19 мая.

Канон преподобному Михею Радонежскому, ученику преподобного Сергия.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Иго Госпо́дне на ра́мо взе́м, / после́довал еси́ Христо́ви со учи́телем свои́м преподо́бным Се́ргием, / с ни́мже и сподо́бился еси́ ви́дети Пресвяту́ю Богоро́дицу. / И слы́шал еси́ пресла́дкий гла́с Ея́, / я́ко обеща́ся неотсту́пна бы́ти ме́ста сего́, / но, о преподо́бне Михе́е, / моли́ся о чту́щих святу́ю па́мять твою́.

Кано́н. Гла́с 2:

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподо́бне о́тче Михе́е, моли́ Бо́га о нас.

Похва́льное тебе́ привнести́ пе́ние, богоно́се Михе́е, тща́щуся, пода́ждь ми́ благода́ть моли́твами твои́ми, я́ко да по́двиги твоя́ честны́я пропове́м.

Припев: Преподо́бне о́тче Михе́е, моли́ Бо́га о нас.

Ра́достно яре́м Госпо́день от ю́ности, богому́дре, восприи́м, вда́лся еси́ учи́телю твоему́, преподо́бному Се́ргию, и сему́ неотлу́чно сожи́тельствовал еси́, сла́вя Бо́га.

Сла́ва Отцу́ и Сы́ну и Свято́му Ду́ху:

Еже па́че всего́ бы́ти в послуша́нии позна́л еси́, о́тче, мно́жайшими по́ты восприи́м вы́шнее Ца́рство, Ангельски на земли́ пожи́в, и ны́не предстоя́ Святе́й Тро́ице, на́с помина́й.

И ны́не и при́сно и во ве́ки веко́в. Ами́нь.

Богородичен: Прииди́те, лю́дие, ублажи́м Ма́терь Бо́жию, посети́вшую ме́сто свято́е сие́ и обеща́вшуюся неотсту́пна бы́ти, Ея́же словеса́ и Михе́й слы́шати сподо́бися.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподо́бне о́тче Михе́е, моли́ Бо́га о нас.

О, твоего́ му́жества! О, ду́шевныя до́блести, сла́вне! Ты́ бо, неви́димыя враги́ сокруши́ти жела́я, своея́ во́ли отре́клся еси́, де́лом на вся́кое повеле́ние отвещава́я.

Припев: Преподо́бне о́тче Михе́е, моли́ Бо́га о нас.

Досто́йно по́двиги твоя́ похвали́ти кто́ возмо́жет? Ты́ бо в пусты́ни, на Ма́ковице жи́тельствуя, гла́д и жа́жду со учи́телем твои́м претерпева́л еси́.

Сла́ва Отцу́ и Сы́ну и Свято́му Ду́ху:

Огню́ я́вльшуся во святи́лищи, и окружа́ющу преподо́бнаго Се́ргия, и неопаля́ющу, я́коже дре́вле купина́, ю́же Моисе́й ви́дев та́инственно, слы́шав ты́ о чудеси́ се́м, ве́рою утверди́лся еси́.

И ны́не и при́сно и во ве́ки веко́в. Ами́нь.

Богородичен: Богоро́дице, все́х Цари́це, умоли́ над все́ми ца́рствующаго Сы́на Твоего́ Христа́ Бо́га на́шего, да изба́вит оби́тель сию́ от бе́д и напа́стей, я́коже предрекла́ еси́.

Седа́лен, гла́с 4:

Блаже́н ты́, о́тче Михе́е, / вои́стину и треблаже́н бы́л еси́, / прилепля́яся бо к смиренному́дру ста́рцу, / смире́нием ду́шу твою́ напои́л еси́, / послуша́ния же до́блесть усво́ив та́ко, / я́ко и по сме́рти де́лом сие́ явля́еши, / ше́ствие творя́ ско́ро к Москве́ на ко́нех, / я́коже ви́ден бы́л еси́ / со ине́ми двема́, Варфоломе́ем и Нау́мом, / призыва́я ра́тныя лю́ди на по́мощь осажде́нным, / те́мже, ублажа́юще, мо́лим тя́: / прииди́ и ны́не к на́м на по́мощь, / осажде́нным грехи́ мно́гими, / кре́пкою твое́ю моли́твою / низложи́ враги́, борю́щия ны́.

