22 мая.

Канон святому пророку Исаие

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Проро́ка Твоего́ Иса́ии па́мять, Го́споди, пра́зднующе, те́м Тя́ мо́лим: спаси́ ду́ши на́ша.

Кано́н проро́ка, гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Проро́че Бо́жий Иса́ие, моли́ Бо́га о нас.

Просвети́ мя, Го́споди Бо́же мо́й, и наста́ви све́тло боже́ственнаго проро́ка Твоего́ сла́вное и честно́е восхвали́ти торжество́.

Припев: Проро́че Бо́жий Иса́ие, моли́ Бо́га о нас.

Боговеща́нная труба́ Иса́иина, огласи́вшая зе́млю, церко́вныя пита́тели созва́ пра́здновати па́мять его́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Стра́сти теле́сныя, богоно́се, помысло́м душе́вным тве́рдо покори́в, сла́ву сподо́бися ви́дети Вседержи́теля.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Проро́че Бо́жий Иса́ие, моли́ Бо́га о нас.

Всю́ зарю́ духо́вную восприе́мь, провозгласи́л еси́, сла́вне, Сло́ва смотре́ния неизрече́нное та́инство.

Припев: Проро́че Бо́жий Иса́ие, моли́ Бо́га о нас.

Взя́лся еси́ к высоте́ небе́сней, и благоче́стия све́тлость показа́л еси́, и́дольскаго су́етия ты́ изобличи́в не́мощь.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ка́меня в Сио́не пречестна́го, краеуго́льнаго, вселе́нную содержа́щаго, Влады́ку Христа́, Иса́ия проро́чествует, полага́ема.

Седа́лен, гла́с 4.

От страсте́й теле́сных преочи́стив ду́шу, сла́ву ви́дел еси́ над все́ми су́щаго Бо́га, проро́че пребога́те. Просия́в проро́чества светоно́сными заря́ми, — Мла́до, — ре́кл еси́, — Отроча́ роди́тся, — Зижди́тель, спаса́ющий на́с от тли́ моли́твами твои́ми.

Пе́снь 4.

Ирмос: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

Припев: Проро́че Бо́жий Иса́ие, моли́ Бо́га о нас.

На доброде́тельный возше́д ве́рх, чи́сто Жела́емому бесе́довал еси́ и ра́достно пе́л еси́: сла́ва си́ле Твое́й, Го́споди.

Припев: Проро́че Бо́жий Иса́ие, моли́ Бо́га о нас.

Проро́честей Иса́ия благода́ти вве́рен бы́сть, и Бо́жие жили́ще показа́ся, и небе́сных си́л сла́вы нетле́нныя сподо́бися.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Обнови́тися острово́м ре́кл еси́ прито́чно, язы́ческим це́рквам, Боже́ственнаго Ду́ха испо́лнен, сла́вне, таи́нник неизрече́нных бы́в.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Проро́че Бо́жий Иса́ие, моли́ Бо́га о нас.

Сокрове́нное свы́ше та́инство зря́ и дре́вний сове́т Вы́шняго, е́же о на́с смотре́ние, богоглаго́ливе, возвести́л еси́.

Припев: Проро́че Бо́жий Иса́ие, моли́ Бо́га о нас.

Страсте́й Твои́х, Го́споди, приснотеку́щий исто́чник страсте́й на́с отмыва́ет, прише́л бо еси́, Спа́се, я́коже Иса́ия проро́к научи́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богочести́вый Иса́ия, от Бо́га изше́д, Отца́, Сло́ва и Свята́го Ду́ха в Естестве́ Еди́ном, Тро́ицу Еди́ну неве́дущим пропове́да.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Проро́че Бо́жий Иса́ие, моли́ Бо́га о нас.

Ду́хом воображе́н, Иса́ия узре́ на престо́ле Госпо́дьства сла́ву блеща́щуся, песносло́вимую трисвяты́м гла́сом, Тричи́сленную.

Припев: Проро́че Бо́жий Иса́ие, моли́ Бо́га о нас.

