25 мая.

Канон святителю Епифанию, епископу Кипрскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Епифа́ния, творе́ние Иоа́нна мона́ха, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припев: Святи́телю о́тче Епифа́ние, моли́ Бо́га о нас.

Во уго́днем ве́рою пожи́в зако́не писа́ний, Влады́чний подъя́л еси́ яре́м, украси́вся же, пребога́те, свети́льник показа́лся еси́, земны́я просвеща́я концы́.

Припев: Святи́телю о́тче Епифа́ние, моли́ Бо́га о нас.

Жела́нием Боже́ственнаго зако́на объя́т бы́в и непра́веднаго разсуди́в пра́ведное, о́тче Епифа́ние, обра́зно прия́л еси́ спаси́тельную ве́ру Тро́ическую, я́коже от Боже́ственнаго проразуме́ния.

Сла́ва Отцу́ и Сы́ну и Свято́му Ду́ху:

Цели́тель пло́ти же и души́, богови́ден бы́сть тебе́ челове́к, подъяре́мником твои́м стра́стное уби́л е́сть стремле́ние, и исцели́ души́ неве́рное мудрова́ние.

И ны́не и при́сно и во ве́ки веко́в. Ами́нь.

Богородичен: Ве́сь о́браз мо́й прие́м, и́же во о́бразе Бо́жии пе́рвее зри́мый, ве́сь обнови́л е́сть, во Твою́ утро́бу боголе́пно все́лься, Чи́стая. Те́мже Богоро́дицу ве́рою Тя́ вси́ сла́вим.

Пе́снь 3.

Ирмос: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Припев: Святи́телю о́тче Епифа́ние, моли́ Бо́га о нас.

Черну́ оде́жду ви́дев пода́вшаго, проси́вшу ми́лости, теле́сныма очи́ма, све́тлою же ри́зою оде́яна разу́мно узре́в, Боже́ственною благода́тию просвети́лся еси́ к ве́ре непоро́чней.

Припев: Святи́телю о́тче Епифа́ние, моли́ Бо́га о нас.

Слы́шав глаго́лы благочести́выя, ве́щи возгнуша́лся еси́ у́бо, и житие́ возжела́в невеще́ственно, я́ко и кро́ви соприча́стну твое́й и ра́зума прича́стну прии́м сестру́, яви́стася супру́га блаже́нная.

Сла́ва Отцу́ и Сы́ну и Свято́му Ду́ху:

Ме́ртвых помышле́ний отврати́вся, преблаже́нне Епифа́ние, возжела́л еси́ живо́му служи́ти Бо́гу и к Боже́ственному хра́му ве́рно прите́кл еси́, прие́м о́браз све́тлый, пребога́те, ме́ртвых твои́х явля́я отпаде́ние.

И ны́не и при́сно и во ве́ки веко́в. Ами́нь.

Богородичен: Святы́х Свята́го Христа́ свя́то породила́ еси́, Святы́ни свято́е селе́ние, во святы́х почива́ющаго, Ему́же вопие́м: Свята́ Це́ркви одушевле́нная пречи́стыя сла́вы Твоея́, Человеколю́бче.

Седа́лен, гла́с 8.

Но́г твои́х обу́щи, я́коже Моисе́й, во святе́м ме́сте отложи́в, Боже́ственным та́йнам научи́лся еси́ духо́вным и, воздержа́ния боле́зньми умертви́в те́ло твое́, пресла́вных чуде́с тва́рь испо́лнил еси́. Те́мже и Богодохнове́ннаго Писа́ния неизрече́нная все́м благоразсуди́л еси́, богоно́се о́тче на́ш, святи́телю Епифа́ние, моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святи́телю о́тче Епифа́ние, моли́ Бо́га о нас.

Моли́твенник, я́коже ра́б, присту́пль ко креще́нию, сыноположи́лся еси́ и́м и насле́дник и́стинен Бо́жий, Епифа́ние, и Христу́ снасле́дник бы́л еси́, боголе́пно Тому́ пожи́в.

Припев: Святи́телю о́тче Епифа́ние, моли́ Бо́га о нас.

Зри́т твое́ многоукра́шено лице́ и неизрече́нною Па́стырь сла́вою и венце́м благоле́пным сла́вную главу́ твою́ па́че естества́ венча́ну, сла́вне, чи́стаго твоего́ се́рдца о́бразы.

Припев: Святи́телю о́тче Епифа́ние, моли́ Бо́га о нас.

Бы́л еси́ прия́телище Боже́ственныя благода́ти, преподо́бне, и расточи́л еси́ му́дре бога́тство вре́менное Христу́, и, име́нием небе́сным обога́щся, некра́домое сокры́л еси́, я́коже разу́мный судия́, Епифа́ние.

