24 мая.

Канон святому священномученику Мокию

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодохнове́нне, в виде́ния восхо́д, сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Моќие. Моли́ Христа́ Бо́га спасти́ся душа́м на́шим.

Кано́н, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Священному́чениче Мо́кие, моли́ Бо́га о нас.

К широте́, блаже́нне, твои́х похва́л напра́ви ума́ моего́ тесноту́ и све́т низпосли́ се́рдцу моему́, пою́щу светоно́сную и сла́вную па́мять твою́, му́чениче прехва́льне.

Припев: Священному́чениче Мо́кие, моли́ Бо́га о нас.

Звезду́ многосве́тлую Це́рковь познава́ет тя́, тоя́ тве́рдь уясня́ющаго све́тлостию страда́ний твои́х, преблаже́нне, му́чеников украше́ние, Моки́е всему́дре.

Припев: Священному́чениче Мо́кие, моли́ Бо́га о нас.

Твои́ми кровьми́ безбо́жие разори́л еси́, по́двиги бра́нными враги́ разрази́л еси́, снеда́емь огне́м, нече́ствующих всю́ попали́л еси́ суету́.

Сла́ва Отцу́ и Сы́ну и Свято́му Ду́ху:

Желе́зом стру́жемь и огне́м оскорбля́емь, зла́та светле́йши, Моки́е, бы́л еси́, изображе́ние Христо́вых страсте́й и ве́ры побо́рник, богоблаже́нне.

И ны́не и при́сно и во ве́ки веко́в. Ами́нь.

Богородичен: Ра́дости на́м Хода́таица, я́ко прии́мши исполне́ние всего́ Божества́, яви́лася еси́, Всенепоро́чная. Те́мже вси́ Тебе́, — ра́дуйся, — я́коже Ангел, согла́сно взыва́ем, Богора́дованная.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Священному́чениче Мо́кие, моли́ Бо́га о нас.

Обнаже́н, к подвиго́м и к боре́нием отлучи́лся еси́, си́лою Креста́ не́мощь твою́ укрепля́я, те́мже велехва́льнаго зми́я низложи́л еси́.

Припев: Священному́чениче Мо́кие, моли́ Бо́га о нас.

Сме́ртию вре́менною безсме́ртное благосла́вие, боле́зней ра́ди плотски́х ве́чное наслажде́ние обре́л, я́коже возжела́л еси́, му́чениче непобеди́ме.

Сла́ва Отцу́ и Сы́ну и Свято́му Ду́ху:

К нетле́нию от тли́ вои́стинну преше́л еси́ кра́йнею любо́вию, ра́достно вмести́лся еси́, Ангелом соприча́стник бы́в, Моки́е.

И ны́не и при́сно и во ве́ки веко́в. Ами́нь.

Богородичен: Тя́ прему́дрость Бо́жия пречи́стое селе́ние обре́тши, от Твои́х чи́стых крове́й воплоща́ется и по рождестве́ нетле́нну показа́.

Седа́лен, гла́с 4.

Наро́читый все́м страстоно́сец, врага́ до конца́ смири́вый и о́гненное муче́ние претерпе́вый кре́пко, Моки́й сла́вный, похвала́ми да почте́н бу́дет: се́й бо претерпе́ нестерпи́мыя му́ки и, усе́чен бы́в во главу́, ко Христу́ венцено́сец взы́де, ра́дуяся.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Священному́чениче Мо́кие, моли́ Бо́га о нас.

Ко́жаных ри́з ве́тхаго умерщвле́ния совле́клся еси́, блаже́нне, всю́ду те́лом стру́жемь, во оде́жду нетле́ния обле́клся еси́ и наслажда́ешися дре́ва жи́зни, ра́дуяся.

Припев: Священному́чениче Мо́кие, моли́ Бо́га о нас.

Украси́лся еси́ благозра́чием доброде́телей, пресла́вне, уясни́лся еси́ боле́зньми добротво́рнаго страда́ния, уподо́бився Ангелом, я́коже бо безпло́тен, сломле́ния и ра́ны претерпе́л еси́.

