных обстоя́ний и бесо́вскаго искуше́ния, Тя́, вои́стинну Бо́жию Ма́терь, испове́дающих, и страсте́й душетле́нных свободи́ти, и ве́чнаго осужде́ния.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Блаже́нне Иси́доре, моли́ Бо́га о нас.

Струи́ благода́ти, я́ко мѵ́ро благово́нно, от свята́го твоего́ гро́ба истека́ют, всебога́те, веселя́ще сердца́ ве́рных, от любве́ к тебе́ приходя́щих, и прогоня́юще кова́рства духо́в лука́вых си́лою Ду́ха Пресвята́го, Иси́доре.

Припев: Блаже́нне Иси́доре, моли́ Бо́га о нас.

Во дво́рех Го́спода Савао́фа насажде́н, я́коже фи́никс, процве́л еси́, богому́дре, и страсте́й вои́стинну тлетво́рных победи́тель яви́лся еси́, Иси́доре, поспеше́нием боже́ственным. Те́мже и ра́дости пра́ведных сподо́бился еси́, досточу́дне.

Сла́ва Отцу́ и Сы́ну и Свято́му Ду́ху:

Ца́рствия Бо́жия возжела́в, тече́ние до́бре сконча́л еси́ и ве́ру соблю́л еси́ нескве́рну, виногра́д бы́в благопло́ден, богозва́нне Иси́доре, принося́ всекра́сныя гро́зды доброде́тели Соде́телю все́х, Бо́гу, венце́м нетле́ния тебе́ украси́вшему.

И ны́не и при́сно и во ве́ки веко́в. Ами́нь.

Богородичен: Избра́ Тебе́ Госпо́дь во все́х ро́дех, благослове́нная в жена́х, непоро́чная Де́во Богоро́дице, я́ко прекра́сное селе́ние простра́нное, боже́ственную ло́жницу, и киво́т святы́ни, и све́щник, и трапе́зу, Чи́стая.

Конда́к, гла́с 8.

Взбра́нному и ди́вному в пра́ведницех, и́же у́бо от Христа́ да́р чуде́с прии́мшему, похва́льныя ны́не принесе́м глаго́лы, но я́ко име́я дерзнове́ние ко Святе́й Тро́ице, Юже моли́ изба́витися от бе́д рабо́м твои́м, да зове́м ти́: ра́дуйся, богому́дре Иси́доре.

Икос:

Ка́ко возмогу́, гре́шный и скве́рный, а́з вку́пе душе́ю и те́лом исписа́ти, е́же во пло́ти сы́й, равноа́нгельное житие́ твое́ и пресла́вная чудеса́? Аще у́бо мно́зи прему́дрии не дости́гнут испове́дати мно́гаго твоего́ терпе́ния, и смире́ния, и те́плыя ко Христу́ любве́, но, оба́че наде́яся на твое́ беззло́бие, о блаже́нне, си́це вопию́ ти: ра́дуйся, пресве́тлая звездо́, от за́пада возсия́вшая и к восто́ку прише́дшая; ра́дуйся, возненави́девый оте́ческую и богоме́рзкую ве́ру, Христа́ же еди́наго, над все́ми су́щаго Бо́га, все́м се́рдцем возлюби́вый и Тому́ невозвра́тным жела́нием после́довавый; ра́дуйся, бу́йственное и юро́дственное е́же по апо́столу, жи́тельство избра́вый; ра́дуйся, премени́вый тле́нная и настоя́щая наде́ждею бу́дущих бла́г; ра́дуйся, дре́внему Иову уподо́бивыйся терпе́нием; ра́дуйся, страстоте́рпче Христо́в непобеди́мый, но при́сно победи́вый диа́вола твои́м смире́нием; ра́дуйся, я́ко дре́вний о́н Ла́зарь ни́щий, почива́я ны́не в ло́нех Авраа́млих; ра́дуйся, и́же по отше́ствии ми́ра сего́, су́щим в беда́х и искуше́ниих гото́в обрета́яся предста́тель и засту́пник; ра́дуйся, везде́ призыва́ющих тя́ бы́стро предваря́еши; ра́дуйся, богому́дре Иси́доре.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Блаже́нне Иси́доре, моли́ Бо́га о нас.