Сла́ва, и ны́не, Богородичен:

Стена́ непобеди́мая на́м, христиа́ном, еси́, Богоро́дице Де́во: / к Тебе́ бо прибега́юще, невреди́ми пребыва́ем. / И па́ки согреша́юще, и́мамы Тя́ моли́твенницу. / Те́м, благодаря́ще, вопие́м Ти́: / ра́дуйся, Благода́тная, Госпо́дь с Тобо́ю.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподо́бне о́тче Михе́е, моли́ Бо́га о нас.

Ни лю́тость враго́в духо́вных, ни ску́дость пусты́ни разсла́биша терпе́ния твоего́, преподо́бне, но я́ко адама́нт тве́рд, пребы́л еси́, ре́вностию Боже́ственною распаля́емь.

Припев: Преподо́бне о́тче Михе́е, моли́ Бо́га о нас.

Осо́бь бесе́дуя Бо́гу и Сему́ приближа́яся душе́ю, Михе́е, о́тче на́ш, никогда́же победи́лся еси́ ле́ностию, но бо́др при́сно пребыва́я, на вся́кое де́ло угото́ван.

Сла́ва Отцу́ и Сы́ну и Свято́му Ду́ху:

Миро благово́нное — Христа́ прии́м в се́рдцы твое́м, подо́бяся Ему́, е́же послушли́ву бы́ти до сме́рти, те́мже к черто́гу небе́сному ра́достно поте́кл еси́ по стопа́м Влады́ки.

И ны́не и при́сно и во ве́ки веко́в. Ами́нь.

Богородичен: Удивля́ется вся́к язы́к и страна́, зря́ще, Влады́чице, сбытие́ слове́с Твои́х, и́бо да́же и до дне́сь неоску́дно пребыва́ет вели́кая Ла́вра, оби́тель Се́ргиева.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Припев: Преподо́бне о́тче Михе́е, моли́ Бо́га о нас.

Му́дрость су́щую, Христа́ Бо́га, обита́ющую в души́ твое́й, стяжа́в изоби́льно, богому́дре Михе́е, вся́кия се́ти зло́бы а́дскаго хитреца́ растерза́л еси́, самаго́ себе́ вда́в в послуша́ние.

Припев: Преподо́бне о́тче Михе́е, моли́ Бо́га о нас.

Истинно росо́ю по́двиг твои́х, о́тче преблаже́нне, погаси́в вся́ стра́сти, возже́гл еси́ о́гнь любве́ и ве́ры к твоему́ учи́телю, воздержа́ние во все́м име́я, свети́льник безстра́стия.

Сла́ва Отцу́ и Сы́ну и Свято́му Ду́ху:

Хотя́ Тро́ице жили́ще ду́шу твою́ сотвори́ти, потща́лся еси́ те́сным и приско́рбным путе́м, подража́я ста́рцу, ше́ствовати, при хра́ме Святы́я Тро́ицы живя́ и непреста́нно моля́ся.

И ны́не и при́сно и во ве́ки веко́в. Ами́нь.

Богородичен: Еже от усе́рдия, приими́, Влады́чице, приноси́мое Тебе́ благодаре́ние и хвалу́ и просвети́ ду́ши на́ша, вси́ бо челове́цы есмы́, лише́ны сла́вы Бо́жией.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподо́бне о́тче Михе́е, моли́ Бо́га о нас.

Юже прия́л еси́ благода́ть твори́ти плоды́ ду́ха: любы́, ра́дость, ми́р, долготерпе́ние, бла́гость, милосе́рдие, ве́ру, кро́тость, воздержа́ние, пода́ждь и на́м моли́твами твои́ми.

Припев: Преподо́бне о́тче Михе́е, моли́ Бо́га о нас.

По́стническими по́двиги у́глие страсте́й угаси́в вои́стину и огне́м любве́ к Бо́гу попали́л еси́ неве́рие, и хулу́, и вся́кое возноше́ние, взима́ющееся на ра́зум Бо́жий, преподо́бне.

Сла́ва Отцу́ и Сы́ну и Свято́му Ду́ху:

Оте́чество и ро́д ты́, о́тче, оста́вив, в пусты́ню прише́л еси́ к вели́кому Се́ргию, с ни́мже подвиза́яся при хра́ме Живонача́льныя Тро́ицы, до́м Ду́ху Свято́му себе́ сотвори́л еси́.

