22 мая.

Канон мученику Христофору

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́ченика, гла́с 4:

Оде́ждами от крове́й украша́яйся, Го́сподеви предстои́ши, Царю́ си́л, Христофо́ре приснопа́мятне, отону́дуже со безпло́тными и му́ченики пое́ши трисвяты́м и стра́шным сладкопе́нием, те́мже моли́твами твои́ми спаса́й ста́до твое́.

Кано́н му́ченика. Гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Святы́й му́чениче Христофо́ре, моли́ Бо́га о нас.

Прииди́те вси́ дне́сь, христоно́сцы, Христофо́ра па́мять, и́стины свиде́теля богому́драго, благоче́стно воспои́м.

Припев: Святы́й му́чениче Христофо́ре, моли́ Бо́га о нас.

Му́жески подвиза́вся на ле́сть, мучи́телей преще́ния, му́чениче страстоно́сче, кре́постию Христо́вою утвержда́емь, попра́л еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Же́зл прозря́ Тя, Богоро́дице, цве́т же па́ки из Тебе́ воплоще́нное Сло́во, провозвести́ сла́вный Иса́ия, Пречи́стая.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святы́й му́чениче Христофо́ре, моли́ Бо́га о нас.

Ору́жием Креста́ огражда́емь, му́чениче Христофо́ре, ра́ны претерпе́л еси́, присножела́емаго наслажда́ешися, ра́дуяся.

Припев: Святы́й му́чениче Христофо́ре, моли́ Бо́га о нас.

Пло́ть у́бо ра́нами ссеца́шеся, боголюби́вая же твоя́ душа́ любо́вию пита́шеся, поуча́ющися Ца́рствия, Христофо́ре, наслажде́нию.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Рече́ние вои́стинну испо́лнися Иса́иино: Де́ва бо роди́ воплоще́нна Жизнода́вца и Спа́са ду́ш на́ших.

Пе́снь 4.

Ирмос: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

Припев: Святы́й му́чениче Христофо́ре, моли́ Бо́га о нас.

Небе́сное насле́дие, му́чениче, восприя́л еси́, на земли́ по Христе́ подвиза́вся, и́дольскую же погаси́л еси́ пре́лесть му́жески лю́таго де́мона.

Припев: Святы́й му́чениче Христофо́ре, моли́ Бо́га о нас.

Же́нское тебе́ искуше́ние, му́чениче, приноша́ше, я́коже Ада́му пра́отцу зми́й пре́жде, но, побежде́н бы́в, стыдя́шеся, удавле́ния на тя́ простира́я.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Отроча́ на́м даде́ся от проро́чицы, рожде́нное без боле́зни Богома́тере, Его́же нача́льство на ра́ме боже́ственный Иса́ия пропове́да.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святы́й му́чениче Христофо́ре, моли́ Бо́га о нас.

Просвеще́нием благода́ти улови́л еси́ лю́ди и неи́стовство безбо́жных мучи́телей разори́л еси́ я́ве, на земли́, му́дре, оде́ян свы́ше де́йством.

Припев: Святы́й му́чениче Христофо́ре, моли́ Бо́га о нас.

Небе́сное изво́лив наслажде́ние я́ве па́че земна́го, му́дре Христофо́ре, претерпе́л еси́ кре́пко муче́ния боле́зни, Кресто́м укрепля́емь.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: На о́блаце, Го́споди, седя́щаго чи́сте Всепе́тыя Ма́тере, Иса́ия ви́де Тя́ я́сно, еги́петския низлага́юща и́долы.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святы́й му́чениче Христофо́ре, моли́ Бо́га о нас.

Не к кро́ви, ни к пло́ти бра́нь взе́м до́блий, но нача́ла побежда́ше и де́моны, неви́димою си́лою Сы́на Бо́жия укрепля́емь.

Припев: Святы́й му́чениче Христофо́ре, моли́ Бо́га о нас.

Возлюби́в благоле́пно жела́ний кра́й, страстоте́рпче, не чу́л еси́ боле́зней стру́жемь, мы́сль твою́ возвыша́я всегда́ ко Влады́це твоему́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Де́ву, во утро́бе заче́ншую зря́ и ро́ждшую, Иса́ия, проро́к сла́вный, воплоще́нна Сло́ва, Сы́на Бо́жия, ны́не ра́дуется.

Седа́лен, гла́с 4.

По́двиг, сла́вне, муче́ния сконча́в, прия́л еси́ вене́ц побе́ды от Бо́га, Христофо́ре блаже́нне, Его́же умоли́ от бе́д изба́вити на́с.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святы́й му́чениче Христофо́ре, моли́ Бо́га о нас.

Муче́ния пу́ть терпе́нием теки́й, Христофо́р в небе́сных живе́т се́лех, поя́: оте́ц на́ших Бо́же, благослове́н еси́.

Припев: Святы́й му́чениче Христофо́ре, моли́ Бо́га о нас.

Нече́стия пла́мень благоче́стия росо́ю Христофо́р увяди́, в пе́снех зовы́й: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Де́вства ви́дев пачеесте́ственное рождество́ и чистоты́ све́тлость, Иса́ия возопи́: оте́ц на́ших Бо́же, благослове́н еси́.

Пе́снь 8.

Ирмос: В Вавило́не о́троцы, боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени, ороша́еми, поя́ху: благослови́те, вся́ дела́ Госпо́дня, Го́спода.

Припев: Святы́й му́чениче Христофо́ре, моли́ Бо́га о нас.

Идолонеи́стовства на́гло приража́ема волна́, му́ченическими отсека́шеся тве́рдыми супротивообра́зными противле́нии за Христа́ прие́млющих беды́ и вопию́щих: благослови́те, вся́ дела́ Госпо́дня, Го́спода.

Припев: Святы́й му́чениче Христофо́ре, моли́ Бо́га о нас.

В ца́рскую багряни́цу обагре́нную от крове́й твои́х, му́чениче, красно́ оде́ян ны́не, Христофо́ре непобеди́ме, со Ангельскими ли́ки лику́еши и пое́ши Соде́телю твоему́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Де́ва Богома́ти Отрокови́ца я́ко Младе́нца держи́т Сло́ва, все́м даю́щаго жи́знь и вся́ сотво́ршаго, я́коже рече́ пре́жде Иса́ия, и, ра́дуяся, взыва́ше: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святы́й му́чениче Христофо́ре, моли́ Бо́га о нас.

Вене́ц све́тел я́ко победи́тель прие́м, Христофо́ре всесла́вне, сца́рствуеши Влады́це, тя́ в му́ках укре́пльшему и ру́ку живоно́сну пода́вшему одоле́ти злонача́льника.

Припев: Святы́й му́чениче Христофо́ре, моли́ Бо́га о нас.

Кро́вию му́ченическою све́тло омы́вся, озари́лся еси́, пречу́дне, ны́не же в де́вственнем черто́зе, с Женихо́м ра́дуяся, вше́л еси́, ми́ра же ми́ру прося́, не преста́й, му́чениче сла́вне.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Угля мы́сленнаго, Чи́стая Богоневе́сто, Иса́ия Его́же ви́де но́сиши на руку́, Богома́ти, зра́ку на́шему соединя́ема и ми́ру спасе́ние све́тло подаю́ща, те́м Тя́ вси́ велича́ем.

Молитва

О святы́й уго́дниче Бо́жий, му́чениче Христофо́ре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.