Сла́ва Отцу́ и Сы́ну и Свято́му Ду́ху:

Безбо́жия глубина́ тя́ ника́коже погрузи́: держа́вною бо руко́ю тя́ Соде́тель спасе́, ре́ки му́к не поколеба́ша души́ твоея́ столпа́, му́дре, непоколе́блемаго.

И ны́не и при́сно и во ве́ки веко́в. Ами́нь.

Богородичен: Иже во́лею вся́ созда́вый хоте́нием от Твои́х крове́й пло́ть Себе́ созда́ и во двою́ существу́ Еди́н происхо́дит, Ма́ти Де́во, спаса́я на́с бла́гостию.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священному́чениче Мо́кие, моли́ Бо́га о нас.

Тя́ си́лу держа́вну на врага́ неви́димаго му́ченик Тво́й стяжа́в, некре́пкую сего́ кре́пость, Христе́, низложи́.

Припев: Священному́чениче Мо́кие, моли́ Бо́га о нас.

Твои́ми кровьми́ земля́ освяти́ся, блаже́нне, твои́ми ра́нами уязви́ся де́монский по́лк, богому́дре досточу́дне.

Сла́ва Отцу́ и Сы́ну и Свято́му Ду́ху:

Тя́ иму́щи све́тла би́сера и че́стна во увязе́нии свое́м, честна́я Це́рковь, всеблаже́нне, украша́ется.

И ны́не и при́сно и во ве́ки веко́в. Ами́нь.

Богородичен: Све́т безле́тный на́м, Отчее сия́ние, родила́ еси́ под ле́том, бога́тством бла́гости бы́вша, Всенепоро́чная.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священному́чениче Мо́кие, моли́ Бо́га о нас.

Любо́вию, и наде́ждею, и ве́рою вооружи́ Подвигополо́жник вели́кий кре́пка ору́жника благоче́стия. Сего́ ра́ди пре́лести низложи́ утвержде́ние.

Припев: Священному́чениче Мо́кие, моли́ Бо́га о нас.

Любве́ плотски́я у́м отлучи́л еси́ и, Жениха́ добро́ты неизрече́нныя зря́, му́ки нивочто́же вмени́л еси́, прехва́льне.

Сла́ва Отцу́ и Сы́ну и Свято́му Ду́ху:

Немо́кренно муче́ния преше́л еси́ пучи́ну и к вы́шним приста́нищем благи́х со все́м бога́тством устреми́лся еси́, побе́ды вене́ц прие́м.

И ны́не и при́сно и во ве́ки веко́в. Ами́нь.

Богородичен: Бе́здну милосе́рдия, Христа́, Ро́ждшая, от грехо́вныя глубины́ мя́, я́ко ми́лостива Еди́на, возведи́ и от бу́ри помышле́ний сопроти́вных спаси́.

Конда́к, гла́с 8.

Вооружи́вся щито́м ве́ры, нечести́вых ополче́ния сте́рл еси́, священному́чениче, и вене́ц от Христа́ взя́л еси́, Моки́е, те́м и, со Ангелы ра́дуяся, спаса́й от бе́д пою́щия тя́, моля́ непреста́нно о все́х на́с.

Икос:

Име́яй ду́шу скве́рнену и те́ло от безчи́сленных собла́зн и бу́рею лю́те погружа́емь, не сме́ю глаго́лати, ниже́ могу́, твоея́ похвалы́, блаже́нне священному́чениче, но я́ко исто́чник сы́й, мно́гия ми́ отмы́й собла́зны и во отверзе́ние усто́м сло́во да́ти моли́ся, мо́лишися бо непреста́нно о все́х на́с.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Священному́чениче Мо́кие, моли́ Бо́га о нас.

В пе́щь вве́ржен бы́в, обре́л еси́ тя́ ороша́ющаго Сло́ва во зра́це Ангельсте, ю́ноши три́ спа́сшаго, вопия́, преблаже́нне: препе́тый Го́споди, Бо́же оте́ц на́ших, благослове́н еси́.

