22 мая.
Канон преподобному Шио Мгвимскому
![Канон преподобному Шио Мгвимскому Канон преподобному Шио Мгвимскому](img_i/093.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 8:
В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Ши́о, дух твой.
Кано́н свята́го, глас 8.
Песнь 1
Ирмос: Внеза́пу дре́вле мо́ре Изра́иль,/ я́ко в пусты́ни, ного́ю пра́шною проше́д, вопия́ше:/ Го́сподеви Бо́гу на́шему, кре́пкому в бране́х, пои́м песнь но́вую.
Припев: Преподобне отче Ши́о, моли Бога о нас!
Осени́ твое́ю благода́тию от сокро́вищ Госпо́дних,/ и́хже прия́л еси́ бога́тно,/ во е́же плод усте́н мои́х жела́нием ду́ха принести́ ти, Ши́о.
Припев: Преподобне отче Ши́о, моли Бога о нас!
Десни́ца Госпо́дня пома́за тя,/ Его́же Дух даде́ ти жизнь/ и наста́ви тя позна́ти испыта́ния та́инств Его́ и храни́ти за́поведи Его́,/ и́хже в свя́тости соблю́л еси́, Ши́о.
Припев: Преподобне отче Ши́о, моли Бога о нас!
Я́коже А́вель, пе́рвыя плоды́ прине́сл еси́ Го́споду,/ дух и ра́зум со все́ю пра́вдою,/ да яви́шися побо́рник с пе́рвыми, треблаже́нный о́тче Ши́о.
Слава: Ны́не, обстоя́ще ра́ку моще́й твои́х, преподо́бне Ши́о,/ про́сим тя умоли́ти Бо́га,/ воздежи́ святы́я ру́це твои́ и вознеси́ Ему́ на́ша моле́ния.
И ныне: Сло́ва О́тчаго селе́ние, Мари́е,/ Тобо́ю бо Челове́ком Бог среди́ челове́ки яви́ся,/ Всесвята́я Богоро́дице, бу́ди ми́лостива к нам, Тебе́ покланя́ющимся.
Песнь 3
Ирмос: Утвержде́й, Сло́ве, Небеса́ сло́вом,/ утверди́ наш ум и се́рдце,/ во е́же сла́вити Тя, Спа́са душ на́ших.
Припев: Преподобне отче Ши́о, моли Бога о нас!
Ено́ха Бог просла́ви, и сей преста́вися во сла́ве еди́ножды;/ ты же, ди́вне, ки́йждый день преставля́лся еси́, сме́ртный час во уме́ помышля́я,/ и сло́вом Бо́жиим спаса́лся еси́.
Припев: Преподобне отче Ши́о, моли Бога о нас!
Я́коже Но́я, пра́ведна тя обре́те Бог/ и яви́ отца́ тя втора́го ми́ра, блаже́нне,/ И́же спасе́ лю́ди ковче́гом,/ и тогда́ уте́рянных подвиго́в Новозда́тель благовести́ тя ми́ру голуби́цею.
Припев: Преподобне отче Ши́о, моли Бога о нас!
Си́мово благослове́ние и благу́ю часть прия́л еси́, о Ши́о досто́йне,/ оте́ческим разделе́нием разда́л еси́ нам, сыно́м твои́м,/ при́сно лику́ющим изоби́лием уче́ний твои́х, о́тче.
Слава: Упова́я на тя, тве́рдаго моли́твенника и защи́тника, да не постыди́мся,/ дерзнове́ние бо и́маши пред Бо́гом, о сла́вный о́тче,/ приими́ я́ко же́ртву на́ша моли́твы и испроси́ у Христа́ Бо́га нам ве́лию ми́лость.
И ныне: Сла́внейшая всех Ма́ти Бо́жия, Ра́досте ми́ра,/ принося́щия ве́рно же́ртву Бо́гу и испове́дующия Тя Богоро́дицу/ осени́ Твое́ю благода́тию и моли́твы на́ша испра́ви ко Го́споду.
Песнь 4
Ирмос: Услы́шах, Го́споди, слух Твой и убоя́хся,/ разуме́х неизрече́нное Твое́ смотре́ние/ и просла́вих, Сло́ве, снизхожде́ние Твое́.
Припев: Преподобне отче Ши́о, моли Бога о нас!
Я́коже Авраа́м, услади́лся еси́ хва́льным отше́льничеством,/ и Бог посети́ тя, Ши́о,/ и обетова́ния Его́ удосто́ился еси́,/ и препо́дал еси́ Его́ благослове́ние умноже́нию пото́мства.
Припев: Преподобне отче Ши́о, моли Бога о нас!
Я́коже Исаа́к, ди́вною си́лою свя́зан бысть ра́ди же́ртвы всесожже́ния Бо́гу,/ возве́л еси́ горе́ ра́зум твой,/ отоню́дуже и получи́л еси́ му́дрость.