И ны́не и при́сно и во ве́ки веко́в. Ами́нь.

Богородичен: Юноши, и ста́рцы, и вся́к во́зраст, прииди́те, ны́не восхва́лим Преблагослове́нную в жена́х Ма́терь Де́ву Отрокови́цу, я́вльшуюся со апо́столы преподо́бным отце́м Се́ргию и Михе́ю.

Конда́к, гла́с 8:

Прииди́те, мона́шествующих собо́ри и по́стников ли́цы, / соше́дшеся, похва́лим блаже́ннаго Михе́я, / спо́стника преподо́бнаго Се́ргия, / с ни́мже предстои́т Святе́й Тро́ице / и мо́лится спасти́ся душа́м на́шим.

Икос:

Ева́нгельский гла́с, о́тче, услы́шав: а́ще не бу́дете, я́ко де́ти, не вни́дите в Ца́рствие небе́сное, и: а́ще кто́ хо́щет по Мне́ ити́, да отве́ржется себе́, — вся́ у́бо оста́вил еси́ мирска́я пристра́стия, бога́тство и сла́ву, я́ко пра́х, вмени́в, де́тски вда́лся еси́ преподо́бному Се́ргию, повину́яся во все́м. Мы́ же, па́мять твою́ соверша́юще, вопие́м ти́ си́це: ра́дуйся, о́тче, за́поведей Госпо́дних исполни́телю; ра́дуйся, послуша́ния и смире́ния до́брый рачи́телю; ра́дуйся, храни́телю ста́рческих повеле́ний; ра́дуйся, соприча́стниче та́йных открове́ний; ра́дуйся, сподви́жниче живу́щим во и́мя Святы́я Тро́ицы; ра́дуйся, досто́йный зри́телю явле́ния Пресвяты́я Богоро́дицы. Ра́дуйся, Михе́е, де́лателю смиренному́дрый.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподо́бне о́тче Михе́е, моли́ Бо́га о нас.

Христу́ себе́ сочета́в, кро́тостию, терпе́нием и повинове́нием у́м прего́рдый боже́ственным смире́нием смири́л еси́, поя́ при́сно: благослове́н Бо́г оте́ц на́ших.

Припев: Преподо́бне о́тче Михе́е, моли́ Бо́га о нас.

В пусты́ни тружда́яся, я́ко кри́н, прозя́бл еси́, доброде́тельми укра́шен, красне́йшее прозябе́ние, о́тче Михе́е, поя́ Бо́гу в души́ твое́й: благослове́н еси́, Го́споди, во ве́ки.

Сла́ва Отцу́ и Сы́ну и Свято́му Ду́ху:

Ангелом земны́м в дому́ Живонача́льныя Тро́ицы подража́я, жи́тельствовав, небе́сный челове́к сотвори́лся еси́, и ны́не на небесе́х лику́еши со Ангелы во ве́ки.

И ны́не и при́сно и во ве́ки веко́в. Ами́нь.

Богородичен: Лю́бящая ме́сто сие́, Ма́ти Бо́жия, Препросла́вленная, угаси́ пе́щь страсте́й на́ших милосе́рдием Твои́м, да воспева́ем Тя́ во ве́ки со избра́нники Твои́ми.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Преподо́бне о́тче Михе́е, моли́ Бо́га о нас.

Уклони́лся еси́, о́тче досточу́дне, от зле́ веду́щих к поги́бели, к стезя́м же Боже́ственным прилепи́лся еси́ и ду́шу твою́ Христу́ пре́дал еси́, да ца́рствуеши с Ни́м во ве́ки.

Припев: Преподо́бне о́тче Михе́е, моли́ Бо́га о нас.

От земли́ на не́бо ду́хом пресели́лся еси́, о́тче, те́ло же твое́ рука́ми учи́теля в земли́ погребе́ся. Ныне́ же со святы́ми лику́ет ду́х тво́й, взыва́я: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Святу́ю Тро́ицу чествова́ти научи́лся еси́ от учи́теля твоего́ Се́ргия преподо́бнаго, те́мже и Бо́г ва́с превознесе́ и дарова́ че́сть, е́же со Ангелы и все́ми святы́ми сла́вити Его́ во ве́ки.

И ны́не и при́сно и во ве́ки веко́в. Ами́нь.

