25 мая.

Канон святителю Герману, патриарху Константинопольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Ге́рмана, творе́ние Феофа́на, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припев: Святи́телю о́тче Ге́рмане, моли́ Бо́га о нас.

Свяще́ния оде́ждою укра́шен, блаже́нне, пожи́л еси́, сло́вом же благода́ти ве́рных пречестны́я собо́ры, яви́лся еси́, богоявле́нне, просвеща́я уче́нии.

Припев: Святи́телю о́тче Ге́рмане, моли́ Бо́га о нас.

Колесни́ца бы́л еси́ доброде́телей, на ню́же все́д, к Бо́гу отше́л еси́, ми́ра красоту́ оста́вль и гнилу́ю сла́ву, небе́сный таи́нник свое́ю прему́дростию бы́в.

Сла́ва Отцу́ и Сы́ну и Свято́му Ду́ху:

От промышле́ния проуве́ден бы́в, я́ко свяще́нник богогла́сен сы́й, о́тче, избе́гл еси́ томи́тельнаго скве́рнаго уби́йства, преподо́бне, Бо́гу соблюда́ющу тя́ десни́цею Вседержи́тельною.

И ны́не и при́сно и во ве́ки веко́в. Ами́нь.

Богородичен: Ку́ю Ти́ досто́йную пе́снь на́ше принесе́т неможе́ние? То́кмо обра́довательную, е́йже на́с Гаврии́л научи́: ра́дуйся, Богоро́дице Де́во, Ма́ти Неневе́стная.

Пе́снь 3.

Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Припев: Святи́телю о́тче Ге́рмане, моли́ Бо́га о нас.

Иже Боже́ственным проразуме́нием прове́дый твоего́ нра́ва свобо́дное и душе́вное, му́дре, благоро́дие, рука́ми беззако́нных убие́ну бы́ти тебе́ Бо́г возбрани́ и де́вственных чи́ну скопле́ние прему́дро обличи́.

Припев: Святи́телю о́тче Ге́рмане, моли́ Бо́га о нас.

Ви́дети жела́я я́ве, блаже́нне, све́тлость мы́сленную Боже́ственнаго обоже́ния, священнонача́лие твое́ украси́л еси́ житие́м целому́дренным и му́дрыми уче́ньми правосла́вно напра́вил еси́ ста́до.

Сла́ва Отцу́ и Сы́ну и Свято́му Ду́ху:

На вели́кое седа́лище вше́д, вельми́ просвети́л еси́ церко́вное, о́тче, исполне́ние уче́ний пе́сньми, Ге́рмане прехва́льне, святи́телю преподо́бне и свети́льниче вселе́нныя прече́стне.

И ны́не и при́сно и во ве́ки веко́в. Ами́нь.

Богородичен: Из Тебе́ процвете́, Чи́стая, Цве́т неувяда́емый, благоуха́я все́ челове́чество Боже́ственным мѵ́ром Своего́ естества́, Отцу́ Собезнача́льный, и из Тебе́ бы́в под ле́том, Де́во Всенепоро́чная.

Седа́лен, гла́с 8.

Во свяще́нную обле́клся оде́жду, показа́лся еси́ посо́бник Христо́ви, не убоя́вся беззако́ннаго царя́, о́тче на́ш, вы́и не преклони́л еси́ безбо́жному веле́нию, зауше́ния терпя́, поноше́ния и преще́ния. Те́мже льсте́ц, я́ростию разгоре́вся, в темни́це тя́ затвори́, да́же до кончи́ны, блаже́нне. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти на́м, чту́щим любо́вию святу́ю па́мять твою́.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святи́телю о́тче Ге́рмане, моли́ Бо́га о нас.

Умертви́в, прему́дре, пло́ти взыгра́ния, священнотаи́нниче Ге́рмане, любому́дрия просвеще́нием у́м уясни́л еси́, духо́вным та́йно наставле́нием укра́шен, Христу́ зовы́й: сла́ва си́ле Твое́й, Го́споди.

Припев: Святи́телю о́тче Ге́рмане, моли́ Бо́га о нас.

Отврещи́ся пречестны́х Христо́вых изображе́ний злочести́вый вра́г пону́ди тя́, в неразу́мие бо вве́ргся, твои́ми изобличи́ся я́ве уче́нии, сла́вне, но, неисце́льно неду́гуя, нечу́вствен пребы́сть.