Си́лою укрепля́емь всемогу́щаго Бо́га, пло́ти умертви́л еси́ и я́же до́лу влеку́щая мудрова́ния, всебога́те, чистото́ю и бде́нием непреста́нным и ра́зум горе́ стяжа́л еси́, вопия́ непреста́нно, Иси́доре: благослове́н еси́, Бо́же оте́ц на́ших.

Припев: Блаже́нне Иси́доре, моли́ Бо́га о нас.

Све́тлости ра́ди жития́ твоего́ удиви́ тя Госпо́дь в чудесе́х, богому́дре Иси́доре: купцу́ у́бо, в мо́ри утопа́ющу, скоре́йшим явле́нием предста́л еси́, досточу́дне, и от глубины́ сего́ изба́вил еси́, вопию́ща: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Го́рнее Ца́рствие, весе́лие присносу́щное и сла́ву неувяда́ющую, бога́тство неистощи́мое и е́же преподо́бных наслажде́ние, по́честь трудо́в твои́х восприя́л еси́ от Бо́га, Благоде́теля все́х, Ему́же ны́не предстоя́, вопие́ши: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Его́же родила́ еси́, Го́спода, Влады́чице Чи́стая, не преста́й моля́щи, изъя́ти мя́ при́сно от вра́г, оскорбля́ющих мя́, и тя́жкое бре́мя грехо́в мои́х расточи́ти, Богоневе́стная, я́ко да, ра́дуяся, вопию́: благослове́н, Пречи́стая, Пло́д Твоего́ чре́ва.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Блаже́нне Иси́доре, моли́ Бо́га о нас.

Не то́кмо в житии́ сы́й, но и по отше́ствии ми́ра мно́жайшая чудеса́ от честна́го твоего́ гро́ба содева́ются приходя́щим с ве́рою, всеблаже́нне Иси́доре, и́бо неду́ги прого́ниши си́лою духо́вною и от бе́д изыма́еши. Те́мже, не престаю́ще, вопие́м: свяще́нницы, воспо́йте, лю́дие, превозноси́те во вся́ ве́ки.

Припев: Блаже́нне Иси́доре, моли́ Бо́га о нас.

Дерзну́вша у́бо иере́я извеще́ние прия́ти о святе́м телеси́ твое́м, боже́ственная а́бие си́ла напра́сно порази́, но твои́ми моли́твами исцеле́ние получи́, всехва́льне Иси́доре. Те́мже и мы́, веселя́щеся, вопие́м: свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Доброде́тельным нра́вом и се́рдцем смире́нным ми́лостив ты́ яви́лся еси́, досточу́дне Иси́доре, тре́бующим от тебе́ по́мощи, при́сно помога́я и чуде́с дея́нием удивля́я ве́рою Го́сподеви вопию́щия: свяще́нницы, по́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ада́ма Соде́тель в ложесна́х Твои́х, Чи́стая, зи́ждется и млеко́м пита́ется, пита́яй вся́ко дыха́ние, Де́во Богоро́дице. Те́мже я́ко Ма́терь Бо́жию, ве́рнии, Тя́ прославля́ем и превозно́сим Чи́стую во ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Блаже́нне Иси́доре, моли́ Бо́га о нас.

Зре́ти при́сно возжела́в сла́ву Бо́га на́шего, Иси́доре, мно́гих доброде́телей разли́чными о́бразы себе́ удобри́л еси́ и, свещу́ нося́, укра́шену еле́ем терпе́ния твоего́, возше́л еси́ в светоно́сный черто́г, со Ангелы сы́й ясне́е наслажда́ешися боговиде́ния.

Припев: Блаже́нне Иси́доре, моли́ Бо́га о нас.

Яко у́треннее со́лнце, возсия́ па́мять твоя́ в ми́ре су́щим, сердца́ озаря́ющи боже́ственною све́тлостию: ты́ бо све́та и дне́ я́ко вои́стинну сы́н яви́лся еси́, богому́дре Иси́доре, те́мже тя́ непреста́нно ублажа́ем.

