22 мая.

Канон первый святителю Николаю архиепископу Мир Ликийских, чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Приспе́ де́нь све́тлаго торжества́, гра́д Ба́рский ра́дуется, и с ни́м вселе́нная вся́ ликовству́ет пе́сньми и пе́ньми духо́вными: дне́сь бо свяще́нное торжество́ в пренесе́ние честны́х и многоцеле́бных моще́й святи́теля и чудотво́рца Никола́я, я́коже со́лнце незаходи́мое, возсия́ светоза́рными луча́ми, разгоня́я тму́ искуше́ний же и бе́д от вопию́щих ве́рно: спаса́й на́с, я́ко предста́тель на́ш вели́кий, Нико́лае.

Кано́н свята́го, гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, еди́ному Влады́це.

Припев: Святи́телю о́тче Нико́лае, моли́ Бо́га о нас.

Пе́снь усте́н мои́х приими́, Благода́телю Христе́, и уясни́ ми́ язы́к, не помина́я мно́гих мои́х грехо́в, да воспою́ честно́е житие́ Твоего́ святи́теля в па́мять пренесе́ния моще́й его́.

Припев: Святи́телю о́тче Нико́лае, моли́ Бо́га о нас.

Чудотво́рный да́р прие́м и терпе́ния венцы́, святи́тельством украша́яся, Бо́гу помоли́ся, о́тче, прегреше́ний проще́ние дарова́ти на́м, сла́вящим твое́ пренесе́ние.

Сла́ва Отцу́ и Сы́ну и Свято́му Ду́ху:

Па́стырь Христо́ва ста́да, о́тче, ины́м овца́м посыла́ешися, к лати́нскому язы́ку, да вся́ удиви́ши чудесы́ твои́ми и ко Христу́ приведе́ши, блаже́нне, Ему́же и о на́с моли́ся непреста́нно.

И ны́не и при́сно и во ве́ки веко́в. Ами́нь.

Богородичен: Дале́че бы́вше иногда́, язы́честии наро́ди Рождество́м Твои́м, Богоро́дице, к Бо́гу прибли́жихомся: Ты́ бо мене́ Обожи́вшаго породила́ еси́ и дре́вния кля́твы Свобо́ждшаго Свое́ю кро́вию.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святи́телю о́тче Нико́лае, моли́ Бо́га о нас.

Незло́бивый нра́вом и кро́ткий о́бразом, житие́ име́я Ангельское, богоблаже́нне Нико́лае, не преста́й о на́с моля́ся еди́ному Человеколю́бцу.

Припев: Святи́телю о́тче Нико́лае, моли́ Бо́га о нас.

Ки́й гра́д, блаже́нне, не име́ет тебе́ помо́щника? Ка́я ли душа́ не призыва́ет твоего́ и́мене? Или́ ко́его ме́ста не присеща́еши ду́хом, твои́ми чудесы́ удивля́я вся́, Нико́лае?

Сла́ва Отцу́ и Сы́ну и Свято́му Ду́ху:

Ба́рский у́бо гра́д прия́т те́ло твое́, но ду́х тво́й в вы́шнем Иерусали́ме, иде́же лику́еши со проро́ки, и апо́столы, и святи́тели ку́пно, моля́ся о на́с еди́ному Человеколю́бцу.

И ны́не и при́сно и во ве́ки веко́в. Ами́нь.

Богородичен: Просвеще́ние ми́ испроси́, Пречи́стая Влады́чице, омраче́нному грехи́ мно́гими, поро́ждшая Све́т всему́ ми́ру, и стра́стную мглу́ дале́че отжени́, еди́на Богоблаже́нная.

И седа́лен святи́теля, гла́с 1.

Пренесе́ние твои́х честны́х моще́й положе́ние на́м бы́сть пра́зднества све́тла, святи́телю Госпо́день прехва́льный, е́же хва́лим благоче́стно, и ра́достно чту́ще тя́ све́та незаходи́маго Со́лнца, ве́рным добро́то, Нико́лае.

Пе́снь 4.

Ирмос: Все́л еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щим: сла́ва си́ле Твое́й, Го́споди.

Припев: Святи́телю о́тче Нико́лае, моли́ Бо́га о нас.

Све́том Вы́шняго озаря́емь, святи́телю, мое́ се́рдце просвети́ и тму́ грехо́вную отжени́, да, ра́дуяся, пою́ твое́ свято́е пренесе́ние.

Припев: Святи́телю о́тче Нико́лае, моли́ Бо́га о нас.

Возсту́пль на ле́ствицу доброде́телей, блаже́нне, чудотво́рец яви́лся еси́ по все́й земли́, Нико́лае, и сего́ ра́ди от Мѵ́р ба́рстии лю́дие прие́млют святы́я мо́щи твоя́.

