24 мая.

Канон святителю Никодиму архиепископу Сербскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́, Яже веще́й Истина, сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Никоди́ме, моли́ Христа́ Бо́га, спасти́ся душа́м на́шим.

Кано́н. Гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святи́телю о́тче Никоди́ме, моли́ Бо́га о нас.

Сло́во Собезнача́льное, Ду́ха Твоего́ пла́менем согре́й се́рдце мое́ и да́ждь ми́ ро́су благода́ти Твоея́, воспе́ти святи́теля Твоего́, его́же благода́тию и чудесы́ Ты́ просла́вил еси́.

Припев: Святи́телю о́тче Никоди́ме, моли́ Бо́га о нас.

Иже Всеви́дящее О́ко Бо́жие, ви́дев души́ твоея́, о́тче, благоро́дие и чистоту́, от мирска́го смуще́ния изво́дит тя́ ко святе́й Афо́нстей горе́, стра́нствовати устроя́ет, отту́дуже тя́ па́стыря Своему́ ста́ду посыла́ет.

Припев: Святи́телю о́тче Никоди́ме, моли́ Бо́га о нас.

Иже Свои́м проразуме́нием ди́внаго Па́вла на пропове́дание Избра́вый и тебе́, о́тче, избира́ет во святе́й Це́ркви, и сию́ сладча́йшими словесы́ веща́ньми просвети́л еси́, святи́телю богому́дре.

Сла́ва Отцу́ и Сы́ну и Свято́му Ду́ху:

Обре́те свяще́нную твою́ ду́шу сия́ние непристу́пное, очище́нну от страсте́й тиме́ния, те́мже всели́выйся в тя́ Христо́с показа́ тя, о́тче, свети́льника, науча́юща земны́я концы́.

И ны́не и при́сно и во ве́ки веко́в. Ами́нь.

Богородичен: Иже в Сина́и купина́ богови́дцу Моисе́ю прообразова́ше Твое́ рождество́, Богоро́дице, и́мже стра́сти челове́ческия и служе́ние и́дольское потреби́ся, те́мже Твоего́ Сы́на правосла́вно велича́ем.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святи́телю о́тче Никоди́ме, моли́ Бо́га о нас.

Целому́дрием, и пра́вдою, и му́жеством духо́вным вооружи́лся еси́, я́коже колесни́цею носи́мь к небе́сным селе́ниям преше́л еси́, Никоди́ме.

Припев: Святи́телю о́тче Никоди́ме, моли́ Бо́га о нас.

Очи́стил еси́ о́ко свое́ мы́сленное, узре́в бо та́инства духо́вная, я́ко досто́ин, и Бо́жиих тва́рей, святи́телю, и, я́ко пра́ведник, прекра́сное пра́вило свяще́нства показа́лся еси́.

Припев: Святи́телю о́тче Никоди́ме, моли́ Бо́га о нас.

Ве́сь в глубину́ богосло́вия вше́л еси́ и свои́ми уче́нии ста́до свое́ просвети́л еси́, пути́ и́стинному наставля́я и науча́я, преблаже́нне, к любви́ боже́ственней си́х возводя́.

Сла́ва Отцу́ и Сы́ну и Свято́му Ду́ху:

К дея́нию виде́ние, о́тче, приложи́л еси́, те́мже вла́сть церко́вную подае́т ти́ Христо́с, ея́же у́бо смы́сл я́ко таи́нник небе́сный разуме́вый, ве́л еси́ лю́ди твоя́ в Ца́рствие Бо́жие, преблаже́нне о́тче Никоди́ме.

И ны́не и при́сно и во ве́ки веко́в. Ами́нь.

Богородичен: Твоему́ лицу́, Богома́ти Влады́чице, я́ко вои́стину мо́лятся бога́тии лю́дстии: ца́рие бо, багряни́цею и венце́м оде́яннии, с людьми́ свои́ми Твоему́ Сы́ну и Бо́гу Хода́таицу и Моли́твенницу Тя́ почита́ют.

Седа́лен, гла́с 8.