Сла́ва Отцу́ и Сы́ну и Свято́му Ду́ху:

Прему́дростию украша́яся и ра́зумом просвеща́яся, смире́нием се́рдца ра́дуяся, высото́ю же жития́ сия́я, досточу́дне, в небе́сная селе́ния преше́л еси́ и та́мо, в ли́це пра́ведных предстоя́, на́с помина́й, чту́щих тя́, блаже́нне Иси́доре.

И ны́не и при́сно и во ве́ки веко́в. Ами́нь.

Богородичен: Све́та Боже́ственнаго прия́телище, луча́ми Божества́ ми́р озари́вшаго, ви́дена была́ еси́, Богоблагода́тная, мо́ст же и ле́ствица, на высоту́ земны́я возводя́щи, Де́во. Те́мже, ве́рнии, ублажа́юще, Тя́ велича́ем.

Свети́лен.

Удали́вся, бе́гая мирски́х сожи́тельства, Христу́, над все́ми Бо́гу на́шему, непоро́чным житие́м благоугоди́л еси́, всеблаже́нне Иси́доре, Его́же ны́не моли́ о на́с, рабе́х твои́х, ве́рою пра́зднующих всечестну́ю па́мять твою́.

Богородичен:

Му́дрость Ипоста́сную, и Сло́во пресу́щное, и врача́ все́х, Христа́ ро́ждшая, Де́во, стру́пы и я́звы души́ моея́ исцели́, лю́тыя и многовре́менныя, и се́рдца моего́ стра́стная утоли́ помышле́ния.

Молитва блаженному Исидору Твердислову, Христа ради юродивому

О, вели́кий уго́дниче Бо́жий, святы́й пра́ведный Иси́доре! Помози́ мне гре́шному, всегда́ стра́стию грехо́вной побежда́емому: ты бо еси́ предста́тель и засту́пник, и ско́рый помо́щник в ско́рбех мои́х, и усе́рдный хода́тай спасе́ния моего́. Ты ве́рою пра́вою и трудо́м твои́м ве́чныя сла́вы и Ца́рствия Небе́снаго сподо́бился еси́, и ны́не у Престо́ла Влады́ки всех, Царя́ Христа́, Бо́га на́шего предстои́ши. Те́мже и молю́ тя, страстоте́рпче пра́ведный: помяни́ мя окая́ннаго, в ти́не грехо́вной валя́ющагося: уже́ бо не могу́ возвести́ о́чи мои́ к го́рнему Сио́ну, зане́ свя́зан есмь сетьми́ диа́вольскими и попече́ньми жите́йскими. Изба́ви мя моли́твами твои́ми от всех злых наве́тов вра́жиих и от вся́каго греха́, да прииму́ исцеле́ние от язв грехо́вных, от вселюте́йшаго зми́я наложе́нных мне. Все житие́ мое́ окая́нный аз во сласте́х ми́ра сего́ изнури́х, и не и́мам помо́щника, и не вем к кому́ прибе́гнути, да пода́ст ми ру́ку по́мощи. Сего́ ра́ди к тебе́ прибега́ю и си́це молю́ся: о святы́й пра́ведный Иси́доре, пода́ждь ми по́мощь в день Стра́шнаго Суда́: егда́ прии́дет Сын Челове́ческий суди́ти всех, тогда́ умоли́ Того́ стра́шнаго и нелицеме́рнаго Судию́, да не осу́дит мя по беззако́нием мои́м, но да поста́вит одесну́ю Себе́ по вели́цей ми́лости Свое́й. Помоли́ся Влады́це Христу́ Бо́гу, да и в ны́нешнем ве́це ми́лостив бу́дет нам гре́шным и недосто́йным рабо́м Свои́м, и да утверди́т мысль на́шу, е́же отврати́тися нам от вся́каго зла и соблюда́ти спаси́тельная Его́ за́поведи, и про́чее вре́мя жития́ на́шего преити́ в покая́нии и соблюде́нии Бо́жиих за́поведей, да дости́гше Небе́сных оби́телей, непреста́нно сла́вим Еди́наго Триипоста́снаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.