Сла́ва Отцу́ и Сы́ну и Свято́му Ду́ху:

Иере́и ве́рнии о тебе́ хва́лятся, и лю́ди христолюби́вии призыва́ют тя́, во бране́х помо́щника, и мы́, недосто́йнии, подвиза́ем тя́ к Бо́гу за ны́ моли́тися, Нико́лае.

И ны́не и при́сно и во ве́ки веко́в. Ами́нь.

Богородичен: Чи́ны Ангельския удивля́ет, Богоро́дице, та́йны Твоея́ глубина́, бе́сы же смуща́ет Твоя́ ико́на. Ейже мы́ кла́няемся, чту́ще Тя́, Бо́жию Ма́терь.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Припев: Святи́телю о́тче Нико́лае, моли́ Бо́га о нас.

В Мѵ́рех престо́л име́л еси́, в Ба́р те́ло пресели́л еси́, и ду́хом на небеси́ пребыва́еши, святи́телю Нико́лае, со апо́столы, я́ко прее́мник, с ни́миже о на́с моли́, пою́щих твое́ пренесе́ние.

Припев: Святи́телю о́тче Нико́лае, моли́ Бо́га о нас.

Все́х христиа́н наде́ждо, и оби́димых ве́лий засту́пниче, и боля́щих цели́телю, печа́льных уте́шителю и к Бо́гу от челове́к хода́таю, Импера́тору на́шему ми́р испроси́ и спаса́й ны́ от пога́ных нахожде́ния.

Сла́ва Отцу́ и Сы́ну и Свято́му Ду́ху:

Погруже́нную ду́шу мою́ мно́гими страстьми́, Нико́лае, умерщвле́нную грехопаде́нием, оживи́ твои́ми моли́твами и напра́ви на покая́ние, да с ве́рными все́ми твое́ сла́влю пренесе́ние.

И ны́не и при́сно и во ве́ки веко́в. Ами́нь.

Богородичен: Его́же тмы́ Ангельския и серафи́мская мно́жества ужаса́ются и разу́мная тва́рь трепе́щет, Того́ я́ко Младе́нца, Де́во, пита́еши, Его́же обра́зно на руку́ Твое́ю ви́дяще, всегда́ покланя́емся.

Пе́снь 6.

Ирмос: Якоже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Припев: Святи́телю о́тче Нико́лае, моли́ Бо́га о нас.

Яко от окри́на, от боже́ственныя твоея́ це́ркве неску́дно прие́млем здра́вие телесе́м и душа́м очище́ние, святи́телю Нико́лае, чудеса́ бо то́чиши благода́тию несомне́нною ве́рою упова́ющим на тя́.

Припев: Святи́телю о́тче Нико́лае, моли́ Бо́га о нас.

От напа́стей разли́чных, и бе́д лю́тых, и скорбе́й, одержа́щих ны́, и от разли́чных злы́х, о́тче, я́ко Христо́в уго́дник пресла́вный, изба́ви рабы́ твоя́, достодо́лжно чту́щия твое́ свято́е пренесе́ние.

Сла́ва Отцу́ и Сы́ну и Свято́му Ду́ху:

Грехо́вным мра́зом исте́рп и жите́йским ве́тром порева́емь, я́ко друго́е со́лнце, о́тче, подо́бие твоего́ о́браза ви́дев, твои́ми моли́твами да согре́юся, служи́телю Христо́в Нико́лае.

И ны́не и при́сно и во ве́ки веко́в. Ами́нь.

Богородичен: Земны́х у́м небе́сныя та́йны не уве́сть, ни тва́рь Творца́ ра́зума домы́слится: прехо́дит бо у́м челове́чь от Де́вы рождество́ Госпо́дне. Ейже моля́щеся ве́рою, грехо́в проще́ние прии́мем.

Конда́к, гла́с 3.

Взы́де, я́ко звезда́, от восто́ка до за́пада твоя́ мо́щи, святи́телю Нико́лае, мо́ре же освяти́ся ше́ствием твои́м, и гра́д Ба́рский прие́млет тобо́ю благода́ть: на́с бо де́ля яви́лся еси́ чудотво́рец изя́щный, преди́вный и ми́лостивый.

Икос:

Воспои́м ны́не святи́теля пе́сньми, Мѵ́рским лю́дем па́стыря и учи́теля, да моли́твами его́ просвети́мся: се́й бо яви́ся чи́ст ве́сь, нетле́нен ду́хом, Христу́ принося́ же́ртву непоро́чну, чи́сту, Бо́гу благоприя́тну, я́ко святи́тель, очище́н и душе́ю и те́лом. Те́мже сы́й и́стинно Це́ркви предста́тель и побо́рник сея́ и чудотво́рец изя́щен, преди́вен и ми́лостив.