Яко река́ прему́дрости, твоя́ уста́, блаже́нне, источа́ют на́м струи́ богосло́вия: мра́к бо неве́дения отгоня́еши и просвеща́еши ду́ши, грехо́м омраче́нныя, от глубины́ отча́яния возводя́ я́, святи́телю, те́мже па́мять твою́ усе́рдно ублажа́ем, Христу́ моли́ся грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святи́телю о́тче Никоди́ме, моли́ Бо́га о нас.

Па́вла апо́стола боже́ственная уче́ния испо́лнил еси́, святи́телю свяще́ннейший, в себе́ бо стяжа́л еси́ плоды́ духо́вныя: любы́, ра́дость, ми́р, долготерпе́ние, бла́гость, ве́ру, кро́тость, воздержа́ние и смире́ние, с си́ми бо бесо́вская низложи́л еси́ шата́ния.

Припев: Святи́телю о́тче Никоди́ме, моли́ Бо́га о нас.

В мо́ре страсте́й ду́ши челове́ков па́дшия извле́кл еси́ и ко приста́нищу спасе́ния си́х наставля́я, я́ко па́стырь и́стинен и святи́тель богоприя́тен.

Припев: Святи́телю о́тче Никоди́ме, моли́ Бо́га о нас.

Ми́лостынею подо́бяся своему́ Влады́це Христу́, к ни́щим свое́ благоутро́бие просте́рл еси́, оби́димых засту́пник и па́дших исправле́ние и все́м, о́тче, спаси́тельное приста́нище бы́л еси́.

Сла́ва Отцу́ и Сы́ну и Свято́му Ду́ху:

Житие́ твое́, боже́ственною доброде́телию укра́шено, уясня́ет ве́рныя, ра́ка же моще́й твои́х облиста́ет ны́ луче́ю чуде́с, вразумля́я все́х, с ве́рою приступа́ющих к не́й и ве́рно, о́тче, восхваля́ющих тя́.

И ны́не и при́сно и во ве́ки веко́в. Ами́нь.

Богородичен: Добро́ту Тя́ Иа́ковлю, святи́телем сла́ву и хвалу́, Сы́н Тво́й и Бо́г на́ш Засту́пницу от искуше́ний лю́дем Свои́м дарова́л е́сть.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святи́телю о́тче Никоди́ме, моли́ Бо́га о нас.

Якоже Моисе́й вели́кий, преше́л еси́ мо́ре страсте́й и, ве́рою жезла́ опира́яся, я́ко Илия́, на доброде́тель, четвероко́нную колесни́цу, все́л еси́, Никоди́ме свяще́нне.

Припев: Святи́телю о́тче Никоди́ме, моли́ Бо́га о нас.

Петро́ву ре́вность и дерзнове́ние Па́влово стяжа́в, святи́телю, мирска́я оста́вил еси́, я́коже се́нь, преходя́ вся́ смуще́ния, те́мже все́х Влады́ка высоча́йший престо́л Своея́ Це́ркве тебе́ дарова́л е́сть.

Припев: Святи́телю о́тче Никоди́ме, моли́ Бо́га о нас.

Ре́вность боже́ственную име́я, я́ко Илия́ вели́кий, гне́вом дыха́еши на враги́ Креста́ Христо́ва и си́х отгоня́еши, я́коже во́лки хи́щныя, от своего́ ста́да, па́стырю блаже́нне.

Сла́ва Отцу́ и Сы́ну и Свято́му Ду́ху:

Облича́я все́х, изря́дне, безбо́жное еретико́в хуле́ние, свое́ ста́до науча́еши Тро́ицу славосло́вити во Еди́нице и Еди́ном Божестве́.

И ны́не и при́сно и во ве́ки веко́в. Ами́нь.

Богородичен: Угль, его́же ви́де Иса́ия, от Твои́х ложе́сн происхо́дит, мирски́я грехи́ взыма́я; Его́же моли́, Влады́чице, очи́стити прегреше́ния на́ша.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святи́телю о́тче Никоди́ме, моли́ Бо́га о нас.

Напита́л еси́ а́лчущия ду́ши ра́зума, хле́б небе́сный си́м предлага́я — сло́во Бо́жие, вку́пе же и чу́вственный, блаже́нне: я́ко оте́ц ми́лостивый, ни́щим и бога́тым бы́л еси́.