Сла́ва Отцу́ и Сы́ну и Свято́му Ду́ху:

Юных отве́ргл еси́ в ю́ности мудрова́ние, укре́пль же ся ста́рческими от му́дрых и разу́мных, стра́хом, блаже́нне, боже́ственным, поуче́нием слове́с духо́вных рачи́тель прему́дрости бы́л еси́.

И ны́не и при́сно и во ве́ки веко́в. Ами́нь.

Богородичен: Святы́х Свята́я Богоро́дице Всепе́тая, ча́яние язы́ков и спасе́ние ве́рных, из Тебе́ возсия́ Изба́витель, и Жизнода́вец, и Госпо́дь, Его́же моли́ спасти́ся рабо́м Твои́м.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Припев: Святи́телю о́тче Епифа́ние, моли́ Бо́га о нас.

Преподо́бно твое́ чре́во хле́бом и водо́ю утесни́л еси́, я́ко ва́риво име́в со́ль, и стра́сти удержа́л еси́ пло́ти, во пло́ти житию́ безпло́тных подо́бяся.

Припев: Святи́телю о́тче Епифа́ние, моли́ Бо́га о нас.

Уще́дрил еси́ та́ющих в жа́жди зно́я и зно́й премени́л еси́, боголе́пно зна́мения начина́я, я́ко служи́тель изря́ден, твоему́ подо́бяся Влады́це, вино́ в во́ду преложи́л еси́, блаже́нне.

Сла́ва Отцу́ и Сы́ну и Свято́му Ду́ху:

Избе́гл еси́ тщи́я челове́к сла́вы и в пусты́ню, я́коже тво́й Влады́ка, всели́лся еси́, искуше́нии, му́дре, Влады́чними к боре́нию неви́димых неможе́ние твое́ укрепля́я.

И ны́не и при́сно и во ве́ки веко́в. Ами́нь.

Богородичен: Сло́во Боже́ственное сло́вом во утро́бе вмести́ла еси́ па́че сло́ва, Богоро́дице, Того́ у́бо моли́ от безслове́сных дея́ний и сласте́й смертоно́сных свободи́ти рабы́ Твоя́.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святи́телю о́тче Епифа́ние, моли́ Бо́га о нас.

Бесо́встии тя́ подо́бницы окружи́вше, ага́рянстии вну́чата, Влады́це же подо́бяся твоему́, супроти́вящагося возблагоде́тельствовал еси́ и све́тло показа́л еси́, о́тче, друго́е о́ко.

Припев: Святи́телю о́тче Епифа́ние, моли́ Бо́га о нас.

Соде́тель тво́й, в тебе́ почи́вый, Ду́ха тя́ орга́н и бо́га, я́коже Моисе́я, фарао́ну показа́, ара́вским жили́щем: вои́стинну бо яви́лся еси́, о́бразу Сего́ подо́бяся.

Сла́ва Отцу́ и Сы́ну и Свято́му Ду́ху:

Сотрясе́ ассири́йскаго царя́, ду́х гоня́щаго, бы́сть же ве́стник твое́й, о́тче, доброде́тели и Боже́ственныя благода́ти, и́бо того́ ве́сть сла́вити Бо́г сла́вящия.

И ны́не и при́сно и во ве́ки веко́в. Ами́нь.

Богородичен: Веселя́тся о Тебе́, Де́во Пречи́стая, ро́да на́шего пра́отцы, Еде́м восприе́мше Тобо́ю, его́же преступле́нием погуби́ша: Ты́ бо Чиста́ и пре́жде рождества́, и по рождестве́ еси́.

Конда́к, гла́с 4.

Священнонача́льник чу́дную дво́ицу восхва́лим, ве́рнии, по до́лгу, с Ге́рманом боже́ственнаго Епифа́ния: си́и бо попали́ша безбо́жных язы́ки, догма́ты прему́дрейшия возло́жше все́м, правосла́вно пою́щим при́сно благоче́стия вели́кое та́инство.

Икос:

Яко свяще́нных добро́ту и сла́ву правосла́вных, дво́ицу святу́ю почти́м досто́йно: си́и бо яви́шася на́м столпи́ утвержде́ния на враги́ неви́димыя и ви́димыя всегда́, ве́ры же столпи́ непрекло́ннии и Це́ркве украше́ние красно́. Его́же нося́щи, пра́во исправля́ет, у́мно вопию́щи: возвесели́ся во мне́ ду́х мо́й вои́стинну, оде́жду мою́, я́коже пре́жде, восприе́мши, ю́же еретицы́ растерза́ша, не пою́ще благоче́стия вели́кое та́инство.

Пе́снь 7.

Ирмос: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святи́телю о́тче Епифа́ние, моли́ Бо́га о нас.

От Боже́ственныя десни́цы прие́м чуде́с да́р, прося́щим у тебе́ ту́не, о́тче, исцеле́ния все́м разда́л еси́, я́коже Влады́ка тебе́ повеле́, хва́льный отце́в Бо́г и препросла́влен.

