20 мая.

Канон святому мученику Акакию сотнику

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченик Твой, Го́споди, Ака́кие,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н Ака́кия, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святы́й му́чениче Ака́кие, моли́ Бо́га о нас.

Добро́тою беззло́бия, сла́вне, укра́шен, до́брых вине́ Исто́чнику со дерзнове́нием предста́л еси́, Его́же ны́не на́м благопреме́нна твои́ми мольба́ми устро́й.

Припев: Святы́й му́чениче Ака́кие, моли́ Бо́га о нас.

Моле́бник и́стинный, дне́сь на́с Ака́кий, высо́ким пропове́данием вопия́, созыва́ет на трапе́зу, со тща́нием у́бо теце́м и весе́лием, мучениколю́бцы.

Припев: Святы́й му́чениче Ака́кие, моли́ Бо́га о нас.

Вода́м прича́щся оставле́ния креще́нием, сыновство́ прия́т благода́ти Бо́жия и второ́му креще́нию муче́ния кро́вию сподо́бился еси́, преблаже́нне.

Сла́ва Отцу́ и Сы́ну и Свято́му Ду́ху:

Не терпя́ беззако́ния, сла́вне, возноси́мо зре́ти, Христо́во Божество́ я́сно пред суди́щем пропове́дал еси́ мучителей, Ака́кие, беззло́бию я́ко тезоимени́т.

И ны́не и при́сно и во ве́ки веко́в. Ами́нь.

Богородичен: В Тебе́, обра́дованная Пречи́стая, ви́дена бы́ша Бо́жия ше́ствия проявле́нно, Де́ву сохра́ньшаго и по рождестве́ нетле́нну Тя́ ро́ждшую соблю́дшаго.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Святы́й му́чениче Ака́кие, моли́ Бо́га о нас.

Ра́зумом боже́ственным, и прему́дростию, и сло́вом укра́шен, му́дрых плете́ния неразу́мная разори́л еси́, те́мже твою́ сла́вную па́мять почита́ем.

Припев: Святы́й му́чениче Ака́кие, моли́ Бо́га о нас.

Му́жественным и тве́рдым сия́я смы́слом, ты́ развраще́ния нечести́вых и ополче́ния победи́л еси́ и пре́лести разори́л еси́ утвержде́ния.

Припев: Святы́й му́чениче Ака́кие, моли́ Бо́га о нас.

Укрепля́емь си́лою Бо́га Вседержи́теля, гнило́е и немощно́е безбо́жия обличи́л еси́, те́мже победоно́сца тя́, му́чениче, пропове́дуем.

Сла́ва Отцу́ и Сы́ну и Свято́му Ду́ху:

Ка́льнаго пития́ и преле́стнаго и ти́ны избе́гл еси́, благоче́стия просвеще́нием и светолу́чными сия́нии у́м осия́я, му́чениче Ака́кие.

И ны́не и при́сно и во ве́ки веко́в. Ами́нь.

Богородичен: Держа́ву сме́рти и кля́твы дре́вния осужде́ние, заче́нши Жи́знь, Богороди́тельнице, упраздни́ла еси́, те́мже Твое́ пречи́стое чти́м Рождество́.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Святы́й му́чениче Ака́кие, моли́ Бо́га о нас.

Необори́мь, я́коже сто́лп, ве́рою пребы́сть, ни муче́ний ту́чами, ни я́звленными приложе́нии, ни бие́ний ве́тры коле́блемь, но взыва́ше велегла́сно: сла́ва си́ле Твое́й, Го́споди.

Припев: Святы́й му́чениче Ака́кие, моли́ Бо́га о нас.

Окормля́емь ве́трилы и дыха́нии Ду́ха Свята́го, блаже́нне, в приста́нищи ти́се ты́ почи́л еси́ и стремле́ния во́лн и ве́тров не ужаса́лся еси́, му́чениче Христо́в всече́стне.

Припев: Святы́й му́чениче Ака́кие, моли́ Бо́га о нас.

Моля́ держа́ву Бо́жию непобеди́мую, одолева́л еси́ всю́ супроти́вную си́лу и все́ ору́жие и́х отъя́т, ра́дуяся, я́ко победи́тель, достосла́вне.

Сла́ва Отцу́ и Сы́ну и Свято́му Ду́ху:

Наставля́емь Боже́ственным явле́нием, тече́ния коне́ц гра́д царе́в сотвори́в, его́же граждани́н бы́л еси́, преблаже́нне, вся́ко наше́ствие ва́рварское отрева́я.