Богородичен: Есть вои́стину се́й святы́й де́нь, в о́ньже собра́ на́с Ма́терь Бо́жия просла́вити по́двиги преподо́бных оте́ц, зде́ просия́вших, и́хже па́мять пребыва́ет во ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу велича́ем.

Припев: Преподо́бне о́тче Михе́е, моли́ Бо́га о нас.

Рече́ Госпо́дь: прославля́ющаго Мя́ просла́влю. Вои́стинну сбы́шася словеса́ сия́, та́ко бо просла́ви Госпо́дь преподо́бнаго Се́ргия и учени́к его́ мно́жество в земли́ Росси́йстей, я́ко и до дне́сь сла́ва и́х зри́тся.

Припев: Преподо́бне о́тче Михе́е, моли́ Бо́га о нас.

До́бр учи́тель, и добри́ су́ть ученицы́ его́: приснопа́мятный Ни́кон, прия́вший бре́мя оте́ческое, и Михе́й смире́нный, Иа́ков Яку́та и Васи́лий, пре́жде все́х прише́дый, Они́сим диа́кон и Елисе́й, до́бре подвиза́вшияся.

Сла́ва Отцу́ и Сы́ну и Свято́му Ду́ху:

Ца́рствовати и́мут с ни́ми и Митрофа́н игу́мен, Си́мон же архимандри́т и други́й Си́мон, Исаа́кий и Мака́рий, зри́тели Ангела, Илия́, Игна́тий и Иоанни́кий пресла́внии, Алекса́ндр и Андре́й во́ини и Епифа́ний прему́дрый.

И ны́не и при́сно и во ве́ки веко́в. Ами́нь.

Богородичен: Ангелов Цари́цу и мона́шескаго чи́на Ангельскаго Влады́чицу, прииди́те вси́, восхва́лим и поклони́мся Ей, Та́ бо нело́жно обеща́ся бы́ти неотсту́пна ме́ста сего́ до сконча́ния ве́ка.

Свети́лен:

Све́т Христо́в всели́ся в тя́, Михе́е преподо́бне, да, предугото́вав чистото́ю жи́зни ду́шу твою́, у́зриши све́т небе́сный в посеще́нии Богома́тери и не у́мреши.

Сла́ва, и ны́не, Богородичен:

Сла́дость Ангелов, преподо́бных ра́дование, христиа́н все́х предста́тельнице, Де́во Ма́ти Госпо́дня, заступи́ на́с и изба́ви ве́чных му́к.

Моли́тва преподо́бному отцу́ на́шему Михе́ю, Ра́донежскому чудотво́рцу.

О, преблаже́нне и богому́дре о́тче Михе́е! Ты́ и́стиннаго Па́стыря Христа́ за́поведи исполня́я, вся́ко весе́лие, е́же в ми́ре, возненави́дел еси́ и житие́ твое́ в слеза́х препровожда́л еси́, теле́сныя стра́сти до конца́ умерщвля́я и во все́м после́дуя житию́ учи́теля твоего́ преподо́бнаго Се́ргия, с ни́мже и сподо́бился еси́ ви́дети Небе́сную Цари́цу, Пресвяту́ю Богоро́дицу, посеща́ющую ва́с и благода́тне обещава́ющую, я́ко неотсту́пна бу́дет от ме́ста сего́. О такове́й, да́нней тебе́ благода́ти, ве́дуще мы́, я́ко и ны́не ку́пно с богоно́сным а́ввою твои́м во оби́телях све́та обита́еши и Го́споду предстои́ши, смире́нно мо́лим тя́, к честне́й ра́це твое́й припа́дающе: не преста́ни вку́пе с ни́м моля́ся о на́с ко Го́споду на́шему Иису́су Христу́ и Пречи́стей Его́ Ма́тери, о е́же сохрани́ти держа́ву Его́ в ми́ре и благопребыва́нии, христолюби́вому Его́ во́инству побе́ду на враги́ дарова́ти, все́м же на́м во благоче́стии и чистоте́ и взаи́мной любви́ ти́хое и безмо́лвное житие́ устро́ити, от гла́да, губи́тельства, огня́, меча́, междоусо́бныя бра́ни и от вся́кия беды́ и ну́жды на́с изба́вити, да, спасе́ни душе́ю же и те́лом, единоду́шно сла́вим в Тро́ице сла́вимаго Бо́га, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.