Припев: Святи́телю о́тче Епифа́ние, моли́ Бо́га о нас.

Па́дает, на ногу́ твое́ю валя́яся, ассири́йский ца́рь, стыде́тися бо доброде́тели ве́сть и сопоста́т. Вся́каго же покаря́ет Еди́ный, во святы́х почива́я, хва́льный отце́в Бо́г и препросла́влен.

Припев: Святи́телю о́тче Епифа́ние, моли́ Бо́га о нас.

Сло́во молчи́т, исправле́ния твоя́ и чуде́с мно́жество ника́коже возмо́же сказа́ти, всеблаже́нне: песка́ бо премину́ет, е́же Христо́с тебе́ дарова́, хва́льный отце́в Бо́г и препросла́влен.

Сла́ва Отцу́ и Сы́ну и Свято́му Ду́ху:

Тро́ичен: Трисве́тлая Еди́нице, неоску́дный безме́рныя бе́здны Све́те, назира́еши Твоя́ певцы́: превозноси́мый Безнача́льный Отче, и Сы́не Собезнача́льный, и Ду́ше Соприсносу́щный, хва́льный отце́в Бо́г и препросла́влен.

И ны́не и при́сно и во ве́ки веко́в. Ами́нь.

Богородичен: Ты́, Исто́чник жи́зни ро́ждши, умерщвле́нна мя́ лю́те бесо́вскими наведе́нии, Чи́стая Всенепоро́чная, оживи́ моли́твами Твои́ми, Твоему́ Сы́ну воспева́юща: хва́льный отце́в Бо́г и препросла́влен.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Епифа́ние, моли́ Бо́га о нас.

Ты́ сло́вом обличи́л еси́ му́дре ересе́й пре́лесть и сия́нием благоче́стия отгна́л еси́ ту́ю, вопия́, Епифа́ние: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Епифа́ние, моли́ Бо́га о нас.

На престо́л возне́сся высо́к, над страстьми́ бо ца́рствовал еси́, пло́ть же удержа́в, ты́ упа́сл еси́ Христо́во ста́до, зовы́й: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Епифа́ние, моли́ Бо́га о нас.

Да лику́ет вся́ко мы́сленное и слове́сное существо́ в па́мять святи́теля и уго́дника Христо́ва, ве́рно зову́щее: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Богоуго́дно ты́ богосло́вив, я́ко основа́ние уче́ний все́м богосло́вие оста́вил еси́ твое́, и́мже, о́тче, пое́м: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ра́дуйся, престо́ле сла́вный Бо́жий, ра́дуйся, ве́рных стено́, Еюже све́т су́щим во тме́ возсия́, Христо́с. И, Тя́ блажа́ще, вопие́м: вся́ дела́, Де́ву благослови́те и славосло́вите пречи́стое Ея́ Рождество́.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святи́телю о́тче Епифа́ние, моли́ Бо́га о нас.

Преде́л де́тели житие́ твое́ и виде́ния Боже́ственнаго, о́тче, словеса́ твоя́ богому́дрым вои́стинну лю́дем оста́вися, Епифа́ние блаже́нне сла́вне. Те́мже тя́ по достоя́нию, восхваля́юще, велича́ем.

Припев: Святи́телю о́тче Епифа́ние, моли́ Бо́га о нас.

Неве́сте Христо́ве предста́, Це́ркви, сла́вне Епифа́ние, и ути́ши я́же на ню́ воздви́женую, моли́твами твои́ми, свире́пую бу́рю, я́ко име́я дерзнове́ние ко Влады́це и Человеколю́бцу.

Сла́ва Отцу́ и Сы́ну и Свято́му Ду́ху:

Тро́ичен: Царю́ царе́й, Свята́я Единонача́льная Тро́ице, все́ми влады́чествующая, пою́щим Тя́ согреше́ний проще́ние и жития́ всего́ устрое́ние неотъе́млемо пода́ждь Епифа́ния моли́твами.

И ны́не и при́сно и во ве́ки веко́в. Ами́нь.

Богородичен: О, па́че ума́ чуде́с Твои́х! Бо́жие бо Сло́во, пло́ть бы́вшее, еди́на родила́ еси́ на́м па́че естества́, Ма́ти Де́во, вся́ческая Боже́ственною во́лею я́ве содержа́ща, Его́же о все́х умоли́.

Свети́лен.

Прииди́те, ве́рнии, почти́м боже́ственное и всесвяще́нное иера́рхов совокупле́ние, в пе́ниих пе́сненных боже́ственнаго Епифа́ния и Ге́рмана, разори́вшия ересе́й омраче́ние и благоче́стия заре́ю просве́щшия всю́ тва́рь.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Епифа́ние, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.