Припев: Священному́чениче Мо́кие, моли́ Бо́га о нас.

На мечи́, на о́гнь и на разже́нныя сосу́ды, му́чениче, противоста́л еси́ му́жески, си́лою Боже́ственною укрепля́емь, и вопия́л еси́, ра́дуяся: препе́тый Го́споди, Бо́же оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

Кро́вными твои́ми то́ки угаси́л еси́ пре́лести пла́мень, терпе́ния же огне́м зажже́нное хвра́стие попали́л еси́ и́дольское, поя́: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Тя́, безсме́ртнаго исто́чника во́ду оставле́ния еди́ну источи́вшую на́м, Иису́са Христа́, Присноде́во, воспева́ем, зову́ще: Бо́же оте́ц на́ших, благослове́н еси́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Священному́чениче Мо́кие, моли́ Бо́га о нас.

Порфи́ру от твои́х крове́й очервлени́в и се́ю обложе́н, нося́ же вме́сто ски́птра ору́жие непобеди́мое, сца́рствуеши, Моки́е, Царю́ все́х, Го́спода воспева́йте, дела́, зовы́й, и превозноси́те Его́ во вся́ ве́ки.

Припев: Священному́чениче Мо́кие, моли́ Бо́га о нас.

Яко со́лнце, дне́сь ми́ру па́мять твоего́ страда́ния возсия́, вся́ озаря́ющи и мра́к отгоня́ющи де́монския зло́бы, сла́вне Моки́е, в не́йже ра́достно тя́ пое́м, благословя́ще Христа́ во ве́ки.

Сла́ва Отцу́ и Сы́ну и Свято́му Ду́ху:

Устро́ив колесни́цу, богому́дре, твоего́ страда́ния кро́вию, взя́тся к небе́сным, дости́гл еси́ чи́ны мы́сленных си́л и страда́лец ли́ки, с ни́миже предстоя́ Тро́ице, всегда́ моли́ о пою́щих тя́.

И ны́не и при́сно и во ве́ки веко́в. Ами́нь.

Богородичен: В тебе́ ви́дена бы́ша ше́ствия Вели́каго Царя́ си́л, две́рь небе́сная, Отрокови́це Неискусобра́чная, Яже челове́ков смеше́ние озе́мльствовавшая. Те́мже Тя́, Де́ву, пое́м и превозно́сим во ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Священному́чениче Мо́кие, моли́ Бо́га о нас.

Пребога́т, и по́лн просвеще́ния бы́в, и стра́стию украша́емь, вну́трь вмести́лся еси́ черто́га, с му́дрыми де́вами веселя́ся, и добро́ту зри́ши недомы́сленную, ея́же све́тлость пре́жде стяжа́л еси́.

Припев: Священному́чениче Мо́кие, моли́ Бо́га о нас.

Во граде́х ины́х предпострада́в, сла́вне, византи́йский гра́д дости́гл еси́, му́чениче, в не́мже твои́х по́двигов кончи́ну и побе́ды вене́ц прия́л еси́, я́ко страда́лец непобеди́мь, его́же огражда́еши мольба́ми твои́ми.

Сла́ва Отцу́ и Сы́ну и Свято́му Ду́ху:

Обре́л еси́ возме́здие я́ко вои́стинну боле́зней твои́х Ца́рство недви́жимое, ста́л еси́, жела́нием, всеблаже́нне, дре́ву живо́тному присту́пль, и бо́г по прича́стию бы́в, Моки́е му́чениче досточу́дне.

И ны́не и при́сно и во ве́ки веко́в. Ами́нь.

Богородичен: Глаго́лом после́дующе Твои́м, всегда́ Тя́, Де́во, ублажа́ем: Сло́во бо на́м неизрече́нно, от Отца́ пре́жде ве́к возсия́вшее, родила́ еси́, я́ко Са́м благоизво́ли, Его́же досто́йно велича́ем.

Молитва

О святы́й уго́дниче Бо́жий, священному́чениче Мо́кие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.