Сла́ва Отцу́ и Сы́ну и Свято́му Ду́ху:

Глаго́л обличе́ние твои́х зря́, звероимени́тый, му́дре, зверообра́зным умо́м с престо́ла низведе́ свяще́ннаго, но вме́сто сего́ обогати́лся еси́ священноде́йством, всеблаже́нне, небе́сным.

И ны́не и при́сно и во ве́ки веко́в. Ами́нь.

Богородичен: Ра́дость Тебе́ я́ве от небе́с принося́, архистрати́г, Чи́стая, благовести́, ре́к: Бо́г прии́дет с пло́тию из Тебе́, Де́во Пречи́стая, на спасе́ние любо́вию пою́щим Тя́.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Припев: Святи́телю о́тче Ге́рмане, моли́ Бо́га о нас.

До конца́ Христа́ возлю́бль, богоприя́тне, возлю́блен бы́л еси́ от Него́ досто́йно и прия́л еси́ дарова́ний пучи́ну, и́бо, му́дре, уче́нии твои́ми Це́рковь просвети́л еси́.

Припев: Святи́телю о́тче Ге́рмане, моли́ Бо́га о нас.

Пе́сньми, Ге́рмане, богодохнове́нными уясни́л еси́ ли́ки ве́рных и боже́ственная исполне́ния, и́бо все́ подо́бное утвержде́ние, о́тче, твоего́ се́рдца правосла́вныя просвети́.

Сла́ва Отцу́ и Сы́ну и Свято́му Ду́ху:

Ра́дуйся, му́чеников страда́ние, и побе́ды обличи́в похвала́ми и словесы́ сложе́нными, и а́бие, сла́вне, обра́зными шароде́йствы во еди́но совокупля́я обоя́.

И ны́не и при́сно и во ве́ки веко́в. Ами́нь.

Богородичен: Веселя́тся небе́сныя си́лы, зря́ще Тя́, ра́дуются с ни́ми челове́ков собра́ния: Рождество́м бо Твои́м соедини́шася, Де́во Богоро́дице, Его́же досто́йно сла́вим.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святи́телю о́тче Ге́рмане, моли́ Бо́га о нас.

Напоя́ется уче́нии твои́ми, всему́дре, и словесы́ ца́рское свяще́ние, лю́дие же Христо́ви возлю́бленнии, богозва́ннии и к Бо́гу наставля́ются наказа́нии твои́ми.

Припев: Святи́телю о́тче Ге́рмане, моли́ Бо́га о нас.

Помина́й тя́ пою́щия, преподо́бне, Бо́гу ны́не предстоя́, испо́лнен боже́ственныя добро́ты и нетле́нныя красоты́, и к животу́ наста́ви моли́твами твои́ми.

Сла́ва Отцу́ и Сы́ну и Свято́му Ду́ху:

Восхожде́ние, му́дре, житию́ положи́л еси́ от сла́вы и си́лы к небе́сней сла́ве и кре́пости, сла́вне, премину́я воздержа́нии, до́ндеже Христу́ жела́емому, ра́дуяся, бесе́довал еси́.

И ны́не и при́сно и во ве́ки веко́в. Ами́нь.

Богородичен: Ны́не, Пречи́стая, Твоего́ раба́ изба́ви от вся́каго обстоя́ния, треволне́ния же и бу́ри страсте́й и к Твоему́ приста́нищу наста́ви: Ты́ бо еси́ мне́ предста́тельница и исправле́ние.

Конда́к, гла́с 4.

Священнонача́льник чу́дную дво́ицу восхва́лим, ве́рнии, по до́лгу, с Ге́рманом боже́ственнаго Епифа́ния: си́и бо попали́ша безбо́жных язы́ки, догма́ты прему́дрейшия возло́жше все́м, правосла́вно пою́щим при́сно благоче́стия вели́кое та́инство.

Икос:

Яко свяще́нных добро́ту и сла́ву правосла́вных, дво́ицу святу́ю почти́м досто́йно: си́и бо яви́шася на́м столпи́ утвержде́ния на враги́ неви́димыя и ви́димыя всегда́, ве́ры же столпи́ непрекло́ннии и Це́ркве украше́ние красно́. Его́же нося́щи, пра́во исправля́ет, у́мно вопию́щи: возвесели́ся во мне́ ду́х мо́й вои́стинну, оде́жду мою́, я́коже пре́жде, восприе́мши, ю́же еретицы́ растерза́ша, не пою́ще благоче́стия вели́кое та́инство.

Пе́снь 7.

Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святи́телю о́тче Ге́рмане, моли́ Бо́га о нас.