Слава: О́тче, предста́телю и моли́твенниче, непоколеби́мый Ши́о,/ вознеси́ моле́ния чад твои́х Ми́лостивому Бо́гу/ и испроси́ нам ве́лию ми́лость.
И ныне: Вы́шшая небе́с Ты еси́, Всесвятая Влады́чице, Ма́ти Бо́жия,/ ка́ко хвали́ти Тя земны́м язы́ком?/ То́кмо жела́нием хва́лим Тебе́, Де́во.
Песнь 5
Ирмос: У́тренююще к Тебе́, Человеколю́бцу,/ воспева́ем Тя, Христе́ Бо́же,/ да́руй нам ми́лости Твоя́.
Припев: Преподобне отче Ши́о, моли Бога о нас!
Целому́дрие и свя́тость Ио́сифову услади́л еси́/ и разшири́л еси́ попра́нием еги́петских су́етных страсте́й/ и раздели́л еси́ хлеб пра́вды, Ши́о.
Припев: Преподобне отче Ши́о, моли Бога о нас!
Уподо́бися Моисе́ю любо́вию к бра́тии и ученико́м,/ егда́ умертви́л еси́ еги́петскую не́нависть/ и па́стве твое́й дал еси́ пи́ти от исто́чника жи́зни, Богоподо́бне.
Слава: Бо́га узре́л еси́ в же́стости жи́зни, я́ко в купине́,/ и запеча́тал еси́ в се́рдцы свое́м/ Бо́гом пи́санную скрижа́ль, Богому́дре о́тче.
И ныне: От Тебе́ рожде́ннаго Христа́ Бо́га моли́ о нас, Богома́ти,/ сохрани́ти лю́ди Твоя́,/ испове́дающия Тя и покланя́ющияся о́бразу Твоему́.
Песнь 6
Ирмос: Я́ко Ио́ну проро́ка от ки́та возве́л еси́, Го́споди,/ изба́ви мя от лови́твы чужда́го/ и спаси́ мя, Ще́дре, я́ко Многоми́лостив.
Припев: Преподобне отче Ши́о, моли Бога о нас!
Ааро́н Бо́жественным огне́м небе́сным священножря́ше,/ ты же сугу́бо приноси́л еси́ Бо́гу/ пла́мень стра́ха Бо́жия, тобо́ю одушевле́нный, жела́нный Ши́о.
Припев: Преподобне отче Ши́о, моли Бога о нас!
Финее́су уподо́бися, ре́вностию ко Христу́ испо́лненный,/ и порази́л еси́ копие́м жела́ния велиа́ра возста́вшая,/ велича́емый о́тче Ши́о.
Слава: По стопа́м Илии́ ше́ствуя и ре́вность того́ восприя́в,/ возлюби́л еси́ пусты́ню, я́ко той, порази́в служи́телей Ваа́ла,/ и пра́вде Госпо́дней сле́довал еси́.
И ныне: Упова́ние тве́рдое и непоколеби́мое Ты еси́ ве́рным, о Ма́ти Бо́жия,/ к Тебе́ прибега́ющия спаси́ от бед ны́нешних и гряду́щих.
Конда́к свята́го, глас 4.
Житие́ твое́ служе́нием Госпо́дним испра́вил еси́/ и, взем крест, оста́вил еси́ вся жите́йская,/ красото́ пусты́ни, преподо́бне Ши́о./ Кого́ убо па́че тя, и по сме́рти жи́ва су́ща/ страна́ И́верская почита́ет/ и мощми́ твои́ми, от гро́ба явле́нными услажда́ется,/ те́мже не преста́й моля́ся о нас ко Го́споду.
Песнь 7
Ирмос: От Иуде́и доше́дше, о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Преподобне отче Ши́о, моли Бога о нас!
Я́коже на Елиссе́я,/ сугу́бо на́йде на тя дух проро́чества и чудотворе́ния,/ вели́кий Ши́о, слуго́ Госпо́день.
Припев: Преподобне отче Ши́о, моли Бога о нас!
Я́коже Дании́л, от ю́ности испо́лнися Ду́ха Бо́жия,/ И́же соде́ла тя судие́ю зако́на ду́ха ра́ди изнуре́ния пло́ти,/ и, я́ко той, и ты покори́ зве́ри.
Слава: Иереми́и и Иса́ии подража́л еси́, о́тче:/ о́вому – низхожде́нием в гроб во́лею и ско́рбию жела́нною,/ о́вому же – досто́йным возвыше́нием.
И ныне: Вочелове́чся во́лею от Тебе́,/ спасл есть Госпо́дь всю вселе́нную,/ Мари́е, Всесвята́я Мати Бо́жия,/ и дарова́ Тя нам отра́ду, гре́шным, Всепе́тая.