Ко усто́м боя́щимся твои́м прино́сит у́гль, Иса́ие, серафи́м, клеща́ми взе́м, и Бо́гу проро́ка соверша́ет, та́йно освяще́нна.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Сбытие́ издале́ча зря́ прорече́ний, Иса́ия у́мно со Ангелы ра́дуется и, игра́я, сла́вит Испо́лнившаго его́ пропове́дания.

Конда́к, гла́с 2.

Проро́чества дарова́ние прие́м, пророкому́чениче, Иса́ие богопропове́дниче, все́м изъясни́л еси́ вочелове́чение Госпо́дне, возгласи́в велегла́сно конце́м: се́ Де́ва во чре́ве прии́мет.

Икос:

Вси́ сни́демся, и́же во страна́х, воспе́ти досто́йно Иса́ию, ве́рнии, во проро́цех ди́внаго: то́й бо, коне́ц проро́чества восприи́м, ми́р просвеща́ет, все́м вку́пе та́йну Боже́ственнаго соедине́ния провозвести́в, с те́ми все́ми возопи́в: с на́ми Бо́г неви́димый, се́ Де́ва во чре́ве прии́мет.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Проро́че Бо́жий Иса́ие, моли́ Бо́га о нас.

Спаси́тельное на́м приходя́щее зря́ Иса́ия избавле́ние, — прии́дет, — возопи́, — оте́ц на́ших Бо́же, благослове́н еси́.

Припев: Проро́че Бо́жий Иса́ие, моли́ Бо́га о нас.

Проро́чества благода́тию и муче́ния венце́м Иса́ия увязе́ся, — кре́пость моя́ и пе́ние мое́, — оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Благоче́стия преде́лы и жития́ зако́ны богоно́сным язы́ком положи́л еси́, проро́че богодухнове́нне, — оте́ц на́ших Бо́же, благослове́н еси́.

Пе́снь 8.

Ирмос: В Вавило́не о́троцы, боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени, ороша́еми, поя́ху: благослови́те, вся́ дела́ Госпо́дня, Го́спода.

Припев: Проро́че Бо́жий Иса́ие, моли́ Бо́га о нас.

Весе́лия ри́зою женихо́вою обложе́н обра́зно, ра́дуется ны́не ве́село Иса́ия сла́вный и, боже́ственныя пи́щи наслажда́яся, со Ангелы веща́ет: благослови́те, вся́ дела́ Госпо́дня, Го́спода.

Припев: Проро́че Бо́жий Иса́ие, моли́ Бо́га о нас.

Бо́га пе́рвее отлучи́вшиися, де́монскими прельще́ннии словесы́, пра́ведно отступи́ша земли́ чи́стыя, окая́ннии, проро́ка гласово́м после́дованно, и пе́ти не мо́гут: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Пре́лесть оста́вивше, к Боже́ственному притеко́ша сия́нию мно́жества язы́к и Христо́ве Це́ркви обручи́шася, я́коже дре́вле рече́ Иса́ия, и пе́сньми ны́не пою́т: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Проро́че Бо́жий Иса́ие, моли́ Бо́га о нас.

Престо́лу предста́л еси́ све́тло, богоприя́тне, Влады́ки си́л, сла́вы же Того́ наслади́вся, твоего́ благоче́стия собира́я плоды́, всеблаже́нне сла́вне. Те́м тя́ вси́ велича́ем.

Припев: Проро́че Бо́жий Иса́ие, моли́ Бо́га о нас.

Прииди́те ны́не, све́та проро́ческаго дарова́ния жела́ющии, прия́ти кни́гу усе́рдно Иса́ии, богоразу́мия испо́лнену: тве́рдым жела́нием внима́ем, да Боже́ственныя зари́ испо́лнимся.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ду́хом све́тлости я́ве осия́емь, Иса́ие богоно́се, вся́, ве́рою творя́щия честну́ю твою́ и светоно́сную па́мять, моли́ спасе́ние получи́ти, да тя́ вси́ велича́ем.

Молитва

О прехва́льный и пречу́дный проро́че Бо́жий Иса́ие! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.