Пе́снь 7.

Ирмос: На по́ле Деи́ре иногда́ мучи́тель пе́щь поста́ви на муче́ние богоно́сных, в не́йже три́ о́троки песносло́вяху Еди́наго Бо́га, тро́ично воспева́ху, глаго́люще: отце́в Бо́же, благослове́н еси́.

Припев: Святи́телю о́тче Нико́лае, моли́ Бо́га о нас.

Дне́сь ра́дуются Ангели Бо́жии, рыда́ет же де́монское мно́жество: спа́сл бо еси́ лю́ди от напа́сти и отгна́л еси́ ду́хи те́мныя. Те́м досто́йно одоле́вый нарица́ешися. Сего́ ра́ди вопие́м Го́сподеви: оте́ц на́ших Бо́же, благослове́н еси́.

Припев: Святи́телю о́тче Нико́лае, моли́ Бо́га о нас.

Одержи́мии печа́лию не́мощи, разли́чными неду́ги утружде́ни, с ве́рою к ра́це твое́й влеку́тся и, получи́вше твою́ ми́лость, быстрообра́зно отхо́дят, ра́достно Го́сподеви пою́ще: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Предстоя́т ти́, бла́женне, собо́ри правове́рных люде́й, и хва́лятся о тебе́ церко́внии учи́тели, прославля́ют же тя́ цари́, я́ко засту́пника. Мы́ же ти́ мо́лимся, спаси́ ны, Нико́лае, пою́щия Го́сподеви: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: О, ка́ко, Спа́са моего́ воспою́, Его́же тре́петно хва́лят Ангели? Но Ты́, Ма́ти, наста́ви мя́ и милосе́рдие Сыно́внее благоутро́бием Твои́м пону́ди поми́ловати ны́, на Тя́ упова́ющия, я́ко Ты́, за ны́ моля́щи Его́, от му́ки изба́виши.

Пе́снь 8.

Ирмос: Ангели и небеса́, на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Святи́телю о́тче Нико́лае, моли́ Бо́га о нас.

Ангели небе́с я́ко служи́теля тя́ восприе́млют, проро́цы и апо́столи я́ко клевре́та срета́ют, Са́м Госпо́дь тебе́ восприе́млет, мы́ же, гре́шнии, ми́лости про́сим.

Припев: Святи́телю о́тче Нико́лае, моли́ Бо́га о нас.

Вели́ка вла́сть от Бо́га вдана́ ти́ е́сть, Нико́лае: мо́ре повину́ется, возду́х слу́шает, и язы́цы покаря́ются, ви́дяще пресла́вная твоя́ чудеса́.

Сла́ва Отцу́ и Сы́ну и Свято́му Ду́ху:

Но́вому Изра́илю, христиа́нскому наро́ду, Спа́се, сла́внейши Моисе́я показа́л еси́ Твоего́ святи́теля Никола́я, от все́х зо́л на́с избавля́юща.

И ны́не и при́сно и во ве́ки веко́в. Ами́нь.

Богородичен: Очище́ние грехо́в я́ко Ма́ти Бо́жия испроси́ и ру́ку ми́ простри́, Госпоже́, погруже́нному во глубине́ неча́яния, да, наде́ждею воста́в, превозноша́ю Тя́ во ве́ки вся́.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святи́телю о́тче Нико́лае, моли́ Бо́га о нас.

Благослове́н Госпо́дь Бо́г на́ш, я́ко просла́ви святи́теля во страна́х, чуде́с струи́ испуща́юща, в мѵ́рех и в лати́нех вся́ исцеля́юща и в Росси́и ми́лостивно посеща́юща.

Припев: Святи́телю о́тче Нико́лае, моли́ Бо́га о нас.

Честны́м сно́м усну́л еси́ и те́ло в Ба́р по́льзы ра́ди пусти́л еси́, неусы́пный бы́в засту́пник все́м, ве́рою призыва́ющим тя́, моли́твами твои́ми, Нико́лае.

Сла́ва Отцу́ и Сы́ну и Свято́му Ду́ху:

Благослове́н небесе́ и земли́ Творе́ц, Бо́г Вседержи́тель, Оте́ц Безнача́льный и Всеси́льный, и Сы́н пре́жде ве́к, от не́др отрыгнове́нное Сло́во, Имже вся́ бы́ша, я́же о на́с, и Ду́х исходя́й Святы́й: Тро́ице Свята́я, сла́ва Тебе́.

И ны́не и при́сно и во ве́ки веко́в. Ами́нь.