Ве́сь в тебе́ Свята́го Ду́ха излия́ся исто́чник: источа́еши бо, я́ко ре́ки, о́тче досточу́дне, за́поведи спаси́тельныя и богокра́сная уче́ния, прехва́льнаго велича́я Бо́га во вся́ ве́ки.

Припев: Святи́телю о́тче Ге́рмане, моли́ Бо́га о нас.

Песносло́вя благоче́стно, уясни́л еси́ Влады́чния пра́здники, воспева́я пе́сненно, обоже́н бы́в, вся́ святы́я же твои́ми мусики́ями к доброде́тели помазу́я, му́дре, ве́рою пою́щия: хва́льный отце́в Бо́же и препросла́влен.

Сла́ва Отцу́ и Сы́ну и Свято́му Ду́ху:

Тро́ичен: Еди́но нача́ло во Еди́нстве непресеко́мем, во Ипоста́сех Трие́х богосло́вным язы́ком вопия́, все́м пропове́дал еси́ Безнача́льна Роди́теля, Единоро́днаго же Собезнача́льна Сы́на и Соесте́ственна Боже́ственнаго Ду́ха я́сно и Единосу́щна.

И ны́не и при́сно и во ве́ки веко́в. Ами́нь.

Богородичен: На Тебе́, Чи́стая Богоро́дице, положи́х всю́ наде́жду и к Тебе́ прибега́ю всегда́: спаси́ мя, Всенепоро́чная, и изба́ви моли́твами Твои́ми одержа́щия молвы́ и смуще́ния, лю́тых мои́х страсте́й и паде́ний.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Ге́рмане, моли́ Бо́га о нас.

Сия́ний блиста́нии Све́та Трисо́лнечнаго, свеще́ю, священноявле́нне, наслажда́яся, ны́не зове́ши, ра́дуяся: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Ге́рмане, моли́ Бо́га о нас.

Мно́гаго све́та и сия́ния, о́тче, сподо́блен, в се́лех небе́сных и в жили́щах на́с, вопию́щих, помяни́: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Яко соблю́д богови́дно и по о́бразу Бо́жию, ико́ны святы́х воздви́гл еси́, ве́дый на первообра́зное преходи́ти, вся́ку че́сть же, прехва́льне, и сла́ву, Го́спода по́йте, вопия́, и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Новообра́зно па́че естества́, Де́во, заче́нши Сло́во, Отцу́ соесте́ственна Сы́на, Де́вою пребыла́ еси́. Те́м Тя́ пое́м, вся́ дела́, и — ра́дуйся — Тебе́ вопие́м, и превозно́сим, Чи́стая, во вся́ ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святи́телю о́тче Ге́рмане, моли́ Бо́га о нас.

Реши́ти и вяза́ти согреше́ния вла́сть с небесе́ прие́м по зако́ну я́ко свяще́нник, преблаже́нне, пою́щим тя́, о́тче, оставле́ние моли́твами твои́ми пода́ждь, да тя́ вси́ ублажа́ем.

Припев: Святи́телю о́тче Ге́рмане, моли́ Бо́га о нас.

Обре́л еси́ воздая́ния боле́зней твои́х священноявле́нно, Ге́рмане всеблаже́нне, блаже́нную прии́м кончи́ну и жи́знь ве́чную восприи́м, Боже́ственнаго виде́ния непреста́нно наслажда́ешися.

Сла́ва Отцу́ и Сы́ну и Свято́му Ду́ху:

Ве́сь себе́ возложи́л еси́ Всеви́дцу Сло́ву и Вседержи́телю добра́ слу́жба показа́лся еси́ свяще́нная, же́ртву прия́тну и благоуго́дну принося́ Го́сподеви, твои́х трудо́в пе́ния.

И ны́не и при́сно и во ве́ки веко́в. Ами́нь.

Богородичен: Уста́ви плотско́е мудрова́ние и страсте́й, Де́во, утиши́ смуще́ние прибега́ющаго, Богороди́тельнице, к покро́ву Твоему́, и наде́жды основа́ние Тя́ иму́щаго, и боже́ственным предста́тельством обога́щшася и заступле́нием.

Свети́лен.

Прииди́те, ве́рнии, почти́м боже́ственное и всесвяще́нное иера́рхов совокупле́ние, в пе́ниих пе́сненных боже́ственнаго Епифа́ния и Ге́рмана, разори́вшия ересе́й омраче́ние и благоче́стия заре́ю просве́щшия всю́ тва́рь.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Ге́рмане, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.