И ны́не и при́сно и во ве́ки веко́в. Ами́нь.

Богородичен: Умерщвле́на мя́, Де́во, и неизбе́жными одержи́ма греха́ связа́нии, еди́на Богома́ти, возста́ви, Яже Жи́знь заче́ншая ве́чную, избавле́ние все́м ве́рным даю́щую.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Святы́й му́чениче Ака́кие, моли́ Бо́га о нас.

Кре́ст поне́сл еси́ на ра́мех, неукло́нно Христу́ после́дуя, к жи́зни нетле́нней веду́щему тя́ и к Све́ту невече́рнему вводя́щу, пребога́те.

Припев: Святы́й му́чениче Ака́кие, моли́ Бо́га о нас.

Го́рькия те́ла, всеблаже́нне, ра́ны и уде́с отсече́ния пи́щу безконе́чную тебе́ исхода́таиша, и му́ченический вене́ц, и Ангельское ра́дование.

Сла́ва Отцу́ и Сы́ну и Свято́му Ду́ху:

Юноша незло́бив, и целому́др, и кро́ток, и кре́пок на стра́сти теле́сныя, и на де́моны же́сток, и неве́рным непристу́пен показа́лся еси́, всеприснопа́мятне.

И ны́не и при́сно и во ве́ки веко́в. Ами́нь.

Богородичен: Истиннаго Бо́га на́м ро́ждшую пло́тски, Отцу́ Единоро́днаго, Богоро́дицу Всечи́стую Тя́ имену́ем, гла́с вку́пе соста́вльше Рождеству́ Твоему́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святы́й му́чениче Ака́кие, моли́ Бо́га о нас.

Гла́дом тя́, и́же да́ра боже́ственнаго гла́дствующии, осужда́ют, му́чениче, приснопита́емаго небе́сными дарова́нии и пи́щу неконча́емую иму́щаго.

Припев: Святы́й му́чениче Ака́кие, моли́ Бо́га о нас.

Посрами́в мучи́телей безбо́жное шата́ние и злонача́льнаго зми́я пучи́ною потопи́л еси́ твои́х крове́й, победоно́сец к небеси́ возлете́л еси́, Ака́кие.

Сла́ва Отцу́ и Сы́ну и Свято́му Ду́ху:

Сме́ртию сме́рти Влады́чне, преблаже́нне, подо́бяся, му́чениче, ве́чно с Ни́м ца́рствуеши, зре́ния Его́ и ра́дости насыща́яся.

И ны́не и при́сно и во ве́ки веко́в. Ами́нь.

Богородичен: Разруши́ла еси́ сме́рти, Чи́стая, осужде́ние и зако́на кля́тву, Христа́ ро́ждшая, Разори́теля сме́рти, и благослове́ние все́м источи́вшаго.

Седа́лен, гла́с 4.

Ту́чами крове́й твои́х, му́чениче Ака́кие, врага́ потопи́в, вся́ ополче́ния мучи́тельская посрами́л еси́, дости́г Ангельския невеще́ственныя ли́ки, прия́л еси́ нетле́ния неувяда́емый вене́ц. Те́мже мольба́ми твои́ми спаси́ от бе́д на́с.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святы́й му́чениче Ака́кие, моли́ Бо́га о нас.

Усе́чен во главу́, к мы́сленней впери́лся еси́ Церко́вней Главе́, побе́дным венце́м укра́шен и зовы́й, пребога́те: препе́тый Го́споди, Бо́же оте́ц на́ших, благослове́н еси́.

Припев: Святы́й му́чениче Ака́кие, моли́ Бо́га о нас.

С му́ченики Христо́вы, я́ко всеи́стинен му́ченик, сочета́лся еси́ терпели́вно, безбо́жныя мучи́тели победи́в, взыва́я, Ака́кие: препе́тый Го́споди, Бо́же оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

Воскрили́в у́м ко блаже́нней наде́жди, соблюда́емей ве́рным, в му́ченическое вше́л еси́ суди́ще, воспева́я ду́хом: Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богородичен: Рече́ния, Де́во, проро́к и дре́внии о́брази Твое́ прообразу́ют я́ве, Богома́ти, чи́стое Рождество́, е́же пою́ще, взыва́ем: оте́ц на́ших Бо́же, благослове́н еси́.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святы́й му́чениче Ака́кие, моли́ Бо́га о нас.

В вы́шнюю митропо́лию, прему́дре, ца́рствующую и́стинно, всели́лся еси́, ю́же созда́ Госпо́дь и святы́м проугото́ва, наде́ющимся на Него́ и ве́рою зову́щим: благослови́те, вся́ дела́ Госпо́дня, Го́спода.