Песнь 8
Ирмос: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Припев: Преподобне отче Ши́о, моли Бога о нас!
Я́коже Самуи́л, Ду́хом бысть зрим и царе́й пома́заше, о́тче,/ вооружи́выйся свои́м уче́нием и бо́дренными моли́твами,/ чудотво́рче Ши́о, Иве́рии свети́ло.
Припев: Преподобне отче Ши́о, моли Бога о нас!
Дави́ду уподо́бися непоро́чностию и прямоду́шием/ и уби́ Голиа́фа страсте́й мета́нием камне́й смире́ния, Боговенча́нный Ши́о,/ и спасл еси́ от сме́рти твоя́ послу́шники.
Слава: Соломо́нову му́дрость обре́те, досто́йне,/ и Бо́гу моли́твенный храм созда́л еси́ в телесе́ свое́м,/ и красото́ю ду́ха твоего́ украси́л еси́,/ во е́же велича́ти Святу́ю Тро́ицу во ве́ки.
И ныне: Ма́ти Бо́жия, Помо́щнице и Покрови́тельнице моля́щихся Тебе́,/ услы́ши моле́ния на́ша, раб Твои́х, и принеси́ ко Христу́,/ да спасе́т нас от бед, скорбе́й и страда́ний.
Песнь 9
Ирмос: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.
Припев: Преподобне отче Ши́о, моли Бога о нас!
Я́коже Иоа́нн Крести́тель, по стопа́м его́ ше́ствуя,/ яви́лся еси́ в пусты́ни А́нгел, пропове́дник покая́ния,/ омыва́я слеза́ми ду́ши, я́дом поро́ка поврежде́нныя,/ пра́вило доброде́телей, Ши́о.
Припев: Преподобне отче Ши́о, моли Бога о нас!
Узре́ша вселе́нскаго наста́вника тя,/ Христо́вым апо́столом и ученико́м подо́бна,/ безчи́сленное бо мно́жество люде́й призва́л еси́ рабо́тати Го́споду,/ па́дшия возставля́я, стоя́щия утвержда́я,/ и вся вку́пе приве́л еси́ Богу.
Слава: Я́коже страстоте́рпец и му́ченик подвиза́лся еси́, о́тче,/ и украси́л еси́ ликостоя́ния преподо́бных, я́ко глава́ их,/ всех осия́л еси́, Бо́жие достоя́ние,/ защи́тник всем бу́ди, о Ши́о.
И ныне: О благода́тная Мари́е, Мати Бо́жия, упова́ние всех христиа́н,/ укрепи́ му́жеством ве́рныя проти́ву ага́рян/ и лю́ди Твоя́ и град Твой спаси́ от вся́каго зла.
Моли́тва
О, великий отче Шио, Церкве Иверския крепосте и утверждение, подаждь юным силу побеждать страсти, яко ты сам тех время неуязвимо прешел еси. Помози нам твердо в вере преуспевати, да утвержденнии престолу славы Христа явимся, якоже и ты, преблаженне отче, время сие забот и трудов велиих, не вкушь горьких житейских сластей, прешёл еси. Даждь и нам добрый разум и крепость на враги невидимыя, да не заботою и попеченьми житейскими, имиже враг ны связати тщится, наше искание вечнаго блага подавлено будет. Испроси нам у Бога память смертную, да ей последующе, Света Незаходимаго достигнем; поддержи старость нашу, да в покаянии и очищении душ и телес пребудем, яко ты, славне, стар убо телом, тверд же душею был еси, еяже покой паче плоти покоя возлюбил еси; тако и путь твой в небесное жительство струями слезными, якоже кринами благоуханными, украсил еси. Такожде даждь, о великий подвижниче, старости нашей силу и опору в кратком сем житий, да пред сердечныма очима нашима покой души попечёньми о покое плоти не затмится. Даждь поблекшим очесем нашим капли слез чистительных, имиже да украсится путь велий в вечный живот, имже тещи имамы. Даждь нам в старости в воздержании, молитве и посте пребыти, да теми облагоухаеми мир весь Своим учением облагоухавшему Христу Богу явимся и Тому благоугбдни будем. Буди нам в час разлучения души от тела крепкий вождь и заступник на горьких воздушных мытарствах; изглади рукописание грех наших благоприятными твоими к Богу молитвами; подаждь нам, о великий ходатаю о душах наших, безбоязненно и непостыдно страшнаго и неприступнаго престола славы достигнути; буди защититель душ наших, яко да сподобимся молитвами твоими одесную престола Христа Бога стати и славословити державную и великолепую силу Его, Отца и Сына и Святаго Духа во веки веков. Аминь
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон преподобному Шио Мгвимскому Канон преподобному Шио Мгвимскому](img_b/093.jpg)