Богородичен: Изви́тием слове́с по достоя́нию Тя́ похвали́ти не достиза́ю, небе́сных си́л пребо́льшу и тва́ри всея́ Честне́йшу, Бо́га и Творца́ поро́ждшую пло́тию. Его́же моли́, Богоро́дице, да поми́лует ны́ в де́нь су́дный.

Свети́лен.

Вели́ка чудеса́ твоя́, пресвяты́й Нико́лае, я́ко яви́лся еси́ во сне́ богому́дрому Константи́ну и три́ во́ины спа́сл еси́, без вины́ на сме́рть осужде́нныя. Та́ко и на́с спаси́ от напра́сныя и ве́чныя сме́рти, пресвяты́й Нико́лае, святи́телю Госпо́день.

Молитва святителю Николаю, архиепископу Мирликийскому, чудотворцу

О, всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий, и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю вселе́нную, ты еси́ пра́ведник, я́ко фи́никс процве́тший, насажде́нный во дво́рех Го́спода своего́: живы́й в Ми́рех, ми́ром благоуха́л еси́, и ми́ро приснотеку́щее благода́ти Бо́жия источа́еши. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во град Ба́рский, от восто́ка до за́пада хвали́ти и́мя Госпо́дне. О, преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бед, тебе́ прославля́ем и тебе́ велича́ем, я́ко наде́жду всех христиа́н, исто́чника чуде́с, защи́тителя ве́рных, прему́драго учи́телю, а́лчущих корми́телю, пла́чущих весе́лие, наги́х одея́ние, боля́щих врача́, по мо́рю пла́вающих упра́вителя, пле́нников свободи́теля, вдов и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Услы́ши нас, моля́щихся тебе́ и прибега́ющих под кров твой, яви́ предста́тельство твое́ о нас к Вы́шнему и исходата́йствуй твои́ми Богоприя́тными моли́твами вся поле́зная ко спасе́нию душ и теле́с на́ших: сохрани́ святу́ю оби́тель сию́ (или: храм сей), вся́кий град и весь, и вся́кую страну́ христиа́нскую, и лю́ди живу́щыя, от вся́кого озлобле́ния по́мощию твое́ю: ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е: тебе́ же пра́веднаго по преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем: ты нас соблюди́ я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й нам ру́ку по́мощи и отве́рзи две́ри милосе́рдия Бо́жия; поне́же недосто́йны есмы́ зре́ти высоту́ Небе́сную, от мно́жества непра́вд на́ших: свя́зани есмы́ у́зами грехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Тем же преклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к нему́ про́сим: помози́ нам, уго́дниче Бо́жий, да не поги́бнем со беззако́нии на́шими, изба́ви нас от вся́кого зла, и от вся́кие ве́щи сопроти́вныя, упра́ви ум наш, и укрепи́ се́рдце на́ше в пра́вой ве́ре, в ней же твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́, и да сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, еди́наго в Тро́ице сла́вимаго и поклоня́емаго Бо́га, ны́не и при́сно, и во ве́ки веко́в. Ами́нь.

Молитва вторая святителю Николаю, архиепископу Мирликийскому, чудотворцу

О, до́брый наш па́стырю и богому́дрый наста́вниче, святи́телю Христо́в Нико́лае! Услы́ши нас гре́шных, моля́щихся тебе́ и призыва́ющих в по́мощь ско́рое предста́тельство твое́; виждь нас не́мощных, отвсю́ду уловля́емых, вся́каго бла́га лише́нных и умо́м от малоду́шия помраче́нных; потщи́ся, уго́дниче Бо́жий, не оста́вити нас в грехо́внем плену́ бы́ти, да не бу́дем в ра́дость враго́м на́шим и не у́мрем в лука́вых дея́ниих на́ших. Моли́ о нас недосто́йных Соде́теля на́шего и Влады́ку, ему́ же ты со безпло́тными ли́ки предстои́ши: ми́лостива к нам сотвори́ Бо́га на́шего в ны́нешнем житии́ и в бу́дущем ве́це, да не возда́ст нам по дело́м на́шим и по нечистоте́ серде́ц на́ших, но по свое́й бла́гости возда́ст нам. На твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем, и ко пресвято́му о́бразу твоему́ припа́дающе, по́мощи про́сим: изба́ви нас, уго́дниче Христо́в, от зол находя́щих на нас, и укроти́ во́лны страсте́й и бед возстаю́щих на нас, да ра́ди святы́х твои́х моли́тв не обы́мет нас напасть и не погря́знем в пучи́не грехо́вней и в ти́не страсте́й на́ших. Моли́, святи́телю Христо́в Нико́лае, Христа́ Бо́га на́шего, да пода́ст нам ми́рное житие́ и оставле́ние грехо́в, душа́м же на́шим спасе́ние и ве́лию ми́лость, ны́не и при́сно и во ве́ки веко́в. Ами́нь.