Припев: Святи́телю о́тче Никоди́ме, моли́ Бо́га о нас.

Якоже друга́го Ио́сифа ве́мы тя́, не Еги́пту житода́теля, но своему́ ста́ду, от Бо́га вруче́нному ти́: Агнца Бо́жия, за ми́р закла́ннаго, раздробля́я, Имже пита́ющеся, сы́нове Бо́жии по прича́стии быва́ем.

Припев: Святи́телю о́тче Никоди́ме, моли́ Бо́га о нас.

Прему́дрость вы́шнюю возлюби́в, от нея́же па́че ме́да услади́лся еси́: доброде́тельми бо и ми́лостынями, я́ко багряни́цею, оде́явся, светле́ешися; ца́рствия Се́рбскаго венце́м украше́ный ца́рь и му́ченик Стефа́н, наста́вника тя́ и отца́ духо́внаго прия́л е́сть, о́тче блаже́нне; его́же к вы́шнему Ца́рствию венцено́сна посла́л еси́.

Сла́ва Отцу́ и Сы́ну и Свято́му Ду́ху:

Смире́ния и́го восприе́м, святи́телю, во все́х бо кре́пок боре́ц показа́лся еси́, Никоди́ме, проти́ву спеша́щим ума́лити сла́ву Христо́ву.

И ны́не и при́сно и во ве́ки веко́в. Ами́нь.

Богородичен: Руно́, е́же Гедео́н узре́, наполня́я росо́ю благода́ти всю́ зе́млю, Твое́ чре́во яви́ся, Пречи́стая Влады́чице: росо́ю благода́ти Сы́на Твоего́ ороси́ти тва́рь моли́ся, Богоро́дице.

Конда́к, гла́с 4.

Возше́дый на высоту́ доброде́телей, и́миже Бо́гу прибли́жився, о на́с моли́, преосвяще́нне, любо́вию тя́ сла́вящих, я́ко па́стыря и учи́теля.

Икос:

Вели́кия доброде́тели исправле́ния показа́л еси́ на́м, святи́телю, милосе́рд же бу́ди на́м, от усе́рдия ма́лое тебе́ благодаре́ние принося́щим: я́ко чадолюби́вый оте́ц, на́шу не́мощь проще́нию сподобля́я, зане́ име́еши дерзнове́ние ве́лие ко Го́споду; сего́ ра́ди и мы́, ча́да твоя́, ублажа́ем па́мять твою́, я́ко и́стиннаго па́стыря и учи́теля.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святи́телю о́тче Никоди́ме, моли́ Бо́га о нас.

Се́ повеству́ет я́ко вои́стинну твое́ усе́рдие, к Бо́гу бы́вшее, и теплоту́ ве́ры честны́й хра́м, его́же во сла́ву Живонача́льныя Тро́ицы созда́л еси́ и Тоя́ уго́днику, добропобе́дному му́ченику Дими́трию, с ни́мже Христо́вы сла́вы насле́дник яви́лся еси́, Никоди́ме блаже́нне.

Припев: Святи́телю о́тче Никоди́ме, моли́ Бо́га о нас.

Па́стырским жезло́м, свя́те, упа́сл еси́ от Бо́га вруче́нное тебе́ ста́до, си́х приводя́ к па́житем живоно́сным, от волко́в мы́сленных те́х сохраня́я.

Припев: Святи́телю о́тче Никоди́ме, моли́ Бо́га о нас.

Все́ свое́ жела́ние к боже́ственней во́ле покори́л еси́ и все́м вся́ бы́л еси́, да Христо́ву Це́рковь соблюде́ши, себе́ сама́го о́браз предлага́я.

Сла́ва Отцу́ и Сы́ну и Свято́му Ду́ху:

Духодви́жно богодухнове́нный язы́к тво́й собо́рную Це́рковь и ста́до твое́ просвети́л е́сть боже́ственными уче́нии, сего́ ра́ди вопие́м: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Де́вственно трие́ о́троцы, Де́во Пречи́стая, проидо́ша пла́мень седмочи́сленно, Твое́ прообразу́юще рождество́, те́м мо́лим Тя́, Влады́чице: угаси́ пла́мень страсте́й серде́ц на́ших.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святи́телю о́тче Никоди́ме, моли́ Бо́га о нас.