Припев: Святы́й му́чениче Ака́кие, моли́ Бо́га о нас.

Претерпе́л еси́ любо́вию му́к томле́ние, гла́дом же та́я, помина́л еси́, изря́дне, присносу́щное наслажде́ние, и пи́щу, и ра́дость пребыва́ющую вопию́щим: благослови́те, вся́ дела́ Госпо́дня, Го́спода.

Припев: Святы́й му́чениче Ака́кие, моли́ Бо́га о нас.

Удо́бь и зело́ ско́ро ра́товал еси́ супротивобо́рцы твоя́, непобеди́ма побо́рника, помо́щника же, и засту́пника, и состра́ждуща Христа́ име́я, пребога́те, Ему́же вопие́м: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Ака́кие блаже́нне, пронарече́н бы́в, житие́ незло́биво име́л еси́ и непоро́чно, укра́шено кро́вию страда́ния, прехва́льне, и доброде́тельми му́ченическими удобря́емь, и зовы́й: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Та́инство стра́нно вои́стинну под со́лнцем еди́на показа́ла еси́: Бо́га бо родила́ еси́, Чи́стая, Неви́димаго, и Безнача́льнаго, и Невмести́маго все́ми, и Непостижи́маго. Ему́же вопие́м: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святы́й му́чениче Ака́кие, моли́ Бо́га о нас.

Имы́й, блаже́нне, страда́льческаго противле́ния сия́тельное, е́же от побе́ды, престо́лу предста́л еси́ Влады́чню, со Ангельскими лику́я во́инствы и все́м спасе́ния прося́, твою́ па́мять блажа́щим.

Припев: Святы́й му́чениче Ака́кие, моли́ Бо́га о нас.

Светла́ твоя́ на враги́, пребога́те, побе́дная храбо́рства, тебе́ же по́чести мно́го бо́льше тво́й Подвигополо́жник подава́ше и Боже́ственнаго светоли́тия исполне́ние. Те́мже тя́ вси́ ублажа́ем.

Сла́ва Отцу́ и Сы́ну и Свято́му Ду́ху:

Бли́з бы́л еси́ Христа́, вседо́блественне, и́бо стра́сть и ско́рбь претерпе́л еси́, те́мже тя́ виде́ния я́сно и боговиде́ния сподо́би, Имже на земли́ вины́ стяжа́л еси́, издале́ча сия́ облобыза́я.

И ны́не и при́сно и во ве́ки веко́в. Ами́нь.

Богородичен: Красне́йший добро́тою Тво́й Пло́д, Всенепоро́чная, па́че все́х яви́ся, заре́ю тва́рь украша́я добротвори́тельныя красоты́, Его́же приле́жно моля́щи спасти́ Тя́ непреста́нно велича́ющия.

Стихи́ры свята́го Ака́кия, гла́с 4.

На еди́наго зми́я я́рость взе́м / и Христо́вою непребори́мою / и непобеди́мою си́лою препоя́сався, / богому́дре Ака́кие, / злы́х обрета́теля на зе́млю низве́ргл еси́, / превознесе́нную низложи́в си́лу, / и сея́ де́йствующия служи́тели посрами́л еси́.

Злы́х отчужде́нию, / до́брых присвое́нию / поучи́вся свы́ше, / де́лом бы́л еси́, / и́мже пронаре́клся еси́ пе́рвее, / Ака́кие прему́дре, / а́ще и па́че про́зван / е́же бе́ по́слежде: / про́мысл бо вели́ких веще́й вину́ / неизрече́нно и неви́димо предлага́ет издале́ча.

Ве́лий во граде́х и все́м ца́рствующий / честны́й тво́й хра́м, / я́ко вене́ц ца́рский и́мать / и столпа́ предлага́ет стяжа́вшим тя́, / му́дра граждани́на, / и храни́теля прия́тна, / и до́бля ору́жника, / внеза́пная враго́в и супоста́тов / наи́тия отгоня́ща.

Богородичен:

Ублажа́ю Тя́, Пречи́стая, / челове́ки похи́тившую / из глубины́ зо́л и неча́яния: / песносло́влю Тя́, Богоневе́сто, / Присноблаже́нную, / и сла́влю Твое́, Чи́стая, недоуме́нное рождество́, / я́ко родила́ еси́ Спа́са ми́ра / и кля́твы свободи́ла еси́, Де́во, / пра́дедния челове́чество.

Молитва

О святы́й уго́дниче Бо́жий, му́чениче Ака́кие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.