Яко фи́никс доброра́сленный, процве́л еси́ и, я́коже кри́н, благоуха́еши на́ша ли́ца, о́тче, предлага́я на́м доброде́тели твоя́, и́миже наслажда́ющеся, душе́ю просвеща́емся.

Припев: Святи́телю о́тче Никоди́ме, моли́ Бо́га о нас.

Иже к Бо́гу твоего́ отше́ствия па́мять сотворя́ем, мы́, вси́ ча́да твоя́, к Бо́гу тя́, о́тче, предлага́я те́пла моли́твенника: чи́сте бо зри́ши Святу́ю Тро́ицу, Юже о на́с моли́ непреста́нно.

Припев: Святи́телю о́тче Никоди́ме, моли́ Бо́га о нас.

Яко досто́ин святи́тель, архиере́ом же нача́льник и украше́ние, преходя́ к вы́шним селе́ниям, ми́р и благослове́ние ста́ду своему́ дарова́л еси́.

Сла́ва Отцу́ и Сы́ну и Свято́му Ду́ху:

Све́т мы́сленный в тя́ всели́ся, о́тче, свещу́ тя неугаси́му ста́ду твоему́ и всему́ ми́ру поста́ви, Еди́наго Све́та пою́ще, Трисо́лнечнаго Божества́, Его́же превозно́сим во ве́ки.

И ны́не и при́сно и во ве́ки веко́в. Ами́нь.

Богородичен: Дании́л Тя́ ви́де го́ру ве́лию, от нея́же отто́ржеся ка́мень кроме́ ру́к, Пречи́стая, Сло́во Бо́жие, Иже порази́ вся́ и́доли; те́мже мо́лим Тя́: не забу́ди на́с, Влады́чице.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святи́телю о́тче Никоди́ме, моли́ Бо́га о нас.

С весе́лием Ангельстии чи́нове твою́ ду́шу прено́сят в страну́ живы́х и в зе́млю кро́тких, те́ло же твое́ всеосвяще́нное все́х Влады́ка Вседержи́тель благоуха́нием обогати́л е́сть.

Припев: Святи́телю о́тче Никоди́ме, моли́ Бо́га о нас.

Ра́ку моще́й твои́х, преблаже́нне, собо́ри ве́рных обстоя́т, и, зря́ще да́нную тебе́ благода́ть от Бо́га, Тро́ицу Святу́ю прославля́ем, душе́вных и теле́сных страсте́й исцеле́ния прие́млюще.

Припев: Святи́телю о́тче Никоди́ме, моли́ Бо́га о нас.

Яко на земли́ до́бре подвиза́вшася и от Бо́га венча́нна моли́твенника тя́ к Нему́ предлага́ем, я́ко име́я дерзнове́ние, непреста́нно моли́ся о и́же ве́рою и любо́вию почита́ющих и воспева́ющих святу́ю па́мять твою́, изба́витися на́м от напа́стей, и бе́д, и осужде́ния.

Сла́ва Отцу́ и Сы́ну и Свято́му Ду́ху:

Таи́нниче небе́сныя иера́рхии, Святе́й ты ны́не Тро́ице предстоя́ с ли́ки Ангельскими, апо́стол, проро́к, му́ченик же, пра́ведник и патриа́рхов, помяни́ на́с, воспева́ющих свяще́нную па́мять твою́, Никоди́ме.

И ны́не и при́сно и во ве́ки веко́в. Ами́нь.

Богородичен: По проро́честву Твоему́, Богома́ти Чи́стая, Сы́н Тво́й и Бо́г на́ш сотвори́ с Тобо́ю вели́чия, Си́льный, Де́вою Тя́ по рождестве́ показа́ и на́м Засту́пницу яви́ Тя́, те́мже Тя́, вси́ ро́ды, велича́ем.

Свети́лен.

Светоно́сна, я́ко у́тро, возсия́ на́м му́драго святи́теля па́мять, ду́ши благочести́вых веселя́щая. Воспое́м же изве́дшаго све́т из тмы́, Христа́ Бо́га на́шего, Ему́же покланя́емся со Отце́м и Ду́хом Святы́м.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Никоди́ме, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.